Moyisi dɩ Arɔn ve Ezipi Pɛ wʋm te
5
Kʋ na kɩ fɩɩn tɩn, Moyisi dɩ Arɔn dɛɛn ma vu Ezipi Pɛ wʋm te ba ta ba wɩ: «Baŋa-Wɛ dɩm na yɩ Yisɩrayɛlɩ tiinə bam Wɛ tɩn ni mʋ tɩntʋ: ‹Pa cwǝŋǝ sɩ a nɔɔna bam viiri. Ba maŋɩ sɩ ba vu kagʋa wʋnɩ ba kɩ candiə mʋ ba zuli amʋ.› » 2 Pa-farʋ wʋm maa wɩ: «Wɔɔ mʋ yɩ Baŋa-Wɛ, pa kʋ maŋɩ sɩ a sɛ o ni sɩ Yisɩrayɛlɩ tiinə bam viiri? Amʋ yǝri Baŋa-Wɛ dɩm kʋntʋ, a nan bá pa cwǝŋǝ sɩ Yisɩrayɛlɩ tiinə bam viiri.»3 Ba laan ma lǝr-o ba wɩ: «Ebru tiinə Wɛ dɩm mʋ tu dɩbam te. Kʋntʋ ŋwaanɩ, dɩ́ loori nmʋ tee nɩ sɩ dɩ́ na pwələ dɩ́ kwe da yatɔ cwǝŋǝ dɩ́ vu kagʋa kam wʋnɩ dɩ́ kɩ kaanɩm dáanɩ dɩ́ pa dɩ́ Tu Baŋa-Wɛ. Bɛŋwaanɩ, dɩ́ na wʋ kɩ kʋntʋ, DƖ wʋ́ waarɩ dɩbam dɩdaanɩ yawɩ-cɛɛrʋ dwi dwi mʋ, naa DƖ pa dɩ́ tʋ jara-kǝm wʋnɩ yɩ dɩ́ tɩ.» 4 Pɛ wʋm ma vɩn yɩ o ta o wɩ: «Moyisi dɩ Arɔn, bɛɛ mʋ yɩ abam pa nɔɔna bam yagɩ ba tɩtʋŋa? Abam maama joori-na á vu á tɩtʋŋa ni nɩ!» 5 O ta maa wɩ: «Nii-na yo! Nɔɔna bam laan tiini ba daga Ezipi tɩga kam nɩ, yɩ á dáa lagɩ sɩ á cəŋi-ba sɩ ba yɩ tʋŋɩ ba tɩtʋŋa yam.»
6 Dɩntʋ dɛ nɩ, Ezipi Pɛ wʋm ma bəŋi dɩdɛɛra balʋ na fɩn tɩntʋŋna bam dɩ tɩtʋŋ-cɛɛra tɩn dɩ balʋ na nii tɩtʋŋa yam baŋa nɩ tɩn, yɩ o pa-ba ni. O dɛɛn maa wɩ:
7 «Abam daa yɩ kwe-na ga-kʋrrʋ á pa nɔɔna bam sɩ ba taa maɩ ba magɩ wara. Bantʋ tɩtɩ laan mʋ maŋɩ sɩ ba beeri ga-kʋrrʋ ba ma ba tʋŋɩ tɩtʋŋa yam. 8 Ba wara yam ba na wʋ́ magɩ tɩn ba maŋɩ sɩ ya muri, dɩ fɩnfɩɩn dɩ. Ba yɩ yawɔrɩ-nyɩna mʋ! Kʋntʋ ŋwaanɩ mʋ ba beeri cwǝŋǝ sɩ ba vu ba kɩ kaanɩm ba pa ba Wɛ dɩm. 9 Pa-na sɩ tɩtʋŋa yam tiini ya cɛ ba yɩra. Kʋntʋ wʋ́ pa ba yɩ na yigə sɩ ba daa cəgi vwan yam kʋntʋ.»
10 Balʋ na fɩn gambɛ sɩm dɩ tɩtʋŋ-cɛɛra tɩn dɩ tɩtʋŋa yigǝ tiinǝ bam dɛɛn ma nuŋi ba vu ba ta dɩ nɔɔna bam ba wɩ: «Pɛ wʋm tagɩ tɩntʋ mʋ: ‹Amʋ daa bá pa abam ga-kʋrrʋ. 11 Abam mʋ maŋɩ sɩ á vu á beeri ga-kʋrrʋ á pa á tɩtɩ. Nan taá ye-na nɩ á wara yam á na maŋɩ á yǝni á magɩ tɩn ba maŋɩ sɩ ya muri ya ni nɩ dɩ fɩnfɩɩn dɩ.› »
12 Kʋ dɛɛn ma pa nɔɔna bam jagɩ Ezipi tɩga kam je maama nɩ ba beeri ga-kʋrrʋ sɩ ba ma ba tʋŋɩ. 13 Balʋ na fɩn gambɛ sɩm dɩ tɩtʋŋa tɩn, dɩ dɛɛn laan tiini ba fɩn-ba, yɩ ba tɛ-ba ba wɩ: «Dɛ maama abam tɩtʋŋa yam maŋɩ sɩ ya yi kʋ daama na yɩ te yɩ á joŋi ga-kʋrrʋ dɩbam tee nɩ tɩn mʋ.» 14 Pɛ wʋm nɔɔna balʋ na fɩn gambɛ sɩm dɩ tɩtʋŋ-cɛɛra tɩn dɛɛn ma bɛɛsɩ Yisɩrayɛlɩ yigǝ tiinǝ balʋ na nii tɩtʋŋa yam baŋa nɩ tɩn. Ba maa jɩgɩ-ba ba maga yɩ ba wɩ: «Kʋ kɩ da yale yɩ á nɔɔna bam wʋ magɩ wara yam sɩ ya ja ya ni nɩ, nɩnɛɛnɩ kʋ daama na yɩ te tɩn. Bɛɛ mʋ kɩa?»
15 Yisɩrayɛlɩ tɩtʋŋa yigǝ tiinǝ bam laan ma vu ba loori Pa-farʋ wʋm ba wɩ: «Dɩ́ Tu, bɛ laan mʋ kɩa yɩ nmʋ jɩgɩ dɩbam n kɩ tɩntʋ? 16 Dɩdɛɛra bam daa ba paɩ dɩbam ga-kʋrrʋ sɩ dɩ́ taa ma dɩ́ tʋŋa, yɩ ba ta fɩn dɩbam sɩ dɩ́ magɩ wara yam sɩ ya yɩ muri. Ba ta maa jɩgɩ dɩbam ba maga, yɩ kʋ yɩ bantʋ yigə mʋ.» 17 Pɛ wʋm ma lǝri-ba o wɩ: «Nii yawɔrɩ-nyɩna bantʋ! Abam na vaɩ tɩtʋŋa tɩn ŋwaanɩ mʋ á kaagɩ á beeri cwǝŋǝ amʋ tee nɩ sɩ á vu á kɩ kaanɩm á pa Baŋa-Wɛ. 18 Lɩla! Sɩ á joori á tɩtʋŋa ni nɩ! Ba bá pa abam ga-kʋrrʋ. Á nan ta maŋɩ sɩ á magɩ wara yam mʋ sɩ ya ja ya ni.» 19 Yisɩrayɛlɩ tɩtʋŋa yigǝ tiinǝ bam ma lwarɩ nɩ kǝm dɩm laan tiini dɩ camma mʋ dɩ pa bantʋ dɩ Yisɩrayɛlɩ tiinə bam maama. Bɛŋwaanɩ, ba maanɩ nɩ wara yam ba na wʋ́ magɩ dɛ maama tɩn ba maŋɩ sɩ ya muri ya ni nɩ.
20 Nɔɔna bam dɛɛn na nuŋi Pɛ wʋm tee nɩ tɩn, mʋ ba jeeri Moyisi dɩ Arɔn. Ba dɩ dɛɛn nan maŋɩ ba zɩgɩ ba cəgi nɔɔna bam mʋ sɩ ba ba. 21 Ba na nɛ-ba tɩn, mʋ ba pʋʋnɩ dɩ Moyisi dɩ Arɔn ba wɩ: «Baŋa-Wɛ wʋ́ waarɩ abam á na kɩ kʋlʋ tɩn ŋwaanɩ. Abam laan pɛ dɩbam tɩtʋŋa tiini ya loi mʋ Ezipi Pɛ dɩ o dɩdɛɛra bam mʋmwa nɩ. Á ta ma á pa-ba pwələ sɩ ba gʋ dɩbam.»
22 Moyisi ma pipiri o vu o bwe Baŋa-Wɛ o wɩ: «Amʋ Yuutu, bɛɛ mʋ yɩ n tiini n ja cam dɩntʋ n ba n pa n nɔɔna bam? Nmʋ bʋŋɩ sɩ n kɩ tɩntʋ mʋ yɩ n tʋŋɩ-nɩ yo tɩn na? 23 Kʋ zɩgɩ dɛ dɩlʋ amʋ na ve a ŋɔɔnɩ dɩdaanɩ Pɛ wʋm nmʋ yɩrɩ ŋwaanɩ tɩn, mʋ o yɔɔrɩ o paɩ nmʋ nɔɔna bam cam sɩ ba taa di. Nmʋ tɩtɩ nan ba kɩ kʋlʋkʋlʋ sɩ n joŋi-ba n yagɩ.»