Debora yɩra taanɩ
4
Ewudi tʋʋnɩ kwaga nɩ, mʋ Yisɩrayɛlɩ tiinə bam daa tiini ba tʋŋɩ lwarɩm ba cɔgɩ Baŋa-Wɛ yigə. 2 Ba lwarɩm dɩm kʋntʋ ŋwaanɩ mʋ Baŋa-Wɛ pɛ cwǝŋǝ sɩ Kaanan tɩʋ Pɛ Yabin di-ba. Wʋntʋ dɛɛn wʋ Hazɔrɩ tɩʋ nɩ mʋ yɩ o di o paarɩ dɩm. Sizera mʋ wʋ o jar-kərə bam yigə nɩ, yɩ o dɛɛn zʋʋrɩ Harosɛtɩ-Goyimi nɩ. 3 Yabin dɛɛn jɩgɩ sise-tərikooru biə-nʋgʋ mʋ sɩ o ma kɩ najara. Tərikooru tɩm maa yɩ tɩlʋ ba na mɛ luuru ba kɩ-tɩ. O maa tiini o jɩgɩ pu-sɩŋa o kɩ Yisɩrayɛlɩ tiinə bam yɩra nɩ bɩna fiinle. Ba ma keeri ba loori Baŋa-Wɛ sɩ DƖ joŋi-ba DƖ yagɩ.4 Wɛ nijoŋnu wʋdoŋ dɛɛn wʋra o yɩrɩ mʋ Debora. O maa yɩ Lapidɔtɩ kaanɩ. Wʋntʋ mʋ nii Yisɩrayɛlɩ tiinə bam baŋa nɩ da yam kʋntʋ nɩ. 5 O dɛɛn yǝni o je kʋrʋ tiu kʋdoŋ kuri nɩ mʋ. Yisɩrayɛlɩ tiinə bam maama maa yǝni ba tui o te sɩ o nii ba taanɩ baŋa nɩ o pa-ba. Je sɩm dɛɛn wʋ Efrayim pweeru tɩm laŋa nɩ mʋ, kʋ maŋɩ dɩ Rama dɩ Betɛlɩ tɩtarɩ nɩ. 6 Dɛ dɩdwɩ mʋ o dɛɛn tʋŋɩ o bəŋi Abinowam bu Barakɩ. Wʋntʋ nuŋi Kedɛsɩ nɩ mʋ, Nɛfitali dwi dɩm wʋnɩ. O ma ta dɩd-o o wɩ: «Yisɩrayɛlɩ tiinə Baŋa-Wɛ dɩm pɛ nmʋ ni dɩntʋ mʋ:
‹Ve n kuri nɔɔna mʋrrʋ fugə sɩ ba nuŋi Nɛfitali dɩdaanɩ Zabulɔn dwiə yam wʋnɩ. Nmʋ laan ma n wʋ́ da ba yigə sɩ á vu á jeeri Tabɔɔrɩ Piu kʋm nɩ. 7 Amʋ wʋ́ sʋgɩ Yabin jar-kərə bam yigə tu Sizera sɩ o nuŋi o vu o yi Kisɔn bugə kam o jeeri abam dɩ najara. Oó taa jɩgɩ o jara-kǝm tərikooru tɩm dɩdaanɩ o jar-kərə bam maama. Amʋ nan wʋ́ kɩ-ba n jɩŋa nɩ pa n di-ba.› »a
8 Barakɩ ma ləri Debora o wɩ: «Nmʋ na sɛ sɩ n da dɩbam kwaga sɩ dɩ́ vu, amʋ wʋ́ vu. Kʋ nan na daɩ kʋntʋ, amʋ dɩ bá vu.»
9 O ma ləri Barakɩ o wɩ: «Amʋ wʋ́ tɔgɩ-m sɩ dɩ́ vu. Nmʋ nan na jaanɩ bʋbʋŋɩ dɩlʋ tɩn, n bá na yɩrɩ dɩ ŋwaanɩ, bɛŋwaanɩ Baŋa-Wɛ lagɩ DƖ kwe Sizera DƖ kɩ kaanɩ jɩŋa nɩ mʋ sɩ o gʋ-o.»
Debora dɛɛn ma zaŋɩ o tɔgɩ Barakɩ yɩ ba vu Kedɛsɩ. 10 Barakɩ ma bəŋi jar-kərə sɩ ba nuŋi Nɛfitali dɩdaanɩ Zabulɔn dwiə yam wʋnɩ ba ba ba zən‑o. Pamaŋ-bɩbɛ mʋrrʋ fugə ma nuŋi ba da o kwaga. Debora dɩ ma da o vu.
11 Kɛnɩ tu dɩdʋa dɛɛn wʋra o yɩrɩ mʋ Hebɛrɩ. Wʋntʋ dɛɛn pwɛ o tɩtɩ mʋ Kɛnɩ tiinə badonnǝ bam wʋnɩ. Bantʋ yɩ Hobabɩ dwi dɩm mʋ. Hobabɩ maa yɩ Moyisi dɔ.b Hebɛrɩ ya ve o cwi o vwe sɩ kʋ maŋɩ dɩdaanɩ tiu kʋm na wʋ Zaananim nɩ tɩn. Kʋ dɛɛn bwələ dɩ Kedɛsɩ mʋ.
12 Sizera dɛɛn ma ni nɩ Abinowam bu Barakɩ ve Tabɔɔrɩ Piu kʋm nɩ. 13 O ma pa o tərikooru biə-nʋgʋ dɩdaanɩ o jar-kərə bam maama zɩgɩ Harosɛtɩ-Goyimi nɩ ba vu ba jeeri Kisɔn bugə kam ni nɩ. Tərikooru tɩm maa yɩ tɩlʋ ba na mɛ luuru ba kɩ-tɩ tɩn.
14 Debora dɛɛn laan ma ta Barakɩ o wɩ: «Zaŋɩ sɩ dɩ́ kɛ! Baŋa-Wɛ zɩm kwe Sizera mʋ DƖ kɩ n jɩŋa nɩ. Nan ve n jeer-o dɩ najara, sɩ Baŋa-Wɛ mʋ lagɩ DƖ da n yigə.»
Barakɩ dɛɛn ma sɩɩnɩ o ja o nɔɔna mʋrrʋ fugə pa ba zɩgɩ Tabɔɔrɩ Piu kʋm yuu nɩ ba tu tɩga. 15 Barakɩ na nuŋi sɩ o jeeri-ba tɩn, mʋ Baŋa-Wɛ pɛ vuvugə tʋ Sizera dɩ o jar-kərə bam tɩtarɩ nɩ, dɩdaanɩ ba tərikooru tɩm maama. Sizera dɛɛn ma zɩgɩ o təriko kʋm wʋnɩ o faŋɩ o cu tɩga nɩ, yɩ o laan duri sɩ o lu. 16 Barakɩ ma zəli ba jar-kərə bam dɩdaanɩ ba tərikooru tɩm taan sɩ kʋ vu kʋ yi Harosɛtɩ-Goyimi. O dɩ o nɔɔna bam ma gʋ Sizera jar-kərə bam maama. Dɩdʋa tɩtɩ dɛɛn wʋ daarɩ.
17 Sizera dɛɛn ma duri dɩ o napra o vu sɩ o zʋ Kɛnɩ tu Hebɛrɩ kaanɩ Yayɛlɩ vwe wʋnɩ. O ve da bɛŋwaanɩ, Yabin dɩ Hebɛrɩ digə kam ni ywənə daanɩ mʋ.
18 Yayɛlɩ dɛɛn ma nuŋi sɩ o jeeri Sizera, yɩ o ta dɩd-o nɩ: «Amʋ tu, duri n ba n zʋ amʋ vwe dɩm nɩ. Yɩ ta n kwarɩ fʋʋnɩ.» O dɛɛn ma duri o zʋ da, yɩ kaanɩ wʋm dɩ səgi‑o, o daarɩ o kwe gwaarʋ o ma o kwǝl‑o. 19 Sizera ma ta dɩ Yayɛlɩ o wɩ: «A loori-m! Pa-nɩ na fɩɩn sɩ a nyɔ, bɛŋwaanɩ, na-nyɔm mʋ lagɩ dɩ gʋ-nɩ.» O dɛɛn ma kwe lʋa dɩ ka wʋ nayɩla o pa‑o sɩ o nyɔ, yɩ o joori o kwǝl‑o. 20 Sizera ta ma ta dɩd-o o wɩ: «Ta n zɩgɩ vwe dɩm ni nɩ n niə, sɩ nɔɔnʋ wʋlʋ na tu o bwe nɩ: nɔɔnʋ wʋ yo seeni na, sɩ n ta wɩ: ‹Awo.› »
21 Sizera dɛɛn na tiini o bugi tɩn ŋwaanɩ, o yɔɔrɩ o dɔ mʋ o bəri. Yayɛlɩ dɛɛn ma kwe o vwe dɩm paarɩ dɩdwɩ dɩdaanɩ bagwəri, o laan vwɛ o yi o yɩra o gʋ-o o tiŋi da. O dɛɛn pagɩ paarɩ dɩm mʋ o da nɔɔnʋ wʋm pʋpɔŋɔ nɩ o ja tɩga nɩ.
22 Barakɩ dɛɛn ma zəli Sizera o yi vwe dɩm. Yayɛlɩ na nɛ‑o tɩn, o ma jeer-o, yɩ o ta o wɩ: «Ba n nii nɔɔnʋ wʋlʋ n na kaagɩ n beeri tɩn.» Barakɩ ma zʋ dɩ Sizera tigi da, yɩ paarɩ dɩm tɔgɩ o pʋpɔŋɔ nɩ dɩ ja tɩga.