3
Moyisi dɛɛn lɛɛrɩ o jɩgɩ o tɩmbaarʋ Zɩtero bʋnɩ dɩm dɩ o peeni sɩm o nii tɩ baŋa nɩ mʋ. Zɩtero dɛɛn maa yɩ Madɩan tiinə kaanɩm tu. Dɛ dɩdʋa: Moyisi ma ja vara bam o kɛ kagʋa kam kwaga nɩ, o vu o yi Sinayi piu.a Piu kʋm kʋntʋ mʋ yɩ Wɛ tɩtɩ jǝgǝ kam.2 Moyisi na wʋra tɩn mʋ Baŋa-Wɛ malɛka kam vɩɩrɩ ka tɩtɩ dɩd-o nɩ min-vʋgʋ te tɩn. Moyisi ma na nɩ mim dɩm jaanɩ sabara tiu kʋdoŋ yɩ dɩ laan ba di sabara tiu kʋm dɩ zwɛa.3 Moyisi ma ta o tɩtɩ nɩ o wɩ: «Amʋ wʋ́ fʋfɔ mʋ a yi a nii wo-kɩnkagɩlɩ dɩntʋ, sɩ a lwarɩ bɛɛ mʋ kɩ yɩ sabara kam ba zwɛa tɩn.»
4 Baŋa-Wɛ ma maanɩ nɩ o fʋfɔ o yi sɩ o nii. Wɛ ma zɩgɩ sabara kam wʋnɩ o bǝŋ-o o wɩ: «Moyisi! Moyisi!» Moyisi ma ləri wɩ: «Nii-nɩ da.» 5 Wɛ ma ta DƖ wɩ: «Yɩ tiini n twɛ yo. Lɩ n natra yam, sɩ mɛ n na zɩgɩ tɩn yɩ amʋ tɩtɩ nyɩm mʋ.» 6 DƖ daa ta ma ta DƖ wɩ: «Amʋ yɩ nmʋ ko Wɛ dɩm mʋ. A maa kwǝri a yɩ nmʋ nabaara Wɛ dɩm: Abraham Wɛ dɩm, dɩ Yizakɩ Wɛ dɩm, dɩdaanɩ Zakɔbɩ Wɛ dɩm mʋ.» Moyisi dɛɛn na ni kʋntʋ tɩn mʋ o səgi o yibiyə. O dɛɛn kwarɩ sɩ o nii o na Wɛ.
7 Baŋa-Wɛ ma ta DƖ wɩ: «Cɩga tɩn, amʋ maanɩ cam dɩlʋ na yi a nɔɔna bam Ezipi nɩ tɩn. Ba tɩtʋŋa yigǝ tiinǝ bam na tiini ba bɛɛsɩ-ba pa ba keeri te maama tɩn zʋ amʋ zwa. A yigə nan wʋ ba yaara yam wʋnɩ. 8 Kʋntʋ ŋwaanɩ, amʋ laan tu ba te sɩ a joŋi-ba mʋ a yagɩ Ezipi tiinə bam jɩŋa nɩ. Amʋ ta wʋ́ pa ba zaŋɩ ba nuŋi ba vu ba jǝni tɩga kalʋ na lamma yɩ ka daga tɩn baŋa nɩ. Tɩga kam kʋntʋ ywəmmə dɩ varɩm dɩ kɔnɔ. Kʋ nan yɩ tɩga kalʋ Kaanan tiinə bam, dɩ Hɛtɩ tiinə bam, dɩ Amɔɔrɩ tiinə bam, dɩ Perezi tiinə bam, dɩ Hevi tiinə bam, dɩdaanɩ Yebusi tiinə bam maama na zʋʋrɩ tɩn mʋ.b 9 Yisɩrayɛlɩ tiinə bam kərə kam yi-nɩ, yɩ a ta kwǝri a na Ezipi tiinə bam na jɩgɩ-ba ba bɛɛsɩ te maama tɩn. 10 Kʋntʋ ŋwaanɩ, a laan nan lagɩ a tʋŋɩ nmʋ mʋ sɩ n vu Ezipi Pɛ wʋm te n ja amʋ nɔɔna Yisɩrayɛlɩ tiinə bam n nuŋi Ezipi tɩʋ kʋm nɩ.»
11 Moyisi ma ta dɩ Wɛ o wɩ: «Amʋ yɩ wɔɔ mʋ? A muri sɩ a vu Pa-farʋ wʋm te a ja Yisɩrayɛlɩ tiinə bam a nuŋi Ezipi nɩ.» 12 Wɛ daa ta ma ta DƖ wɩ: «Amʋ wʋ́ taa wʋra nmʋ tee nɩ. Mɩmaŋɩ dɩntʋ mʋ wʋ́ brɩ nɩ amʋ mʋ sɩɩnɩ a tʋŋɩ-m: Nmʋ na jaanɩ a nɔɔna bam n nuŋi Ezipi nɩ, abam laan wʋ́ ba piu kʋntʋ yuu nɩ mʋ á zuli-nɩ.»c
13 Moyisi ma ləri o wɩ: «Amʋ nan na ve Yisɩrayɛlɩ tiinə bam te yɩ a ta dɩ ba nɩ ‹Abam nabaara Wɛ dɩm mʋ tʋŋɩ-nɩ á tee nɩ,› baá wanɩ ba bwe amʋ nɩ ‹Wɛ dɩm kʋntʋ yɩrɩ mʋ bɛ?› Tɩta mʋ amʋ wʋ́ lǝri-ba?»
14 Wɛ ma ta dɩ Moyisi DƖ wɩ: «Amʋ mʋ yɩ a na maŋɩ a yɩ wʋlʋ tɩn. Ta dɩdaanɩ Yisɩrayɛlɩ tiinə bam wɩ: Amʋ-maŋɩ-a-wʋra-taa-wuu mʋ tʋŋɩ-m ba tee nɩ.»d 15 Wɛ ma daarɩ DƖ ta dɩ Moyisi DƖ wɩ:
«Ta dɩ Yisɩrayɛlɩ tiinə bam nɩ: ‹Yuutu Baŋa-Wɛ na yɩ á nabaara Wɛ dɩm tɩn, Abraham Wɛ dɩm, dɩ Yizakɩ Wɛ dɩm, dɩ Zakɔbɩ Wɛ dɩm mʋ tʋŋɩ-nɩ á tee nɩ.› Amʋ yɩrɩ dɩm mʋ kʋntʋ sɩ kʋ taa ve maŋa kalʋ na ba ti tɩn. Kʋ na zɩgɩ dwi dɩdwɩ nɩ sɩ kʋ vu kʋ yi dwi dɩdoŋ nɩ, yɩrɩ dɩm kʋntʋ mʋ baá taa maɩ ba guli a gulə. 16 Nan ve n la Yisɩrayɛlɩ nakwa bam n kɩ daanɩ sɩ n ta dɩ ba n wɩ: ‹Baŋa-Wɛ dɩm na yɩ abam nabaara Wɛ dɩm tɩn, Abraham Wɛ dɩm, dɩ Yizakɩ Wɛ dɩm, dɩ Zakɔbɩ Wɛ dɩm mʋ tu amʋ te. DƖ nan tagɩ DƖ wɩ: Amʋ sɩɩnɩ a nii á baŋa nɩ mʋ, yɩ a na kʋlʋ maama na yi abam Ezipi nɩ tɩn. 17 Amʋ nan maŋɩ a pooli nɩ a lagɩ a ja abam a nuŋi á yaara yam wʋnɩ á na nɛ Ezipi nɩ tɩn. Amʋ ta wʋ́ pa á zaŋɩ á vu tɩga kalʋ Kaanan tiinə bam na zʋʋrɩ da tɩn, dɩ Hɛtɩ tiinə bam, dɩ Amɔɔrɩ tiinə bam, dɩ Perezi tiinə bam, dɩ Hevi tiinə bam, dɩdaanɩ Yebusi tiinə bam. Tɩga kam kʋntʋ ywəmmə mʋ dɩ varɩm dɩ kɔnɔ.›
18 Nmʋ na tagɩ kʋntʋ doŋ, Yisɩrayɛlɩ nakwa bam wʋ́ sɛ n taanɩ dɩm. Nmʋ laan maŋɩ sɩ n ja-ba sɩ á vu Ezipi pɛ wʋm te, yɩ á ta dɩd-o á wɩ: ‹Baŋa-Wɛ dɩm na yɩ Ebru tiinə bam Wɛ tɩn mʋ tu dɩbam te. Kʋntʋ, pa dɩbam pwələ sɩ dɩ́ ma da yatɔ dɩ́ kwe cwǝŋǝ dɩ́ vu kagʋa kam wʋnɩ dɩ́ kɩ kaanɩm dáanɩ dɩ́ pa dɩ́ Tu Baŋa-Wɛ dɩm.› 19 Amʋ nan ye nɩ Pɛ wʋm bá sɛ o pa abam pwələ sɩ á vu, kʋ na daɩ nɩ a mɛ dam mʋ a fɩ‑o. 20 Amʋ laan wʋ́ ma a dam a waarɩ Ezipi tiinə bam dɩdaanɩ wo-kɩnkagɩla yalʋ a na wʋ́ kɩ ba tɩtarɩ nɩ tɩn. Kʋ kwaga nɩ mʋ Pɛ wʋm laan wʋ́ pa abam cwǝŋǝ sɩ á viiri.
21 Amʋ nan ta wʋ́ pa á kikiə su Ezipi tiinə bam yi. Kʋntʋ wʋ́ pa á bá nuŋi dɩ jɩ-kʋrɩ á viiri. 22 Abam kaana maama maŋɩ sɩ ba vu ba tikəri nɔɔna balʋ na yɩ Ezipi tiinə kaana tɩn te mʋ, dɩdaanɩ kaanɩ wʋlʋ maama na zʋʋrɩ ba sɔŋɔ nɩ tɩn te. Ba laan maa wʋ́ loori ba na səbu-poŋo wǝǝnu, dɩ səbu-sɩŋa wǝǝnu, dɩdaanɩ gwaarʋ tɩlʋ á biə na wʋ́ taa jɩgɩ ba zʋʋrɩ tɩn. Abam na kɩ kʋntʋ mʋ, á wʋ́ ma swan á ja Ezipi tiinə bam jɩjɩgɩrʋ tɩm á wǝli da á viiri.»