7
Baŋa-Wɛ laan ma ləri Moyisi DƖ wɩ: «Nii! Amʋ lagɩ a pa n ta n nyɩ dɩ Wɛ mʋ Ezipi Pɛ wʋm yigə nɩ. Nmʋ zɩmbaarʋ Arɔn wʋ́ taa yɩ nmʋ nijoŋnu sɩ o taa ŋɔɔnɩ dɩd-o.2 Nmʋ maŋɩ sɩ n ta kʋlʋ maama a na wʋ́ ŋɔɔnɩ dɩ nmʋ tɩn n brɩ n zɩmbaarʋ Arɔn. Wʋntʋ laan maa wʋ́ ta dɩ Pɛ wʋm sɩ o yagɩ cwǝŋǝ sɩ Yisɩrayɛlɩ tiinə bam viiri ba daarɩ o tɩʋ kʋm.3 Amʋ nan wʋ́ pa Pɛ wʋm bɩcarɩ taa damma. Amʋ wʋ́ pa wo-kɩnkagɩla zanzan kɩ Ezipi tiinə bam tɩtarɩ nɩ.4 Dɩ kʋntʋ dɩ, o ta bá sɛ o cəgi abam taanɩ dɩm. Amʋ laan wʋ́ ma a dam-fɔrɔ a waarɩ Ezipi tiinə bam. Kʋ kwaga nɩ, amʋ wʋ́ pa a nɔɔna bam nuŋi da tɩʋ kʋm kʋntʋ nɩ. Yisɩrayɛlɩ tiinə bam maama wʋ́ nuŋi kɔgɔ dɩ kɔgɔ.5 Kʋntʋ maama na kɩa, Ezipi tiinə bam wʋ́ lwarɩ nɩ amʋ mʋ yɩ Baŋa-Wɛ, dɩ amʋ na mɛ dam a waarɩ-ba pa Yisɩrayɛlɩ tiinə bam na cwǝŋǝ ba nuŋi ba tɩʋ kʋm nɩ tɩn ŋwaanɩ.»
6 Moyisi dɩ Arɔn ma kɩ kʋlʋ maama Baŋa-Wɛ na brɩ-ba tɩn. 7 Ba dɛɛn na ve sɩ ba ŋɔɔnɩ dɩdaanɩ Pa-farʋ wʋm tɩn, dɩ Moyisi yɩ bɩna funɔnɔ (80) mʋ. Arɔn maa yɩ bɩna funɔnɔ-yatɔ (83).
Arɔn nacəgə kam jigi bɩsankwɩa
8 Baŋa-Wɛ dɛɛn ma ta dɩ Moyisi dɩ Arɔn DƖ wɩ: 9 «Ezipi Pɛ wʋm na tagɩ o wɩ: ‹Kɩ-na wo-kɩnkagɩlɩ sɩ a nii›, sɩ n laan ta dɩ Arɔn sɩ o kwe o nacəgə kam o dʋlɩ o dɩ tɩga nɩ, Pɛ wʋm yigə nɩ. O na kɩa, ka wʋ́ ji bɩsankwɩa.» 10 Moyisi dɩ Arɔn dɛɛn ma vu ba zʋ Pa-farʋ wʋm te. Ba ma kɩ kʋlʋ maama Baŋa-Wɛ na brɩ-ba tɩn. Arɔn dɛɛn kwe o nacəgə kam mʋ o dʋlɩ o dɩ tɩga nɩ, Pɛ wʋm dɩdaanɩ o nakwa yigə nɩ. Ka ma sɩɩnɩ ka ji bɩsankwɩa. 11 Pa-farʋ wʋm ma tʋŋɩ o bəŋi o tɩʋ kʋm yiyən-yeenə dɩ kʋ liri mwaanʋ tiinə sɩ ba la daanɩ. Liri kərə bam na tu tɩn, ba dɩ ma kwe ba liri kikiə ba lwǝni ba kɩ wo-kɩnkagɩla yantʋ doŋ. 12 Ba dɩdʋa dɩdʋa dɛɛn ma dʋlɩ ba nace sɩm ba dɩ tɩga nɩ, yɩ sɩ ji bɩsankwɩ. Kʋ nan na yɩ Arɔn nacəgə kam, kantʋ dɛɛn ligi ba nace sɩm maama mʋ. 13 Ezipi Pɛ wʋm dɛɛn nɛ tɩntʋ maama, yɩ o bɩcarɩ ta dana. O dɛɛn wʋ sɛ sɩ o cəgi ba taanɩ dɩm. Baŋa-Wɛ nan maŋɩ DƖ ta nɩ kʋʋ́ taa yɩ kʋntʋ mʋ.
Cam kuni fugə
1. Jana
14 Baŋa-Wɛ ma ta dɩ Moyisi DƖ wɩ: «Ezipi Pɛ bɩcarɩ yɔɔrɩ dɩ dana mʋ, yɩ o vɩn sɩ o pa amʋ nɔɔna bam cwǝŋǝ sɩ ba viiri. 15 Jwa tɩtɩɩtɩ sɩ n kwe nacəgə kalʋ na jigi bɩsankwɩa tɩn n vu Nili bugə kam ni sɩ n jeeri Pɛ wʋm da. O na maa bɩɩnɩ maŋa kalʋ tɩn, sɩ n zɩgɩ bugə kam ni nɩ n cəg‑o. 16 O na tuǝ, sɩ n ta dɩd-o nɩ: ‹Baŋa-Wɛ dɩlʋ Ebru tiinə bam na zuli‑DƖ tɩn mʋ tʋŋɩ-nɩ sɩ a ta dɩ nmʋ sɩ n pa DƖ nɔɔna bam cwǝŋǝ sɩ ba vu kagʋa kam wʋnɩ ba zuli‑DƖ. Nmʋ nan ta wʋ sɛ sɩ n pa ba viiri. 17 Baŋa-Wɛ ni dɩm mʋ tɩntʋ:
Wɛ wʋ́ kɩ kǝm sɩ nmʋ wanɩ n lwarɩ nɩ Dɩntʋ mʋ yɩ Baŋa-Wɛ. Nii yo! Amʋ lagɩ a kwe nacəgə kantʋ a na ze tɩn a magɩ Nili bugə kam na bam sɩ ba pipiri ba ji jana. 18 Kale yalʋ na wʋ Nili bugə kam wʋnɩ tɩn maama wʋ́ tɩ. Na bam dɩ maa wʋ́ taa lwe, pa Ezipi tiinə bam dɩ daa bá wanɩ ba nyɔ bugə kam na.› »
19 Baŋa-Wɛ daa ma ta dɩ Moyisi DƖ wɩ: «Ta dɩ Arɔn sɩ o kwe o nacəgə kam o twɩ-ka o jeeri Ezipi bwi sɩm, dɩ nabarɩ sɩm, dɩ bu-tʋlɩ sɩm, dɩ buli sɩm. O na kɩ kʋntʋ, na bam maama wʋ́ pipiri ba ji jana. Kʋ na maŋɩ kʋ yɩ kambi sɩm dɩ kɔɔra bam wʋnɩ, Ezipi tɩʋ kʋm je maama wʋ́ su dɩ jana.» 20 Moyisi dɩ Arɔn ma kɩ kʋlʋ maama Baŋa-Wɛ na brɩ-ba tɩn. Ezipi Pɛ wʋm dɩ o nakwa dɛɛn zɩgɩ ba nii mʋ, yɩ Arɔn zǝŋi o nacəgə kam o ma magɩ na bam baŋa. Nili bugə kam na bam maama ma pipiri ba ji jana. 21 Bugə kam wʋ kale sɩm maama ma tɩ pa ka na bam dɩ tiini ba lwe. Ezipi tiinə bam daa warɩ na bam sɩ ba nyɔ. Jana dɛɛn maa yɔɔrɩ ba su Ezipi tɩʋ kʋm maama. 22 Ezipi liri-kərə bam dɩ ma kwe ba liri kikiə ba lwǝni ba kɩ kʋntʋ doŋ. Pa-farʋ wʋm bɩcarɩ daa ta maa dana yɩ o vɩn sɩ o cəgi Moyisi dɩ Arɔn taanɩ dɩm. Baŋa-Wɛ nan maŋɩ DƖ ta nɩ kʋʋ́ taa yɩ kʋntʋ mʋ. 23 Pɛ wʋm laan ma pipiri o joori o sɔŋɔ. O brɩ o wʋ sɛ sɩ o kwe kǝm dɩntʋ o kɩ o yuu nɩ. 24 Ezipi tiinə bam maama ma gwaarɩ buli Nili bugə kam ni nɩ sɩ ba wanɩ ba na na ba nyɔ, ba na warɩ ba nyɔ bugə kam tɩtɩ na bam tɩn ŋwaanɩ.
25 Baŋa-Wɛ dɛɛn na pɛ Nili bugə kam na bam cɔgɩ tɩn mʋ da yarpɛ dɛɛn daa tu ya kɛ.