Zefete dɩ Efrayim tiinə bam taanɩ
12
Efrayim dwi tiinə bam dɛɛn ma kɩ ba tɩtɩ daanɩ jara-kǝm ŋwaanɩ. Ba ma bɛ Zʋrdɛn bugə kam ba vu Zafon. Ba ma yi Zefete te, yɩ ba ta ba wɩ: «Nmʋ na ve sɩ n kɩ najara dɩdaanɩ Amɔn tiinə bam tɩn, bɛɛ mʋ yɩ n wʋ bəŋi dɩbam sɩ dɩ́ tɔgɩ dɩ́ kɩ najara yam? Dɩ́ lagɩ dɩ́ zwɛ n sɔŋɔ kʋm dɩ n tɩtɩ maama mʋ.»2 Zefete ma lǝri-ba o wɩ: «Amʋ dɩ a digə kam ya mʋ jɩgɩ ta-kamunu dɩdaanɩ Amɔn tiinə bam. Amʋ ma tʋŋɩ a ta abam, yɩ á wʋ sɛ sɩ á ba á joŋi-nɩ á yagɩ ba jɩŋa nɩ. 3 A na maanɩ nɩ abam wʋ ti á yigə sɩ á wǝli-nɩ tɩn, mʋ a dʋlɩ a ŋwɩa a yagɩ yɩ a lɛɛnɩ sisəm dɩm a vu a jeeri Amɔn tiinə bam. Baŋa-Wɛ ma pa a di-ba. Cwǝŋǝ kɔɔ mʋ abam zɩm jɩga sɩ á ba á jeeri amʋ dɩ najara?»
4 Zefete dɛɛn ma ja Galadɩ jar-kərə bam maama o kɩ daanɩ sɩ ba kwaarɩ Efrayim tiinə bam dɩ najara. Efrayim tiinə bam ma ta Galadɩ tiinə bam taanɩ ba wɩ: «Abam Galadɩ tiinə bam yɩ nɔn-yɔɔrʋ mʋ yɩ á nuŋi Efrayim dɩdaanɩ Manasɩ dwiə yam wʋnɩ á ba yo seeni.» Kʋntʋ ŋwaanɩ, Galadɩ tiinə bam ma kwaanɩ ba di Efrayim tiinə bam.
5 Galadɩ tiinə bam ma vu ba cəŋi je sɩlʋ Efrayim tiinə bam na yǝni ba tɔgɩ da ba bɛ Zʋrdɛn bugə kam tɩn. Efrayim tu laan na bʋŋɩ sɩ o bɛ bugə kam o joori sɔŋɔ, yɩ o na loori cwǝŋǝ ba tee nɩ sɩ o kɛ, Galadɩ tiinə bam wʋ́ bwe‑o mʋ wɩ: «Nmʋ yɩ Efrayim tu mʋ na?» O na wɩ: ‹Awo!›, 6 baá bwe kʋ tu mʋ wɩ: ‹Ta wɩ: Cibolɛtɩ!› Kʋ tu ma yǝni o wɩ: ‹Sibolɛtɩ›, bɛŋwaanɩ o warɩ yɩrɩ dɩm kʋntʋ o bəŋi lanyɩranɩ. Galadɩ tiinə bam ma yǝni ba ja-o ba gʋ Zʋrdɛn bubɛ dɩm kʋntʋ nɩ. Da yam kʋntʋ nɩ, Efrayim tiinə bam mʋrrʋ fiinna-tɩle (42,000) mʋ tɩga.
7 Galadɩ tu Zefete dɛɛn nii Yisɩrayɛlɩ tiinə bam baŋa nɩ bɩna yardʋ mʋ yɩ o laan tɩ. Ba ma ja‑o ba kɩ o tɩtɩ tɩʋ Galadɩ wʋnɩ.
Yibazan dɩ Elɔnɩ dɩ Abedon taanɩ
8 Zefete na tɩgɩ tɩn, Betelɩhɛm tu dɩdʋa o yɩrɩ na yɩ Yibazan tɩn, mʋ nii Yisɩrayɛlɩ tiinə bam baŋa nɩ. 9 O maa jɩgɩ bəkəri fiintɔ dɩ bukwa fiintɔ. O dɛɛn kwe o bukwa fiintɔ bam o pa baara balʋ na daɩ o tɩtɩ sɔ-yuu kʋm nɔɔna tɩn mʋ. O daa ta ma joŋi bukwa fiintɔ sɔ-yuni tɩdonnǝ tee nɩ o pa o bu-baara bam sɩ ba ma ba kɩ kaana. Wʋntʋ nii Yisɩrayɛlɩ tiinə bam baŋa nɩ bɩna yarpɛ mʋ, 10 yɩ o laan tɩ. Ba ma kwe‑o ba kɩ Betelɩhɛm nɩ.
11 Yibazan dɩ tʋʋnɩ kwaga nɩ, Elɔnɩ na yɩ Zabulɔn tu tɩn mʋ nii Yisɩrayɛlɩ tiinə bam baŋa nɩ bɩna fugə, 12 yɩ o laan tɩ. Ba ma kwe‑o ba kɩ Zabulɔn tiinə tɩʋ Ayalɔn nɩ.
13 Elɔnɩ tʋʋnɩ kwaga nɩ, Hileli bu Abedon dɩ daa mʋ nii Yisɩrayɛlɩ tiinə bam baŋa nɩ. Hileli nuŋi Piratɔnɩ tɩʋ mʋ. 14 Abedon biə maa yɩ fiinna, yɩ o naarʋ yɩ fiintɔ. Ba dɛɛn jɩgɩ bɩnɛ fusɩrpɛ mʋ ba diinə. Hileli bu Abedon dɛɛn nii Yisɩrayɛlɩ tiinə bam baŋa nɩ bɩna nana mʋ, 15 yɩ o laan tɩ. Ba ma kwe‑o ba kɩ Piratɔnɩ nɩ. Jǝgǝ kam kʋntʋ wʋ Efrayim laŋa kam nɩ, Amalɛkɩ tiinə bam na zʋʋrɩ pweeru tɩm nɩ mɛ tɩn mʋ.