Baŋa-Wɛ Malɛka kam
2
Maŋa dɩdʋa mʋ Baŋa-Wɛ malɛka kam zɩgɩ Giligalɩ nɩ ka jeeri Bokim nɩ. Ka dɛɛn ma kwe Wɛ kwǝrǝ kantʋ ka pa Yisɩrayɛlɩ tiinə bam:«Amʋ mʋ jaanɩ abam a nuŋi Ezipi nɩ a ba yo seeni, pa á zʋ tɩga kalʋ a na goni ni dɩdaanɩ á nabaara bam sɩ a pa-ba tɩn, yɩ a wɩ: ‹A brɩ a bá nuŋi ni-mɔrɔ dɩlʋ a na kɩ dɩ abam tɩn kwaga nɩ. 2 Kʋ nan daɩ sɩ abam dɩdaanɩ tɩga kam kʋntʋ nɔɔna kɩ ni-mɔrɔ daanɩ. Abam maŋɩ sɩ á ja ba jwǝnǝ kaanɩm bimbinə yam á cɔgɩ á yagɩ mʋ.›a
Abam nan vɩn ni dɩm kʋntʋ a na pɛ abam tɩn. Bɛŋwaanɩ mʋ yɩ á kɩ kʋntʋ? 3 Kʋntʋ ŋwaanɩ, amʋ daa bá zəli tɩɩnɩ dɩm tiinə a yagɩ sɩ a daarɩ ba tɩga kam a pa abam sɩ á taá te. Baá taa yɩ á dʋna mʋ yɩ ba daanɩ abam zanzan. Ba jwǝnǝ yam dɩ maa wʋ́ ja abam nɩ cɩkʋ te.»
4 Yisɩrayɛlɩ tiinə bam na ni malɛka kam taanɩ dɩm tɩn, ba maama wʋrʋ maa cɔgɩ, yɩ ba tʋ kaasa nɩ. 5 Ba ma bəŋi je sɩm kʋntʋ yɩrɩ nɩ Bokim.b Ba dɛɛn ma kɩ kaanɩm daanɩ ba pa Baŋa-Wɛ.
Zozwe tʋʋnɩ
6 Zozwe dɛɛn ta na ŋwɩ tɩn, o ma pa Yisɩrayɛlɩ tiinə bam cwǝŋǝ sɩ ba viiri. Nɔɔnʋ maama ma vu sɩ kʋ tu joŋi o tɩga pʋpwara o taa te. 7 Zozwe ŋwɩa maŋa kam maama nɩ, Yisɩrayɛlɩ tiinə bam dɛɛn tʋŋɩ ba tɔgɩ Baŋa-Wɛ wʋbʋŋa mʋ. Ba nakwa badonnǝ dɩ dɛɛn dɛ ba na Baŋa-Wɛ na kɩ wo-kɩnkagɩla yalʋ DƖ pa Yisɩrayɛlɩ dwi tiinə nan tɩn. Zozwe na tɩga yɩ bantʋ ta ŋwɩ maŋa kalʋ tɩn nɩ, Yisɩrayɛlɩ tiinə bam ta tɔgɩ Baŋa-Wɛ dɩ cɩga mʋ.
8 Baŋa-Wɛ tɩntʋŋnʋ Zozwe na yɩ Nun bu tɩn dɛɛn nɛ bɩna bi dɩdaanɩ fugə mʋ yɩ o laan tɩ. 9 Ba dɛɛn ma ja‑o ba kɩ o tɩtɩ tɩga kam ba na pɔɔrɩ ba pa‑o tɩn nɩ. Ka wʋ Timinatɩ-Heresɩ nɩ mʋ, Efrayim pweeru laŋa kam nɩ. Ka dɛɛn maŋɩ dɩdaanɩ Gaasa Piu kʋm jazɩm baŋa seeni mʋ.
10 Bantʋ dwi dɩm maama ma tɩ ba ti. Dwi dɩdoŋ dɛɛn daa ma zaŋɩ Yisɩrayɛlɩ wʋnɩ. Bantʋ yǝri Baŋa-Wɛ dɩm yɩ ba wʋ lwarɩ kʋlʋ dɩ kʋlʋ maama DƖ na kɩ DƖ pa Yisɩrayɛlɩ dwi tiinə bam tɩn. 11 Yisɩrayɛlɩ tiinə bam dɛɛn ma tʋŋɩ lwarɩm ba cɔgɩ Baŋa-Wɛ yigə, yɩ ba puli sɩ ba taa kaanɩ Baalɩ jwǝnǝ yam. 12 Ba dɛɛn nuŋi Baŋa-Wɛ dɩm na yɩ ba nabaara Wɛ yɩ DƖ ja-ba DƖ ja DƖ nuŋi Ezipi nɩ tɩn kwaga nɩ mʋ, yɩ ba daarɩ ba sɛ nɔɔna balʋ na gilimi-ba tɩn jwǝnǝ sɩ ba taa kaana. Ba kikiə yam kʋntʋ dɛɛn ma pa Baŋa-Wɛ banɩ zaŋɩ, 13 ba na vɩn Dɩntʋ yɩ ba daarɩ ba tɔgɩ Baalɩ dɩdaanɩ Asetarɩ jwǝnǝ yam tɩn ŋwaanɩ. 14 Baŋa-Wɛ dɛɛn tɔgɩ DƖ ban-zɔŋɔ kʋm ŋwaanɩ mʋ DƖ kwe Yisɩrayɛlɩ tiinə bam DƖ yagɩ vɩnvɩrna jɩŋa nɩ, sɩ ba bɛɛsɩ-ba, yɩ DƖ daarɩ o kɩ-ba ba dʋna balʋ na gilimi-ba tɩn jɩŋa nɩ, pa ba warɩ ba dʋna bam sɩ ba jeeri dɩ najara.c 15 Yisɩrayɛlɩ tiinə bam dɛɛn na yǝni ba nuŋi sɩ ba kɩ najara, Baŋa-Wɛ wʋ́ cɩ-ba mʋ, nɩnɛɛnɩ DƖ na maŋɩ DƖ loori yigə DƖ kaanɩ-ba nɩ: DƖ wʋ́ kɩ te tɩn. Yisɩrayɛlɩ tiinə bam maa tiini ba wʋ cam wʋnɩ.
16 Kʋ kwaga nɩ Baŋa-Wɛ dɛɛn ta yǝni DƖ lɩ joŋnə mʋ DƖ pa-ba. Joŋnə bam laan mʋ daa yǝni ba joŋi-ba ba yagɩ vɩnvɩrna bam jɩŋa nɩ. 17 Kʋntʋ maama wʋ́ kɩ, yɩ Yisɩrayɛlɩ tiinə bam ta lagɩ jwǝnǝ mʋ sɩ ba taa kaana. Ba ba nɩgɩ ba joŋnə balʋ na te-ba tɩn. Ba maa yagɩ cwe sɩlʋ ba kwə dɛɛn na tɔgɩ tɩn. Ba maa yǝni ba yagɩ Wɛ cwǝŋǝ lɩla yɩ ba daa ba sɛ Baŋa-Wɛ niə yam. 18 Yisɩrayɛlɩ tiinə bam dʋna na yǝni ba pa kʋ zʋ ba yɩra, Baŋa-Wɛ dɛɛn yǝni DƖ ŋwanɩ DƖ pa-ba mʋ yɩ DƖ tʋŋɩ vrɩnʋ ba ŋwaanɩ. Wɛ ma yǝni DƖ wǝli kʋ tu pa DƖ joŋi-ba ba dʋna jɩŋa nɩ o yagɩ. Joŋnu wʋm na wʋ tɩgɩ, kʋ yǝni kʋ zurǝ mʋ kʋ pa Yisɩrayɛlɩ tiinə bam. 19 Kʋ daarɩ, joŋnu wʋm na yɔɔrɩ o tɩ, ba daa yǝni ba ywəri mʋ ba tʋ ba cwə-dwe sɩm wʋnɩ. Ba daa yǝni ba kɩ lwarɩm mʋ ba dwǝni ba kwə bam kikiə yam. Ba maa yǝni ba joori ba zʋ jwə-kaanɩm wʋnɩ, yɩ ba pa ba wʋʋ dana dɩ lwarɩm kǝm.
20 Baŋa-Wɛ banɩ laan ma tiini dɩ zaŋɩ dɩ Yisɩrayɛlɩ tiinə bam yɩ DƖ wɩ:
«Nɔɔna bantʋ yɔɔrɩ ba cɔgɩ ni-mɔrɔ dɩlʋ amʋ dɩdaanɩ ba nabaara na kɩ daanɩ tɩn mʋ. Ba ta ma vɩn sɩ ba sɛ amʋ ni dɩm. 21 Kʋntʋ ŋwaanɩ amʋ daa bá zəli tɩɩnɩ dɩlʋ Zozwe na tɩgɩ o daarɩ yɩ ba wʋ di-dɩ tɩn. 22 Amʋ wʋ́ yagɩ sɩ tɩɩnɩ dɩm kʋntʋ taa wʋra mʋ sɩ a taa ma a maŋɩ Yisɩrayɛlɩ tiinə bam a niə, baá sɛ ba tɔgɩ Baŋa-Wɛ nɩnɛɛnɩ ba kwə bam na tɔgɩ te tɩn, naa ba bá tɔgɩ.»
23 Kʋntʋ ŋwaanɩ mʋ Zozwe dɛɛn wʋ di tɩɩnɩ dɩm kʋntʋ maama. Zozwe tʋʋnɩ dɩm kwaga nɩ dɩ, Yisɩrayɛlɩ tiinə bam ta wʋ wanɩ-dɩ ba di lɩla, pa tɩɩnɩ dɩm tiinə bam ta daarɩ tɩga kam baŋa nɩ.