2. Yoorə
8
Baŋa-Wɛ dɛɛn ma ta dɩ Moyisi DƖ wɩ: «Ve n ta Ezipi Pɛ wʋm nɩ: ‹Baŋa-Wɛ ni dɩm mʋ tɩntʋ:Pa a nɔɔna bam cwǝŋǝ sɩ ba viiri sɩ ba taa waɩ ba zuli-nɩ. 2 Nmʋ nan na vɩn, ta n ye nɩ amʋ wʋ́ pa yoorə puli ya su nmʋ lʋgʋ kʋm je maama ya daanɩ abam. 3 Yoorə yam wʋ́ tiini ya puli ya su Nili bugə kam maama. Ya laan maa wʋ́ daarɩ ya zʋ Pɛ sɔŋɔ wʋnɩ, kʋ na yɩ nmʋ tɩtɩ digə dɩ n pwəgə je mʋ dɩ. Ya ta wʋ́ zʋ nmʋ nakwa bam dɩ sam nɩ, dɩ tɩʋ kʋm sam maama nɩ. Ya ta wʋ́ vu ya pəni á kaligwəənu wʋnɩ, dɩ á maasa fɔgɩm zwɩ sɩm wʋnɩ. 4 Yoorə yam lagɩ sɩ taa faŋɩ mʋ ya taa diini nmʋ tɩtɩ dɩ n nakwa bam dɩ n nɔn-biə bam maama baŋa.› »
5 Baŋa-Wɛ laan ma ta dɩ Moyisi DƖ wɩ: «Ta dɩ Arɔn sɩ o twɩ o nacəgə kam na wʋ o jɩŋa nɩ tɩn sɩ kʋ jeeri bwi sɩm, dɩ nabarɩ sɩm, dɩ buli sɩm maama. Kʋntʋ na kɩa, yoorə wʋ́ nuŋi bwi sɩm wʋnɩ ya faarɩ Ezipi tɩga kam maama.» 6 Arɔn ma sɩɩnɩ o twɩ o jɩŋa o jeeri na bam na tigi Ezipi je sɩlʋ maama nɩ tɩn. Yoorə ma nuŋi na bam wʋnɩ ya faarɩ Ezipi tɩga kam maama. 7 Ezipi liri-kərə bam dɩ ma kwe ba liri kikiə ba lwǝni ba kɩ kʋntʋ doŋ, pa yoorə yadonnǝ dɩ nuŋi tɩga kam baŋa nɩ.
8 Ezipi Pa-farʋ wʋm ma tʋŋɩ o bəŋi Moyisi dɩ Arɔn yɩ o ta dɩ ba o wɩ: «Loori-na Baŋa-Wɛ sɩ DƖ pa yoorə yam lagɩ je sɩ daarɩ amʋ dɩ a nɔɔna bam. Kɩ-na kʋntʋ sɩ amʋ dɩ pa abam nɔɔna bam cwǝŋǝ sɩ ba vu ba kɩ kaanɩm ba pa Baŋa-Wɛ.» 9 Moyisi ma ləri Pɛ wʋm o wɩ: «Tɔ, nan da yigə n ta n brɩ-nɩ maŋa kalʋ n na lagɩ sɩ a loori Wɛ a pa nmʋ dɩ n nakwa bam dɩ n nɔn-biə bam maama tɩn. Amʋ laan wʋ́ loori Wɛ sɩ DƖ pa yoorə yam je nmʋ dɩ n nɔɔna bam sam nɩ. Ya laan wʋ́ taa wʋ Nili bugə kam wʋnɩ yɩranɩ mʋ.» 10 Pɛ wʋm ma lǝr-o o wɩ: «Jwaanɩ sɩ n kɩ kʋntʋ.» Moyisi ma ta o wɩ: «Nmʋ nan na tagɩ te tɩn mʋ wʋ́ tʋŋɩ, sɩ nmʋ ma n lwarɩ nɩ dɩbam Tu Baŋa-Wɛ ba jɩgɩ doŋ. 11 Yoorə yam wʋ́ sɩɩnɩ ya viiri mʋ ya daarɩ nmʋ, dɩ n nakwa bam, dɩ n nɔn-biə bam, dɩ abam sam dɩm maama. Ya laan wʋ́ maŋɩ Nili bugə kam wʋnɩ yɩranɩ mʋ.»
12 Moyisi dɩ Arɔn ma nuŋi da Pɛ wʋm tee nɩ. Moyisi dɛɛn ma loori Baŋa-Wɛ yoorə yam ŋwaanɩ, dɩ DƖ na pɛ ya zaŋɩ ya daanɩ Pɛ wʋm tɩn. 13 Baŋa-Wɛ ma sɛ Moyisi wɛ-loro kʋm, yɩ DƖ pa yoorə yam tɩ. Yalʋ dɛɛn na wʋ Ezipi tiinə di sɩm wʋnɩ, dɩ ba kʋnkwallʋ tɩm wʋnɩ, dɩ ba kadwi sɩm nɩ tɩn maama ma tɩ. 14 Ezipi tiinə bam ma coori-ya ba tiŋi kurəm-kurəm zanzan. Tɩʋ kʋm maama dɛɛn cɛ mʋ dɩ yoorə yam lwəm. 15 Sɩ kʋ na yɩ Pa-farʋ wʋm, o dɛɛn na maanɩ nɩ yoorə yam daa ba yaarɩ-ba tɩn, mʋ o daa ta pɛ o bɩcarɩ dana. O daa ta wʋ sɛ sɩ o cəgi Moyisi dɩ Arɔn taanɩ dɩm, nɩ Baŋa-Wɛ na maŋɩ DƖ ta nɩ kʋʋ́ taa yɩ te tɩn.
3. Yeenə
16 Baŋa-Wɛ dɛɛn ma ta dɩ Moyisi DƖ wɩ: «Ta n brɩ Arɔn sɩ o twɩ o nacəgə kam o ma magɩ tɩga kam, sɩ Ezipi tɩga kasʋlʋ kʋm maama ji yeenə.» 17 Ba ma sɛ. Arɔn ma twɩ o jɩŋa o magɩ tɩga kam dɩ o nacəgə kam. Yeenə ma zaŋɩ ba məəli nabiinǝ dɩ vara maama. Ezipi tɩʋ kʋm ni maama kasʋlʋ dɛɛn ma ji yeenə. 18 Ezipi liri-kərə bam dɩ ma kwe ba liri kikiə ba kwaanɩ sɩ ba lwǝni ba pa yeenə ba, yɩ ba ga kʋ ŋwa. Yeenə yam dɛɛn faarɩ tɩʋ kʋm maama mʋ. 19 Liri kərə bam ma ta dɩ Pa-farʋ wʋm ba wɩ: «Wɛ kǝm mʋ tɩntʋ.» Dɩ kʋntʋ maama dɩ, Pɛ wʋm bɩcarɩ daa taa dana mʋ, yɩ o wʋ sɛ sɩ o cəgi-ba. Baŋa-Wɛ nan maŋɩ DƖ ta nɩ kʋʋ́ taa yɩ kʋntʋ mʋ.
4. Nanjwɛ
20 Baŋa-Wɛ dɛɛn ta ma ta Moyisi DƖ wɩ: «Zaŋɩ zɩzɩŋa nɩ n vu n cɩ Pɛ wʋm cwǝŋǝ maŋa kalʋ o na maa ve bugə kam ni tɩn. Laan ta dɩd-o nɩ: ‹Baŋa-Wɛ ni dɩm mʋ tɩntʋ:
Pa amʋ nɔɔna bam cwǝŋǝ sɩ ba viiri, sɩ ba vu ba zuli-nɩ. 21 Nmʋ nan na wʋ pɛ-ba cwǝŋǝ, amʋ wʋ́ tʋŋɩ nanjwɛ zanzan sɩ sɩ daanɩ nmʋ, dɩ n nakwa bam dɩ n nɔn-biə bam maama. Nanjwɛ wʋ́ su á sam, yɩ sɩ faarɩ Ezipi tɩga kam maama. 22 Sɩ kʋ na yɩ amʋ tɩtɩ nɔɔna bam ba na zʋʋrɩ Gozɛnɩ laŋa kam nɩ tɩn, nanjwɛ bá taa wʋ bantʋ je sɩm nɩ.a Amʋ na tiŋi pʋpwara kam kʋntʋ, abam wʋ́ ma á lwarɩ nɩ amʋ Baŋa-Wɛ mʋ tʋŋɩ a tɩtʋŋa tɩga baŋa yo seeni. 23 Amʋ wʋ́ pa pʋpwara kam pəni amʋ nɔɔna bam dɩ abam nɔɔna bam tɩtarɩ nɩ. Jwaanɩ mʋ amʋ wʋ́ kɩ wo-kɩnkagɩlɩ dɩm kʋntʋ.› »
24 Baŋa-Wɛ dɛɛn ma sɩɩnɩ DƖ tʋŋɩ nanjwɛ zanzan DƖ yagɩ Pɛ wʋm sɔŋɔ nɩ, dɩ o nakwa bam sam nɩ. Sɩ dɛɛn tiini sɩ cɔgɩ Ezipi tɩʋ kʋm maama. 25 Pa-farʋ wʋm ma bəŋi Moyisi dɩ Arɔn yɩ o ta dɩ ba o wɩ: «Ve-na á kaanɩ á pa á Wɛ dɩm dɩbam tɩʋ kʋntʋ nɩ yo.» 26 Moyisi ma lǝr-o wɩ: «Kʋntʋ bá wanɩ. Dɩbam na wʋ́ kwe vara dwi dɩlʋ dɩ́ ma dɩ́ kɩ kaanɩm dɩ́ pa dɩ́ Tu Baŋa-Wɛ tɩn mʋ culǝ Ezipi tiinə bam tee nɩ. Dɩbam nan na lagɩ dɩ́ kɩ kaanɩm dɩm yɩ ba na dɩbam, baá dʋlɩ dɩbam dɩ kandwa mʋ ba gʋ. 27 Dɩbam wʋ́ kwe da yatɔ mʋ dɩ́ maa zʋ kagʋa kam wʋnɩ dɩ́ kɩ kaanɩm dáanɩ dɩ́ pa dɩ́ Tu Baŋa-Wɛ. DƖ ni dɩm kʋntʋ mʋ DƖ pɛ dɩbam.»
28 Pɛ wʋm dɩ laan ma ta o wɩ: «Tɔ. Amʋ wʋ́ pa abam cwǝŋǝ sɩ á zʋ kagʋa kam wʋnɩ á kaanɩ á pa abam Tu Baŋa-Wɛ. Sɩ á yɩ ve-na yigə yigə. Nan loori-na Wɛ á pa amʋ.» 29 Moyisi ma lǝr-o o wɩ: «Amʋ na yɔɔrɩ a nuŋi yo seeni, a lagɩ a loori Baŋa-Wɛ mʋ. Jwaanɩ nanjwɛ sɩm wʋ́ yagɩ abam yɩra, Pɛ wʋm dɩ o nakwa bam dɩ o nɔɔna bam maama. Pɛ, nan ta n ye sɩ n daa n yɩ ganɩ dɩbam. Nan yɩ cɩ nɔɔna bam sɩ ba vu ba kɩ kaanɩm ba pa Baŋa-Wɛ.»
30 Moyisi dɛɛn na nuŋi o daarɩ Pɛ wʋm tɩn, o ve o loori Baŋa-Wɛ mʋ. 31 Baŋa-Wɛ ma sɛ Moyisi kwǝrǝ kam. DƖ dɛɛn ma pa nanjwɛ sɩm yagɩ Ezipi Pɛ wʋm, dɩ o nakwa bam, dɩdaanɩ o nɔn-biə bam maama. Nanjʋa dɩdʋa tɩtɩ dɛɛn daa wʋ daarɩ da. 32 Pɛ wʋm daa ta ma pa o bɩcarɩ dana. O ma vɩn sɩ o pa nɔɔna bam cwǝŋǝ sɩ ba viiri.