Cam dɩlʋ na kweeli tɩn
11
Baŋa-Wɛ dɛɛn ma ta Moyisi DƖ wɩ: «Amʋ laan lagɩ a pa cam dɩdwɩ mʋ yi Ezipi Pɛ wʋm dɩ o nɔɔna bam sɩ kʋ kweeli. A na kɩ kʋntʋ, oó pa abam cwǝŋǝ sɩ á viiri. O nan lagɩ o zəli abam mʋ sɩ á nuŋi á daarɩ o tɩʋ kʋm. 2 Nan ta dɩ Yisɩrayɛlɩ tiinə bam sɩ ba vu ba tikəri nɔɔna bam te ba bwe ba joŋi səbu-sɩŋa dɩdaanɩ səbu-poŋo wǝǝnu. Ba baara dɩ ba kaana maama wʋ́ kɩ kʋntʋ mʋ.»3 Baŋa-Wɛ dɛɛn nan kɩ sɩ Ezipi tiinə bam mʋ taa nɩgɩ Yisɩrayɛlɩ tiinə bam. Kʋ ta na yɩ Moyisi, Ezipi tɩʋ nakwa bam dɩdaanɩ kʋ nɔn-biə bam kwǝni ba nii‑o nɩ o yɩ nɔn-kamunu mʋ.
4 Moyisi dɛɛn ma ta dɩ Pɛ wʋm o wɩ: «Baŋa-Wɛ ni dɩm mʋ tɩntʋ:
Tɩtɩɩ kʋnkʋrʋ nɩ, amʋ Baŋa-Wɛ wʋ́ tɔgɩ Ezipi tɩʋ kʋm baŋa nɩ a kɛ. 5 Ezipi tɩʋ bəkər-kwɩa dwi maama wʋ́ tɩ. Pɛ wʋlʋ na sagɩ paarɩ jangɔŋɔ kʋm nɩ tɩn bu-kwɩan wʋ́ tɩ, yɩ gaba-kana kam na cʋɩ muni tɩn dɩ bəkər-kwɩa dɩ tɩ. Vara balʋ ba na lʋgɩ dayigǝ tɩn dɩ maa wʋ́ tɩ. 6 Ezipi tɩʋ ni maama lagɩ kʋ taa yɩ mʋ ŋɔɔ dɩ kərə. Ba ta wʋ fɔgɩ ba na kərə kalʋ dwi na wʋ́ tʋ tɩʋ kʋm nɩ tɩn, yɩ ka dwi nan daa bá ba. 7 Kʋ nan na yɩ Yisɩrayɛlɩ tiinə bam na zʋʋrɩ mɛ tɩn, kakurə tɩtɩ bá we ka fugi nabiinǝ naa vara. Kʋntʋ mʋ wʋ́ pa abam lwarɩ nɩ amʋ Baŋa-Wɛ mʋ pɛ pʋpwara wʋra Ezipi tiinə dɩ Yisɩrayɛlɩ tiinə tɩtarɩ nɩ.»
8 Moyisi daa ta ma ta dɩ Pɛ wʋm o wɩ: «Nmʋ nakwa bam laan wʋ́ ba amʋ te mʋ ba kuni doonə tɩga nɩ ba loori-nɩ sɩ a ja a nɔɔna bam maama a viiri. Kʋ kwaga nɩ mʋ amʋ wʋ́ sɩɩnɩ a viiri.» Moyisi na tagɩ kʋntʋ tɩn, o banɩ ma tiini dɩ zaŋɩ. O ma nuŋi Pɛ wʋm te o kɛ o daarɩ‑o.
9 Baŋa-Wɛ dɛɛn tagɩ dɩdaanɩ Moyisi DƖ wɩ: «Pa-farʋ wʋm bá sɛ o cəgi nmʋ taanɩ dɩm. Kʋʋ́ pa amʋ na pwələ sɩ a tiini a tʋŋɩ wo-kɩnkagɩla zanzan Ezipi tiinə tee nɩ.» 10 Moyisi dɩdaanɩ Arɔn dɛɛn sɩɩnɩ ba kɩ wo-kɩnkagɩla yantʋ maama mʋ Ezipi Pa-farʋ wʋm yibiyə nɩ. Dɩ kʋntʋ maama dɩ, Baŋa-Wɛ dɛɛn ta pɛ pɛ wʋm bɩcarɩ dana mʋ.a Pɛ wʋm dɛɛn ma vɩn sɩ o pa Yisɩrayɛlɩ tiinə bam cwǝŋǝ sɩ ba nuŋi da o tɩʋ kʋm nɩ ba viiri.