Zidɩɔn di Madɩan tiinə bam o ti
8
Efrayim tiinə bam dɛɛn ma yi Zidɩɔn te yɩ ba ŋɔɔnɩ ba wɩ: «Bɛŋwaanɩ mʋ n ya wʋ bəŋi dɩbam sɩ dɩ́ dɩ nuŋi dɩ́ tɔgɩ dɩ́ kɩ najara dɩ Madɩan tiinə bam? Bɛɛ mʋ dɩ́ kɩ-m yɩ n kɩ dɩbam kʋntʋ?» Ba dɛɛn ma tiini ba bwɛ‑o.2 O ma lǝri-ba o wɩ: «Amʋ na kɩ te tɩn wʋ yi kʋlʋ abam na kɩ tɩn. Abam Efrayim tiinə na tʋŋɩ fɩnfɩɩn kʋlʋ tɩn daga kʋ dwe amʋ digə kam maama na kɩ te tɩn. 3 Bɛŋwaanɩ, Wɛ wǝli abam pa á gʋ Madɩan dɩdɛɛra bale bam, Orɛbɩ dɩdaanɩ Zɛbɩ. Amʋ na kɩ te maama tɩn yi kʋntʋ na?» O taanɩ dɩm kʋntʋ ma pa ba banɩ dɩm zuri.
Zeba dɩdaanɩ Salimuna taanɩ
4 Kʋntʋ maama dɩdaanɩ Zidɩɔn dɩdaanɩ nɔɔna biə-yatɔ bam laan yi Zʋrdɛn bugə kam mʋ yɩ ba bɛ-ka. Ba ma tiini ba bugi yɩ kana dɩ cɛ-ba. 5 O ma ta Sukɔtɩ tiinə bam o wɩ: «A loori abam popo! Pa-na a kwaga tɔgɩna bam dɩpɛ sɩ ba di, bɛŋwaanɩ ba tiini ba bugi mʋ. Dɩ́ wʋra dɩ́ zəli Madɩan pwa Zeba dɩdaanɩ Salimuna mʋ sɩ dɩ́ ja.»
6 Sukɔtɩ tɩʋ nakwa bam ma ləri ba wɩ: «Abam ta wʋ jaanɩ Zeba dɩdaanɩ Salimuna á kɩ á jɩŋa nɩ, yɩ n lagɩ sɩ dɩ́ pa n jar-kərə bam dɩpɛ. Dɩ́ bá sɛ.»
7 Zidɩɔn daa ma ta dɩ ba o wɩ: «Á na tagɩ kʋntʋ doŋ tɩn, Baŋa-Wɛ nan na pɛ dɩ́ ja Zeba dɩdaanɩ Salimuna, amʋ wʋ́ kwe kagʋa yuu sabarɩ mʋ a ma a magɩ abam!»
8 O na zɩgɩ daanɩ tɩn, o ve Peniɛlɩ mʋ. O ta ma loori-ba nɩnɛɛnɩ o ya na kɩ te Sukɔtɩ nɩ tɩn. Peniɛlɩ tiinə bam dɩ dɛɛn ta lǝr-o Sukɔtɩ tiinə bam lərə yam doŋ mʋ. 9 O ma ta ba dɩ o wɩ: «Amʋ na di pwa bam yɩ a joori dɩ yazurə, a lagɩ a vaarɩ á di-dɩdɔrɔ kʋntʋ mʋ a dɩ tɩga nɩ!»
10 Zeba dɩ Salimuna dɩdaanɩ ba jar-kərə bam dɛɛn ma vu ba wʋ Karekorɩ nɩ. Nɔɔna balʋ maama na nuŋi wa-puli je sɩm sɩ ba kɩ najara tɩn laan daarɩ nɔɔna mʋrrʋ fugə-tɩnu (15,000) yɩranɩ mʋ, bɛŋwaanɩ ba nɔɔna mʋrrʋ bi dɩdaanɩ fiinle (120,000) mʋ tɩga najara yam wʋnɩ. 11 Zidɩɔn dɛɛn ma kwe pipiu tiinə cwǝŋǝ kalʋ na tigi Noba dɩdaanɩ Yogebeha wa-puli seeni tɩn, o vu o darɩ o dʋna bam dɩ najara. 12 Madɩan pwa bale bam, Zeba dɩdaanɩ Salimuna ma zaŋɩ ba duri sɩ ba lu. Zidɩɔn dɩ o nɔɔna bam ma zəli-ba ba ja. Kʋntʋ ma pa vuvugə tʋ ba dʋna bam maama tɩtarɩ nɩ.
13 Zidɩɔn ma zɩgɩ najara je sɩm nɩ o maa joori sɔŋɔ. O nan ya tɔgɩ Heresɩ zɔŋɔ kʋm cwǝŋǝ kam mʋ. 14 Ba na maa kɛ tɩn mʋ ba nɛ Sukɔtɩ tiinə nɔn-dʋŋʋ dɩdʋa. Zidɩɔn ma ja-o sɩ o bwe‑o tɩʋ kʋm yigǝ tiinǝ bam bwiə. Nɔn-dʋŋʋ kʋm ma pʋpʋnɩ ba nakwa fusɩrpɛ barpɛ bam yɩra o pa‑o. 15 Zidɩɔn ma vu Sukɔtɩ tiinə bam te o ta dɩ ba o wɩ: «Nan nii-na Zeba dɩ Salimuna mʋ tɩntʋ! Abam ya vɩn sɩ á wǝli-nɩ yɩ á ta wɩ: ‹Nmʋ ta wʋ jaanɩ Zeba dɩ Salimuna, yɩ n lagɩ sɩ dɩ́ wǝli n nɔɔna bam na bugi tɩn dɩ dɩpɛ.› » 16 O ma pa tɩʋ kʋm nakwa bam nuŋi pooni, yɩ o kwe kagʋa yuu sabarɩ o ma magɩ-ba. 17 O ta ma vu o vaarɩ Peniɛlɩ di-dɩdɔrɔ kʋm o dɩ tɩga nɩ, yɩ o daarɩ o gʋ tɩʋ kʋm kʋntʋ nɔɔna bam.
18 Zidɩɔn laan ma bwe Zeba dɩ Salimuna o wɩ: «Nɔɔna bra dwi mʋ abam dɛɛn gʋa Tabɔɔrɩ nɩ?» Ba ma lǝr-o ba wɩ: «Ba yɩ nɩnɛɛnɩ nmʋ na yɩ te tɩn mʋ. Ba maama nyɩ dɩ pabiə mʋ.»
19 O daa ma ta dɩ ba o wɩ: «Nɔɔna balʋ á na gʋ kʋntʋ tɩn yɩ amʋ cʋrrʋ mʋ, amʋ tɩtɩ nu-biə. Ŋwɩa Tu Baŋa-Wɛ wʋ́ zɩgɩ amʋ cɩga kam kwaga nɩ sɩ: abam ya na wʋ gʋ-ba, amʋ dɩ yaá yagɩ abam.» 20 Zidɩɔn ma ta o bu-kwɩan Yetɛrɩ o wɩ: «Ve n gʋ-ba!» Bu wʋm maa wʋ sɛ sɩ o lɩ o sʋ-lɔŋɔ kʋm, o ta na yɩ bu yɩ fʋʋnɩ jɩg-o tɩn ŋwaanɩ.
21 Zeba dɩdaanɩ Salimuna dɛɛn ma ta Zidɩɔn ba wɩ: «Nmʋ tɩtɩ yi n gʋ dɩbam, bɛŋwaanɩ, nabiinu na yɩ te tɩn, o dam dɩ maɩ kʋntʋ mʋ.» Zidɩɔn ma sɩɩnɩ o vu o gʋ-ba. O ma daarɩ o lɩ səbu-poŋo tɩlʋ na wʋ ba yogondə yam ban nɩ tɩn o ja o viiri.
Zidɩɔn na kɩ jwəm dɩlʋ tɩn
22 Kʋ na kɩ fɩɩn tɩn, mʋ Yisɩrayɛlɩ tiinə bam ve ba ta dɩ Zidɩɔn ba wɩ: «Dɩbam lagɩ sɩ nmʋ mʋ di paarɩ dɩ́ baŋa nɩ, sɩ n bu dɩdaanɩ n naa dɩ jwa di paarɩ dɩ́ baŋa nɩ. Bɛŋwaanɩ, nmʋ mʋ joŋi dɩbam n yagɩ Madɩan tiinə bam jɩŋa nɩ.»
23 Zidɩɔn dɛɛn ma lǝri-ba o wɩ: «Amʋ bá sɛ sɩ a di paarɩ á baŋa nɩ. A bu dɩ nan bá di abam paarɩ. Baŋa-Wɛ mʋ wʋ́ taa yɩ abam Pɛ.» 24 O laan ma ta dɩ ba o wɩ: «Woŋo dɩdʋa a na wʋ́ loori abam sɩ á kɩ á pa-nɩ tɩn mʋ tɩntʋ: nɔɔnʋ maama pa-nɩ səbu-sɩŋa zwa-kwanɩ dɩdʋa sɩ kʋ nuŋi wǝǝnu tɩlʋ o na joŋi dɩ́ dʋna bam tee nɩ tɩn wʋnɩ.» Bɛŋwaanɩ, Madɩan tiinə bam dɛɛn yǝni ba lə zwa-kwana mʋ ba zwa nɩ, ba na yɩ Ismayɛlɩ dwi tiinə tɩn ŋwaanɩ.
25 Nɔɔna bam dɛɛn ma ləri ba wɩ: «Dɩ́ sɛ dɩ wʋpolo.» Ba ma lwarɩ gar-jalɩ tɩga nɩ pa nɔɔnʋ maama kwe zwa-kwanɩ dɩdʋa o na joŋi ba dʋna bam jɩŋa nɩ tɩn o dɩ da. 26 Zidɩɔn na tɔgɩ kʋ baŋa nɩ o na səbu-sɩŋa kalʋ tɩn daga zanzan, sɩ kʋ maŋɩ dɩ kilo fiinle tɩn. O ta ma na səbu-poŋo wǝǝnu dɩ zambili-laarʋ, kʋ wǝli dɩdaanɩ nɩnwaŋa gwaarʋ tɩlʋ Madɩan pwa na zʋʋrɩ tɩn, dɩ wo-laarʋ tɩlʋ ba na dɩ ba yogondə yam ban nɩ tɩn. 27 Zidɩɔn ma kwe səbu-sɩŋa kam kʋntʋ o ma o mɔɔnɩ kaanɩm gwar-wʋgʋ nyɩnyʋgʋ o zɩgɩ o tɩtɩ tɩʋ Ofera wʋnɩ. Yisɩrayɛlɩ tiinə maama ma dʋlɩ ba cɩga dɩ Wɛ ba yagɩ, yɩ ba daarɩ ba zuli nyɩnyʋgʋ kʋm. Kʋ ma lɛɛrɩ kʋ ji cɩkʋ kʋlʋ na jaanɩ Zidɩɔn dɩ o sɔŋɔ tiinə tɩn, pa ba da kʋ ŋwaanɩ ba cɔgɩ zanzan.a
Zidɩɔn tʋʋnɩ
28 Yisɩrayɛlɩ tiinə bam dɛɛn yɔɔrɩ ba di Madɩan tiinə bam mʋ lanyɩranɩ, pa Madɩan tiinə bam daa warɩ-ba sɩ ba daanɩ. Zidɩɔn ta na ŋwɩ tɩn, Yisɩrayɛlɩ tiinə bam dɛɛn ma sin dɩ najara sɩ kʋ yi bɩna funɔnɔ.
29 Zoasɩ bu Zidɩɔn ma joori o tɩtɩ sɔŋɔ o zʋʋrɩ da. 30 O bu-baara maa yɩ fusɩrpɛ, bɛŋwaanɩ, o kaana daga zanzan. 31 O ta jɩgɩ ka-biə wʋdoŋ Sishɛm nɩ. Kaanɩ wʋm ma lʋ bəkərə o pa‑o, yɩ o dɩ pa bu wʋm yɩrɩ wɩ Abimelɛkɩ.
32 Zidɩɔn kwɩn lanyɩranɩ mʋ yɩ o laan tɩ. Ba ma kɩ-o o ko Zoasɩ yibeeli dɩm wʋnɩ. Dɩ dɛɛn wʋ Abizeri dwi tiinə tɩʋ Ofera nɩ mʋ.
33 Zidɩɔn na yɔɔrɩ o tɩ tɩn, mʋ Yisɩrayɛlɩ tiinə bam daa dʋlɩ ba cɩga dɩ Wɛ ba yagɩ, yɩ ba joori ba kaanɩ Baalɩ jwǝnǝ yam. Ba ve ba kwe Baal-Beriti mʋ sɩ jwəm dɩm kʋntʋ taa yɩ ba wɛ. 34 Yisɩrayɛlɩ tiinə bam ma yɔɔrɩ ba swe Baŋa-Wɛ swiə. Dɩntʋ nan ya mʋ joŋi-ba o yagɩ ba dʋna balʋ maama na gilimi-ba tɩn jɩŋa nɩ. 35 Ba maa wʋ kɩ lanyɩranɩ dɩ Zidɩɔn sɔŋɔ tiinə bam, dɩ wo-laarʋ tɩlʋ maama o na kɩ o pa-ba tɩn dɩ.