Baŋa-Wɛ tʋŋɩ Moyisi Pa-farʋ wʋm tee nɩ
6
Baŋa-Wɛ laan ma ta dɩ Moyisi DƖ wɩ: «Amʋ laan lagɩ a pa n lwarɩ amʋ na wʋ́ kɩ Pa-farʋ wʋm te tɩn mʋ. Amʋ wʋ́ ma dam mʋ a fɩ‑o sɩ o yagɩ a nɔɔna bam cwǝŋǝ sɩ ba viiri. Amʋ wʋ́ pa o zəli-ba mʋ sɩ ba nuŋi ba daarɩ o tɩʋ kʋm.»2 Wɛ daa ta ma ta dɩ Moyisi DƖ wɩ: «Amʋ mʋ yɩ Baŋa-Wɛ. 3 Amʋ dɛɛn vɩɩrɩ a tɩtɩ dɩ Abraham, dɩ Yizakɩ, dɩdaanɩ Zakɔbɩ, sɩ ba lwarɩ nɩ a yɩ Dam-fɔrɔ Tu Wɛ dɩm mʋ. Amʋ dɛɛn nan wʋ pɛ ba lwarɩ a yɩrɩ dɩm na yɩ Yuutu Baŋa-Wɛ tɩn.a 4 Amʋ dɛɛn ma goni ni dɩ ba, yɩ a goni ni sɩ a pa-ba Kaanan tɩga kam. Ba dɛɛn nan ta yɩ vərə mʋ ba zʋʋrɩ je sɩm kʋntʋ nɩ. 5 Amʋ laan nan ni Yisɩrayɛlɩ tiinə bam na ŋʋʋsɩ te maama tɩn bɛŋwaanɩ Ezipi tiinə bam tiini ba dɩ ba gabɛɛm wʋnɩ. Amʋ nan wʋ́ kɩ a tɔgɩ dɩ a ni-gonim dɩm. 6 Nan ta dɩ Yisɩrayɛlɩ tiinə bam nɩ ‹Amʋ mʋ yɩ Baŋa-Wɛ! A nan wʋ́ ma a dam-fɔrɔ dɩ a tɩtʋŋ-kamunnu a ma a waarɩ Ezipi tiinə bam, sɩ a daarɩ a joŋi abam á tɩtʋŋ-dɛɛra wʋnɩ a yagɩ sɩ á daa yɩ taá yɩ gambɛ. 7 A maa wʋ́ pa á taá yɩ amʋ tɩtɩ nɔɔna. Amʋ maa wʋ́ taa yɩ abam Wɛ. Kʋntʋ tɩn, á wʋ́ wanɩ á lwarɩ nɩ amʋ mʋ yɩ abam Tu Baŋa-Wɛ, a na joŋi abam a yagɩ Ezipi tiinə bam jɩŋa nɩ tɩn ŋwaanɩ. 8 A maa wʋ́ ja abam a zʋ tɩga kalʋ a dɛɛn na goni ni sɩ a pa Abraham, dɩ Yizakɩ, dɩdaanɩ Zakɔbɩ tɩn. Amʋ wʋ́ sɩɩnɩ a pa abam tɩga kam kʋntʋ sɩ ka taa yɩ abam tɩtɩ nyɩm. Amʋ nan mʋ yɩ Baŋa-Wɛ.› »
9 Moyisi dɛɛn ma ta tɩntʋ maama dɩ Yisɩrayɛlɩ tiinə bam. Ba ma vɩn o taanɩ dɩm, Bɛŋwaanɩ ba vwana mʋ dɛ yigə ya parɩ. Ba yɩra dɩ dɛɛn ma cɛ, ba tɩtʋŋ-dɛɛra yam ŋwaanɩ. 10 Baŋa-Wɛ laan ma ta dɩ Moyisi DƖ wɩ: 11 «Joori n vu Ezipi Pɛ te, sɩ n ta dɩd-o nɩ o pa Yisɩrayɛlɩ tiinə bam cwǝŋǝ sɩ ba nuŋi da o tɩʋ kʋm nɩ ba viiri.» 12 Moyisi ma ləri o wɩ: «Nmʋ ye nɩ amʋ ni warɩ dɩ pipiri lanyɩranɩ. Nii amʋ tɩtɩ nɔɔna bam na wʋ cəgi amʋ taanɩ dɩm tɩn, Pɛ wʋm laan mʋ wʋ́ sɛ o cəgi-dɩ na?»
13 Baŋa-Wɛ dɛɛn ma pa Moyisi dɩ Arɔn ni yɩ DƖ wɩ: «Ve-na Yisɩrayɛlɩ tiinə bam dɩ Ezipi Pɛ te, á ta dɩ ba nɩ amʋ Baŋa-Wɛ mʋ pɛ abam ni sɩ á ja Yisɩrayɛlɩ tiinə bam á nuŋi da Ezipi tɩʋ kʋm nɩ.»
Moyisi dɩ Arɔn dwi dɩm taanɩ
14 Nɔɔna bantʋ dɛɛn mʋ wʋ Yisɩrayɛlɩ sɔ-yuni tɩm maama yigə nɩ:
Zakɔbɩ bu-kwɩan kam mʋ yɩ Ruban. Ruban bu-baara bam mʋ tɩntʋ:
Henɔkɩ, dɩ Palu, dɩ Esrɔm, dɩ Karmɩ. Sɔ-yuni tɩntʋ mʋ kɩ daanɩ tɩ yɩ Ruban dwi dɩm nabaara.
15 Simeyon dɩ bu-baara bam mʋ tɩntʋ:
Yemuɛlɩ, dɩ Yamini, dɩ Ohadɩ, dɩ Yakinni, dɩ Tɩsoharɩ, dɩdaanɩ Sawuli. (Sawuli nu dɛɛn yɩ Kaanan tiinə bukɔ mʋ.) Sɔ-yuni tɩntʋ mʋ kɩ daanɩ tɩ yɩ Simeyon dwi dɩm nabaara.
16 Levi bu-baara bam yɩra na pʋpʋnɩ ya tiŋi tɩn mʋ tɩntʋ:
Gɛrsɔnɩ, dɩ Keyatɩ, dɩ Merari. Levi dɛɛn ŋwɩ mʋ taa o yi bɩna bi dɩ fiintɔ-yarpɛ (137).
17 Gɛrsɔnɩ biə dɩ ba sɔ-yuni tɩm dɛɛn maa yɩ Libini dɩ Simeyi.
18 Keyatɩ biə dɛɛn mʋ yɩ Amiram, dɩ Yiseyarɩ, dɩ Ebrɔn, dɩdaanɩ Uziyɛlɩ. Keyatɩ dɩ dɛɛn ŋwɩ mʋ taan o yi bɩna bi dɩ fiintɔ-yatɔ (133).
19 Merari biə dɛɛn mʋ yɩ Masili dɩ Musi.
Sɔ-yuni tɩntʋ mʋ kɩ daanɩ tɩ yɩ Levi dwi dɩm nabaara.
20 Amiram dɛɛn ma di o ko nakɔ Yokebɛdɩ o ma o kɩ kaanɩ. Ba dɛɛn ma lʋ Arɔn dɩ Moyisi.b Amiram dɛɛn ŋwɩ mʋ taan o yi bɩna bi dɩ fiintɔ-yarpɛ (137).
21 Yiseyarɩ biə dɩ dɛɛn maa yɩ Kʋra, dɩ Nefɛgɩ, dɩdaanɩ Zikiri.
22 Uziyɛlɩ biə dɩ dɛɛn maa yɩ Mikayɛlɩ, dɩ Elizafan, dɩ Sitiri.
23 Arɔn dɛɛn ma di Eliseba o ma o kɩ kaanɩ. Wʋntʋ maa yɩ Amɩnadabɩ bukɔ mʋ, yɩ o ta yɩ Naasɔn nakɔ. Ba dɛɛn lʋgɩ biə bana mʋ: Nadabɩ, dɩ Abiyu, dɩ Eleyazaarɩ, dɩ Itamarɩ.
24 Kʋra biə dɛɛn maa yɩ Asiri, dɩ Elikana, dɩ Abiasafɩ. Bantʋ dɩ ba sɔ-yuni tɩm mʋ yɩ Kʋra dwi dɩm nabaara.
25 Arɔn bu Eleyazaarɩ dɛɛn ma di Putiyɛlɩ bukɔ o ma o kɩ o kaanɩ, yɩ ba lʋ Fineasɩ.
Levi dwi dɩm taanɩ mʋ kʋntʋ. Sɔ-yuni tɩm kʋntʋ maama dɛɛn yɩ Levi dwi dɩm mʋ.c
26 Arɔn dɩ Moyisi taanɩ na brɩ te tɩntʋ tɩn, bantʋ maa yɩ balʋ Baŋa-Wɛ na pɛ-ba ni DƖ wɩ: ba ve ba ja Yisɩrayɛlɩ tiinə bam dɩ ba kɔgɔ kʋm maama ba ja nuŋi da Ezipi nɩ. 27 Bantʋ dɛɛn ma sɩɩnɩ ba vu Ezipi Pa-farʋ wʋm te ba ta dɩd-o sɩ o pa Yisɩrayɛlɩ tiinə bam cwǝŋǝ sɩ ba viiri.
Baŋa-Wɛ pɛ Moyisi dɩ Arɔn ni