Moyisi lʋra taanɩ
2
Levi dwi tu dɩdʋa dɛɛn ma di o tɩtɩ dwi tiinə bukɔ wʋdoŋ o ma kɩ o kaanɩ.a 2 Kaanɩ wʋm ma ja pugə o lʋ bəkərə. O ma na nɩ bu wʋm lamma. O ma da kʋ ŋwaanɩ o səg‑o canɩ sɩtɔ.b 3 O laan ma maanɩ nɩ o daa bá wanɩ o səg‑o. O ma kwe tɩtɔgɔ ba na mɛ sangɛ ba sɔ-kʋ tɩn, yɩ o daarɩ o kwe kʋtaalɩ o ma turi-kʋ sɩ na yɩ wanɩ ba zʋ. O dɛɛn ma kwe bu wʋm o kɩ kʋ wʋnɩ yɩ o daarɩ o ja-o o vu Nili bugə kam ni o səg‑o nancan-gullu wʋnɩ. 4 Bu wʋm nakɔ dɛɛn maa zɩgɩ da yɩ o tʋlɩ o nii kʋlʋ na wʋ́ kɩ-o tɩn.5 Kʋ na kɩ fɩɩn tɩn, Ezipi Pɛ bukɔ dɛɛn ma tu bugə kam sɩ o swɛ o yɩra. O tɩntʋŋ-kaana maa ve ba kaagɩ bugə kam ni dɩm nɩ. O laan ma tʋlɩ o na tɩtɔgɔ kʋm nancan-gullu tɩm wʋnɩ yɩ o tʋŋɩ o tɩntʋŋ-kana sɩ o vu o ja-kʋ o ja ba. 6 O ma puri kʋ ni yɩ o na bu-sɩsɩŋa na tigi da yɩ o keerǝ. Bu wʋm ŋwaŋa ma zʋ-o. O ma ta o wɩ: «Ebru tiinə bu-balwa bam dɩdʋa mʋ tɩntʋ.»
7 Bu wʋm nakɔ wʋm ma vu Pɛ bukɔ wʋm te o bwe‑o o wɩ: «A ve a beeri Ebru tiinə kaana bam wʋnɩ a pa‑m sɩ ba dɩdʋa taa paɩ bu wʋm ŋɔgɩ yɩlɩ na?» 8 O ma sɛ yɩ o wɩ: o ve! Bɩsankana kam ma vu o bəŋi bu wʋm nu sɩ o ba. 9 Pɛ bukɔ wʋm ma ta dɩd-o o wɩ: «Ja bu wʋntʋ n vu sɔŋɔ n ta n nii o baŋa nɩ n pa-nɩ. Amʋ wʋ́ ŋwɩ‑m kʋ ŋwaanɩ.» Kaanɩ wʋm ma sɩɩnɩ o ja bu wʋm o vu sɔŋɔ, o maa jɩg-o o kɔna.
10 Bu wʋm dɛɛn na bɩgɩ fɩɩn tɩn, o nu wʋm ma ja-o o vu o pa Pɛ bukɔ wʋm sɩ o kwe‑o o ma ji o tɩtɩ bu. O dɛɛn ma pa bu wʋm yɩrɩ nɩ ‹Moyisi›, yɩ o wɩ: ‹A na liir‑o na wʋnɩ tɩn ŋwaanɩ.›c
Moyisi duri o vu Madɩan
11 Moyisi dɛɛn na bɩgɩ baarʋ o ti tɩn dɛ dɩdʋa o ma zaŋɩ o nuŋi o vu o tɩtɩ Ebru tiinə bam na zʋʋrɩ mɛ tɩn. O ma nii o na ba yɩra na cɛ dɩ tɩtʋŋ-dɛɛra te tɩn. O ta ma na Ezipi tu wʋdoŋ na jɩgɩ Ebru tu dɩdʋa o maga. 12 O ma dʋlɩ o yi o nii je maama yɩ o wʋ nɛ nɔɔn-nɔɔnʋ. O ma magɩ Ezipi tu wʋm o gʋ, yɩ o daarɩ o kwe‑o o səgi kasʋlʋ wʋnɩ.
13 Tɩga na pʋʋrɩ tɩn, o daa ma nuŋi yɩ o na Ebru tiinə bale na jɩgɩ daanɩ. O ma bwe wʋlʋ na tusi tɩn o wɩ: «Bɛɛ mʋ yɩ nmʋ jɩgɩ n doŋ Ebru tu n maga?» 14 Nɔɔnʋ wʋm ma lǝr-o o wɩ: «Wɔɔ mʋ pɛ nmʋ ni sɩ n tan yɩ dɩdɛɛrʋ dɩbam baŋa nɩ, sɩ n bʋrɩ dɩbam bʋra? Nmʋ wʋ́ gʋ amʋ n wǝli Ezipi tu wʋm n na gʋ tɩn wʋnɩ mʋ na?» Moyisi na ni kʋntʋ tɩn, fʋʋnɩ ma zʋ-o yɩ o bʋŋɩ o tɩtɩ nɩ o wɩ: «Cɩga ŋwaanɩ tɩn, a na kɩ te tɩn lwarɩ jaja mʋ.»
15 Ezipi Pɛ wʋm dɛɛn ma ni kʋlʋ na kɩ tɩn. O ma kwaanɩ sɩ o gʋ Moyisi. Moyisi ma duri o lu Pɛ wʋm jɩŋa nɩ yɩ o vu o zʋʋrɩ Madɩan tɩʋ nɩ.
O dɛɛn ma vu o je vʋlɩ dɩdoŋ təŋə nɩ. 16 O na wʋra tɩn, Madɩan tiinə kaanɩm tu wʋdoŋ bukwa barpɛ ma ba sɩ ba mɔ na ba kɩ vara nyɔɔm jəgə kam nɩ, sɩ ba ko wʋm vara bam nyɔ. 17 Nayɩra badonnǝ dɛɛn ma ba ba zəli bukwa bam. Moyisi ma zaŋɩ o joŋi-ba o yagɩ, yɩ o daarɩ o pa ba vara bam nyɔ na bam. 18 Kʋ na kɩ kʋntʋ tɩn, bɩsankam sɩm ma joori ba vu ba ko te, o yɩrɩ mʋ Zɩterod. O dɛɛn ma bwe-ba o wɩ: «Abam zɩm kɩ tɛ mʋ á joori kʋntʋ lɩla?» 19 Ba ma ləri ba wɩ: «Ezipi tu wʋdoŋ mʋ joŋi dɩbam o yagɩ nayɩra bam jɩŋa nɩ. Wʋntʋ mʋ lɛɛrɩ o mɔ na dɩ o pa vara bam nyɔ.» 20 O ma bwe o bukwa bam wɩ: «Nɔɔnʋ wʋm nan wʋ yən mʋ? Abam yag-o da sɩ bɛɛ mʋ? Bəŋ-o-na sɩ o ba o di wʋdiu.»
21 Moyisi dɛɛn ma sɛ sɩ o taa zʋʋrɩ nɔɔnʋ wʋm tee nɩ. Kʋ na kɩ fɩɩn tɩn, Zɩtero ma kwe o bukɔ Sefora o pa Moyisi sɩ o di o ma kɩ kaanɩ. 22 Sefora ma lʋ bəkərə yɩ Moyisi pa o yɩrɩ nɩ ‹Gɛrsɔmɩ›e. Bɛŋwaanɩ, o dɛɛn bʋŋɩ o tɩtɩ nɩ mʋ o wɩ: «Amʋ yɩ vəru mʋ sa-tɩʋ nɩ.»
23 Kʋ na wʋra kʋ wʋra tɩn, Ezipi Pɛ wʋm dɛɛn ma tɩ. Yisɩrayɛlɩ tiinə bam maa ŋʋʋsa ba gabɛɛm ŋwaanɩ. Ba dɛɛn tiini ba keeri mʋ ba loori zǝnǝ. Ba kərə kam ma tʋ Wɛ zwa nɩ, 24 yɩ DƖ ni ba ŋʋʋsa yam. DƖ ma guli ni dɩlʋ DƖ dɛɛn na goni DƖ pa Abraham, dɩ Yizakɩ, dɩ Zakɔbɩ tɩn gulə.f 25 Wɛ ma nii DƖ na Yisɩrayɛlɩ tiinə bam na yaarɩ te tɩn yɩ DƖ kɩ DƖ yigə ba wʋnɩ.