Baŋa-Wɛ na wʋ́ tɔgɩ Moyisi baŋa DƖ kɩ mɩmaŋa yalʋ tɩn
4
Moyisi dɛɛn ma ləri Baŋa-Wɛ o wɩ: «Dɛdoŋ nɩ, Yisɩrayɛlɩ tiinə bam bá sɛ a taanɩ dɩm, ba nan bá pa-nɩ cɩga. Baá wanɩ ba ta nɩnɛɛnɩ, nmʋ sɩɩnɩ n wʋ vɩɩrɩ n tɩtɩ dɩ amʋ.» 2 Baŋa-Wɛ ma bwe‑o DƖ wɩ: «Bɛɛ mʋ n ze dɩ n jɩŋa?» O ma ləri o wɩ: «Nacəgə mʋ a ziǝ.» 3 Baŋa-Wɛ ma ta DƖ wɩ: «Dʋlɩ-ka n dɩ tɩga nɩ.» Moyisi ma dʋlɩ-ka o dɩ tɩga nɩ. Ka ma ji bɩsankwɩa, yɩ o duri o daarɩ-ka.4 Baŋa-Wɛ ta ma ta DƖ wɩ: «Twɩ n jɩŋa n ja-ka ka nabili seeni.» Moyisi na twɩ o jɩŋa o ja bɩsankwɩa kam tɩn, ka ma joori ka ji nacəgə o jɩŋa nɩ. 5 Baŋa-Wɛ laan maa wɩ: «Kǝm dɩntʋ wʋ́ pa ba sɛ nɩ amʋ Baŋa-Wɛ mʋ sɩɩnɩ a vɩɩrɩ a tɩtɩ dɩ nmʋ, amʋ wʋlʋ na yɩ ba nabaara Wɛ dɩm tɩn: Abraham Wɛ dɩm, dɩ Yizakɩ Wɛ dɩm, dɩ Zakɔbɩ Wɛ dɩm tɩn.»
6 Baŋa-Wɛ ta ma ta dɩd-o nɩ: «Tʋrɩ n jɩŋa n gɔrɔ kʋm nɩ sɩ n dwe n nyɔɔnɩ.» O ma kɩ kʋntʋ. Moyisi na joori o lɩ o jɩŋa kam tɩn, ka da ka pɩɩrɩ mʋ dɩ nanyaanʋa yawɩʋ kʋm. 7 Baŋa-Wɛ daa ma ta DƖ wɩ: «Daa n joori n tʋrɩ n jɩŋa kam n gɔrɔ kʋm nɩ.» Moyisi ma kwe o jɩŋa o tʋrɩ o gɔrɔ kʋm nɩ. O na joori o lɩ-ka tɩn, ka da ka kɩ lanyɩranɩ mʋ, nɩnɛɛnɩ o yɩra yam maama na yɩ te tɩn. 8 Baŋa-Wɛ laan ma ta DƖ wɩ: «Ba na wʋ pɛ‑m cɩga dɩ dayigə maana woŋo kʋm, ba laan wʋ́ sɛ mɩmaŋɩ bɩle tu wʋm. 9 Dɩ kʋntʋ dɩ, ba na nɛ wo-mɩmaŋa yale yantʋ yɩ ba ta vɩn sɩ ba sɛ n taanɩ dɩm, sɩ n mɔ na Nili bugə kam nɩ n daarɩ n lo-ba tɩ-kʋra kam baŋa nɩ. Na bam kʋntʋ wʋ́ ji jana tɩga kam baŋa nɩ.»
10 Moyisi dɛɛn ma loori Baŋa-Wɛ o wɩ: «Amʋ Yuutu, amʋ warɩ a ŋɔɔnɩ lanyɩranɩ. Kʋ zɩgɩ nmʋ dɩ amʋ na ŋɔɔnɩ daanɩ tɩn, a maŋɩ a warɩ mʋ. A nan maŋɩ a bá lwarɩ ŋwaŋa. A ni warɩ sɩ dɩ pipiri lanyɩranɩ.»b
11 Baŋa-Wɛ ma ləri DƖ wɩ: «Wɔɔ mʋ pɛ nabiinu o ni dɩm? Wɔɔ mʋ kɩ zwa-kwarʋ dɩ mɩmaarʋ? Wɔɔ mʋ paɩ nabiinu yiǝ sɩ o taa naɩ, naa sɩ o taa yɩ lilwe? Kʋ daɩ amʋ Baŋa-Wɛ mʋ na? 12 Laan nan ve, sɩ amʋ wʋ́ wəli‑m dɩ ŋwaŋa, yɩ a daarɩ a brɩ-m n na wʋ́ ta kʋlʋ maama tɩn.»
13 Moyisi maa wɩ: «Amʋ Yuutu, a loori-m! Tʋŋɩ nɔn-gaa sɩ kʋntʋ tu vu o tʋŋɩ tɩtʋŋɩ dɩm.»
14 Moyisi taanɩ dɩm dɛɛn ma zaŋɩ Baŋa-Wɛ banɩ. Wɛ ma ta dɩd-o nɩ: «Sɩ nmʋ zɩmbaarʋ Arɔn wʋlʋ dɩ na yɩ Levi tu tɩn, wʋntʋ waɩ o ŋɔɔnɩ lanyɩranɩ. Nii yo! O wʋ cwǝŋǝ nɩ o bɩɩnɩ sɩ o jeeri‑m. O nan na nɛ‑m, kʋʋ́ pa o wʋʋ poli zanzan. 15 Nmʋ wʋ́ wanɩ n ŋɔɔnɩ n brɩ-o nmʋ taanɩ dɩm dɩ o na wʋ́ ta kʋlʋ tɩn. Amʋ wʋ́ wǝli abam dɩ ŋwaŋa yɩ a brɩ abam á na wʋ́ kɩ te maama tɩn. 16 Arɔn mʋ wʋ́ lwǝni n taanɩ dɩm o ŋɔɔnɩ dɩ nɔɔna bam, nɩnɛɛnɩ o yɩ nmʋ ni mʋ te. Nmʋ tɩtɩ wʋ́ ləri amʋ yuu nɩ n ŋɔɔnɩ dɩd-o. 17 Nan kwe nacəgə kantʋ nmʋ na ze n jɩŋa nɩ tɩn n wǝli da n vu, sɩ n lagɩ n ma-ka n tʋŋɩ wo-kɩnkagɩla mʋ.»c
Moyisi joori o vu Ezipi
18 Moyisi dɛɛn ma joori o tɩmbaarʋ Zɩtero te o ta dɩd-o o wɩ: «Amʋ bʋŋɩ sɩ a joori a cʋrrʋ tɩm te mʋ Ezipi nɩ, sɩ a nii ba ta ŋwɩ dɩ yazurə na.» Zɩtero ma sɛ yɩ o wɩ: «Ve, sɩ Wɛ wʋ́ pa n yi lanyɩranɩ.»
19 Moyisi dɛɛn ta na wʋ Madɩan nɩ tɩn, mʋ Baŋa-Wɛ ya tag‑o DƖ wɩ: «Joori n vu Ezipi, sɩ balʋ maama na beeri‑m sɩ ba gʋ tɩn laan tɩga.» 20 Moyisi ma ja o kaanɩ dɩ o bu-baara bam o jəni-ba bɩnaga baŋa nɩ, yɩ o laan kwe cwǝŋǝ o tɔgɩ dɩ ba o maa joori Ezipi. O dɛɛn maa ze Wɛ nacəgə kam o jɩŋa nɩ. 21 Baŋa-Wɛ ma ta dɩ Moyisi DƖ wɩ: «Nmʋ na yi Ezipi tɩʋ kʋm, wo-kɩnkagɩla yalʋ maama amʋ na pɛ‑m dam sɩ n kɩ tɩn, sɩ n fɔgɩ n kɩ-ya Ezipi Pɛ wʋm yigə nɩ. Amʋ nan wʋ́ pa o bɩcarɩ taa dana mʋ, yɩ o bá sɛ sɩ amʋ nɔɔna bam viiri. 22 Kʋ na tu kʋntʋ, sɩ n ta dɩ Pɛ wʋm nɩ: ‹Baŋa-Wɛ ni dɩm mʋ tɩntʋ:
Yisɩrayɛlɩ yɩ amʋ bəkər-kwɩa mʋ. 23 Amʋ nan mʋ tagɩ dɩ nmʋ sɩ n pa a bəkər-kwɩa kam cwǝŋǝ sɩ o viiri o vu o zuli-nɩ. Nmʋ nan vɩn amʋ ni. Kʋntʋ ŋwaanɩ, amʋ dɩ nan wʋ́ gʋ nmʋ bəkər-kwɩa kam mʋ.› »d
24 Moyisi dɩ o kwaga kam ta na wʋ cwǝŋǝ nɩ yɩ ba vu ba yi je sɩlʋ ba na wʋ́ pəni sɩ tɩga pʋʋrɩ tɩn, Baŋa-Wɛ dɛɛn ma vu DƖ te yɩ DƖ bʋŋɩ sɩ DƖ gʋ-o. 25 Moyisi kaanɩ Sefora ma zaŋɩ o kwe kandwɛ-fʋlɩ na jɩgɩ ni tɩn o ma o goni o bu-baarʋ wʋm pəni. O kwe tɔnɔ kʋm o ma o dwe Moyisi barɔ jəgə nɩ yɩ o ta o wɩ: «Nmʋ yɔɔrɩ n yɩ amʋ barʋ jana bam ŋwaanɩ mʋ.» 26 O na ŋɔɔnɩ te tɩn tɔgɩ dɩ pən-gwəŋə kam ŋwaanɩ mʋ. Baŋa-Wɛ daa maa wʋ gʋ Moyisi.
27 Baŋa-Wɛ dɛɛn ma ta dɩ Arɔn DƖ wɩ: «Zaŋɩ n vu kagʋa kam yuu sɩ n jeeri Moyisi.» O ma vu o jeer-o Wɛ piu kʋm nɩ yɩ o kukwǝr-o. 28 Moyisi dɛɛn laan ma lwǝni o brɩ Arɔn kʋlʋ maama Baŋa-Wɛ na tʋŋ-o sɩ o ta tɩn. O ma daarɩ o ta wo-kɩnkagɩla yam Baŋa-Wɛ na pɛ‑o ni sɩ o kɩ tɩn taanɩ o brɩ Arɔn.
29 Moyisi dɩ Arɔn dɛɛn ma kwe cwǝŋǝ ba vu ba yi Ezipi yɩ ba la Yisɩrayɛlɩ nakwa bam ba kɩ daanɩ. 30 Arɔn ma ta kʋlʋ maama Baŋa-Wɛ dɛɛn na tagɩ dɩ Moyisi tɩn o brɩ-ba. O dɩ ma kɩ wo-kɩnkagɩla yam maama pa nɔɔna bam na. 31 Nakwa bam dɛɛn ma sɛ. Ba ta ma ni Baŋa-Wɛ na nɛ ba yaara yam yɩ DƖ cu DƖ ba sɩ DƖ joŋi-ba ya wʋnɩ te tɩn. Ba ma kuni doonə tɩga nɩ ba zuli Wɛ.