8. Kayɩra
10
Baŋa-Wɛ ma ta Moyisi DƖ wɩ: «Joori n vu Ezipi Pɛ wʋm te. A nan pɛ o dɩ o nakwa bam bɩcara dana mʋ, sɩ a wanɩ a da kʋ baŋa nɩ a kɩ wo-kɩnkagɩla yantʋ sɩ ba na. 2 Kʋ ta wʋ́ pa abam jwa lwǝni á brɩ á biə dɩdaanɩ ba dɩ biə, sɩ ba lwarɩ amʋ na kɩ te a waarɩ Ezipi tiinə bam dɩ wo-kɩnkagɩla yalʋ a na kɩ ba tɩtarɩ nɩ tɩn. Abam maama laan wʋ́ lwarɩ nɩ amʋ mʋ yɩ Baŋa-Wɛ.»3 Moyisi dɩ Arɔn dɛɛn ma vu Ezipi Pɛ wʋm te ba ta dɩd-o ba wɩ: «Baŋa-Wɛ na yɩ Ebru tiinə bam Wɛ dɩm tɩn ni dɩm mʋ tɩntʋ:
Nmʋ wʋ́ vɩn sɩ n gooni n tɩtɩ amʋ yigə nɩ taan sɩ n vu n maŋɩ yən mʋ? Pa a nɔɔna bam cwǝŋǝ sɩ ba viiri sɩ ba taa waɩ ba zuli-nɩ. 4 Nmʋ nan ta na vɩn sɩ n pa-ba pwələ, amʋ wʋ́ pa kayɩra jwa ba ka daanɩ n tɩʋ kʋm. 5 Kayɩra kam lagɩ ka məəli je maama mʋ, pa abam daa bá taa naɩ tɩga kam. Ka maa wʋ́ dəlimi woŋo kʋlʋ maama ta na daarɩ yɩ dʋ-kambana yam wʋ cɔgɩ-kʋ tɩn, kʋ wǝli dɩ tweeru tɩlʋ maama ta na nuŋi á tɩga kam nɩ tɩn. 6 Ka lagɩ ka məəli á sam maama mʋ, nmʋ tɩtɩ sɔŋɔ kʋm, dɩ n nakwa bam sam dɩm, dɩ n nɔn-biə bam sam dɩm maama. Kʋ na zɩgɩ á nabaara maŋa nɩ sɩ kʋ yi zɩm tɩn, kayɩra dwi dɩm kʋntʋ ta wʋ fɔgɩ ka yʋ á tɩʋ kʋm nɩ.»
Moyisi laan ma pipiri o nuŋi o daarɩ Pa-farʋ wʋm.
7 Pɛ wʋm nakwa bam ma ta dɩd-o ba wɩ: «Baarʋ wʋntʋ lagɩ o yaarɩ dɩbam sɩ kʋ vu kʋ kwaarɩ maŋa kɔɔ mʋ? Nan pa nɔɔna bam cwǝŋǝ sɩ ba vu ba zuli ba Tu Baŋa-Wɛ. Nmʋ ta wʋ maanɩ nɩ dɩ́ tɩʋ kʋm maama cɔgɩ nɔɔnʋ wʋntʋ ŋwaanɩ mʋ na?» 8 Ba ma bəŋi Moyisi dɩ Arɔn sɩ ba joori ba ba Pɛ wʋm te. O ma ta dɩ ba o wɩ: «Tɔ, cwǝŋǝ laan wʋra sɩ á vu á zuli á Tu Baŋa-Wɛ. Sɩ abam bran mʋ wʋ́ tɔgɩ ba vu?» 9 Moyisi dɛɛn ma ləri o wɩ: «Dɩbam maama mʋ wʋ́ vu. Kʋʋ́ taa yɩ dɩ́ nɔn-dʋnnʋ dɩdaanɩ nankwɩn maama, kʋ wǝli dɩ dɩ́ bu-baara dɩdaanɩ dɩ́ bukwa maama. Dɩ́ ta wʋ́ kwe dɩ́ bʋnɩ, dɩ dɩ́ peeni, dɩdaanɩ dɩ́ naanɩ dɩm maama. Bɛŋwaanɩ, dáanɩ mʋ dɩ́ maŋɩ sɩ dɩ́ vu dɩ́ di candiə dɩ́ zuli Baŋa-Wɛ.» 10 Pɛ wʋm ma ta o wɩ: «Baŋa-Wɛ sɩɩnɩ DƖ wʋ́ taa wʋ á tee nɩ mʋ nɩnɛɛnɩ amʋ na sɛ sɩ abam kaana dɩ á biə bam tɔgɩ ba vu! Tɩntʋ yɔɔrɩ kʋ brɩ nɩ á bʋŋɩ sɩ á kɩ lwarɩm mʋ. 11 Kʋ bá kɩ! Abam na loori cwǝŋǝ sɩ á vu á zuli Baŋa-Wɛ tɩn, á baara bam yɩranɩ mʋ wʋ́ vu.» Ba dɛɛn ma zəli Moyisi dɩ Arɔn sɩ ba nuŋi da Pɛ wʋm yigə nɩ.
12 Baŋa-Wɛ ma ta dɩ Moyisi DƖ wɩ: «Zǝŋi n jɩŋa n jeeri Ezipi tɩʋ kʋm baŋa, sɩ kayɩra kam laan ba sɩ məəli je maama sɩ dəlimi ga-zuru dwi maama ta na wʋ tɩga kam nɩ yɩ dʋ-kambana yam wʋ cɔgɩ tɩn.» 13 Moyisi ma zǝŋi o nacəgə kam o jeeri Ezipi tɩʋ kʋm baŋa. Dɛ dɩm kʋntʋ nɩ mʋ Baŋa-Wɛ dɛɛn pɛ viu nuŋi wa-puli seeni kʋ ba kʋ jeeri lʋgʋ kʋm. Kʋ dɛɛn dʋlɩ wɩa dɩ tɩtɩɩ maama mʋ. Tɩga dɛɛn na jɩgɩ ka pʋʋrɩ tɩn, dɩ viu kʋm jaanɩ kayɩra kam kʋ ba. 14 Sɩ kɔgɔ dɛɛn tiini sɩ gaalɩ zanzan, yɩ sɩ məəli tɩʋ kʋm tɩga kam maama. Ezipi tiinə ta wʋ fɔgɩ ba na kayɩra kam kʋntʋ dwi. Ka dwi dɩm kʋntʋ dɩ daa bá ba maŋa dɩ maŋa. 15 Kayɩra kam dɛɛn ma kwǝli tɩga kam maama pa ka zwəri liirə liirə. Sɩ ma di kʋlʋ maama dʋ-kambana yam na daarɩ tɩn. Kʋ maa yɩ tweeru biə maama, dɩ ga-zuru, dɩ ba kaagɩ wʋdiiru maama mʋ. Ezipi wʋnɩ kʋlʋkʋlʋ dɛɛn daa wʋ daarɩ yɩ kʋ jɩgɩ zurim.
16 Pa-farʋ wʋm ma kɩ lɩla o tʋŋɩ o bəŋi Moyisi dɩ Arɔn yɩ o wɩ: «Amʋ tusi abam yigə nɩ dɩ á Tu Baŋa-Wɛ dɩm yigə nɩ. 17 Nan yagɩ-na a tusim dɩntʋ á ma á cɛ-nɩ, sɩ á daarɩ á loori á Tu Baŋa-Wɛ sɩ DƖ pa cam dɩntʋ kɛ dáa sɩ a sin.» 18 Moyisi ma nuŋi Pɛ wʋm tee nɩ yɩ o vu o loori Baŋa-Wɛ. 19 Baŋa-Wɛ ma pa vu-dɩʋ kʋm pipiri kʋ nuŋi wa-zʋʋrɩ seeni. Kʋ ma dʋlɩ kʋ kalɩ kayɩra kam maama kʋ ja kʋ vu kʋ yagɩ Nanɩ-sʋŋʋ kʋm nɩ. Kayɩra dɩdʋa tɩtɩ dɛɛn daa wʋ daarɩ Ezipi tɩʋ kʋm nɩ. 20 Baŋa-Wɛ dɛɛn daa ta ma pa Pa-farʋ wʋm bɩcarɩ dana mʋ. O ma vɩn sɩ o pa Yisɩrayɛlɩ tiinə bam cwǝŋǝ sɩ ba viiri.
9. Lim
21 Baŋa-Wɛ dɛɛn ta ma ta dɩ Moyisi DƖ wɩ: «Twɩ n jɩŋa n yɔɔrɩ wɛyuu nɩ sɩ lim ba dɩ kwǝli Ezipi tɩga kam baŋa maama. Lim dɩm wʋ́ tiini dɩ zʋ nɔɔna bam yɩra.» 22 Moyisi ma twɩ o jɩŋa o yɔɔrɩ wɛyuu nɩ. Ezipi tɩga kam baŋa maama ma tiini ka kɩ lim, sɩ kʋ maŋɩ dɩ da yatɔ. 23 Kantʋ maŋa kam nɩ, Ezipi tiinə bam dɛɛn daa ba nii ba naɩ da-je. Nɔɔn-nɔɔnʋ maa warɩ sɩ o nuŋi o sɔŋɔ nɩ o vu je je. Sɩ kʋ na yɩ Yisɩrayɛlɩ tiinə bam na zʋʋrɩ mɛ tɩn, pooni dɛɛn mʋ wʋra je sɩm kʋntʋ nɩ.
24 Ezipi Pɛ wʋm dɛɛn ma bəŋi Moyisi yɩ o wɩ: «Cwǝŋǝ laan wʋra sɩ á vu á zuli á Baŋa-Wɛ dɩm. Abam biə dɩ á kaana wʋ́ wanɩ ba tɔgɩ ba vu. Nan yagɩ-na á vara bam yo sɩ á vu.» 25 Moyisi ma ləri o wɩ: «Nmʋ maŋɩ sɩ n yagɩ cwǝŋǝ mʋ sɩ dɩ́ ja vara bam dɩ́ vu dɩ́ ma kɩ kaanɩm, yɩ dɩ́ zwɛ-ba dɩ́ pa dɩbam Tu Baŋa-Wɛ. 26 Dɩ́ wʋ́ ja dɩ́ vara bam maama mʋ dɩ́ wǝli da dɩ́ vu. Varɩm dɩdwɩ tɩtɩ bá daarɩ Ezipi tɩga kam baŋa nɩ. Dɩbam maŋɩ sɩ dɩ́ kuri kaanɩm vara mʋ sɩ dɩ́ taa maɩ dɩ́ zuli dɩ́ Tu Baŋa-Wɛ. Dɩ́ na wʋ yi je sɩm, dɩ́ bá lwarɩ varɩm dɩ varɩm wʋlʋ dɩ́ na wʋ́ lɩ dɩ́ ma kɩ kaanɩm dɩ́ pa Baŋa-Wɛ tɩn.»
27 Baŋa-Wɛ ta ma pa Pa-farʋ wʋm bɩcarɩ dana mʋ. Pɛ wʋm dɛɛn wʋ sɛ sɩ o pa Yisɩrayɛlɩ tiinə bam cwǝŋǝ sɩ ba viiri. 28 O ma ta dɩ Moyisi o wɩ: «Lagɩ je da amʋ yigə nɩ! Nan fɔgɩ n nii n yuu nɩ, sɩ dɛ dɩm nmʋ daa na wʋ́ joori n ba amʋ yigə nɩ tɩn, n lagɩ n tɩ mʋ.» 29 Moyisi dɩ ma ləri o wɩ: «Dɩ́ nan zɩgɩ n kwǝrǝ kam kwaga nɩ. Nmʋ sɩɩnɩ n daa n bá na amʋ.»