Sarɩya-dirə Tɔnɔ
Yisɩrayɛlɩ tiinə bam jaŋɩ sɩ ba joŋi Kaanan tɩga kam maama
1
Zozwe tʋʋnɩ dɩm kwaga nɩ, Yisɩrayɛlɩ tiinə bam ma bwe sɩ ba lwarɩ Baŋa-Wɛ wʋbʋŋa yɩ ba wɩ: «Yisɩrayɛlɩ dwiə yam wʋnɩ dwi dɔɔ mʋ wʋ́ loori yigə sɩ ba zaŋɩ najara dɩ Kaanan tiinə bam?»2 Baŋa-Wɛ ma ləri DƖ wɩ: «Zuda dwi tiinə bam mʋ wʋ́ da yigə ba vu ba jeeri-ba dɩ najara. Amʋ nan wʋ́ pa ba di-ba yɩ ba daarɩ ba taa te tɩga kam.»
3 Zuda tiinə bam ma vu Simeyon tiinə bam te, ba na yɩ cʋrrʋ tɩn ŋwaanɩ, yɩ ba ta wɩ: «Kaanan tiinə mʋ zʋʋrɩ tɩga kalʋ Baŋa-Wɛ na kwe DƖ pa dɩbam tɩn baŋa nɩ. Nan ba-na á zǝni dɩbam sɩ dɩ́ di-ba, sɩ á dɩ na lagɩ á kɩ najara á tɩga kam ŋwaanɩ sɩ dɩbam dɩ wǝli abam.» 4-5 Simeyon tiinə bam ma sɛ ba wǝli Zuda tiinə bam yɩ ba vu ba jeeri Kaanan tiinə bam dɩdaanɩ Perezi tiinə bam dɩ najara. Najara yam nan kɩ Bezeki nɩ mʋ. Kaanan dɩ Perezi tiinə kɔgɔ kʋm nan ya yɩ mʋrrʋ fugə mʋ, yɩ Baŋa-Wɛ wǝli-ba pa ba di Kaanan tiinə bam dɩdaanɩ Perezi tiinə bam maama. Zuda tiinə bam ma na Pɛ Adoni-Bezeki na wʋ mɛ seeni tɩn. Ba ma yi‑o dɩ najara, 6 yɩ Adoni-Bezeki kwaanɩ sɩ o duri o lu ba jɩŋa nɩ, yɩ o wʋ wanɩ. Ba na jaan‑o tɩn, mʋ ba goni o nu-kwɩɩrʋ tɩm dɩdaanɩ o namimbi-kwɩɩrʋ tɩm ba yagɩ. 7 Ba na jɩgɩ kǝm dɩm kʋntʋ ba kɩ tɩn, mʋ Adoni-Bezeki tagɩ o wɩ: «Amʋ dɩ ya jaanɩ pwa fusɩrpɛ mʋ a goni ba nu-kwɩɩrʋ dɩdaanɩ ba namimbi-kwɩɩrʋ tɩm, pa ba twɛ wʋdi-mumugə kalʋ amʋ na di yɩ ka siiri tɩga nɩ tɩn ba di. Wɛ zɩm laan wʋra DƖ ŋwɩ DƖ jɩnɩ mʋ a baŋa nɩ.» Ba ma ja-o ba vu Zeruzalɛm yɩ o tɩ.
8 Zuda tiinə bam ma jeeri Zeruzalɛm tɩʋ kʋm dɩ najara. Ba ma di-kʋ, yɩ ba gʋ kʋ nɔn-biə bam ba daarɩ ba zwɛ-kʋ.
9 Kaanan tiinə badonnǝ nan ya zʋʋrɩ pweeru laŋa kam nɩ mʋ, dɩ jagwiə kagʋa kam seeni, dɩdaanɩ wa-zʋʋrɩ seeni bwəəlu tɩm nɩ. Zuda tiinə bam dɛɛn ta ma zɩgɩ Zeruzalɛm nɩ ba vu ba zaŋɩ najara dɩ ba maama. 10 Ba ma pa najara yam yi Kaanan tiinə balʋ na wʋ Ebrɔn tɩʋ wʋnɩ tɩn. Pulim kam nɩ, je sɩm kʋntʋ yɩrɩ dɛɛn yɩ Kiriyat-Arba mʋ. Dáanɩ mʋ ba di Sesayi, dɩ Ahiman dɩdaanɩ Taliməyi dɩ ba dwi dɩm maama.
11 Zuda tiinə bam daa ma zɩgɩ dáanɩ ba vu sɩ ba jeeri Debiri tiinə dɩ najara. Pulim nɩ tɩn, tɩʋ kʋm kʋntʋ yɩrɩ dɛɛn mʋ yɩ Kiriati-Sɩferɩ. 12 Zuda dwi tu dɩdʋa yɩrɩ mʋ Kalɛbɩ. O dɛɛn ma ta o wɩ: «Amʋ wʋ́ kwe a bukɔ Akisa a pa nɔɔnʋ wʋlʋ maama na wʋ́ wanɩ o vu o kɩ najara dɩdaanɩ Kiriati-Sɩferɩ tiinə bam yɩ o wanɩ-ba tɩn.» 13 Kenazɩ bu Ɔtiniyɛlɩ dɛɛn ma vu o kɩ najara yam, yɩ o wanɩ tɩʋ kʋm nɔɔna bam. Kenazɩ dɩ yɩ Kalɛbɩ nyaanɩ mʋ. O ma kwe o bukɔ Akisa o pa Ɔtiniyɛlɩ, sɩ o di o ma o ji o kaanɩ.
14 Kadri dɩm maŋa kam nɩ mʋ, Akisa tagɩ dɩ o barʋ wʋm sɩ ba beeri tɩga ba joŋi o ko wʋm tee nɩ. O dɛɛn ma di bɩnaga o vu o tu o ko yigə nɩ, yɩ o ko bwe‑o o wɩ: «Bɛɛ mʋ nmʋ lagɩ sɩ a kɩ a pa‑m?» 15 Akisa ma lǝr-o o wɩ: «A loori sɩ n kɩ-nɩ zaanɩ mʋ. Nmʋ na pɛ-nɩ tɩga kalʋ tɩn yɩ kagʋa yɩranɩ mʋ. Kʋntʋ tɩn, a lagɩ sɩ n beeri buli-yiə je mʋ n pa-nɩ.» Kalɛbɩ ma beeri buli-yiə je o pa‑o, jazɩm baŋa seeni dɩ jagwiə seeni maama.
16 Moyisi tɩmbaarʋ dwi dɩm mʋ yɩ Kɛnɩ tiinə bam. Ba ma zɩgɩ Zerikoa nɩ ba wǝli dɩdaanɩ Zuda tiinə bam yɩ ba vu Zuda kagʋa kam jagwiə seeni. Ba maa zʋʋrɩ Arada nɩ dɩdaanɩ je sɩm kʋntʋ nɔɔna bam.
17 Zuda dwi dɩm ma nuŋi ba wǝli Simeyon dwi dɩm yɩ ba vu ba zaŋɩ najara dɩ Kaanan tiinə balʋ na zʋʋrɩ Zefatɩ nɩ tɩn. Ba ma di tɩʋ kʋm kʋntʋ yɩ ba yɔɔrɩ ba cɔgɩ-kʋ pa kʋ ji Wɛ nyɩm. Kʋntʋ ŋwaanɩ mʋ ba laan bəŋi tɩʋ kʋm kʋntʋ yɩrɩ nɩ ‹Horama›.b 18 Zuda tiinə bam ta ma di Gaza, dɩ Asekelon, dɩ Ekoron, tɩɩnɩ dɩm kʋntʋ maama dɩdaanɩ dɩ nawuurə yam.
19 Baŋa-Wɛ dɛɛn mʋ wǝli Zuda tiinə bam yɩ ba di tɩɩnɩ dɩlʋ maama na wʋ pweeru laŋa kam nɩ tɩn. Sɩ kʋ na yɩ Kaanan tiinə balʋ na zʋʋrɩ bwəəlu tɩm seeni tɩn, ba dɛɛn wʋ wanɩ bantʋ ba di, nɔɔna bam kʋntʋ na maɩ luuru mʋ ba kɩ jara-kǝm tərikooru tɩn ŋwaanɩ. 20 Moyisi na pɛ ni sɩ ba kɩ te tɩn mʋ ba dɩ kɩa. Ba kwe Ebrɔn mʋ ba pa Kalɛbɩ. Wʋntʋ dɩ dɛɛn ya zəli Anakɩ biə batɔ bam mʋ o daarɩ je sɩm kʋntʋ o joŋi o te. 21 Bɛnzamɛn dwi tiinə bam dɛɛn wʋ wanɩ sɩ ba zəli Yebusi tiinə bam. Nɔɔna bam kʋntʋ zʋʋrɩ Zeruzalɛm nɩ mʋ, yɩ dɩ zɩm maama, Yebusi tiinə bam gwaanɩ dɩ Bɛnzamɛn tiinə bam mʋ ba zʋʋrɩ tɩʋ kʋm kʋntʋ nɩ.
22-23 Zʋzɛfʋ dwi tiinəc bam dɩ ma vu ba jeeri Betɛlɩ dɩ najara. Pulim nɩ tɩn tɩʋ kʋm yɩrɩ yɩ Luuzi mʋ. Baŋa-Wɛ dɛɛn ma wǝli-ba. Ba ma tʋŋɩ nɔɔna sɩ ba vu ba ŋɔ ba nii tɩʋ kʋm na yɩ te tɩn. 24 Balʋ na ve sɩ ba ŋɔ ba nii tɩn ma na nɔɔnʋ na zɩgɩ tɩʋ kʋm wʋnɩ o maa nuŋǝ. Ba dɛɛn ma ta ba wɩ: «Nmʋ na brɩ dɩbam cwǝŋǝ sɩ dɩ́ wanɩ dɩ́ zʋ abam tɩʋ kʋm wʋnɩ, dɩ́ bá kɩ-m kʋlʋkʋlʋ dɩ́ cɔgɩ.» 25 Nɔɔnʋ wʋm ma sɩɩnɩ o brɩ-ba cwǝŋǝ kam, yɩ ba dɩ vu ba zʋ tɩʋ kʋm wʋnɩ ba gʋ kʋ nɔn-biə maama yɩ ba yagɩ nɔɔnʋ wʋm dɩ o digə tiinə sɩ ba taa ŋwɩ. 26 Nɔɔnʋ wʋm laan ma vu o zʋʋrɩ Hɛtɩ tiinə bam laŋa nɩ. O dɛɛn lɔgɩ tɩʋ mʋ yɩ o bəŋi kʋ yɩrɩ nɩ Luuzi. Tɩʋ kʋm ta jɩgɩ yɩrɩ dɩm kʋntʋ dɩ zɩm maama.
27 Manasɩ dwi dɩm dɛɛn wʋ wanɩ sɩ ba zəli Bɛtɩ-San tiinə bam, naa Taanakɩ tiinə bam, naa Dora tiinə bam, naa Ibɩleyam tiinə bam, na Megido tiinə bam dɩdaanɩ balʋ maama na zʋʋrɩ tɩɩnɩ dɩm nawuurə yam nɩ tɩn. Bɛŋwaanɩ, Kaanan tiinə bam maa paarɩ ba maŋɩ tɩʋ kʋm kʋntʋ nɩ ba zʋʋra. 28 Yisɩrayɛlɩ tiinə bam maa na tu ba dana maŋa kalʋ tɩn, ba fɩn Kaanan tiinə bam sɩ ba taa tʋŋɩ tɩtʋŋ-cɛɛra mʋ ba pa-ba. Ba nan ya wʋ zəli ba maama ba ti.
29 Kaanan tiinə badonnǝ dɩ dɛɛn zʋʋrɩ Gezɛrɩ nɩ, yɩ Efrayim dwi dɩm wʋ zəli-ba. Kaanan tiinə bam dɛɛn ma lɛɛrɩ ba zʋʋrɩ dɩ ba. 30 Zabulɔn tiinə bam dɩ maa wʋ zəli Kaanan tiinə balʋ na zʋʋrɩ Kitiron nɩ dɩdaanɩ Nahalali nɩ tɩn. Ba yagɩ-ba mʋ pa ba tɔgɩ ba zʋʋrɩ dɩ ba yɩ ba laan fɩn-ba sɩ ba taa tʋŋɩ tɩtʋŋ-cɛɛra ba pa-ba. 31 Asɛɛrɩ dwi dɩm maa wʋ zəli Kaanan nɔɔna balʋ na zʋʋrɩ Akoo, dɩ Sidɔn, dɩ Ahalabi, dɩ Akisiba, dɩ Heliba, dɩ Afɛkɩ, dɩ Rehɔbɩ tɩɩnɩ dɩm wʋnɩ tɩn mʋ, 32 pa ba tɔgɩ ba zʋʋrɩ dɩ ba. 33 Nɛfitali dwi tiinə dɩ maa wʋ zəli balʋ na zʋʋrɩ Bɛtɩ-Sɩmesa dɩ Bɛtɩ-Anata nɩ tɩn. Kʋ ma pa Nɛfitali tiinə bam dɩdaanɩ tɩga kam kʋntʋ nɔɔna bam lɛɛrɩ ba zʋʋrɩ daanɩ. Nɛfitali tiinə bam dɛɛn za fɩn tɩɩnɩ dɩm kʋntʋ tiinə bam mʋ sɩ ba taa tʋŋɩ tɩtʋŋ-cɛɛra ba pa-ba. 34 Amɔɔrɩ tiinə bam dam dɛɛn dwe Dan dwi dɩm dam. Ba ma cɩ-ba ba yagɩ pweeru laŋa kam nɩ pa ba daa wʋ wanɩ sɩ ba tu ba ba bwəəlu tɩm seeni. 35 Amɔɔrɩ tiinə bam dɛɛn ma yɔɔrɩ ba maŋɩ Ayalɔn nɩ, dɩ Saalibim nɩ, dɩdaanɩ Heresi Piu kʋm seeni ba zʋʋra. Kʋ daarɩ maŋa kalʋ Zʋzɛfʋ dwi dɩm na tu ba na dam tɩn, mʋ ba fɩn Amɔɔrɩ tiinə sɩ ba taa tʋŋɩ tɩtʋŋ-cɛɛra ba pa-ba. 36 Amɔɔrɩ tiinə bam tɩga kam sisəm dɛɛn zɩgɩ pweeru cwǝŋǝ kalʋ ba na bǝi nɩ ‹Nɔŋɔ cwǝŋǝ› tɩn mʋ, ka vu ka tɔgɩ Siloe seeni ka kɛ yigə.