5. Vara tʋʋnɩ
9
Baŋa-Wɛ dɛɛn daa ma ta dɩ Moyisi DƖ wɩ: «Ve Pa-farʋ wʋm te n ta nɩ: ‹Baŋa-Wɛ na yɩ Ebru tiinə bam Wɛ dɩm tɩn ni dɩm mʋ tɩntʋ:Pa amʋ nɔɔna bam cwǝŋǝ sɩ ba viiri, sɩ ba vu ba zuli-nɩ. 2 Nmʋ nan na wʋ sɛ sɩ ba viiri, yɩ n cəŋi-ba, 3 Baŋa-Wɛ wʋ́ ma DƖ dam DƖ ja yawɩ-cɛɛrʋ mʋ DƖ ba DƖ yagɩ á vara bam maama baŋa nɩ. Kʋ na yɩ á sise, dɩ á bɩnɛ, dɩ á yogondə, dɩ á naanɩ, dɩ á peeni, dɩdaanɩ á bʋnɩ, yawɩɩrʋ wʋ́ ja tɩ maama pa tɩ tɩ. 4 Baŋa-Wɛ nan wʋ́ pa pʋpwara mʋ taa wʋra Ezipi tiinə vara bam dɩdaanɩ Yisɩrayɛlɩ tiinə vara bam tɩtarɩ nɩ. Kʋ na yɩ Yisɩrayɛlɩ tiinə vara bam mʋ, ba dɩdʋa tɩtɩ ba lagɩ o tɩ.
5 Baŋa-Wɛ maŋɩ DƖ tiŋi dɛ mʋ sɩ kʋ kɩ kʋntʋ, yɩ DƖ ta wɩ: Jwaanɩ, wʋm wʋ́ pa kʋ kɩ Ezipi tɩʋ nɩ.› »
6 Tɩga dɛɛn na pʋʋrɩ tɩn, Baŋa-Wɛ ma sɩɩnɩ DƖ kɩ DƖ na wuuri DƖ ta te tɩn. Ezipi tiinə vara bam maama ma tɩ. Sɩ kʋ na yɩ Yisɩrayɛlɩ tiinə vara bam, dɩdʋa tɩtɩ dɛɛn wʋ tɩgɩ. 7 Pɛ wʋm ma tʋŋɩ nɔɔna sɩ ba nii. O ma maanɩ nɩ Yisɩrayɛlɩ tiinə vara bam dɩdʋa tɩtɩ wʋ tɩgɩ. Dɩ kʋntʋ dɩ, o bɩcarɩ ta dana mʋ, yɩ o vɩn sɩ o pa nɔɔna bam cwǝŋǝ sɩ ba viiri.
6. Ŋwan-pwəm
8 Baŋa-Wɛ daa ma ta dɩ Moyisi dɩ Arɔn DƖ wɩ: «Zwɛ-na tɩntwarɩm, sɩ á ja á vu Pɛ wʋm te. Abam na yi da, sɩ Moyisi zɩgɩ pɛ wʋm yigə nɩ o dʋlɩ tɩntwarɩm dɩm o yagɩ wɛɛnɩ. 9 Tɩntwarɩm dɩm wʋ́ ji fogo mʋ wɛyuu nɩ yɩ tɩ jagɩ tɩ yi Ezipi tɩʋ kʋm maama. Kʋ ta wʋ́ pa ŋwan-pwəm jǝni nabiinǝ dɩdaanɩ vara yɩra nɩ sɩ yaarɩ-ba lʋgʋ kʋm je maama nɩ.» 10 Ba ma sɩɩnɩ ba kwe tɩntwarɩm dɩm ba ja vu Pɛ wʋm te. Moyisi laan ma kwe-tɩ o ta o yagɩ wɛɛnɩ, yɩ tɩ pa ŋwan-pwəm jǝni nabiinǝ dɩdaanɩ vara yɩra nɩ sɩ yaarɩ-ba. 11 Liri kərə bam dɛɛn wʋ wanɩ ba vu ba zɩgɩ Moyisi yigə nɩ, ŋwan-pwəm sɩm na lǝgi ba yɩra nɩ, dɩ Ezipi tiinə bam maama yɩra nɩ tɩn ŋwaanɩ. 12 Baŋa-Wɛ dɛɛn ma pa Pɛ wʋm bɩcarɩ taa dana, yɩ o wʋ sɛ sɩ o cəgi Moyisi dɩ Arɔn taanɩ. Baŋa-Wɛ nan maŋɩ DƖ ta dɩ Moyisi nɩ kʋʋ́ taa yɩ kʋntʋ mʋ.
7. Dʋ-kambana
13 Baŋa-Wɛ dɛɛn ma ta dɩ Moyisi DƖ wɩ: «Jwa zɩzɩŋa nɩ sɩ n vu n jeeri Pɛ wʋm n cɩ o cwǝŋǝ n ta dɩd-o n wɩ: ‹Baŋa-Wɛ na yɩ Ebru tiinə bam Wɛ dɩm tɩn ni dɩm mʋ tɩntʋ:
Pa a nɔɔna bam cwǝŋǝ sɩ ba viiri sɩ ba vu ba zuli-nɩ. 14 Nmʋ na wʋ sɛ, amʋ laan wʋ́ pa cam tiini dɩ yi nmʋ tɩtɩ yɩra, kʋ wǝli dɩ n nakwa bam dɩ n nɔn-biə bam maama. Kʋ maa wʋ́ pa nmʋ lwarɩ nɩ nɔɔn-nɔɔnʋ tǝrǝ lʋgʋ baŋa nɩ o na maŋɩ dɩ amʋ. 15 Amʋ yi sɩ a kwe a jɩŋa a magɩ nmʋ dɩ n nɔn-biə bam maama pa yawɩ-cɛɛrʋ tiini tɩ ja abam. Amʋ ya na kɩ kʋntʋ, abam dwi dɩm yaá saarɩ lʋgʋ kʋm baŋa nɩ. 16 Kʋ nan na yɩ te tɩn, woŋo kʋlʋ ŋwaanɩ amʋ na pɛ cwǝŋǝ sɩ n tan wʋra tɩn mʋ yɩ sɩ a tɔgɩ nmʋ ŋwaanɩ a brɩ nɔɔna a dam dɩm na maɩ te tɩn, yɩ a daarɩ a joŋi yɩrɩ lʋgʋ baŋa je maama nɩ.a 17 Nmʋ nan ta paɩ n tɩtɩ kamunni mʋ yɩ n cəŋi amʋ nɔɔna bam sɩ ba yɩ viiri. 18 Ta n ye nɩ: amʋ jwa wʋ́ pa dʋ-kambana tiini ya tʋ á tɩga kam nɩ. Kʋ na zɩgɩ Ezipi tɩʋ kʋm pulim nɩ tɩn sɩ kʋ yi zɩm, kʋ dwi ta wʋ fɔgɩ kʋ kɩ. 19 Nan pa n nɔɔna bam ni sɩ ba ja ba vara dɩdaanɩ ba wǝǝnu tɩlʋ maama na wʋ pooni yigə nɩ tɩn, ba ba ba kɩ ba sam dɩm wʋnɩ. Bɛŋwaanɩ, dʋ-kambana yam wʋ́ vwe vara dɩ nabiinǝ balʋ maama na wʋ pooni yigə nɩ tɩn mʋ pa ba maama tɩ.› »
20 Pɛ wʋm nakwa badaara dɛɛn ma fʋnɩ dɩ Baŋa-Wɛ taanɩ dɩm. Bantʋ ma kɩ lɩla ba vu ba pa ba gambɛ sɩm dɩdaanɩ ba vara maama ba ba zʋ sam dɩm wʋnɩ. 21 Ba badonnǝ yigə dɛɛn tǝrǝ dɩ Baŋa-Wɛ taanɩ dɩm yɩ ba yagɩ ba gambɛ sɩm dɩ ba vara bam pwələ nɩ.
22 Baŋa-Wɛ ma ta dɩ Moyisi o wɩ: «Twɩ n jɩŋa n yɔɔrɩ wɛyuu nɩ, sɩ dʋ-kambana laan tɩn Ezipi tɩʋ kʋm maama nɩ. Ya lagɩ ya tʋ ya magɩ nabiinǝ, dɩ vara, dɩdaanɩ wʋdiiru tɩlʋ na wʋ Ezipi tiinə karɩ sɩm nɩ tɩn mʋ.» 23 Moyisi dɛɛn ma twɩ o nacəgə kam wɛyuu nɩ. Baŋa-Wɛ ma tʋŋɩ dʋ-baga, dɩdaanɩ dʋ-kambana. Dʋa kam daa ta ma pɩpɩlɩ ka bagɩ tɩga kam. Baŋa-Wɛ dɛɛn ma pa dʋ-kambana tiini ya tʋ Ezipi tɩʋ kʋm nɩ.b 24 Ka ma tiini ka wuuri je maama, yɩ ka ta pɩpɩlɩ taan. Kʋ na zɩgɩ Ezipi tɩʋ kʋm pulim nɩ tɩn, dʋ-fara kʋntʋ dwi ta wʋ fɔgɩ kʋ kɩ lʋgʋ kʋm nɩ. 25 Dʋ-kambana yam dɛɛn ma magɩ woŋo kʋlʋ maama na wʋ Ezipi tɩʋ kʋm pooni yigə nɩ tɩn. Ya dɛɛn cɔgɩ nabiinǝ dɩ vara maama, yɩ ya ta cɔgɩ wʋdiiru dɩ tweeru tɩlʋ maama na nuŋi tɩga kam baŋa nɩ tɩn. 26 Kʋ daarɩ Gozɛnɩ laŋa kam yɩranɩ mʋ, dʋ-kambana yam dɛɛn wʋ yi da. Dáanɩ mʋ Yisɩrayɛlɩ tiinə bam dɛɛn nan zʋʋrɩ tɩn.
27 Ezipi Pɛ dɛɛn ma tʋŋɩ o bəŋi Moyisi dɩ Arɔn yɩ o ta dɩ ba o wɩ: «Amʋ laan lwarɩ nɩ a tusi mʋ, yɩ Baŋa-Wɛ jɩgɩ cɩga. Kʋ na yɩ amʋ dɩ a nɔɔna bam, dɩbam ba jɩgɩ bʋra. 28 Nan loori-na Baŋa-Wɛ á pa dɩbam, sɩ dɩ́ yɩra laan mʋ cɛ dɩ dʋ-kambana yam dɩdaanɩ dʋ-baga kam. Amʋ dɩ laan wʋ́ pa abam pwələ sɩ á viiri. Abam daa daɩ sɩ á maŋɩ yo seeni.» 29 Moyisi ma ləri o wɩ: «Amʋ na nuŋi tɩʋ kʋm wʋnɩ, a laan wʋ́ zǝŋi a jɩan yam wɛɛnɩ a loori Baŋa-Wɛ sɩ dʋ-baga kam yagɩ bagɩm. Dʋ-kambana yam dɩ daa bá taa nɩ. Kʋntʋ mʋ wʋ́ pa nmʋ lwarɩ nɩ lʋgʋ baŋa maama yɩ Baŋa-Wɛ nyɩm mʋ. 30 Amʋ nan ye lanyɩranɩ nɩ nmʋ dɩ n nakwa bam ta ba kwarɩ Yuutu Baŋa-Wɛ.»
31 Kʋ dɛɛn na kɩ te tɩn, kanzɛc sɩm dɩ caarad yam cɔgɩ mʋ, bɛŋwaanɩ kanzɛ sɩm jɩgɩ sɩ punnu mʋ, kʋ daarɩ caara yam dɩ dɛɛn bɩgɩ. 32 Kʋ nan na yɩ bəniŋəe kam dɩdaanɩ ka dwi dɩm maama, kantʋ wʋ tɔgɩ ka cɔgɩ, ka daa ta na wʋ bɩgɩ tɩn ŋwaanɩ.
33 Moyisi ma nuŋi Pɛ wʋm tee nɩ o vu o nuŋi tɩʋ kʋm wʋnɩ. O ma vu o zǝŋi o jɩan yam Baŋa-Wɛ yigə nɩ o loori‑DƖ. Dʋ-baga kam dɩdaanɩ dʋ-kambana yam ma kwǝri. Dʋa kam dɛɛn daa wʋ nɩgɩ tɩga kam baŋa nɩ. 34 Pa-farʋ wʋm na nɛ nɩ dʋa kam dɩ dʋ-kambana yam daa ba nɩ, yɩ dʋ-baga kam dɩ daa ba bagɩ tɩn, o ma joori o tusi. O dɩ o nakwa bam maama ma pa ba bɩcara dana. 35 O bɩcarɩ na dana tɩn, o vɩn sɩ o pa Yisɩrayɛlɩ tiinə bam cwǝŋǝ sɩ ba viiri. Baŋa-Wɛ nan maŋɩ DƖ pa Moyisi lwarɩ nɩ kʋʋ́ taa yɩ kʋntʋ mʋ.