48
Kʋ dɛɛn daa wʋ dáanɩ yɩ ba ta dɩ Zʋzɛfʋ ba wɩ: «N ko ba jɩgɩ yazurə mʋ.» Zʋzɛfʋ ma ja o bu-baara Manasɩ dɩ Efrayim, o wǝli da o vu sɩ o daanɩ o ko yawɩʋ kʋm. 2 Ba na yi da tɩn, mʋ nɔɔnʋ tagɩ dɩ Zakɔbɩ o wɩ: «N bu Zʋzɛfʋ tu sɩ o daanɩ n pwəgə.» Zakɔbɩ dɛɛn ma kɩ o tɩtɩ o kɩ daanɩ o zaŋɩ o pwəgə je nɩ o jǝni. 3 O ma ta dɩ Zʋzɛfʋ o wɩ:«Amʋ na wʋ Kaanan tɩʋ Luuzi nɩ tɩn, Dam-fɔrɔ Tu Wɛ dɩm dɛɛn vɩɩrɩ o tɩtɩ dɩ amʋ. DƖ dɛɛn ma kɩ amʋ yu-yoŋo dáanɩ. 4 Wɛ ma daarɩ DƖ ta dɩ amʋ DƖ wɩ: ‹Amʋ wʋ́ pa n dwi puli sɩ n na kɔgɔ zanzan, yɩ nmʋ biə ji tɩɩnɩ zanzan. Amʋ ta wʋ́ daarɩ a kwe tɩga kantʋ a pa‑m sɩ n dɩ n dwi dɩm taa te-ka maŋa maama.›a
5 Tɔ, amʋ bu, amʋ nan lagɩ sɩ n ta n ye wɩ: n biə bale bam n na lʋgɩ Ezipi nɩ yɩ a dɛɛn ta wʋ tu yo tɩn wʋ́ ji amʋ biə mʋ. Efrayim dɩ Manasɩ laan yɩ amʋ biə mʋ, nɩnɛɛnɩ Ruban dɩ Simeyon na maŋɩ ba yɩ amʋ biə te tɩn.b 6 Nmʋ daa n na lʋgɩ biə badonnǝ, sɩ ba laan taa yɩ n tɩtɩ biə. Kʋ nan yɩ Efrayim dɩ Manasɩ yɩra baŋa nɩ mʋ ba dɩ wʋ́ joŋi ba tɩga kam pɔɔrɩm. 7 Amʋ dɛɛn na zɩgɩ Mezopotami nɩ a maa joori tɩn, a wʋ dɛɛn tiini kʋ cɔgɩ dɩ n nu Rasɛɛlɩ na tɩgɩ Kaanan tɩʋ kʋm nɩ tɩn ŋwaanɩ mʋ. Dɩ́ na wʋ cwǝŋǝ nɩ dɩ́ ve tɩn, o tɩga yɩ ba kɩ-o cwǝŋǝ kam yuu nɩ mʋ, kʋ bwələ dɩ Efrata.» (Efrata yɩ Betelɩhɛm mʋ).
8 Zakɔbɩ dɛɛn ma na Zʋzɛfʋ bu-baara bale bam yɩ o bwe o wɩ: «Bantʋ yɩ bra mʋ?» 9 Zʋzɛfʋ ma ləri o ko o wɩ: «Ba yɩ biə balʋ Wɛ na pɛ amʋ yo tɩn mʋ.» Zakɔbɩ ma ta o wɩ: «Pa ba yi a yɩra sɩ a sɔɔlɩ Wɛ yu-yoŋo a kɩ ba yuu nɩ.» 10 Zakɔbɩ dɛɛn nan tiini o kwɩn mʋ, yɩ o yiǝ dɛɛn wʋra ya dwiə. Zʋzɛfʋ ma ja o biə bam o yi o yɩra. O ko dɛɛn ma kukwəri-ba lanyɩranɩ. 11 Zakɔbɩ ma ta dɩ Zʋzɛfʋ o wɩ: «Amʋ dɛɛn daa maŋɩ a ba tɩɩnɩ sɩ a na nmʋ tɩtɩ yibiyə. Nan nii! Wɛ laan pɛ a na n biə bam dɩ a wǝli da.»
12 Zʋzɛfʋ dɛɛn ma pa o biə bam fʋfɔ dáa o ko nɛ baŋa nɩ. O tɩtɩ ma tiiri o ko yigə nɩ yɩ o cɔɔlɩ o yibiyə tɩga nɩ. 13 Zʋzɛfʋ ma pa o biə bam zɩgɩ Zakɔbɩ sɛ sɩm nɩ. Efrayim wʋ Zakɔbɩ jagwiə nɩ yɩ Manasɩ maa wʋ o jazɩm nɩ. 14 Zakɔbɩ dɛɛn ma garɩ o jazɩm dɩm o daŋɩ Efrayim yuu nɩ, yɩ wʋntʋ mʋ yɩ nyaanɩ wʋm. O ma daarɩ o kwe o jagwiə kam o daŋɩ Manasɩ yuu nɩ. Wʋntʋ nan mʋ yɩ bu-kwɩan kam. 15 O ma daarɩ o kwe Wɛ yu-yoŋo o ma kɩ Zʋzɛfʋ yu-yoŋo yɩ o wɩ:
«Wɛ wʋ́ kɩ biə bantʋ yu-yoŋo.
O yɩ Wɛ dɩlʋ amʋ kwə Abraham dɩ Yizakɩ dɛɛn na sɛ ba pa‑o tɩn mʋ.
Wɛ dɩm dɩntʋ mʋ nii amʋ baŋa nɩ nɩ nayɩrʋ te
a ŋwɩa maama wʋnɩ sɩ kʋ yi zɩm.
16 Amʋ cam dwi maama wʋnɩ,
o malɛka kam mʋ yǝni o lɩ-nɩ dɩ wʋnɩ.
Wɛ dɩm dɩntʋ wʋ́ kɩ bəkəri sɩm yu-yoŋo.
Wɛ wʋ́ pa nɔɔna taa tɔgɩ biə bantʋ baŋa nɩ ba guli amʋ yɩrɩ,
kʋ wǝli dɩ amʋ kwə Abraham dɩ Yizakɩ yɩra yam.
Wɛ wʋ́ pa ba dwi puli zanzan lʋgʋ baŋa nɩ.»
17 Zʋzɛfʋ na nɛ nɩ o ko jazɩm dɩm daŋɩ Efrayim yuu nɩ tɩn, mʋ kʋ tiini kʋ daan‑o. O dɛɛn ma kwaanɩ sɩ o dwanɩ o ko jazɩm dɩm Efrayim yuu nɩ, sɩ o ja o vu o daŋɩ Manasɩ yuu nɩ. 18 Zʋzɛfʋ ma ta dɩ o ko o wɩ: «A ko, wʋntʋ mʋ yɩ bu-kwɩan kam. Nan kwe n jazɩm n daŋɩ wʋntʋ yuu nɩ.» 19 O ko wʋm ma vɩn yɩ o wɩ: «Amʋ bu, a ye kʋ ni nɩ. Wʋntʋ dɩ́ wʋ́ sɩɩnɩ o ji nɔn-kɔgɔ. O nyaanɩ wʋm nan wʋ́ taa daga o dwe‑o, yɩ o dwi dɩm mʋ wʋ́ ji tɩɩnɩ zanzan.»
20 Dɩntʋ dɛ dɩm nɩ Zakɔbɩ ma sɔɔlɩ Wɛ yu-yoŋo o kɩ ba yuu nɩ yɩ o wɩ: «Yisɩrayɛlɩ tiinə na yǝni ba kwe Wɛ yu-yoŋo ba ma kɩ wʋlʋ maama yu-yoŋo, baá taa tɔgɩ á yɩra yam ŋwaanɩ yɩ ba wɩ: ‹Wɛ wʋ́ pa n ta n yɩ nɩnɛɛnɩ Efrayim dɩdaanɩ Manasɩ na yɩ te tɩn.› » Kʋ kɩ kʋntʋ mʋ yɩ o pa Efrayim kɛ Manasɩ yigə.
21 Zakɔbɩ dɛɛn ma ta dɩ Zʋzɛfʋ o wɩ: «Kʋ laan yi amʋ tʋʋnɩ. Wɛ nan wʋ́ taa wʋra abam tee nɩ sɩ o ja abam o joori á nabaara tɩga kam sɩ á taá je da. 22 Kʋ nan na yɩ nmʋ tɩtɩ, n dwe n cʋrrʋ tɩm maama. A kwe pweeru laŋa kalʋ a na mɛ a sʋ-lɔŋɔ dɩdaanɩ a taŋa a vrɩ-ka Amɔɔrɩ tiinə bam tee nɩ tɩn mʋ a pa‑m.»