Tɩɩnɩ dɩlʋ ta na daarɩ sɩ ba di tɩn
3
Yisɩrayɛlɩ tiinə badaara dɛɛn wʋ mɩ dɩ najara yalʋ na yǝni ya kɩ Kaanan tɩga kam nɩ tɩn. Kʋntʋ ŋwaanɩ Baŋa-Wɛ pɛ tɩga kam tɩɩnɩ dɩdonnǝ daarɩ, sɩ o yǝni DƖ kwe-dɩ DƖ maŋɩ Yisɩrayɛlɩ tiinə bam DƖ niə. 2 Baŋa-Wɛ dɛɛn lagɩ sɩ Yisɩrayɛlɩ tiinə bam maama mʋ mɩ dɩdaanɩ jara-kǝm, sɩ ba kwaga kam na yǝri jara-kǝm tɩn dɩ taa ye ya laŋa. 3 Balʋ na daarɩ tɩga kam nɩ tɩn maa yɩ: Filisi tiinə dɩ ba pwa banu bam, dɩ Kaanan tiinə bam maama, kʋ ta wǝli dɩ Sidɔn tiinə bam dɩdaanɩ Hevi tiinə balʋ na zʋʋrɩ Liban pweeru tɩm seeni, kʋ na zɩgɩ Baal-Hɛrɩmɔn Piu kʋm nɩ sɩ kʋ yi Lebo-Hamatɩ seeni tɩn. 4 Tɩɩnɩ dɩm kʋntʋ ta daarɩ sɩ Baŋa-Wɛ tɔgɩ dɩ baŋa nɩ DƖ maŋɩ Yisɩrayɛlɩ tiinə bam DƖ nii, baá tɔgɩ DƖ niə yam nɩnɛɛnɩ Moyisi na maŋɩ o brɩ ba nabaara bam sɩ ba taa kɩ te tɩn, naa ba bá tɔgɩ.5 Kʋntʋ tɩn, Yisɩrayɛlɩ tiinə bam dɛɛn lɛɛrɩ ba zʋʋrɩ dɩdaanɩ Kaanan tiinə bam, dɩ Hɛtɩ tiinə bam, dɩ Amɔɔrɩ tiinə bam, dɩ Perezi tiinə bam, dɩ Hevi tiinə bam dɩdaanɩ Yebusi tiinə bam mʋ. 6 Ba na gwaanɩ daanɩ kʋntʋ tɩn, Yisɩrayɛlɩ tiinə bam dɛɛn ma sɛ sɩ ba dɩ tɩɩnɩ dɩm kʋntʋ tiinə di da-bukwa. Kʋ dɛɛn dɛ cwǝŋǝ kam kʋntʋ mʋ yɩ ba puli sɩ ba taa kaanɩ tɩɩnɩ dɩm jwǝnǝ yam.a
Ɔtiniyɛlɩ yɩra taanɩ
7 Yisɩrayɛlɩ tiinə bam dɛɛn tiini ba tʋŋɩ lwarɩm ba cɔgɩ Baŋa-Wɛ yigə. Ba swe ba Baŋa-Wɛ dɩm swiə, yɩ ba daarɩ ba zuli Baalɩ dɩdaanɩ Asera jwǝnǝ yam. 8 Baŋa-Wɛ banɩ dɛɛn ma tiini dɩ zaŋɩ dedaanɩ-ba. DƖ ma pa pwələ pa Mezopotami tɩʋ Pɛ Kusan Risatayim di-ba. Yisɩrayɛlɩ tiinə bam dɛɛn ma tʋŋɩ ba pa‑o bɩna nana. 9 Ba ma kaasɩ ba loori Baŋa-Wɛ, pa DƖ lɩ joŋnu o pa-ba. Kʋ nan yɩ Kenazɩ bu Ɔtiniyɛlɩ mʋ. Kenazɩ dɩ dɛɛn maa yɩ Kalɛbɩ nyaanɩ. O ma sɩɩnɩ o joŋi Yisɩrayɛlɩ tiinə bam o yagɩ.b 10 Baŋa-Wɛ Joro ma cu Ɔtiniyɛlɩ baŋa nɩ dɩ dam, pa o ji Yisɩrayɛlɩ tiinə bam yigə tu. O dɛɛn ma jeeri Pɛ Kusan Risatayim dɩ najara, yɩ Baŋa-Wɛ kwe pɛ wʋm DƖ kɩ o jɩŋa nɩ, pa o di‑o. 11 Yisɩrayɛlɩ tiinə bam dɛɛn ma sin dɩ najara sɩ kʋ yi bɩna fiinna, yɩ Ɔtiniyɛlɩ laan tɩ.
Ewudi yɩra taanɩ
12 Yisɩrayɛlɩ tiinə bam dɛɛn daa ma tiini ba tʋŋɩ lwarɩm ba cɔgɩ Baŋa-Wɛ yigə. DƖ ma pa pwələ pa Moabɩ tɩʋ Pɛ Egolon di-ba. 13 Egolon ma kɩ ni-mɔrɔ dɩdaanɩ Amɔn tiinə bam dɩ Amalɛkɩ tiinə bam, yɩ ba vu ba zaŋɩ najara dɩ Yisɩrayɛlɩ tiinə bam. O dɛɛn ma vrɩ Zeriko tɩʋ kʋm o te. 14 Yisɩrayɛlɩ tiinə bam ma tʋŋɩ ba pa Pɛ Egolon bɩna fugə-nana.
15 Kʋntʋ kwaga nɩ, Yisɩrayɛlɩ tiinə bam dɛɛn ma kaasɩ ba loori Baŋa-Wɛ, pa DƖ lɩ joŋnu o pa-ba. Kʋ dɛɛn nan yɩ Gera bu Ewudi mʋ. Gera yɩ Bɛnzamɛn dwi tu mʋ. Ewudi maa yɩ nɔn-gwiə. Yisɩrayɛlɩ tiinə bam dɛɛn ma tʋŋ-o sɩ o ja pɛɛra o vu o pa Moabɩ tɩʋ Pɛ Egolon. 16 Ewudi dɛɛn ma pa ba kɩ sʋ-lɔŋɔ na jɩgɩ niə yale ba pa‑o. Kʋ dɩdwarɩm maŋɩ dɩdaanɩ kantɩa maŋɩm mʋ. O ma kuni-kʋ o yagɩ o jazɩm cwe seeni, yɩ o daarɩ o ma o gwaarʋ tɩm o kwǝli-kʋ. 17 Pɛ Egolon nan ya tiini o yɩ ba-kamunu mʋ. Ewudi ma yi o te yɩ o kwe pɛɛra yam o pa‑o. 18 O na pɛ pɛ wʋm o pɛɛra yam o ti tɩn, mʋ o tʋŋɩ nɔɔna balʋ na dɛ dɩd-o ba zɩŋɩ-ya tɩn sɩ ba joori sɔŋɔ. 19 Ewudi na yi mɛ ba na sarɩ kandwa Giligalɩ nɩ tɩn, mʋ o tɩtɩ zɩgɩ dáanɩ o joori Egolon tee nɩ yɩ o wɩ: «Pɛ, amʋ jɩgɩ taanɩ mʋ sɩ a səgi a ta a brɩ-m.»
Pɛ wʋm dɛɛn ma pa o tɩntʋŋna bam maama ni nɩ: ba yagɩ-ba ba yɩranɩ. Nɔɔnʋ maama ma nuŋi pooni.
20 Pɛ wʋm dɛɛn nan ya je o yɩranɩ mʋ di-balaŋa na wʋ o sɔŋɔ kʋm nayuu nɩ tɩn, kʋ na zurǝ tɩn ŋwaanɩ. Ewudi ma yi o yɩra yɩ o ta o wɩ: «Wɛ mʋ pɛ-nɩ kwǝrǝ sɩ a ta a brɩ-m.» Pɛ wʋm ma zaŋɩ o zɩgɩ wɛɛnɩ. 21 Ewudi ma kwe o jagwiə kam o lɩ sʋ-lɔŋɔ kʋm na wʋ o jazɩm cwe nɩ tɩn. O laan ma mʋʋrɩ kʋ maama Egolon pugə nɩ. 22 Sʋ-lɔŋɔ kʋm maama dɛɛn maŋɩ o pugə kam nɩ mʋ dɩ kʋ jɩŋa kam maama yɩ kʋ brɩ kʋ ta kʋ nuŋi o kwaga nɩ. Pɛ wʋm yɩra lara ma kwǝli-kʋ. Ewudi ma yagɩ-kʋ da. 23 O ma pɩ nayuu digə kam ni o yag-o da, yɩ o daarɩ o nuŋi o maa kɛa.
24 O dɛɛn na kɛ o daarɩ tɩn, Pɛ wʋm tɩntʋŋna ma di nayuu kʋm yɩ ba na nɩ digə kam niə pɩ mʋ. Ba dɛɛn ma bʋŋɩ nɩ o ga wʋra o zɩgɩ nɛ mʋ ka wʋnɩ. 25 Ba na cəgi taan kʋ ba kʋ kɛ maŋa yɩ o ta wʋ pʋrɩ digə kam tɩn, mʋ ba beeri borbu ba ma pʋrɩ. Ba ma na nɩ ba tu wʋm tɩgɩ mʋ o tigi tɩga nɩ.
26 Ba dɛɛn na cəgi taa sɩ Pɛ wʋm pʋrɩ tɩn, dɩdaanɩ Ewudi maŋɩ o duri o lu o gaalɩ ba na sarɩ kandwa yam mɛ tɩn, o kɛ o yi Seyiri tɩʋ kʋm. 27 O na yi Efrayim pweeru laŋa kam nɩ tɩn mʋ o wugi nabɔnɔ sɩ Yisɩrayɛlɩ tiinə bam maama nuŋi sɩ ba vu ba kɩ najara. O ma tɔgɩ ba yigə o ja-ba o tu zwəənu tɩm nɩ. 28 O ma pa-ba ni o wɩ: «Taá tɔgɩ-na amʋ. Bɛŋwaanɩ, Baŋa-Wɛ mʋ kwe á dʋna Moabɩ tiinə bam DƖ kɩ á jɩŋa nɩ, sɩ á di-ba.» Nɔɔna bam maama ma tɔgɩ Ewudi kwaga. Ba ma vu ba yi je sɩlʋ Moabɩ tiinə na yǝni ba tɔgɩ-da ba bɛ Zʋrdɛn bugə kam tɩn. Ba ma cəŋi cwǝŋǝ kam sɩ nɔɔn-nɔɔnʋ yɩ tɔgɩ-da o kɛ. 29 Dɛ dɩm kʋntʋ nɩ, ba gʋ Moabɩ tiinə balʋ na tiini ba ye najara laŋa lanyɩranɩ tɩn, kʋ maŋɩ dɩ nɔɔna mʋrrʋ fugə mʋ, yɩ ba wʋlʋwʋlʋ wʋ lugi. 30 Yisɩrayɛlɩ tiinə bam ma di Moabɩ tiinə bam pa ba tʋŋɩ ba pa-ba. Ba dɛɛn ma sin dɩ najara sɩ kʋ yi bɩna funɔnɔ.
Samgarɩ yɩra taanɩ
31 Joŋnu wʋlʋ dɛɛn na saŋɩ o joŋi Yisɩrayɛlɩ tiinə bam o yagɩ tɩn mʋ yɩ Samgarɩ. O dɛɛn yɩ Anatɩ bu mʋ. O ma kwe gwəli dɩlʋ ni na mɩɩnɩ nɩ luku tɛ, o ma gʋ Filisi tiinə biə-yardʋ.