Ba beeri kaana ba pa Bɛnzamɛn tiinə
21
Yisɩrayɛlɩ tiinə bam dɛɛn ya jeeri Mitspa nɩ ba du durə wɩ: «Dɩbam wʋlʋwʋlʋ bá pa Bɛnzamɛn dwi tu di dɩbam bukɔ maŋa dɩ maŋa!»2 Ba najara yam na ti tɩn, Yisɩrayɛlɩ tiinə bam ma la daanɩ ba gilimi Betɛlɩ nɩ. Ba ma tiini ba kaasɩ yɩ ba keerǝ sɩ kʋ taa ve dɩdaan-ni nɩ, ba wʋʋ na cɔgɩ tɩn ŋwaanɩ. 3 Ba ma loori Wɛ ba wɩ: «Dɩbam Tu Yisɩrayɛlɩ tiinə Baŋa-Wɛ dɩm, bɛŋwaanɩ mʋ wǝǝnu tɩntʋ tʋ dɩbam baŋa, pa dwi dɩdʋa lagɩ kʋ je Yisɩrayɛlɩ dwi tiinə bam tɩtarɩ nɩ?»
4 Tɩga na pʋʋrɩ tɩtɩɩtɩ tɩn, nɔɔna bam ma zaŋɩ ba lɔ kaanɩm bimbim yɩ ba kwe zwɛɛm pɛɛra dɩ yazurə pɛɛra ba kaanɩ ba pa Baŋa-Wɛ. 5 Yisɩrayɛlɩ tiinə bam maama ma bwe daanɩ ba wɩ: «Dɩbam na tu dɩ́ jeeri Baŋa-Wɛ yigə nɩ kʋntʋ tɩn, Yisɩrayɛlɩ sɔ-yuu kɔɔ mʋ wʋ dɛ ba jeeri?» Ba bwe kʋntʋ bɛŋwaanɩ ba ya dugi durə mʋ nɩ: wʋlʋ maama na wʋ tɔgɩ o jeeri Mitspa nɩ, sɩ ba gʋ kʋ tu.
6 Yisɩrayɛlɩ tiinə bam maama wʋʋ ma cɔgɩ, ba cʋrrʋ Bɛnzamɛn dwi tiinə bam ŋwaanɩ. Ba ta maa wɩ: «Zɩm dɛ dɩntʋ, Bɛnzamɛn dwi kʋm wʋra kʋ je mʋ Yisɩrayɛlɩ nɩ. 7 Dɩbam nan ya na dɛ yigə dɩ́ du durə nɩ dɩ́ bá pa ba di dɩ́ wʋlʋwʋlʋ bukɔ tɩn, dɩ́ laan wʋ́ na kaana yən mʋ, sɩ dɩ́ pa Bɛnzamɛn tiinə baara balʋ fɩnfɩɩn na daarɩ tɩn?»
8 Ba daa ta ma bwe daanɩ ba wɩ: «Yisɩrayɛlɩ dwi kɔɔ mʋ wʋ dɛ kʋ ba Mitspa sɩ dɩ́ maama jeeri Baŋa-Wɛ yigə nɩ?» Ba ma maanɩ nɩ nɔɔn-nɔɔnʋ wʋ nuŋi Yabɛsɩ Galadɩ nɩ o ba o wǝli ba kɔgɔ kʋm wʋnɩ. 9 Bɛŋwaanɩ, ba ya jeeli nɔɔna bam ni mʋ, yɩ ba wʋ nɛ Yabɛsɩ Galadɩ nɔɔna bam wʋlʋwʋlʋ da.
10 Yisɩrayɛlɩ tiinə kɔgɔ kʋm ma kuri ba jar-kərə mʋrrʋ fugǝ-bale (12,000) balʋ na tiini ba yɩ nɔn-babɛ tɩn sɩ ba vu Yabɛsɩ Galadɩ. Ba ma pa-ba ni dɩntʋ ba wɩ: «Abam na yi da, sɩ á kwe á sʋ-lwaanʋ tɩm á gʋ nɔɔnʋ wʋlʋ maama na wʋ dáanɩ tɩn, kaana yoo, biə yoo, yɩ daarɩ-na nɔɔn-nɔɔnʋ.» 11 Ba ta maa wɩ: «Go-na baarʋ dwi maama dɩ kaanɩ dwi maama sɩ á daarɩ kaana balʋ ta na yǝri baara tɩn yɩranɩ.» 12 Nɔn-babɛ sɩm na yi Yabɛsɩ Galadɩ tɩn, mʋ ba maanɩ nɩ kabwənə biə-yana (400) wʋra ba ya ta na wʋ lwarɩ baara. Ba ma ja-ba ba vu Siloo tɩʋ, mɛ Wɛ kɔgɔ kʋm na jeeri tɩn. Je sɩm kʋntʋ wʋ Kaanan tɩga baŋa nɩ mʋ.
13 Yisɩrayɛlɩ kɔgɔ kʋm maama ma kɩ ni dɩdwɩ yɩ ba tʋŋɩ kwǝrǝ ba pa Bɛnzamɛn tiinə balʋ na səgi Rimɔn piu kʋm nɩ tɩn nɩ najara yam ti, kʋntʋ tɩn pwələ laan wʋra sɩ ba sɛ sɩ ba kɩ daanɩ. 14 Bɛnzamɛn tiinə bam ma jeeri Yisɩrayɛlɩ tiinə bam, yɩ ba dɩ pa-ba kabwənə yalʋ ba na wʋ gʋ yɩ ba ja ba nuŋi Yabɛsɩ Galadɩ nɩ ba ba tɩn. Bukwa bam dɛɛn maa wʋ yi Bɛnzamɛn tiinə baara bam.
15 Yisɩrayɛlɩ tiinə bam wʋʋ ma tiini kʋ cɔgɩ Bɛnzamɛn tiinə bam ŋwaanɩ, bɛŋwaanɩ Baŋa-Wɛ sɛ sɩ goŋo mʋ pəni Yisɩrayɛlɩ dwiə yam tɩtarɩ nɩ. 16 Ba kɔgɔ kʋm nakwa bam ma ta ba wɩ: «Bɛnzamɛn kaana bam maama tɩgɩ ba ti. Dɩ́ laan nan wʋ́ na kaana yən mʋ sɩ dɩ́ pa balʋ na daarɩ Bɛnzamɛn dwi dɩm wʋnɩ tɩn? 17 Bɛnzamɛn dwi tiinə balʋ na daarɩ tɩn maŋɩ sɩ ba puli mʋ. Yisɩrayɛlɩ dwi dɩdʋa tɩtɩ ba maŋɩ sɩ kʋ je. 18 Dɩbam nan dɛ yigə dɩ́ du durə dɩntʋ mʋ wɩ: ‹Kampwəl-balɔrɔ wʋ́ taa wʋ wʋlʋ maama na wʋ́ pa Bɛnzamɛn tiinə bam o bukɔ tɩn yuu nɩ.› Kʋntʋ ŋwaanɩ, dɩ́ bá wanɩ dɩ́ pa-ba dɩ́ bukwa sɩ ba ji ba kaana.»
19 Ba ma bʋŋɩ ba ja nɩ: «Baŋa-Wɛ candiə kam dɩ́ na yǝni dɩ́ di bɩnɩ maama Siloo nɩ tɩn bá daanɩ dɩ yi.» Siloo wʋ Betɛlɩ tɩʋ kʋm jazɩm baŋa seeni mʋ. Kʋ ta maa wʋ cwǝŋǝ kalʋ na nuŋi Betɛlɩ nɩ ka ve Sishɛm tɩn wa-puli seeni. Lebona jagwiə seeni mʋ kʋntʋ.
20 Ba ma pa Bɛnzamɛn tiinə bam ni dɩntʋ ba wɩ: «Ve-na á səgi vinyə tweeru karɩ sɩm wʋnɩ, 21 sɩ á taá yɩra cwǝŋǝ kam. Siloo tiinə bukwa bam na nuŋi tɩʋ kʋm sɩ ba tɔgɩ ba sa kwɛɛra yam, sɩ á zaŋɩ á na səgi mɛ tɩn á nuŋi á yi á ja-ba, baarʋ maama dɩ o kaanɩ, sɩ á ja-ba á vu Bɛnzamɛn laŋa kam á taá jɩga. 22 Bukwa bam kwə naa ba nabwa na wʋ sɛ sɩ á taá di-ba, dɩbam laan wʋ́ loori-ba nɩ: ‹Popo, yagɩ-na cwǝŋǝ sɩ nɔɔna bam taa jɩgɩ á bukwa bam ba di. Bɛŋwaanɩ najara yam na kɩ tɩn, dɩbam wʋ wanɩ dɩ́ lagɩ kaana dɩ́ pa-ba. Abam dɩ nan wʋ yiri á ni dɩm, bɛŋwaanɩ abam tɩtɩ wʋ kwe á bukwa á pa-ba.› »
23 Bɛnzamɛn tiinə bam dɛɛn ma sɩɩnɩ ba kɩ kʋntʋ. Ba ve Siloo seeni mʋ, yɩ ba kuri kabwənə sɩlʋ na saɩ tɩn wʋnɩ ba ja ba viiri, baarʋ maama dɩ o kaanɩ. Ba ma joori ba zʋʋrɩm je. Ba ma lɔ ba tɩɩnɩ dɩm ba zʋʋrɩ dɩ wʋnɩ.
24 Kʋntʋ kwaga nɩ mʋ Yisɩrayɛlɩ tiinə bam maama laan joori ba sam. Dwi maama dɩ digə maama joori ba jǝŋǝ je mʋ.
25 Maŋa kam kʋntʋ, pɛ dɛɛn ta tǝrǝ Yisɩrayɛlɩ nɩ. Nɔɔnʋ maama maa kɩ o wʋbʋŋa na lagɩ te tɩn.