Zakɔbɩ dɩ o sɔŋɔ tiinə ve Zʋzɛfʋ te
46
Zakɔbɩ dɛɛn ma lu o woŋo maama o ja o nuŋi o vu Bɛɛr-Seba. O na yi da tɩn mʋ o kɩ kaanɩm o pa o ko Yizakɩ Wɛ dɩm. 2 Wɛ dɛɛn ma ba Zakɔbɩ te tɩtɩ nɩ DƖ ŋɔɔnɩ dɩd-o DƖ wɩ: «Zakɔbɩ! Zakɔbɩ!» O dɩ ma ləri wɩ: «Nii-nɩ.» 3 Wɛ ma ləri DƖ wɩ: «Amʋ mʋ yɩ Baŋa-Wɛ, nmʋ ko Wɛ dɩm. Nan yɩ kwarɩ fʋʋnɩ sɩ n vu Ezipi, sɩ dáanɩ mʋ amʋ lagɩ a pa n dwi dɩm puli dɩ ji dwi kamunu. 4 Amʋ tɩtɩ wʋ́ tɔgɩ dɩ nmʋ sɩ dɩ́ vu Ezipi. A nan ta wʋ́ joori a ja n dwi a ba yo seeni sɩ ba jǝni tɩga kantʋ baŋa nɩ. Nmʋ nan na lagɩ n tɩ, nmʋ bu Zʋzɛfʋ tɩtɩ mʋ wʋ́ ja nmʋ pa n tɩ.»5 Zakɔbɩ dɛɛn ma yagɩ Bɛɛr-Seba. O biə bam ma ja‑o, ba wǝli dɩ ba bu-balwa, dɩ ba kaana bam maama ba jǝni sise-tərikooru wʋnɩ, nɩnɛɛnɩ Pa-farʋ wʋm na tʋŋɩ sɩ ba kɩ te tɩn. 6 Ba dɛɛn ta jaanɩ ba vara mʋ, dɩ ba zɩla yalʋ maama ba na nɛ Kaanan tɩʋ kʋm nɩ tɩn ba wǝli da ba ja vu Ezipi. Zakɔbɩ dɛɛn ma pɛ o dwi dɩm maama sɩ ba vu Ezipi. 7 Kʋ maa yɩ o biə maama mʋ, dɩ o naarʋ, bəkəri dɩ bɩsankam maama mʋ o jaanɩ o vu.
8 Zakɔbɩ bu-baara balʋ dɛɛn na dɛ ba vu Ezipi tɩn yɩra mʋ tɩntʋ:a
Henɔkɩ, dɩ Palu, dɩ Esrɔm, dɩ Karmɩ.
10 Simeyon dɩ bu-baara bam maa yɩ:
Yemuɛlɩ, dɩ Yamini, dɩ Ohadɩ, dɩ Yakinni, dɩ Tɩsoharɩ dɩ Sawuli. Sawuli maa yɩ Kaanan tiinə bukɔ bu.
11 Levi dɩ bu-baara bam maa yɩ:
Gɛrsɔnɩ, dɩ Keyatɩ, dɩdaanɩ Merari.
12 Zuda dɩ bu-baara bam maa yɩ:
Ɛrɩ, dɩ Onanɩ, dɩ Swela, dɩ Farɛsɩ, dɩ Zara. Kʋ nan na yɩ Ɛrɩ dɩ Onanɩ, bantʋ maŋɩ ba tɩ Kaanan tɩʋ kʋm nɩ mʋ. Farɛsɩ bu-baara bam maa yɩ Esrɔm dɩdaanɩ Hamuli.
13 Yisakaarɩ bu-baara bam maa yɩ:
Tola, dɩ Pua, dɩ Yɔbɩ, dɩ Simirɔnɩ.
14 Zabulɔn dɩ bu-baara bam maa yɩ: Serɛdɩ, dɩ Elɔnɩ, dɩ Yaleheli.
15 Zakɔbɩ kaanɩ Lea bu-baara dɩ ba dɩ biə mʋ kʋntʋ. O dɛɛn nan lʋgɩ o biə bam Mezopotami nɩ mʋ. Lea ta lʋgɩ bukɔ o pa Zakɔbɩ, o yɩrɩ mʋ Dina. Zakɔbɩ ka-kwɩa kam bu-baara dɩ o bukɔ Dina na kɩ daanɩ, ba maama wʋ́ taa yɩ fiintɔ-batɔ mʋ.
16 Gadɩ dɩ bu-baara bam dɛɛn mʋ yɩ:
Zefon, dɩ Hagi, dɩ Suni, dɩ Ezibon, dɩ Eri, dɩ Arɔdi, dɩdaanɩ Areli.
17 Asɛɛrɩ dɩ bu-baara bam maa yɩ:
Imina, dɩ Isiva, dɩ Isivi dɩ Beria. Ba nakɔ yɩrɩ dɛɛn mʋ yɩ Sera. Beria bu-baara bam maa yɩ Hebɛrɩ dɩ Malkiɛlɩ.
18 Laban dɛɛn ya kwe Zilpa mʋ o pa o bukɔ Lea sɩ o ma o kɩ o tɩntʋŋ-kana. Wʋntʋ dɩ dɛɛn ma lʋ biə bantʋ o pa Zakɔbɩ. Bantʋ dɩ ba biə maama yɩ fugə-bardʋ mʋ.
19 Zakɔbɩ kaanɩ Rasɛɛlɩ lʋgɩ bu-baara bale o pa‑o:
Zʋzɛfʋ dɩdaanɩ Bɛnzamɛn.
20 Zʋzɛfʋ dɩ ma lʋ biə bale Ezipi nɩ: Manasɩ dɩ Efrayim.b Bantʋ dɛɛn yɩ Ɔnɩ kaanɩm tu Potifera bukɔ Asnatɩ biə mʋ.
21 Bɛnzamɛn bu-baara bam maa yɩ:
Bela, dɩ Bekɛrɩ, dɩ Asabeli, dɩ ɡera, dɩ Naaman, dɩ Eyi, dɩ Rokɩ, dɩ Mupim, dɩ Hupim dɩdaanɩ Arada.
22 Rasɛɛlɩ bu-baara bantʋ mʋ o dɛɛn lʋgɩ o pa Zakɔbɩ. Bantʋ dɩ ba biə maama yɩ fugə-bana mʋ.
23 Dan bu-baarʋ wʋm dɛɛn mʋ yɩ: Husim.
24 Nɛfitali dɩ bu-baara bam maa yɩ:
Yahazeli, dɩ ɡuni, dɩ Jezera, dɩdaanɩ Silem.
25 Laban dɛɛn ya kwe Bila mʋ o pa o bukɔ Rasɛɛlɩ sɩ o ma o kɩ-o tɩntʋŋ-kana. Wʋntʋ dɩ dɛɛn ma lʋ biə o pa Zakɔbɩ. Bantʋ dɩ ba biə maama yɩ barpɛ mʋ.
26 Zakɔbɩ tɩtɩ dwi dɩlʋ dɛɛn na dɛ ba vu Ezipi tɩn dɛɛn yɩ nɔɔna fusɩrdʋ-bardʋ (66) mʋ, nɩnɛɛnɩ ba na wʋ jeeli o bu-kaana bam ba wǝli da. 27 Bu-baara bale bam Zʋzɛfʋ na wʋ Ezipi nɩ yɩ o lʋ tɩn na wǝli da, Zakɔbɩ sɔŋɔ tiinə balʋ na zaŋɩ ba vu Ezipi tɩn maama yɩ nɔɔna fusɩrpɛ (70) mʋ.
28 Zakɔbɩ dɛɛn tʋŋɩ Zuda mʋ sɩ o loori yigə o vu Zʋzɛfʋ te sɩ ba wanɩ ba jeeri daanɩ Gozɛnɩ laŋa kam nɩ. Ba na yi Gozɛnɩ tɩn, 29 dɩ Zʋzɛfʋ dɛɛn pɛ o tɩntʋŋna ti o sise-təriko yigə yɩ o din kʋ baŋa nɩ o vu Gozɛnɩ sɩ o jeeri o ko Zakɔbɩ. Zʋzɛfʋ na yɔɔrɩ o na o ko tɩn, mʋ o dʋlɩ o vɔna o kukwǝr-o yɩ o kan yi-na sɩ kʋ dáanɩ. 30 Zakɔbɩ dɛɛn ma ta Zʋzɛfʋ o wɩ: «Amʋ tɩtɩ yiǝ laan nɛ nmʋ yɩ n ta ŋwɩ! Amʋ laan na nɛ cwǝŋǝ, aá tɩ.»
31 Zʋzɛfʋ ma ta dɩ o cʋrrʋ tɩm dɩdaanɩ o ko sɔŋɔ tiinə bam o wɩ: «Amʋ wʋ́ vu a ŋɔɔnɩ dɩ Pa-farʋ wʋm a ta nɩ ‹Amʋ cʋrrʋ dɩ a ko sɔŋɔ tiinə dɛɛn zʋʋrɩ Kaanan nɩ mʋ. Ba maama laan nan tu a te mʋ yo seeni.› 32 A ta wʋ́ pa o lwarɩ nɩ á yɩ nayɩrɩ-dwi mʋ, yɩ á nan jaanɩ á peeni, dɩ á bʋnɩ, dɩ á naanɩ dɩdaanɩ á woŋo maama mʋ á wǝli da á ba yo. 33 Pɛ wʋm wʋ́ bəŋi abam sɩ á zʋ o te. O na bwe abam wɩ: ‹Abam tʋŋɩ bɛ tɩtʋŋa mʋ?›, 34 sɩ á fɔgɩ á lǝr-o á wɩ: ‹Kʋ na zɩgɩ dɩbam biini nɩ tɩn, dɩ́ maŋɩ dɩ́ tɔgɩ vara mʋ. Dɩbam kwə dɩ dɛɛn nan mʋ maŋɩ ba yɩ nayɩra.› Kʋntʋ wʋ́ pa o pa abam pwələ sɩ á jǝni Gozɛnɩ laŋa kam nɩ.» Zʋzɛfʋ dɛɛn tagɩ kʋntʋ bɛŋwaanɩ Ezipi tiinə culi balʋ na yɩrɩ peeni tɩn mʋ.