Zidɩɔn yɩra Taanɩ
6
Yisɩrayɛlɩ tiinə bam dɛɛn daa ma tʋŋɩ lwarɩm ba cɔgɩ Baŋa-Wɛ yigə. DƖ ma kwe-ba DƖ kɩ Madɩan tiinə jɩŋa nɩ, yɩ ba pa kʋ zʋ Yisɩrayɛlɩ tiinə bam yɩra bɩna yarpɛ. 2 Madɩan tiinə bam maa dana ba dwe Yisɩrayɛlɩ tiinə bam yɩ ba tiini ba bɛɛsɩ-ba. Kʋntʋ ma pa Yisɩrayɛlɩ tiinə bam yǝni ba beeri je ba səgə pweeru yum nɩ, dɩ tɩ bɔɔna wʋnɩ, dɩ tɩ gugwəəru tɩlʋ maama wʋnɩ. 3 Yisɩrayɛlɩ tiinə bam dɛɛn na yǝni ba du ba wo-dwə, Madɩan tiinə bam wʋ́ tɔgɩ dɩ Amalɛkɩ tiinə dɩdaanɩ dwiə yalʋ maama na zʋʋrɩ wa-puli seeni tɩn mʋ ba ba ba jeeri-ba dɩ najara. 4 Ba dɛɛn tui ba je Yisɩrayɛlɩ tɩga baŋa nɩ mʋ, yɩ ba jaanɩ wʋdiiru tɩlʋ maama Yisɩrayɛlɩ tiinə bam na dugi tɩn ba cɔga. Ba ma jaanɩ-ba ba cɔgɩ kʋntʋ ba tɩga kam maama nɩ taan, sɩ kʋ yi Gaza seeni. Ba ta ma yǝni ba vrɩ ba peeni, dɩ ba naanɩ, dɩdaanɩ ba bɩnɛ, pa Yisɩrayɛlɩ tiinə bam daa ba jɩgɩ ba ni-wʋdiu. 5 Madɩan tiinə bam yǝni ba ja ba vara mʋ ba ba yɩ ba daarɩ ba cwi ba vwə daanɩ. Bantʋ dɩ ba yogondə yam ni dɛɛn warɩ kʋ ga kʋ ti. Ba maa wʋ́ yǝni ba məəli tɩga kam maama nɩnɛɛnɩ kayɩra te tɩn, yɩ ba zarɩmɩ-ka nyɔ! 6 Ba ma pa yinigə tiini ka ja Yisɩrayɛlɩ tiinə bam pa ba kaasɩ ba loori Baŋa-Wɛ sɩ DƖ joŋi-ba DƖ yagɩ.7 Yisɩrayɛlɩ tiinə bam dɛɛn na dɛ Madɩan tiinə bam kikiə ŋwaanɩ ba keeri ba loori Baŋa-Wɛ kʋntʋ tɩn, 8 DƖ ma tʋŋɩ nijoŋnu wʋdoŋ sɩ o ja kwǝrǝ kantʋ o vu o pa-ba:
«Amʋ, Yisɩrayɛlɩ tiinə Baŋa-Wɛ dɩm mʋ wɩ: amʋ mʋ jaanɩ abam a ja a nuŋi Ezipi tɩʋ kʋm nɩ yɩ a vrɩ abam a yagɩ á gabɛɛm dɩm nɩ. 9 A ma joŋi abam Ezipi tiinə bam jɩŋa nɩ a yagɩ. A ta ma joŋi abam a yagɩ nɔɔna balʋ maama na bɛɛsɩ abam tɩn jɩŋa nɩ. Amʋ ma zəli á dʋna bam pa ba nuŋi ba daarɩ ba tɩga kam yɩ abam laan te. 10 A ma ta dɩ abam nɩ: ‹Amʋ mʋ yɩ abam Tu Baŋa-Wɛ dɩm. Kʋntʋ tɩn, á ba maŋɩ sɩ á zuli jwǝnǝ yalʋ Amɔɔrɩ tiinə bam na zulə yɩ á laan wʋ ba tɩga kam nɩ tɩn.› Abam nan wʋ sɛ amʋ kwǝrǝ kam.»
11 Baŋa-Wɛ malɛka kam ma vu ka je tiu kʋm na wʋ Ofera nɩ tɩn kuri nɩ. Kʋ yɩ Abizeri tu Zoasɩ nyɩm mʋ. O bu Zidɩɔn maa zɩgɩ da o magɩ bəniŋəa piu goŋo wʋnɩ. Ba dɛɛn yǝni ba nɔnɩ vinyə tiu biə mʋ goŋo kʋm kʋntʋ wʋnɩ. Zidɩɔn dɛɛn nan kɩ kʋntʋ sɩ o səgi mɩna yam Madɩan tiinə bam yigə nɩ mʋ. 12 Baŋa-Wɛ malɛka kam dɛɛn ma yi Zidɩɔn tee nɩ ka wɩ: «Nmʋ tiini n yɩ nɔn-babɩa mʋ, yɩ Baŋa-Wɛ dɩ wʋ n tee nɩ.»
13 Zidɩɔn ma ləri o wɩ: «Amʋ tu, Baŋa-Wɛ na sɩɩnɩ DƖ wʋ dɩ́ tee nɩ, bɛɛ mʋ yɩ kikiə yantʋ maama jɩgɩ ya kɩ dɩ́ yɩra nɩ? Wo-kɩnkagɩla yalʋ dwi dɩ́ kwə bam na maŋɩ ba brɩ dɩbam nɩ DƖ tʋŋɩ ba tɩtarɩ nɩ tɩn daa wʋ yən nɩ mʋ? Ba dɛɛn ta brɩ dɩbam ba wɩ: Baŋa-Wɛ mʋ jaanɩ-ba DƖ ja DƖ nuŋi Ezipi nɩ. Lele nan, Baŋa-Wɛ dʋlɩ dɩbam mʋ DƖ yagɩ, DƖ daarɩ DƖ kɩ dɩbam Madɩan tiinə bam jɩŋa nɩ.»
14 Baŋa-Wɛ tɩtɩ dɛɛn laan ma pa Zidɩɔn ni DƖ wɩ: «Ve n ma n dam dɩntʋ n na jɩgɩ tɩn n tʋŋɩ, sɩ n joŋi Yisɩrayɛlɩ tiinə bam n yagɩ Madɩan tiinə jɩŋa nɩ, sɩ amʋ tɩtɩ mʋ tʋŋɩ-m.»
15 Zidɩɔn ma ləri o wɩ: «Amʋ Yuutu, amʋ lagɩ a kɩ tɩta mʋ a joŋi Yisɩrayɛlɩ tiinə bam a yagɩ? Dɩbam digə kam mʋ tiini ka bwǝnǝ Manasɩ dwi dɩm wʋnɩ. Amʋ ta ma tiini a yɩ balaŋa dɩ́ digə kam nɔɔna maama wʋnɩ.» 16 Baŋa-Wɛ ma lǝr-o DƖ wɩ: «Amʋ wʋ́ taa wʋ n tee nɩ, yɩ nmʋ wʋ́ cɩcʋgɩ Madɩan tiinə bam maama nɩnɛɛnɩ ba yɩ nɔɔnʋ dɩdʋa mʋ te.»
17 Zidɩɔn ma ta o wɩ: «N yi na sɩɩnɩ dɩ su amʋ kikiə, sɩ n kɩ nyɩnyʋgʋ woŋo n brɩ-nɩ. Kʋntʋ wʋ́ pa a lwarɩ nɩ nmʋ Baŋa-Wɛ mʋ ŋɔɔnɩ dɩ amʋ. 18 A loori-m! Ta yɩ ve. Cəgi-nɩ sɩ a vu a ja a pɛɛrɩ a ba a pa‑m, sɩ n laan kɛ.» Baŋa-Wɛ dɩ ma ləri DƖ wɩ: «Tɔ. A wʋ́ cəgi‑m, ve sɩ n ba.»
19 Zidɩɔn ma vu sɔŋɔ o saŋɩ pi-bala, yɩ o ta kwe muni kʋrɩwaa bu dɩdʋa o ma kɩ dɩpɛ dɩlʋ na ba jɩgɩ dabɩlɩ tɩn. O ta ma kɩ nwana yam tɩtɔgɔ wʋnɩ yɩ o daarɩ o lo ya nyʋa bam o kɩ kambiə wʋnɩ, o laan ja o vu o pa‑o tiu kʋm kuri nɩ.b
20 Wɛ malɛka kam ma ta dɩd-o ka wɩ: «Kwe nwana yam dɩdaanɩ dɩpɛ kʋm n daŋɩ piu kʋntʋ yuu nɩ, sɩ n daarɩ n lo nyʋa bam tɩ baŋa nɩ.» Zidɩɔn ma sɩɩnɩ o kɩ kʋntʋ. 21 Baŋa-Wɛ malɛka kam nan ya ze nacəgə mʋ o jɩŋa nɩ. O ma kwe nacəgə kam yɩ o ma ka ni dɩm seeni o dwe nwana yam dɩdaanɩ dɩpɛ kʋm. Piu kʋm dɛɛn ma ja mim, yɩ dɩ zwɛ tɩ maama. Baŋa-Wɛ malɛka kam dɛɛn ma je.
22 Zidɩɔn dɛɛn ma maanɩ nɩ: kʋ yɩ Baŋa Wɛ malɛka mʋ o nɛa. Fʋʋnɩ ma tiini dɩ zʋ‑o ye o kaasɩ o wɩ: «Yuu-tu Baŋa Wɛ, amʋ nɛ nmʋ tɩtɩ malɛka kam jaja.» 23 Baŋa-Wɛ ma ta dɩd-o nɩ: «Pa n bɩcarɩ zuri! Yɩ ta n fʋna, sɩ n bá tɩ.»
24 Zidɩɔn dɛɛn ma lɔ bimbim sɩ o ma zuli Wɛ je sɩm kʋntʋ nɩ, yɩ o bəŋi-dɩ o wɩ: ‹Baŋa-Wɛ yɩ Bɩcar-zuru Tu mʋ.› Bimbim dɩm kʋntʋ ta wʋ Ofera nɩ, mɛ na yɩ Abizeri sɔ-yuu tiinə nyɩm tɩn mʋ.
25 Tɩtɩɩ dɩm kʋntʋ nɩ mʋ Baŋa-Wɛ dɛɛn tagɩ Zidɩɔn DƖ wɩ: «Ve n ja n ko na-bɩa kam, dɩdaanɩ kadoŋ na yɩ bɩna yarpɛ tɩn, sɩ n laan ma n cɔgɩ bimbim dɩlʋ n ko na kaanɩ Baalɩ dɩ baŋa nɩ tɩn n dɩ tɩga nɩ. N ta wʋ́ goni Asera nyɩnyʋgʋ daa kam na salɩ dɩ yɩra nɩ tɩn mʋ n dɩ tɩga nɩ. 26 Nmʋ ta maŋɩ sɩ n zɩgɩ zoŋo kʋntʋ yuu nɩ mʋ n lɔ bimbim dɩlʋ na yɔɔrɩ tɩn n pa n Tu Baŋa-Wɛ. Ta kwe Asera nyɩnyʋgʋ daa kam n na goni tɩn n ma n tarɩgɩ mim sɩ n zwɛ na-bɩa bɩle tu wʋm n kaanɩ n pa Baŋa-Wɛ.»
27 Zidɩɔn dɛɛn ma lɩ nɔɔna fugə o tɩntʋŋna bam wʋnɩ yɩ ba vu ba kɩ kʋlʋ Baŋa-Wɛ na brɩ-o sɩ o kɩ tɩn. O nan ya kwarɩ o cʋrrʋ dɩdaanɩ tɩʋ kʋm nɔɔna bam mʋ. Kʋntʋ ŋwaanɩ, o wʋ wanɩ sɩ o kɩ kʋntʋ wɩa nɩ, yɩ o kɩ tɩtɩɩ nɩ.
28 Tɩga na pʋʋrɩ tɩtɩɩtɩ tɩn, mʋ tɩʋ kʋm tiinə zaŋɩ ba na nɩ: Baalɩ bimbim dɩm bwəri mʋ dɩ tʋ tɩga nɩ. Ba ta nɛ nɩ Asera nyɩnyʋgʋ daa kam dɩ goni mʋ ya ka daa tǝrǝ. Ba ta nɛ nɩ nɔɔna kwe na-bɩa bale tu wʋm ba ma kɩ kaanɩm ba yagɩ bimbim dɩlʋ ba na lɔgɩ ba zɩgɩ tɩn baŋa nɩ. 29 Ba ma bwɛ daanɩ ba wɩ: «Wɔɔ mʋ kɩ tɩntʋ?» Ba na yɛ kʋ wʋnɩ tɩn mʋ ba maanɩ nɩ: kʋ yɩ Zoasɩ bu Zidɩɔn mʋ kɩ kǝm dɩm.
30 Tɩʋ kʋm nɔɔna bam ma vu Zoasɩ te ba ta ba wɩ: «Pa n bu wʋm nuŋi o ba yo seeni sɩ dɩ́ gʋ-o, bɛŋwaanɩ, o vaarɩ Baalɩ bimbim dɩm mʋ o dɩ tɩga nɩ, yɩ o daarɩ o go Asera nyɩnyʋgʋ daa kam na yǝri dɩ yɩra nɩ tɩn o wǝli da.»
31 Zoasɩ dɛɛn ma ta dɩ balʋ maama na tu ba ta taanɩ ba brɩ-o tɩn o wɩ: «Abam wʋ́ wanɩ Baalɩ jaŋa á joŋi á jaŋɩ á pa‑o na? Wʋlʋ maama na wʋ́ jaŋɩ o pa Baalɩ tɩn wʋ́ tɩ mʋ sɩ tɩga laan pʋʋrɩ. Baalɩ na sɩɩnɩ o yɩ wɛ, yagɩ-o-na sɩ o tɩtɩ jaŋɩ o jaŋa, bɛŋwaanɩ, wʋntʋ bimbim mʋ ba vaarɩ ba dɩ tɩga nɩ.» 32 Kʋ na zɩgɩ dɛ dɩm kʋntʋ nɩ tɩn, mʋ ba lɛɛrɩ ba jɩgɩ Zidɩɔn ba bǝi nɩ ‹Yerubaalɩ›. Bɛŋwaanɩ o ko Zoasɩ ya tagɩ o wɩ: «Yagɩ-na sɩ Baalɩ tɩtɩ jaŋɩ o jaŋa, kʋ na yɩ wʋntʋ bimbim dɩm mʋ ba vaarɩ ba dɩ tɩga nɩ tɩn ŋwaanɩ.»
33 Madɩan tiinə bam, dɩ Amalɛkɩ tiinə bam dɩdaanɩ dwiə yalʋ maama na zʋʋrɩ wa-puli seeni tɩn dɛɛn ma wǝli daanɩ, yɩ ba bɛ Zʋrdɛn bugə kam ba vu ba cwi ba vwə Zizreyɛlɩ bolo kʋm wʋnɩ. 34 Baŋa-Wɛ Joro ma cu Zidɩɔn baŋa nɩ dɩdaanɩ dam. O ma wu nabɔnɔ o bəŋi Abizeri dwi kʋm o kɩ daanɩ sɩ ba tɔgɩ o kwaga. 35 O ta ma tʋŋɩ kwǝrǝ o bəŋi Manasɩ tiinə bam maama sɩ ba nuŋi najara ŋwaanɩ. O kwǝrǝ kam dɛɛn ta yi Asɛɛrɩ tiinə bam, dɩ Zabulɔn dɩdaanɩ Nɛfitali tiinə bam. Ba maama ma nuŋi ba pɛ o kwaga ba pu.
36 Zidɩɔn dɛɛn ma loori Wɛ o wɩ: «A lagɩ sɩ a lwarɩ n na goni ni dɩ amʋ nɩ nmʋ wʋ́ tɔgɩ amʋ baŋa nɩ n joŋi Yisɩrayɛlɩ dwi tiinə n yagɩ tɩn wʋ́ sɩɩnɩ kʋ kɩ mʋ na. 37 Tankɔlɔ mʋ tɩntʋ a lagɩ a tiŋi mɛ dɩ́ na magɩ mɩna tɩn. Tɩga na pʋʋrɩ, yɩ nyɔnɔ na bugi tankɔlɔ kʋm yɩranɩ, yɩ tɩga kam na kʋga, mʋ a wʋ́ lwarɩ nɩ nmʋ wʋ́ sɩɩnɩ n da amʋ baŋa nɩ n joŋi Yisɩrayɛlɩ tiinə n yagɩ nɩnɛɛnɩ n na tagɩ te tɩn.» 38 Kʋ dɛɛn sɩɩnɩ kʋ kɩ kʋntʋ mʋ. Tɩga na pʋʋrɩ tɩn, Zidɩɔn ŋʋkɩ na mʋ tankɔlɔ kʋm yɩra nɩ o su zʋŋa.