Zidɩɔn zaŋɩ najara dɩ Madɩan tiinə
7
Tɩga na pʋʋrɩ tɩn, Zidɩɔn dɩdaanɩ o jar-kərə bam ma zaŋɩ zɩzɩŋa nɩ ba vu ba cwi ba vwə Harodɩ buli-yi dɩm seeni. Madɩan tiinə bam dɛɛn wʋ jazɩm baŋa seeni mʋ. Ba dɩ ma cwi ba vwə bolo kʋlʋ na wʋ More zoŋo kʋm təŋə nɩ tɩn wʋnɩ. 2 Baŋa-Wɛ dɛɛn ma ta Zidɩɔn DƖ wɩ: «Nɔɔna balʋ na tɔgɩ nmʋ kwaga tɩn tiini ba daga. A na di Madɩan tiinə bam a pa‑m, nɔɔna bam wʋ́ taa jɩgɩ kamunni ba paɩ ba tɩtɩ nɩ bantʋ mʋ di-ba. Ba bá pa a na a zulə. 3 Kʋntʋ tɩn, ta n brɩ nɔɔna bam maama nɩ: wʋlʋ na fʋna, sɩ kʋ tu joori o viiri o daarɩ dɩbam.» Nɔɔna mʋrrʋ fiinle-tɩle (22,000) ma joori sɔŋɔ, yɩ mʋrrʋ fugə (10,000) maŋɩ Zidɩɔn tee nɩ.4 Baŋa-Wɛ ta ma ta Zidɩɔn DƖ wɩ: «N nɔɔna bam ta tiini ba daga zanzan.a Ja-ba n vu bugə kam seeni sɩ a pɔɔrɩ balʋ na wʋ́ tɔgɩ nmʋ tɩn a pa‑m. Amʋ na wʋ́ ta wʋlʋ a wɩ: o da dɩ nmʋ sɩ á vu á zaŋɩ najara yam tɩn mʋ wʋ́ vu, sɩ a na wɩ wʋlʋ bá vu, kʋ tu daɩ sɩ o tɔgɩ.»
5 Zidɩɔn ma ja nɔɔna bam maama o vu bugə kam. Baŋa-Wɛ laan ma ta dɩd-o DƖ wɩ: «Maanɩ balʋ na wʋ́ lagɩsɩ na bam nɩnɛɛnɩ kakurə na kɩ te tɩn, dɩdaanɩ balʋ dɩ na wʋ́ kuni ba nadoonə tɩga nɩ yɩ ba nyɔ na bam tɩn, sɩ n pɔɔrɩ-ba daanɩ.» 6 Kʋntʋ na kɩ tɩn, nɔɔna biə-yatɔ (300) dɛɛn mʋ mɛ ba jɩn ba kasɩ na bam ba nyɔ. Balʋ maama na daarɩ tɩn kuni doonǝ mʋ tɩga nɩ yɩ ba nyɔ na bam.
7 Baŋa-Wɛ laan ma ta Zidɩɔn DƖ wɩ: «Amʋ lagɩ a tɔgɩ nɔɔna biə-yatɔ yantʋ baŋa nɩ mʋ a joŋi n nɔɔna bam maama a yagɩ, sɩ a daarɩ a kwe Madɩan tiinə bam a kɩ n jɩŋa nɩ sɩ n di-ba. Ta balʋ maama na daarɩ tɩn sɩ ba joori sɔŋɔ.» 8 Zidɩɔn dɛɛn ma pɔɔrɩ nɔɔna biə-yatɔ yam sɩ ba taa wʋ o tee nɩ. O ma pa Yisɩrayɛlɩ tiinə balʋ na daarɩ tɩn joori ba viiri. O dɛɛn ma joŋi ba zɩla dɩdaanɩ ba nabwaanʋ tɩm o pa balʋ na daarɩ ba maŋɩ o tee nɩ tɩn. Madɩan tiinə bam nan ya tigi bolo kʋm nɩ yɩ ba wʋ Zidɩɔn dɩ o nɔɔna bam kuri seeni mʋ.
9 Tɩtɩɩ dɩm kʋntʋ nɩ, Baŋa-Wɛ ma ta Zidɩɔn DƖ wɩ: «Zaŋɩ n vu Madɩan tiinə bam na tigi mɛ tɩn n zaŋɩ najara dɩ ba, sɩ a lagɩ a kwe-ba a kɩ n jɩŋa nɩ mʋ. 10 Nmʋ nan na fʋna sɩ n jeeri-ba dɩ najara mʋ, sɩ n zaŋɩ n tɔgɩ dɩdaanɩ n tɩntʋŋnʋ Pura sɩ á vu da á nii. 11 Nmʋ na yi ba te yɩ n ni ba lara yam, nmʋ wʋ́ na baarɩ sɩ n jeeri-ba.» Zidɩɔn dɩdaanɩ o tɩntʋŋnʋ Pura ma da daanɩ ba vu ba dʋna bam vwə yam ni seeni. 12 Madɩan tiinə bam, dɩdaanɩ Amalɛkɩ tiinə bam, dɩ wa-puli seeni nɔɔna bam maama ya jarɩ ba tɩtɩ mʋ bolo kʋm tɩga nɩ, nɩnɛɛnɩ kayɩra na tiini sɩ yʋ te tɩn. Ba yogondə yam kɔgɔ dɩ maa tiini ya gaalɩ nɩnɛɛnɩ nɩnɩʋ ni kasʋlʋ na daga te tɩn.
13 Zidɩɔn dɛɛn yi da o maŋɩ, dɩdaanɩ nɔɔnʋ mʋ wʋra o tɛ o dɩndwɛ o brɩ o doŋ. Kʋ tu maa wɩ: «Amʋ dwɛ nɩ dɩpɛ mʋ bibili kʋ zʋ dɩbam na tigi mɛ tɩntʋ tɩn, yɩ kʋ laan magɩ vwe dɩdaanɩ dam pa dɩ pipiri dɩ pu tɩga nɩ.» 14 O doŋ wʋm ma lǝr-o o wɩ: «Kʋntʋ maama tɛ Zoasɩ bu Zidɩɔn sʋ-lɔŋɔ kʋm taanɩ mʋ. O yɩ Yisɩrayɛlɩ tu mʋ, yɩ Wɛ pa‑o dam sɩ o di Madɩan tiinə dɩdaanɩ dɩbam jar-kərə bam maama!»
15 Zidɩɔn na ni dɩndwɛ dɩm dɩdaanɩ dɩ kuri o ti tɩn, mʋ o kuni nadoonə o zuli Baŋa-Wɛ. O laan ma joori Yisɩrayɛlɩ jar-kərə bam na wʋ mɛ tɩn, yɩ o ta dɩ ba o wɩ: «Zaŋɩ-na wɛɛnɩ, sɩ Baŋa-Wɛ lagɩ DƖ pa á di Madɩan tiinə bam mʋ.» 16 O dɛɛn ma pɔɔrɩ o jar-kərə biə-yatɔ bam kuni bɩtɔ. O ma pa nɔɔnʋ maama nabɔnɔ. O ta ma pa kʋ tu ze mim yɩ kamɔgɔ laan kwǝli-dɩ. 17 O ma pa ba maama ni o wɩ: «Tɔgɩ-na amʋ kwaga sɩ á maanɩ á nii amʋ na wʋ́ kɩ te tɩn. Amʋ na yi dɩ́ dʋna bam tigə je sɩm ni, yɩ a kɩ kʋlʋ maama, sɩ abam dɩ taá nii-nɩ yɩ á daarɩ á dɩ kɩ kʋntʋ. 18 Amʋ dɩdaanɩ balʋ na wʋ a tee nɩ tɩn wʋ́ wu dɩ́ nabwaanʋ tɩm. Abam na nɛ kʋntʋ, sɩ á dɩ wu á nabwaanʋ tɩm á kaagɩ dɩ́ dʋna bam tigə je sɩm maama nɩ. Á laan maa wʋ́ kaasɩ wɛɛnɩ á wɩ: ‹Baŋa-Wɛ ŋwaanɩ, dɩdaanɩ Zidɩɔn ŋwaanɩ!› »
19 Kʋ dɛɛn na yi tɩtɩɩ kʋnkʋrʋ maŋa kalʋ Madɩan tiinə yɩrɩna bam na ləri daanɩ tɩn, mʋ Zidɩɔn dɩdaanɩ nɔɔna bi dɩlʋ na wʋ o tee nɩ tɩn ve ba yi ba dʋna bam vwə yam ni. Ba ma wu ba nabwaanʋ tɩm, yɩ ba daarɩ ba lɔ ba kamwarʋ tɩm ba na ze tɩn. 20 Zidɩɔn nɔɔna bam pʋpwara kuni bɩtɔ kʋm maama dɛɛn mʋ wugi ba nabwaanʋ, yɩ ba daarɩ ba lɔ ba kamwarʋ tɩm. Ba dɛɛn ma ze mim ba jagwiə seeni, yɩ ba nabwaanʋ tɩm wʋ ba jazɩm seeni. Ba laan ma kaasɩ wɛɛnɩ ba wɩ: «Sʋ-lɔŋɔ kʋm yɩ Baŋa-Wɛ ŋwaanɩ dɩdaanɩ Zidɩɔn ŋwaanɩ mʋ!» 21 Nɔɔna bam maama maŋɩ mɛ ba na zɩgɩ kʋntʋ tɩn mʋ ba kaagɩ ba dʋna bam ba kɩ tɩtarɩ nɩ. Ba dʋna bam maa kaagɩ ba coosi yɩ ba duri sɩ ba lu.
22 Maŋa kalʋ Zidɩɔn nɔɔna bam na jɩgɩ ba nabwaanʋ tɩm ba wui kʋntʋ tɩn, dɩdaanɩ Baŋa-Wɛ pɛ ba dʋna bam mʋ kwe ba sʋ-lwaanʋ ba beeri da-je sɩ ba gʋ. Madɩan tiinə jar-kərə bam dɛɛn kwe Zerera cwǝŋǝ kam mʋ ba duri ba vu ba yi Bɛtɩ-Sita. Ba ta ma yi Abɩl-Mehola na bwələ dɩdaanɩ Tabatɩ tɩn. 23 Yisɩrayɛlɩ tiinə balʋ na nuŋi Nɛfitali dwi wʋnɩ, dɩ Asɛɛrɩ dwi wʋnɩ, dɩ Manasɩ dwi dɩm maama wʋnɩ tɩn ma nuŋi ba zəli Madɩan tiinə bam, nɩ ba na joŋi ni sɩ ba kɩ te tɩn. 24 Zidɩɔn dɛɛn ta tʋŋɩ nɔɔna mʋ Efrayim pweeru laŋa kam maama nɩ sɩ ba ta dɩ ba nɩ: «Nuŋi-na á kɩ najara dɩdaanɩ Madɩan tiinə bam. Cɩ-na Zʋrdɛn bugə kam dɩdaanɩ bu-tʋlɩ sɩm sɩ kʋ yi Bɛtɩ-Bara seeni. Yɩ pa-na sɩ Madɩan tiinə bam na pwələ ba bɛ bwi sɩm.»
Efrayim tiinə bam dɛɛn ma sɩɩnɩ ba nuŋi ba cɩ Zʋrdɛn bugə kam dɩ bu-tʋlɩ sɩm niə maama, sɩ kʋ yi Bɛtɩ-Bara. 25 Ba dɛɛn na zəli Madɩan tiinə bam tɩn, mʋ ba jaanɩ ba yigǝ tiinǝ bale. Orɛbɩ dɩdaanɩ Zɛbɩ mʋ kʋntʋ. Orɛbɩ piu kʋm nɩ mʋ ba dɛɛn gʋ Orɛbɩ, yɩ ba daarɩ ba gʋ Zɛbɩ mɛ ba na nɔnɩ vinyə tiu biə tɩn yɩ ba bə-kʋ nɩ ‹Zɛbɩ nɔnɩm jǝgǝ›.
Ba dɛɛn ma goni Orɛbɩ dɩdaanɩ Zɛbɩ yum tɩm ba lɩ yɩ ba ja-tɩ ba vu ba pa Zidɩɔn. Maŋa kam kʋntʋ nɩ, dɩdaanɩ Zidɩɔn zʋʋrɩ Zʋrdɛn bugə kam wa-puli seeni mʋ.