Zakɔbɩ kɩ o biə bam yu-yoŋo
49
Zakɔbɩ dɛɛn ma bəŋi o bu-baara bam yɩ o ta dɩ ba o wɩ: «La-na daanɩ amʋ yigə nɩ sɩ a maŋɩ a brɩ abam kʋlʋ jwa na wʋ́ kɩ á yɩra nɩ tɩn.2 Zakɔbɩ biə bam, nan jeeri-na, sɩ á cəgi.
Cəgi-na á ko Yisɩrayɛlɩa taanɩ dɩm.
3 Ruban, nmʋ mʋ yɩ amʋ bu-kwɩan.
N maa n yɩ a nɔn-dʋŋʋ jana bu, yɩ n brɩ amʋ dam.
Nmʋ dam dɩ n zulə tiini ya gaalɩ nɔɔna maama.
4 Nmʋ nan nyɩ nɩnɛɛnɩ na na cuuri te tɩn mʋ,
n ba zɩgɩ jǝgǝ dɩdʋa.
Kʋntʋ tɩn, nmʋ bá kɛ yigə.b
Nmʋ zʋ n ko sara wʋnɩ n cɔgɩ-ka,
n na pəni dɩ amʋ kaanɩ wʋdoŋ tɩn ŋwaanɩ.
5 Simeyon dɩ Levi yɩ cʋrrʋ mʋ.
Ba sʋ-lwaanʋ tɩm jaanɩ vuvugə mʋ tɩ tui.
6 Amʋ ba lagɩ ba jǝŋǝ je maŋa dɩ maŋa!
Dɩ́ bá jeeri daanɩ sɩ dɩ́ bam bana,
Bɛŋwaanɩ, ba tɔgɩ ban-zɔŋɔ baŋa nɩ ba gʋ nɔɔna
ba daarɩ ba pa nabɛ gwarɩgɩ yɔɔ yɔɔ.
7 Amʋ sɔɔlɩ lwarɩm a yagɩ ba ban-lʋm dɩm baŋa nɩ,
ba na tiini ba kɩ lɛɛrʋ tɩn ŋwaanɩ.
Ba tiini ba jɩgɩ pu-sɩŋa zanzan.
A lagɩ a jagɩ ba dwi dɩm a yagɩ tɩga kam maama baŋa nɩ mʋ,
sɩ ba gwaanɩ dɩ Yisɩrayɛlɩ dwi tiinə bam maama.
8 Zuda, nmʋ cʋrrʋ tɩm wʋ́ te‑m.
N jɩŋa wʋ́ taa wʋ n dʋna bakala nɩ sɩ n wanɩ-ba.
Nmʋ ko biə wʋ́ ba ba kuni doonə tɩga nɩ ba zuli‑m.c
9 Amʋ bu Zuda, n nyɩ dɩ nyoŋ-pwala mʋ,
N nyɩ dɩ nyoŋ-kana na zi ka wʋdiu
yɩ ka laan vwɛ ka joori ka vu
ka tigi cɩmm ka tigə je nɩ tɩn mʋ.
Nɔɔn-nɔɔnʋ ba lagɩ sɩ o daanɩ‑m.
10 Zuda wʋ́ taa ze paarɩ nacəgə kam mʋ.
O dwi dɩm nan wʋ́ taa di paarɩ mʋ maŋa maama.
Dwi-gɛ tiinə wʋ́ ja wǝǝnu ba ba ba pa‑o
yɩ ba cɔɔlɩ ba yibiyə tɩga nɩ ba zul‑o.
11 Wʋntʋ yǝni o jaanɩ o bɩnaga o ve o le tiu yɩra nɩ,
dɩ kʋ tweeru biə na maŋɩ ba lamma te tɩn dɩ.
O kwe tweeru biə nyʋa mʋ o ma zarɩ o gwaarʋ tɩm.
12 O yiǝ laan wʋ́ taa sɩɩna lanyɩranɩ,
nɩnɛɛnɩ dɩvɛn balʋ o na nyɔa tɩn.
O yələ maa wʋ́ taa tiini ya pɩɩra
nɩ nayɩla te.
13 Zabulɔn wʋ́ taa zʋʋrɩ nɩnɩʋ ni nɩ mʋ,
nabwǝǝru wʋ́ taa tui tɩ zɩgɩ je sɩm kʋntʋ nɩ.
O laŋa kam dɩ wʋ́ yalɩ ka vu ka yi Sidɔn je sɩm.
14 Yisakaarɩ nyɩ dɩ bɩnaga mʋ na tiini ka damma
yɩ ka tigi ka zɩla ywəllu tɩle tɩtarɩ nɩ ka sin tɩn mʋ.
15 Wʋntʋ nɛ nɩ o zʋʋrɩm je sɩm lamma,
dɩdaanɩ o tɩga kam maama.
Kʋntʋ ŋwaanɩ o laan ma sɛ sɩ o zɩŋɩ zɩla yam
yɩ o daarɩ o sɛ tɩtʋŋ-cɛɛra nɩ gambaa te.
16 Dan mʋ wʋ́ taa te o nɔɔna dɩ cɩga.
O dwi dɩm wʋ́ jǝni Yisɩrayɛlɩ tiinə bam wʋnɩ.
17 Dan nan wʋ́ taa nyɩ dɩ bɩsankwɩa mʋ,
ka na tigi cwǝŋǝ ni nɩ tɩn.
Ka maa wʋ́ zaŋɩ ka dʋnɩ sisǝŋǝ nakilə
sɩ ka pa diru wʋm yalɩ o tʋ o kwaga tɩtarɩ nɩ.
18 Baŋa-Wɛ, amʋ cəgi nmʋ mʋ sɩ n joŋi-nɩ n yagɩ!
19 Kʋ na yɩ Gadɩ, vɩnvɩrna mʋ wʋ́ kwaanɩ sɩ ba vrɩ‑o.
Wʋntʋ nan wʋ́ pipiri o zəli-ba pa ba viiri.
20 Asɛɛrɩ tɩga kam wʋ́ taa kɩ wʋdi-laarʋ zanzan.
Oó taa jɩgɩ wʋdiu kʋlʋ na maŋɩ dɩ pɛ dim tɩn.
21 Nɛfitali nyɩ dɩ fərə kalʋ ba na yagɩ sɩ ka taa te ka tɩtɩ tɩn mʋ.
Ka maa lʋrɩ bu-laarʋ.
22 Zʋzɛfʋ nyɩ dɩ tiu kʋlʋ na ləri biə zanzan tɩn mʋ.
Kʋ maa zɩga kʋ bwələ dɩ bugə,
yɩ kʋ nɛ sɩm yɔɔrɩ sɩ tɔgɩ sɩ ma diini kəbrə baŋa.
23 O dʋna bam ma ta ba cɩna dɩ yi-sɩɩna
sɩ ba ciŋ‑o ba ja.
24 O tɩtɩ taŋa kam nan yɔɔrɩ ka zɩgɩ mʋ cɩga cɩga.
O jɩn sɩm maa dana sɩ o taa taɩ o cɩna.
Baŋa-Wɛ dɩm na yɩ Zakɔbɩ dwi tiinə Dam maama Tu wʋm tɩn
mʋ wʋ́ pa Zʋzɛfʋ dam.
Wʋntʋ nii o nɔɔna baŋa nɩ, nɩ nayɩrʋ te mʋ.
O maa yɩ Yisɩrayɛlɩ tiinə dalɩm je, nɩ piu mʋ te.
25 Nmʋ ko Wɛ dɩm, dɩntʋ mʋ wʋ́ wəli‑m.
Dam-fɔrɔ Tu Wɛ dɩm mʋ wʋ́ kɩ nmʋ yu-yoŋo.
Dɩntʋ wʋ́ pa dʋa nuŋi wɛyuu ka taa nɩ.
Na dɩ wʋ́ buri tɩga kuri nɩ.
Wɛ wʋ́ pa n na dwi zanzan,
yɩ n vara dɩ taa daga.
26 Nmʋ ko na sɔɔlɩ Wɛ yu-yoŋo o yagɩ n yuu nɩ te tɩn
dwe wo-laarʋ tɩlʋ na wʋ faŋa faŋa pweeru tɩm nɩ tɩn.
Wɛ wʋ́ pa nmʋ Zʋzɛfʋ na wʋdiiru dɩ wo-laarʋ kʋ ja gaalɩ.
DƖ wʋ kɩ nmʋ yu-yoŋo,
nmʋ wʋlʋ na yɩ pabu nmʋ cʋrrʋ tɩm maama yigə nɩ tɩn.
27 Bɛnzamɛn nyɩ dɩ wiiru na jaanɩ vara kʋ tʋrɩ tɩn mʋ.
Zɩzɩŋa maama o yǝni o di o na jaanɩ kʋlʋ tɩn mʋ.
Sɩ dɩdaan-ni na yiǝ,
o daa pɔɔrɩ kʋlʋ maama na daarɩ tɩn.»
28 Yisɩrayɛlɩ dwiə fugə-yale yam mʋ kʋntʋ, dɩdaanɩ ba ko dɛɛn na tagɩ te o ma sɔɔlɩ Wɛ yu-yoŋo o kɩ ba yuu nɩ tɩn. O kwe Wɛ yu-yoŋo o ma kɩ ba yu-yoŋo sɩ kʋ maŋɩ dɩ ba dɩdʋa dɩdʋa na yɩ te tɩn mʋ.
Zakɔbɩ tʋʋnɩ
29 Zakɔbɩ dɛɛn laan ma pa o biə bam kwǝrǝ kantʋ yɩ o wɩ: «Kʋ laan gɛ fɩɩn sɩ amʋ dɩ tɩ sɩ a vu a nabaara bam te. Amʋ na tɩga, kwe-na amʋ á kɩ gugoro dɩlʋ nɩ ba dɛɛn na kɩ amʋ kwə bam da tɩn. Tɩga kam dɛɛn ya yɩ Hɛtɩ tu Efrɔn nyɩm mʋ. 30 Gugoro dɩm kʋntʋ wʋ Makpela pwələ kam nɩ mʋ, yɩ dɩ bwələ dɩ Kaanan tɩʋ Mamre. Abraham dɛɛn yəgi-dɩ Efrɔn tee nɩ mʋ, sɩ o taa kɩ o nɔɔna dɩ wʋnɩ. 31 Dáanɩ mʋ ba dɛɛn kɩ Abraham dɩ o kaanɩ Sara. Ba ma daarɩ ba kɩ Yizakɩ dɩ o kaanɩ Rebeka dɩ wʋnɩ. Amʋ dɩ dɛɛn kɩ a kaanɩ Lea da. 32 Abraham dɛɛn nan yəgi bɔɔnɩ dɩm dɩdaanɩ pwələ kam maama mʋ Hɛtɩ tiinə bam tee nɩ.»
33 Zakɔbɩ dɛɛn ma brɩ o biə bam ba na wʋ́ kɩ te maama tɩn o ti. O laan ma guni o pəni o pwəgə je nɩ, yɩ o tɩ.