47
Zʋzɛfʋ ma vu o ta dɩ Pa-farʋ wʋm o wɩ: «Amʋ ko dɩ a cʋrrʋ jaanɩ ba peeni, dɩ ba bʋnɩ, dɩ ba naanɩ dɩdaanɩ ba wǝǝnu maama mʋ ba ba yo. Lele kʋntʋ, ba tu sɩ ba jǝni Gozɛnɩ laŋa kam nɩ mʋ.» 2 O ta ma kuri o cʋrrʋ tɩm wʋnɩ tɩnu o ja o zʋ Pa-farʋ wʋm te sɩ ba war‑o.3 Pɛ wʋm ma bwe Zʋzɛfʋ cʋrrʋ tɩm o wɩ: «Abam tʋŋɩ bɛ tɩtʋŋa mʋ?» Ba ma lǝr-o ba wɩ: «Dɩ́ yɩ nayɩra mʋ, nɩnɛɛnɩ dɩbam kwə bam dɛɛn na tʋŋɩ tɩtʋŋɩ dɩlʋ tɩn.» 4 Ba dɛɛn ta ma ta dɩd-o ba wɩ: «Dɩ́ tu yo sɩ dɩ́ taa zʋʋrɩ lʋgʋ kʋntʋ nɩ maŋa fɩnfɩɩn mʋ. Bɛŋwaanɩ, kana kam tiini ka cɛ Kaanan tɩʋ kʋm nɩ mʋ, yɩ dɩ́ vara bam daa ba naɩ gaarʋ sɩ ba taa di. Kʋntʋ nan tɩn, dɩ́ laan nan loori-m mʋ, dɩ́ tu, sɩ n na sɛ, sɩ dɩ́ taa zʋʋrɩ Gozɛnɩ laŋa kam nɩ.»
5 Pa-farʋ wʋm ma ta dɩ Zʋzɛfʋ o wɩ: «Nmʋ ko dɩ n cʋrrʋ tɩm tu nmʋ te mʋ. 6 Ezipi tɩʋ kʋm ni maama wʋ n jɩŋa nɩ. Pa ba jǝni tɩga kam mɛ maama na lamma tɩn. Pa-ba pwələ sɩ ba taa zʋʋrɩ Gozɛnɩ nɩ. Nmʋ ma na maanɩ nɩ ba wʋlʋ tiini o ye vara kɔnɔ lanyɩranɩ, sɩ n kwe amʋ tɩtɩ naanɩ dɩm n kɩ kʋ tu jɩŋa nɩ sɩ o taa nii-dɩ o pa-nɩ.»
7 Zʋzɛfʋ laan ma ja o ko Zakɔbɩ o zʋ sɩ o warɩ Pɛ wʋm. Zakɔbɩ dɛɛn ma sɔɔlɩ Wɛ yu-yoŋo o kɩ Pa-farʋ wʋm yuu nɩ. Kʋntʋ na ti tɩn, 8 Pɛ wʋm ma bwe‑o o wɩ: «Nmʋ jɩgɩ bɩna yagra mʋ?» 9 Zakɔbɩ dɛɛn ma ləri Pɛ wʋm o wɩ: «Amʋ bɩna a na mɛ a beeri lʋgʋ baŋa nɩ tɩn yɩ bi dɩ fiintɔ mʋ (130). Bɩna yam kʋntʋ nan ba daga yɩ ya su dɩ cam. Amʋ bɩna yam bá twɛ a kwə dɛɛn na mɛ bɩna yalʋ ba beeri lʋgʋ baŋa nɩ tɩn.» 10 Zakɔbɩ daa ta ma warɩ Wɛ o pa Pa-farʋ wʋm yɩ o laan nuŋi da o tee nɩ.
11 Zʋzɛfʋ dɛɛn kɩ Pa-farʋ wʋm na brɩ-o sɩ o kɩ te tɩn mʋ. O ma pa o ko dɩ o cʋrrʋ tɩm jǝŋǝ je Ezipi nɩ sɩ ba taa zʋʋrɩ da. Tɩga kalʋ o dɛɛn na pɛ-ba tɩn laan jigi ba tɩtɩ nyɩm mʋ yɩ ka lamma ka dwe Ezipi tɩga kam maama. Je sɩm kʋntʋ dɛɛn bwələ dɩ Ramsɛsɩ tɩʋ kʋm na wʋ Gozɛnɩ laŋa kam nɩ tɩn mʋ. 12 Zʋzɛfʋ dɛɛn mʋ ta jɩgɩ o ko, dɩ o cʋrrʋ tɩm, dɩ ba kwaga kam maama ni-wʋdiu. Nankwɩn dɩ bu-balwa maama dɛɛn di wʋntʋ jɩŋa nɩ mʋ.
Zʋzɛfʋ dɩ kana maŋa kam taanɩ
13 Wʋdiu dɛɛn tǝri lʋgʋ kʋm maama je je nɩ. Kana kam dɛɛn cɛ Ezipi nɩ dɩdaanɩ Kaanan nɩ yɩ nɔɔna bam maama dɛɛn wʋra ba zaŋɩ ba je dɩ kana. 14 Nɔɔna maama dɛɛn maa tui Zʋzɛfʋ te ba yəgi mɩna. O dɩ dɛɛn ma la səbu kʋm o ja o vu Pa-farʋ wʋm sɔŋɔ. 15 Ezipi tiinə bam dɩ Kaanan tiinə bam ma di ba sǝbiǝ ba ti yɩ kana ta wʋra. Ezipi tiinə maama ma vu Zʋzɛfʋ te ba wɩ: «Pa dɩbam wʋdiu, sɩ dɩ́ yɩ pu dɩ kana yɩ n ta zɩgɩ da! Dɩ́ səbu maama ti.»
16 Zʋzɛfʋ dɛɛn ma ta dɩ ba o wɩ: «Nan ja-na á vara á ba á pa-nɩ. Abam səbu na sɩɩnɩ kʋ ti, amʋ wʋ́ yəgi wʋdiu a pa abam sɩ á vara bam ləri səbu yuu nɩ.» 17 Ba ma ja ba vara bam ba vu Zʋzɛfʋ te, yɩ o dɩ pa-ba wʋdiu o ma o lǝni ba sise yuu nɩ, dɩ ba peeni dɩ ba bʋnɩ yuu nɩ. O dɛɛn ta pɛ-ba wʋdiu ba naanɩ dɩ ba bɩnɛ ŋwaanɩ mʋ. Dɩntʋ bɩnɩ dɩm nɩ o dɛɛn mɛ wʋdiu kʋm o lǝni ba vara bam maama.
18 Bɩnɩ dɩdoŋ daa ma yi. Ezipi tiinə dɛɛn ma vu Zʋzɛfʋ te ba wɩ: «Dɩbam tu, dɩ́ bá wanɩ dɩ́ səgi cɩga kam nmʋ yigə nɩ. Dɩbam səbu ti, dɩ́ vara maama maa wʋ nmʋ jɩŋa nɩ. Kʋlʋ yɩranɩ laan na daarɩ tɩn mʋ yɩ dɩ́ karɩ sɩm dɩdaanɩ dɩ́ tɩtɩ yɩra yam. 19 Nan kwaanɩ n wǝli dɩbam. Kʋ na daɩ kʋntʋ, dɩ́ wʋ́ je mʋ dɩdaanɩ dɩ́ tɩga kam maama. Yəgi dɩbam dɩdaanɩ dɩ́ karɩ sɩm sɩ n pa dɩbam wʋdiu. Dɩbam wʋ́ ji Pa-farʋ wʋm gambɛ yɩ o ta wʋ́ taa te dɩ́ tɩga kam dɩ, nɩnɛɛnɩ n na pɛ dɩbam wʋdiu sɩ dɩ́ joŋi dɩ́ tɩtɩ, dɩ wo-dwə sɩ dɩ́ tɩga kam dɩ bá taa tigi kafɛ.»
20 Zʋzɛfʋ dɛɛn ma yəgi Ezipi tɩga kam maama pa ka ji Pa-farʋ wʋm nyɩm. Kana kam na tiini ka cɛ tɩn, Ezipi tiinə bam maama dɛɛn maa jɩgɩ ba karɩ ba yəgi kʋntʋ. Pa-farʋ wʋm ma ba o taa te tɩga kam maama. 21 Zʋzɛfʋ dɛɛn ma pa nɔɔna bam ji gambɛ mʋ, kʋ zɩgɩ Ezipi daa dɩdʋa nɩ sɩ kʋ yi kakam daa nɩ. 22 Kʋ nan na yɩ Ezipi kaanɩm tiinə bam, o dɛɛn wʋ yəgi bantʋ tɩga, bɛŋwaanɩ Pa-farʋ wʋm dɛɛn mʋ pɔɔrɩ o wʋdiiru o paɩ bantʋ sɩ kʋ yi ba ni. Kʋntʋ ŋwaanɩ ba dɛɛn ba maŋɩ sɩ ba kwe ba tɩga ba yəgi ba pa Zʋzɛfʋ.
23 Zʋzɛfʋ ma ta dɩ nɔɔna bam o wɩ: «Á wʋ nɛ na? Abam dɩdaanɩ á tɩga kam maama laan jigi Pa-farʋ wʋm nyɩm mʋ. Nan joŋi-na wo-dwə á vu á du á karɩ sɩm nɩ. 24 Wʋdiu zagɩm maŋa nɩ, sɩ á pɔɔrɩ wʋdiiru tɩm kuni bɩnu. Á wʋ́ kwe pɔɔrɩm dɩdʋa á ba á pa Pɛ mʋ, yɩ á daarɩ pɔɔrɩm yana á jɩgɩ á ma á kɩ á wo-dwə dɩdaanɩ á ni-wʋdiu sɩ kʋ pa abam dɩ á digə tiinə.» 25 Nɔɔna bam dɛɛn ma ləri ba wɩ: «Dɩ́ tu, nmʋ joŋi dɩbam mʋ n yagɩ. Nmʋ na tiini n kɩ dɩbam lanyɩranɩ kʋntʋ tɩn, dɩ́ wʋ́ taa yɩ Pɛ wʋm gambɛ.»
26 Zʋzɛfʋ dɛɛn ma lɛɛrɩ o pa ni sɩ dɩ taa tʋŋɩ Ezipi tɩga maama baŋa nɩ. Dɩ nan wʋra mʋ dɩ zɩm tɩntʋ. Kʋ zɩgɩ mʋ wɩ wʋdiiru zagɩm maŋa nɩ, sɩ nɔɔna maama pɔɔrɩ-tɩ kuni bɩnu. Pɔɔrɩm dɩdʋa maa wʋ́ taa yɩ Pa-farʋ wʋm nyɩm. Kaanɩm tiinə bam tɩga yɩranɩ mʋ dɛɛn tɔgɩ ka daɩ Pɛ wʋm nyɩm.
Zakɔbɩ twɛ sɩ o tɩ
27 Yisɩrayɛlɩ tiinə bam ma lɛɛrɩ ba zʋʋrɩ Ezipi nɩ. Ba dɛɛn wʋ Gozɛnɩ laŋa kam nɩ mʋ. Dáanɩ mʋ ba dɛɛn tiini ba duni yɩ ba dwi ta puli zanzan.
28 Zakɔbɩ dɛɛn jǝni Ezipi nɩ bɩna fugə-yarpɛ (17) mʋ. O ŋwɩa dɛɛn jaanɩ bɩna bi dɩdaanɩ fiinna-yarpɛ (147) mʋ. 29 O dɛɛn tu o maanɩ nɩ kʋ daa bá dáanɩ sɩ o tɩ. O ma bəŋi o bu Zʋzɛfʋ o ta o wɩ: «Nɩnɛɛnɩ nmʋ yi na su dɩ amʋ, sɩ n kwe n jɩŋa n kɩ amʋ cwe kuri nɩ sɩ n du durə. Goni ni n pa-nɩ nɩ nmʋ wʋ́ duri amʋ ŋwaŋa sɩ n brɩ n cɩga dɩ amʋ. Sɛ nɩ: a na tɩga, n bá kɩ-nɩ Ezipi nɩ. 30 Amʋ na maa ve a kwə te, a lagɩ sɩ á ja-nɩ mʋ á nuŋi Ezipi nɩ. Á laan maa wʋ́ ja-nɩ á vu á kɩ mɛ ba dɛɛn na kɩ amʋ kwə bam tɩn.»a Zʋzɛfʋ ma ləri o wɩ: «Amʋ wʋ́ kɩ nmʋ na wɩ a kɩ te tɩn.»
31 Zakɔbɩ ma ta dɩd-o sɩ o fɔgɩ o du durə sɩ o kɩ kʋntʋ. Zʋzɛfʋ ma sɩɩnɩ o du durə dɩm o pa‑o. Zakɔbɩ ma guni o pəni o pwəgə je nɩ yɩ o kɩ Wɛ le.