11
Galadɩ tu Zefete dɛɛn yɩ babɩa mʋ jara-kǝm laŋa nɩ. O nu maa yɩ ka-tʋla yɩ o ko yɩrɩ yɩ Galadɩ. 2 Galadɩ kaanɩ wʋm dɩ dɛɛn lʋgɩ biə dɩd-o. Biə bam maa na kɩ nɔɔna tɩn, mʋ ba zəli Zefete ba yagɩ gaa nɩ yɩ ba ta ba wɩ: «Dɩ́ ko jɩjɩgɩrʋ tɩm daɩ sɩ nmʋ tɔgɩ n joŋi tɩ wʋnɩ, nmʋ na yɩ ka-gaa bu tɩn ŋwaanɩ.» 3 Zefete ma duri o yagɩ o cʋrrʋ tɩm, yɩ o vu o zʋʋrɩ Tɔbɩ tɩʋ nɩ. Nɔn-wo-kʋrrʋ ma vu da ba salɩ o yɩra nɩ, pa ba kaagɩ je sɩm maama ba vrɩ nɔɔna.4 Kʋ na kɩ fɩɩn tɩn, Amɔn tiinə bam ma zaŋɩ najara dɩdaanɩ Yisɩrayɛlɩ tiinə bam. 5 Najara yam na zaŋɩ kʋntʋ tɩn, mʋ Galadɩ nakwa bam ve Tɔbɩ sɩ ba ja Zefete ba joori. 6 Ba ma ta ba wɩ: «Ba n tʋ dɩ́ yigə nɩ, sɩ dɩ́ vu dɩ́ kɩ najara dɩdaanɩ Amɔn tiinə bam.»
7 Zefete ma ta dɩ ba o wɩ: «Abam dɛɛn culi-nɩ mʋ, yɩ á fɩn-nɩ á zəli sɩ a nuŋi a daarɩ a ko sɔŋɔ kʋm. Bɛŋwaanɩ mʋ á cam maŋa nɩ á daa beeri amʋ je?»
8 Galadɩ nakwa bam ma lǝr-o ba wɩ: «Dɩ kʋntʋ maama dɩ, dɩ́ pipiri dɩ́ bɩɩnɩ nmʋ te mʋ, sɩ n tɔgɩ dɩ́ yigə sɩ dɩ́ kɩ najara dɩdaanɩ Amɔn tiinə bam. Kʋntʋ kwaga nɩ, nmʋ laan wʋ́ ta n yɩ Galadɩ tiinə bam maama yuutu mʋ.»
9 Zefete ta ma bwe-ba o wɩ: «Cɩga tɩn, abam na jaanɩ-nɩ á joori sɩ dɩ́ kɩ najara dɩdaanɩ Amɔn tiinə bam, yɩ Baŋa-Wɛ na kwe-ba DƖ kɩ dɩ́ jɩŋa nɩ pa dɩ́ di-ba, á wʋ́ sɛ sɩ a taa yɩ á yuutu na?»
10 Galadɩ nakwa bam ma lǝr-o ba wɩ: «Baŋa-Wɛ yɩ maana tu dɩ́ tɩtarɩ nɩ sɩ: dɩbam sɛ sɩ dɩ́ kɩ nmʋ na tagɩ te tɩn.» 11 Zefete ma tɔgɩ-ba o joori o vu Mitspa. Nakwa bam ma sɛ sɩ o taa te-ba, yɩ o daarɩ o yɩ ba najara yigə tu. Zefete na wʋ Mitspa nɩ tɩn, o ma joori o ta o taanɩ dɩm maama Baŋa-Wɛ yigə nɩ.
12 Zefete dɛɛn ma tʋŋɩ kwǝrǝ Amɔn tiinə Pɛ wʋm tee nɩ o bwe o wɩ: «Bɛɛ mʋ tigi dɩbam laŋa nɩ pa n ba sɩ n kɩ najara dɩdaanɩ dɩbam?»
13 Amɔn tiinə Pɛ wʋm ma ləri Zefete nɔɔna bam o wɩ: «Maŋa kalʋ Yisɩrayɛlɩ tiinə bam dɛɛn na zɩgɩ Ezipi nɩ ba bɩɩnɩ tɩn, ba vrɩ a tɩga kalʋ na zɩgɩ Aranon bugə kam nɩ ka tʋlɩ Yabɔkɩ bugə kam, sɩ kʋ taa ve Zʋrdɛn bugə kam maama tɩn mʋ. Abam nan maŋɩ sɩ á joori á pa-nɩ a tɩga mʋ dɩ bɩcar-zuru.»
14 Zefete daa ma tʋŋɩ nɔɔna Amɔn tiinə Pɛ wʋm tee nɩ dɩdaanɩ kwǝrǝ kantʋ:
15 «Zefete wɩ: kʋ daɩ nɩ Yisɩrayɛlɩ tiinə bam dɛɛn joŋi Moabɩ tiinə dɩdaanɩ Amɔn tiinə tɩga mʋ. 16 Kʋlʋ na wʋra tɩn mʋ yɩ nɩ: Yisɩrayɛlɩ tiinə bam na nuŋi Ezipi nɩ tɩn, ba kwe kagʋa cwǝŋǝ kam mʋ ba vu ba yi Nanɩ-sʋŋʋ kʋm, ba zɩgɩ daanɩ ba vu ba yi Kadɛsɩ. 17 Ba ma tʋŋɩ nɔɔna Edɔm Pɛ tee nɩ wɩ: ‹Pa dɩbam pwələ sɩ dɩ́ tɔgɩ n tɩga kam baŋa nɩ dɩ́ kɛ.› Edɔm Pɛ ma vɩn.a Ba ta ma loori cwǝŋǝ Moabɩ tiinə Pɛ tee nɩ, yɩ o dɩ wʋ sɛ sɩ ba kɛ. Kʋntʋ ma pa Yisɩrayɛlɩ tiinə bam maŋɩ Kadɛsɩ nɩ.
18 Ba dɛɛn ma kaagɩ kagʋa kam nɩ ba veǝ, yɩ ba bɩbarɩ Edɔm tɩga kam dɩdaanɩ Moabɩ tɩga kam. Ba ve kʋntʋ mʋ taa ba tɔgɩ Moabɩ tɩga kam wa-puli seeni. Ba ma vu ba cwi ba vwə Aranon bugə kam bubɛ dɩdoŋ dɩm nɩ. Ba wʋ zʋ Moabɩ laŋa kam, bɛŋwaanɩ Aranon bugə kam mʋ yɩ Moabɩ laŋa kam sisəm.
19 Yisɩrayɛlɩ tiinə bam dɛɛn ma tʋŋɩ kwǝrǝ Amɔɔrɩ tiinə Pɛ Sɩhɔn tee nɩ. Wʋntʋ ya jɩgɩ o paarɩ o di Hesebon nɩ mʋ. Ba maa wɩ: ‹Pa dɩbam cwǝŋǝ sɩ dɩ́ tɔgɩ n tɩga kam baŋa dɩ́ vu dɩ́ tɩʋ.›b 20 Sɩhɔn maa wʋ pɛ Yisɩrayɛlɩ tiinə bam cɩga sɩ ba tɔgɩ o tɩga kam baŋa nɩ ba kɛ. O ma kɩ o jar-kərə bam o kɩ daanɩ pa ba jeeri Yahaza nɩ, yɩ ba laan kɩ najara dɩdaanɩ Yisɩrayɛlɩ tiinə bam.
21 Yisɩrayɛlɩ tiinə Baŋa-Wɛ dɩm ma pa Sɩhɔn dɩdaanɩ o nɔɔna bam maama zʋ Yisɩrayɛlɩ jɩŋa pa ba di-ba. Kʋ laan ma pa Yisɩrayɛlɩ dwi tiinə joŋi Amɔɔrɩ tiinə na zʋʋrɩ tɩga kam kʋntʋ nɩ tɩn ba te. 22 Ba ma joŋi Amɔɔrɩ tiinə tɩga kam maama, kʋ na zɩgɩ Aranon bugə kam nɩ sɩ kʋ tʋlɩ kʋ yi Yabɔkɩ bugə kam tɩn. Kʋ daa ta zɩgɩ kagʋa kam nɩ sɩ kʋ yi Zʋrdɛn bugə kam tɩn.
23 Cɩga ŋwaanɩ tɩn, Yisɩrayɛlɩ tiinə Baŋa-Wɛ dɩm mʋ zəli Amɔɔrɩ tiinə bam yɩ DƖ kwe ba tɩga DƖ pa dɩbam Yisɩrayɛlɩ tiinə bam. Cwǝŋǝ kɔɔ mʋ á jɩga sɩ á ma á joŋi-ka? 24 Abam wɛ dɩm yɩrɩ na yɩ Kemɔsɩ tɩn na pɛ abam kʋlʋ sɩ á taá te tɩn, pa-na sɩ á yi su-kʋ, sɩ dɩbam dɩ wʋ́ taa jɩgɩ kʋlʋ maama dɩbam Tu Baŋa-Wɛ na kwe DƖ pa dɩbam tɩn mʋ. 25 Nmʋ bʋŋɩ nɩ n garɩ Zipʋre bu Balakɩ na yɩ Moabɩ tiinə Pɛ tɩn mʋ na? O wʋ sɛ sɩ o dwǝni dɩdaanɩ Yisɩrayɛlɩ tiinə bam, naa sɩ o jeeri-ba dɩ najara. Kʋ daɩ cɩga na? 26 Yisɩrayɛlɩ tiinə bam na zʋʋrɩ Hesebon dɩ Aroyɛrɩ dɩ dɩ nawuurə yam nɩ, kʋ wǝli dɩ tɩɩnɩ dɩlʋ na wʋ Aranon bugə kam bubɛ nɩ tɩn zɩm jɩgɩ bɩna biə-yatɔ mʋ. Bɛɛ mʋ yɩ abam wʋ kwaanɩ sɩ á joori á joŋi tɩɩnɩ dɩm kʋntʋ? 27 Amʋ wʋ kɩ kʋlʋkʋlʋ a cɔgɩ n yigə. Nmʋ nan na kwaanɩ n beeri najara dɩdaanɩ amʋ tɩn, n wʋ kɩ lanyɩranɩ. Baŋa-Wɛ nan yɩ dɩlʋ na bʋrɩ cɩga bʋra tɩn mʋ.c Dɩntʋ zɩm mʋ wʋ́ di bʋra Yisɩrayɛlɩ tiinə bam dɩdaanɩ Amɔn tiinə bam tɩtarɩ nɩ.»
28 Amɔn tiinə Pɛ wʋm dɛɛn maa wʋ cəgi kwǝrǝ kalʋ Zefete na tʋŋɩ o pa‑o tɩn.
29 Baŋa-Wɛ Joro dɛɛn ma tu Zefete baŋa nɩ dɩ dam. O ma zaŋɩ o tɔgɩ Galadɩ dɩ Manasɩ laŋa kam maama o kɛ o yi Galadɩ tɩʋ Mitspa. O ma zɩgɩ daanɩ o vu Amɔn tiinə bam na gilimi mɛ tɩn. 30 Zefete ma goni ni dɩdaanɩ Baŋa-Wɛ o wɩ: «Nmʋ na kwe Amɔn tiinə bam n kɩ amʋ jɩŋa nɩ pa a di-ba, 31 a na maa joori sɔŋɔ dɩ yazurə yɩ woŋo kʋlʋ maama na wʋ́ da yigə kʋ nuŋi amʋ sɔŋɔ nɩ sɩ kʋ jeeri-nɩ tɩn wʋ́ taa yɩ nmʋ Baŋa-Wɛ nyɩm mʋ sɩ a ma a kɩ zwɛɛm kaanɩm a pa‑m.»
32 Zefete ma bɛ bugə kam o vu sɩ o jeeri Amɔn tiinə bam dɩ najara. Baŋa-Wɛ ma kwe-ba DƖ kɩ Zefete jɩŋa nɩ pa o di-ba. 33 O dɛɛn tiini o wanɩ-ba mʋ sɩ kʋ zɩgɩ Aroyɛrɩ nɩ sɩ kʋ tʋlɩ kʋ yi Miniti laŋa kam maama. Tɩɩnɩ fiinle mʋ o diə o ta vu o yi Abel-Keramim nɩ. Kʋ dɛ cwǝŋǝ kam kʋntʋ mʋ yɩ Yisɩrayɛlɩ tiinə bam di Amɔn tiinə bam.
34 Zefete dɛɛn ma joori Mitspa. Maŋa kalʋ o na yɔɔrɩ o maa yi sɔŋɔ tɩn, mʋ o bukɔ nuŋi sɩ o jeer-o. O jɩgɩ sɩnyɛ mʋ o wɔɛ yɩ o saɩ o jeeri o ko wʋm. Bukɔ wʋm kʋntʋ yɩranɩ mʋ Zefete lʋga, bəkərə naa bɩsankana daa wʋ wǝli da. 35 O maa na nɛ‑o tɩn, mʋ o wʋʋ cɔgɩ zanzan. O ma kaarɩ o gwaarʋ yɩ o kaasɩ o wɩ: «A bukɔ, n gʋ-nɩ! N tiini n ja cam n ba n pa-nɩ! Amʋ wuuri a goni ni dɩdaanɩ Baŋa-Wɛ yɩ a daa bá joori a ni dɩm kwaga nɩ.»
36 Bukɔ wʋm dɩ ma ləri o wɩ: «A ko, nmʋ na goni ni dɩdaanɩ Baŋa-Wɛ te tɩn, nan ma-nɩ n kɩ kʋlʋ n na tagɩ dɩ Wɛ nɩ nń kɩ tɩn. Bɛŋwaanɩ Baŋa-Wɛ pɛ n ŋwɩ jɩnɩ n dʋna Amɔn tiinə bam baŋa nɩ.» 37 O laan ma loori o ko o wɩ: «Amʋ nan loori‑m sɩ n kɩ woŋo dɩdʋa n pa-nɩ. Pa-nɩ pwələ sɩ a kwe canɩ sɩle a vu pweeru tɩm seeni, sɩ a tɔgɩ dɩdaanɩ a yuudonnə a taa beerǝ, sɩ a keeri a na yǝri baarʋ yɩ a lagɩ a tɩ tɩn ŋwaanɩ.»
38 Zefete ma sɛ yɩ o wɩ: «Tɔ. Nan ve!» O ma pa o lagɩ je o vu o kɩ canɩ sɩle, wʋntʋ dɩdaanɩ o yuudonnə maama. Ba ma maŋɩ pweeru tɩm laŋa nɩ ba keeri o na yǝri baarʋ yɩ o lagɩ o tɩ tɩn ŋwaanɩ. 39 Canɩ sɩle sɩm dɛɛn na ti tɩn, o ma joori o ko wʋm te. Zefete ma ja‑o o kɩ o na goni ni dɩdaanɩ Baŋa-Wɛ sɩ o kɩ te tɩn yɩ bukɔ wʋm ta wʋ lwarɩ baarʋ.