Nuŋim Tɔnɔ
1
Zakɔbɩa bu-baara balʋ na tɔgɩ dɩd-o ba vu ba zʋʋrɩ Ezipi nɩ tɩn yɩra mʋ tɩntʋ. Nɔɔnʋ maama dɩ o digə tiinə dɛɛn mʋ dɛ ba vu.2 Ruban, dɩ Simeyon, dɩ Levi, dɩ Zuda.
3 Yisakaarɩ, dɩ Zabulɔn, dɩ Bɛnzamɛn.
4 Dan, dɩ Nɛfitali; Gadɩ, dɩ Asɛɛrɩ.b
5 O bu Zʋzɛfʋ dɛɛn maŋɩ o wʋ Ezipi nɩ mʋ. Zakɔbɩ dwi dɩm maama dɛɛn yɩ fusɩrpɛ mʋ. 6 Zʋzɛfʋ dɩ o cʋrrʋ tɩm kʋntʋ maama tɩm maa ba ba tɩ, kʋ wəli dɩ bantʋ dɩ maŋa kam kantʋ nɔɔna bam maama. 7 Yisɩrayɛlɩ dwi tiinə bam dɛɛn nan ta puli mʋ zanzan yɩ ba kɔgɔ daga kʋ gaalɩ. Ba ma tiini ba kɩ dam yɩ tɩʋ kʋm maama su dɩ ba dwi dɩm yɩranɩ.
8 Pa-dʋʋrʋ dɩ dɛɛn ma joŋi Ezipi o te. Wʋntʋ maa yǝri Zʋzɛfʋ ni nɩ. 9 Pɛ wʋm ma ta dɩ o nɔɔna bam o wɩ: «Nii-na Yisɩrayɛlɩ tiinə bantʋ na puli zanzan te yɩ ba jɩgɩ dam ba dwe dɩbam. 10 Pa-na sɩ dɩ́ kɩ swan dɩ́ cɩ ba pulim dɩm, sɩ kʋ na daɩ kʋntʋ, najara na tʋ dɩbam dɩdaanɩ tɩʋ kʋdoŋ tɩtarɩ nɩ, baá wǝli dɩbam dʋna bam wʋnɩ ba kɩ najara dɩdaanɩ dɩbam yɩ ba laan duri ba lu dɩbam tɩʋ kʋm nɩ.»
11 Kʋntʋ ŋwaanɩ Ezipi tiinə ma kuri tɩtʋŋa yuutiinə sɩ ba taa bɛɛsɩ-ba dɩ tɩtʋŋ-dɛɛra. Ba ma pa Yisɩrayɛlɩ tiinə bam lɔ Pitom tɩʋ dɩdaanɩ Ramsɛsɩ tɩʋ sɩ Ezipi Pɛ wʋm taa zɩgɩ o wʋdiiru da. 12 Ba nan na yǝni ba tiini ba bɛɛsɩ-ba te tɩn mʋ Yisɩrayɛlɩ tiinə bam laan fɔgɩ ba pulǝ zanzan yɩ ba jagɩ je maama. Kʋ ma pa Ezipi tiinə bam tiini ba kwarɩ fʋʋnɩ dɩ Yisɩrayɛlɩ tiinə bam. 13 Ezipi tiinə bam ma pa kʋ cɛ Yisɩrayɛlɩ tiinə bam yɩra yɩ ba tiini ba bɛɛsɩ-ba dɩ tɩtʋŋa. 14 Ba ma pa ba ŋwɩa kɩ cam dɩdaanɩ wara magɩm dɩ tɩɩrʋ tɩtʋŋ-dɛɛra. Ba dɛɛn ta fɩn-ba sɩ ba taa tʋŋa ba karɩ dɩ ba kadwi nɩ. Kʋntʋ tɩn Ezipi tiinə bam dɛɛn bɛɛsɩ Yisɩrayɛlɩ tiinə bam yɩ ba ba jɩgɩ ba ŋwaŋa.c
15 Kaana bale dɛɛn maa wʋra balʋ na yǝni ba zǝni Ebrud kapwi sɩ ba lʋ biə tɩn. Ba dɩdʋa yɩrɩ mʋ Sifira. Wʋdoŋ wʋm dɩ yɩrɩ maa yɩ Pua. Ezipi Pɛ wʋm ma ta dɩ ba o wɩ: 16 «Á na yǝni á wǝli Ebru kaana bam sɩ ba lʋ, yɩ ba na lʋga, sɩ á fɔgɩ á nii. Bu wʋm na yɩ bəkərə, sɩ á gʋ-o. O daa na yɩ bɩsankana, sɩ á yag-o sɩ o ta o ŋwɩ.» 17 Kaana bale bam maa kwarɩ Wɛ, yɩ ba wʋ sɛ Ezipi Pɛ wʋm ni. Ba maa paɩ bəkəri sɩm wʋra.
18 Pɛ wʋm ma bəŋi kaana bam yɩ o bwe-ba o wɩ: «Bɛŋwaanɩ mʋ á kɩ kʋntʋ yɩ á paɩ bəkəri sɩm ta ŋwɩ?» 19 Ba ma ləri ba wɩ: «Pɛ. Ebru kaana bam daɩ nɩnɛɛnɩ Ezipi kaana bam te. Bantʋ warɩma mʋ. Ba ma yǝni ba garɩ ba lʋ ba ti mʋ yɩ dɩbam laan yi ba te.» 20 Kʋntʋ ŋwaanɩ Wɛ ma kɩ kaana bale bam lanyɩranɩ. Yisɩrayɛlɩ tiinə bam dɛɛn puli mʋ yɩ ba kɔgɔ tiini kʋ gaalɩ. 21 Kaana bale bam na kwarɩ Wɛ tɩn ŋwaanɩ, DƖ ma pa ba dɩ lʋ biə.
22 Pa-farʋ wʋm laan ma pa o nɔɔna bam maama ni dɩntʋ DƖ wɩ: «Ebru tiinə na lʋgɩ bəkərə maama, á maŋɩ sɩ á dʋl-o mʋ á dɩ Nili bugə kam nɩ. Kʋ daarɩ kʋ na yɩ bɩsankana, sɩ á yag-o sɩ o ta ŋwɩ.»