Debora dɩdaanɩ Barakɩ ləŋə
5
Dɛ dɩm kʋntʋ nɩ mʋ Debora dɩdaanɩ Abinowam bu-baarʋ Barakɩ dɛɛn leeni ləŋə kantʋ ba wɩ:2 Yisɩrayɛlɩ tiinə cɩ-tara mʋ joŋi yigə,
yɩ nɔɔna bam maama dɩ sɛ ba nuŋi sɩ ba kɩ najara yam.
Baŋa-Wɛ maŋɩ dɩ tiə mʋ!
3 Abam pwa dɩ dɩdɛɛra maama, cəgi-na,
sɩ a leeni ləŋə a tee Yisɩrayɛlɩ tiinə Baŋa-Wɛ dɩm.
Amʋ wʋ́ leeni a zuli Baŋa-Wɛ mʋ!
4 Baŋa-Wɛ, nmʋ dɛɛn zɩgɩ Seyiri laŋa nɩ n nuŋi n bɩɩnɩ!
Nmʋ yɔɔrɩ n nuŋi Edɔm nɩ mʋ n bɩɩnɩ!
N na ma n bɩɩnɩ tɩn mʋ tɩga kam sisiŋi,
yɩ wɛyuu kʋm dɩ maa cuurə dɩ na.
5 Pweeru tɩm dɩ dwanɩ mʋ Sinayi Tu Baŋa-Wɛ yigə nɩ.
Tɩ ma sisiŋi Yisɩrayɛlɩ Baŋa-Wɛ dɩm yigə nɩ.
6 Maŋa kalʋ Anatɩ bu Samgarɩ na nii tɩga kam baŋa nɩ tɩn
kʋ wǝli dɩdaanɩ Yayɛlɩ maŋa nɩ,
cwə-vələ dɛɛn daa ba tɔgɩ pɩmpala ba veǝ,
sɩ ba tɔgɩ cwə-balɛ yɩranɩ mʋ.
7 Nɔɔna dɛɛn daa ba zʋʋrɩ Yisɩrayɛlɩ tɩɩnɩ nawuurə yam nɩ ya,
sɩ kʋ taa nii maŋa kalʋ Debora na nuŋi
sɩ o nii Yisɩrayɛlɩ tiinə bam baŋa nɩ,
yɩ o yɩ ba maama nu tɩn.
8 Yisɩrayɛlɩ tiinə bam dɛɛn na kuri sɩ ba taa zuli wa-gɛ tɩn,
najara mʋ tʋ ba tɩɩnɩ dɩm nɩ.
Ba jar-kərə mʋrrʋ fiinna bam wʋnɩ,
wɔɔ dɛɛn mʋ ze najara cɩ-kwaŋa naa cicwe?
9 A wʋ mʋ dɛ Yisɩrayɛlɩ yigə tiinə bam
dɩ nɔɔna balʋ na sɛ ba tɔgɩ ba kɩ najara tɩn kikiə yam.
Baŋa-Wɛ maŋɩ dɩ tiə mʋ!
10 Cəgi-na á nii,
abam balʋ na dɔgɩ bʋnɛ-pwəənu baŋa nɩ
yɩ á je pwal-laarʋ baŋa nɩ tɩn,
kʋ wǝli dɩ abam balʋ na ve tɩga nɩ tɩn.
11 Cəgi-na sɩ á wʋ́ ni na-mɔra kwəri mʋ zaŋɩ bwi cwe nɩ.
Ba kaagɩ ba tɛ Baŋa-Wɛ na kɩ wo-kamunnu tɩlʋ tɩn.
Ba ta maa tɛ Yisɩrayɛlɩ tiinə bam na di ba dʋna te tɩn.
Baŋa-Wɛ nɔɔna bam ma zaŋɩ ba tɩɩnɩ dɩm wʋnɩ
sɩ ba jeeri manco-pɩɩna yam nɩ.
12 Debora, zaŋɩ wɛɛnɩ!
Zaŋɩ wɛɛnɩ sɩ n mɔ ləŋə
sɩ nɔɔna sɛ.
Abinowam bu Barakɩ,
nmʋ dɩ zaŋɩ wɛɛnɩ,
sɩ n ja balʋ n na di tɩn n ja n viiri.
13 Balʋ na daarɩ yɩ ba jɩgɩ cɩga tɩn ma vu ba dɩdɛɛra bam te.
Baŋa-Wɛ nɔɔna bam ma da DƖ ŋwaanɩ
ba wǝli-nɩ sɩ dɩ́ kɩ najara.
14 Ba badonnǝ nuŋi Efrayim dwi dɩm wʋnɩ,
ba na yɩ balʋ na zəli Amalɛkɩ tiinə ba tɩga kam nɩ tɩn.
Ba maa tɔgɩ Bɛnzamɛn dwi tiinə dɩ ba cʋrrʋ tɩm kwaga.
Najara yigǝ tiinǝ dɩ dɛɛn ma nuŋi Makira nɩ ba ba.
Dɩdɛɛra badonnǝ dɩ nuŋi Zabulɔn nɩ ba jeeri.
15 Yisakaarɩ yigə tiinə bam ma tɔgɩ Debora kwaga.
Cɩga tɩn, Yisakaarɩ nɔɔna bam dɩ ma tɔgɩ Barakɩ kwaga
ba yɔɔrɩ ba tu bolo kʋm nɩ mʋ sɩ ba zaŋɩ najara yam.
Kʋ nan na yɩ Ruban dwi dɩm tiinə,
bantʋ ya ta je wʋbʋŋa wʋnɩ mʋ.
16 Bɛŋwaanɩ mʋ á maŋɩ kwaga nɩ yɩ á yɩrɩ peeni sɩm?
Á bʋŋɩ sɩ á cəgi nayɩra na jɩgɩ wi ba wui te tɩn mʋ na?
Cɩga ŋwaanɩ tɩn, Ruban dwi dɩm ya ta je wʋbʋŋa wʋnɩ mʋ.
17 Galadɩ tiinə bam dɩ ma maŋɩ
Zʋrdɛn bugə kam wa-puli seeni.
Dan dwi tiinə dɩ ma maŋɩ kwaga nɩ dɩ ba nabwǝǝru tɩm.
Asɛɛrɩ dwi dɩm dɛɛn ma maŋɩ nɩnɩʋ kʋm ni nɩ.
Bantʋ wʋ nuŋi ba tɩɩnɩ dɩm nɩ.
18 Kʋ daarɩ Zabulɔn tiinə bam dɩdaanɩ Nɛfitali tiinə bam
dɛɛn sɛ sɩ ba ga ba ŋwɩa najara wʋnɩ mʋ.
19 Kaanan tɩɩnɩ pwa bam nuŋi sɩ ba kɩ najara.
Ba ma zaŋɩ najara Taanakɩ nɩ,
sɩ kʋ maŋɩ dɩdaanɩ Megido bwi sɩm.
Ba nan gɛ səbu-poŋo wǝǝnu sɩ ba ja ba viiri.
20 Calcwɩ zɩgɩ wɛyuu nɩ mʋ sɩ joŋi jara yam sɩ ja
sɩ cwəŋə yuu nɩ, sɩ joŋi jara yam mʋ sɩ ja, sɩ jaŋɩ dɩ Sizera.
21 Kisɔn na-woro kʋm ma coori-ba sɩ ja viiri;
Kisɔn bu-tʋla kam na wʋra taan wuu tɩn mʋ kʋntʋ.
Amʋ wʋ́ da kʋntʋ ŋwaanɩ a vu yigə mʋ dɩ dam.
22 Siseŋ-nɔɔna bam wurigi mʋ sɩ maa kɛa.
Sɩ napɔɔna yam maa guri tɩga.
23 Baŋa-Wɛ malɛka kam maa wɩ:
«Sɔɔlɩ-na lwarɩm á yagɩ Merozɩ tɩʋ kʋm baŋa nɩ!
Kampwəl-balɔrɔ tiini kʋ taa wʋ kʋ nɔn-biə bam dɩ yuu nɩ,
bɛŋwaanɩ, ba wʋ sɛ ba nuŋi sɩ ba wǝli Baŋa-Wɛ,
sɩ DƖ nɔɔna bam wanɩ ba jeeri ba dʋna pamaŋna bam najara wʋnɩ.»
24 Yayɛlɩ mʋ tiini o jɩgɩ yu-yoŋo kaana maama wʋnɩ!
O maa yɩ Kɛnɩ tu Hebɛrɩ kaanɩ
yɩ o jɩgɩ yu-yoŋo o dwe kaana balʋ maama na zʋʋrɩ vwə wʋnɩ tɩn.
25 Sizera dɛɛn loori na mʋ sɩ o nyɔ.
Yayɛlɩ ma kwe nayɩla o pa‑o.
O dɛɛn ma beeri vərə zʋŋa,
o kɩ nayɩl-kapwəŋə da o pa‑o.
26 O dɛɛn ze vwe paarɩ mʋ o jagwiə nɩ,
yɩ o jazɩm dɩm jɩgɩ bagwəri.
O ma pa paarɩ dɩm o lɔ Sizera yuu kʋm o cɩcʋgɩ.
Paarɩ dɩm ma tɔgɩ o pʋpɔŋɔ nɩ dɩ nuŋi dɩ ja tɩga.
27 Sizera sɩsarɩ mʋ o tʋ tɩga nɩ o tigə.
O maŋɩ Yayɛlɩ nɛ seeni mʋ o tɩ o tigə yiri-titi.
28 Sizera nu maa zɩgɩ o digə takoro ni nɩ o yɩrɩ je maama.
O ta ma niə o nii cwǝŋǝ nɩ yɩ o wɩ:
«Bɛɛ mʋ kɩ pa o daanɩ kʋntʋ, yɩ o ta wʋ tu?
A ta wʋ ni o təriko kʋm na maa bɩɩnɩ tɩn.
Bɛŋwaanɩ mʋ o siseŋ-nɔɔna bam napɔɔna ta ba dwana?»
29 Kaana balʋ na zɩgɩ o tee nɩ tɩn ma ləri taanɩ ba brɩ-o,
yɩ o jɩgɩ-dɩ o ma zuri o bɩcarɩ taan nɩ:
30 «Ba na daanɩ tɩn, ba wʋra ba pɔɔrɩ wǝǝnu tɩlʋ ba na vrɩ najara wʋnɩ tɩn mʋ ba paɩ daanɩ.
Jar-kəru maama bá ga kaanɩ dɩdʋa naa bale sɩ o ja o joori sɔŋɔ.
ɡwar-nyɩnnʋ maa wʋ́ taa yɩ Sizera nyɩm,
yɩ zambili-nyɩnnʋ tɩm taa yɩ amʋ tɩtɩ nyɩm.
Kʋ yɩ wǝǝnu tɩntʋ ŋwaanɩ mʋ pɛ ba daanɩ.»
31 Baŋa-Wɛ, sɛ sɩ nmʋ dʋna maama tɩ tʋʋnɩ dɩm kʋntʋ doŋ.
Kʋ daarɩ balʋ na soe nmʋ tɩn,
pa ba taa nyɩɩna dɩ dam
nɩ wɩa na nyɩ dɩ dam ka pulim maŋa nɩ te tɩn.
Yisɩrayɛlɩ tiinə bam dɛɛn ma sin dɩ najara sɩ kʋ yi bɩna fiinna.