Tola yɩra taanɩ
10
Abimelɛkɩ tʋʋnɩ kwaga nɩ mʋ Pua bu Tola dɛɛn tu o joŋi Yisɩrayɛlɩ tiinə bam o yagɩ. O nuŋi Yisakaarɩ dwi dɩm nɩ mʋ, yɩ o ko-nakwɩ yɩrɩ yɩ Dodo. O maa zʋʋrɩ Efrayim pweeru laŋa kam tɩʋ kʋdoŋ nɩ, kʋ yɩrɩ na yɩ Samiri tɩn. 2 O nii Yisɩrayɛlɩ tiinə bam baŋa nɩ bɩna fiinle-yatɔ mʋ, yɩ o laan tɩ. Ba dɛɛn ma kɩ-o Samiri nɩ.Yayiri yɩra taanɩ
3 Wʋntʋ dɩ tʋʋnɩ kwaga nɩ mʋ Yayiri tuǝ o wʋra. O yɩ Galadɩ tu mʋ, yɩ o nii Yisɩrayɛlɩ tiinə bam baŋa nɩ bɩna fiinle-yale. 4 O maa jɩgɩ bu-baara fiintɔ. Bantʋ maa jɩgɩ bɩnɛ fiintɔ ba yǝni ba diinə. Ba daa ta maa jɩgɩ tɩɩnɩ fiintɔ Galadɩ laŋa kam nɩ ba niə. Dɩ zɩm maama, nɔɔna ta bǝi tɩɩnɩ dɩm nɩ Havɔtɩ-Yayiri mʋ. 5 Yayiri ma tɩ, yɩ ba kɩ-o Kamɔnɩ nɩ.
Amɔn tiinə bam na pɛ kʋ zʋ Yisɩrayɛlɩ tiinə bam yɩra te tɩn
6 Yisɩrayɛlɩ tiinə bam dɛɛn daa ma tʋŋɩ lwarɩm ba cɔgɩ Baŋa-Wɛ yigə. Ba dɛɛn zuli Baalɩ dɩ Asetarɩ jwǝnǝ yam mʋ. Ba daa ta maa zuli jwǝnǝ yalʋ na yɩ Siiri tiinə wa, dɩ Sidɔn tiinə wa, dɩ Moabɩ tiinə wa, kʋ kwe Amɔn tiinə wa, dɩdaanɩ Filisi tiinə bam wa mʋ. Ba kikiə yam kʋntʋ ma pa ba yagɩ Baŋa-Wɛ, yɩ ba daa ba zuli‑DƖ. 7 Baŋa-Wɛ banɩ ma tiini dɩ zaŋɩ dɩdaanɩ Yisɩrayɛlɩ tiinə bam, yɩ DƖ pa cwǝŋǝ sɩ Filisi tiinə bam dɩdaanɩ Amɔn tiinə bam di-ba. 8 Bɩnɩ dɩm kʋntʋ wʋnɩ, ba pɛ kʋ zʋ Yisɩrayɛlɩ tiinə bam yɩra mʋ, pa ba təŋə bugi. Ba ma bɛɛsɩ Yisɩrayɛlɩ tiinə balʋ na zʋʋrɩ Galadɩ nɩ tɩn bɩna fugə-nana mʋ. Je sɩm kʋntʋ maa wʋ Zʋrdɛn bugə kam bubɛ dɩlʋ na jeeri wa-puli seeni tɩn. Amɔɔrɩ tiinə bam na zʋʋrɩ mɛ seeni tɩn mʋ kʋntʋ. 9 Amɔn tiinə bam ma bɛ Zʋrdɛn bugə kam, yɩ ba ba ba kɩ najara dɩdaanɩ Zuda tiinə bam, dɩ Bɛnzamɛn tiinə bam, dɩdaanɩ Efrayim tiinə bam maama. Yisɩrayɛlɩ tiinə wʋʋ ma tiini kʋ cɔgɩ. 10 Yisɩrayɛlɩ tiinə bam ma kaasɩ ba loori Baŋa-Wɛ yɩ ba wɩ: «Cɩga ŋwaanɩ tɩn, dɩbam tusi mʋ n yigə nɩ, bɛŋwaanɩ dɩ́ yagɩ nmʋ na yɩ dɩbam Wɛ dɩm tɩn mʋ yɩ dɩ́ laan vu dɩ́ zuli Baalɩ jwǝnǝ yam.»a
11 Baŋa-Wɛ dɛɛn ma lǝri-ba DƖ wɩ: «Amʋ maŋɩ a wʋ joŋi abam mʋ a yagɩ Ezipi tiinə bam dɩ Amɔɔrɩ tiinə bam dɩ Amɔn tiinə bam dɩdaanɩ Filisi tiinə bam jɩŋa nɩ na? 12 Kʋ ta kɩ kʋntʋ mʋ yɩ Sidɔn tiinə bam dɩ Amalɛkɩ tiinə bam dɩ Madɩan tiinə bam yaarɩ abam. Á ma á keeri á loori-nɩ, yɩ a joŋi abam a yagɩ ba maama jɩŋa nɩ. 13 Tɩntʋ maama kɩ mʋ, yɩ á ta vɩn amʋ á daarɩ á jɩgɩ wa yadonnə á zulə. Kʋntʋ tɩn, amʋ daa bá joŋi abam a yagɩ. 14 Ve-na á keeri á loori wa yalʋ á laan na kuri á pa á tɩtɩ tɩn, sɩ ya joŋi abam ya yagɩ á cam dɩm wʋnɩ.»
15 Yisɩrayɛlɩ tiinə bam dɛɛn ma ta Baŋa-Wɛ ba wɩ: «Dɩbam kɩ lwarɩm zanzan. Kɩ n na lagɩ te tɩn dɩbam yɩra nɩ, sɩ n joŋi dɩbam n yagɩ zɩm dɛ dɩntʋ.» 16 Ba laan ma dʋlɩ ba wa-yɔɔrʋ tɩlʋ na wʋ ba tɩtarɩ nɩ tɩn ba yagɩ, yɩ ba daarɩ ba zuli Baŋa-Wɛ. Baŋa-Wɛ daa maa warɩ sɩ DƖ taa cɩm yɩ DƖ nii Yisɩrayɛlɩ tiinə bam dɩ ba cam dɩm.
Zefete yɩra taanɩ
17 Amɔn tiinə bam dɛɛn ma bəŋi daanɩ sɩ ba zaŋɩ najara dɩ Yisɩrayɛlɩ tiinə bam. Ba ma vu ba cwi ba vwə Galadɩ nɩ. Yisɩrayɛlɩ tiinə bam dɩ ma kɩ ba tɩtɩ daanɩ ba jeeri Mitspa nɩ ba cwi ba vwə da. 18 Galadɩ nɔn-yum tɩm ma bwɛ daanɩ wɩ: «Wʋlʋ maama na sɛ sɩ o da yigə o ja najara yam o jeeri Amɔn tiinə bam tɩn mʋ wʋ́ taa yɩ Galadɩ tiinə bam maama yuutu.»