Zʋzɛfʋ brɩ o tɩtɩ dɩ o cʋrrʋ tɩm
45
Zʋzɛfʋ dɛɛn daa wʋ wanɩ o tɩtɩ o ja o tɩntʋŋna bam yigə nɩ. O ma bagɩ-ba o wɩ: «Nɔɔnʋ maama nuŋi da á daarɩ-nɩ na!» Tɩntʋŋna bam na nuŋi ba daarɩ Zʋzɛfʋ dɩ o cʋrrʋ tɩm yɩranɩ, o laan ma ta o na yɩ wʋlʋ tɩn o brɩ-ba. 2 O ma keeri dɩ kwǝr-dɩa o pa Ezipi tiinə bam ni sɔɔ kʋm. Pa-farʋ wʋm sɔŋɔ tiinə dɩ dɛɛn ni kʋ ŋwa.3 Zʋzɛfʋ ma ta o cʋrrʋ tɩm o wɩ: «Amʋ yɩ Zʋzɛfʋ mʋ! A ko daa ta sɩɩnɩ o ŋwɩ na?» O cʋrrʋ tɩm dɛɛn wʋ wanɩ o taanɩ dɩm sɩ ba ləri ba pa‑o, bɛŋwaanɩ, ba yɩra dɛɛn tiini ya saɩ mʋ o yigə nɩ.
4 Zʋzɛfʋ dɛɛn ta ma ta dɩ o cʋrrʋ tɩm o wɩ: «Titwəni-na á yi a yɩra.» Ba na yi o te tɩn, mʋ o tagɩ o wɩ:
«Amʋ mʋ yɩ á cʋrʋ Zʋzɛfʋ, wʋlʋ abam dɛɛn na yəgi á pa nɔɔna sɩ ba ja-nɩ ba vu Ezipi tɩn! 5 Nan yɩ pa-na sɩ á wʋ cɔgɩ. Daa á yɩ pa-na kʋ taa wɔɛ abam dɩdaanɩ á na yəgi-nɩ á yagɩ yo seeni tɩn ŋwaanɩ. Cɩga ŋwaanɩ tɩn, kʋ yɩ Wɛ dɛɛn mʋ tʋŋɩ-nɩ yo sɩ a loori yigə a ba sɩ a joŋi nɔɔna zanzan ŋwɩa a yagɩ. 6 Kana kam bɩna yale mʋ kɛ tɩntʋ, yɩ bɩna yanu ta daarɩ sɩ ka tiini ka cɛ. Bɩna yantʋ wʋnɩ nɔɔna bá va sɩ ba zagɩ wʋdiiru. 7 Kʋ maa yɩ Wɛ mʋ tʋŋɩ-nɩ sɩ a da abam yigə a ba yo sɩ a cɩ sɩ á dwi yɩ saarɩ lʋgʋ kʋm nɩ. DƖ mɛ DƖ dam mʋ DƖ kɩ kʋntʋ sɩ a joŋi abam a yagɩ cɩga cɩga. 8 Á taá yɩrɩ á tɩtɩ, nɩ kʋ daɩ abam mʋ pɛ a ba yo. Wɛ mʋ kɩa. Dɩntʋ mʋ pɛ amʋ ji dɩdɛɛrʋ Pɛ wʋm yigə nɩ, sɩ a taa nii o sɔŋɔ kʋm maama baŋa nɩ, yɩ a daarɩ a te Ezipi tɩʋ kʋm maama.
9 Nan kɩ-na lɩla á joori á vu a ko te sɩ á ta dɩd-o nɩ ‹Nmʋ bu Zʋzɛfʋ kwǝrǝ mʋ tɩntʋ: Wɛ mʋ pɛ a te Ezipi tɩʋ kʋm maama. Kwaanɩ sɩ n daa n yɩ dáanɩ sɩ n ba a te lɩla. 10 Nmʋ wʋ́ ta n zʋʋrɩ Gozɛnɩ laŋa kam seeni mʋ sɩ n ta n twɛ amʋ yo seeni. Nmʋ dɩ n biə, dɩ n naarʋ, dɩ n peeni, dɩ n bʋnɩ, dɩ n naanɩ, dɩdaanɩ woŋo kʋlʋ maama n na jɩgɩ tɩn wʋ́ taa wʋ dáanɩ mʋ. 11 Abam na wʋ dáanɩ, amʋ wʋ́ taa nii á baŋa nɩ sɩ á na wʋdiu á di. Ta n ye nɩ bɩna yanu mʋ ta daarɩ sɩ kana kam taa wʋra. A nan ba lagɩ sɩ kana yaarɩ nmʋ dɩ n sɔŋɔ tiinə bam, kʋ wǝli dɩdaanɩ n vara maama.›
12 Abam tɩtɩ nɛa yɩ a nyaanɩ Bɛnzamɛn dɩ nɛa wɩ amʋ mʋ sɩɩnɩ a yɩ Zʋzɛfʋ. 13 Pa-na sɩ a ko lwarɩ nɩ Ezipi tiinə bam tiini ba zuli-nɩ mʋ yo seeni, sɩ á daarɩ á ta dɩd-o kʋlʋ maama á yi na nɛ tɩn. Á laan maa wʋ́ ja-o á ba yo lɩla.»
14 Zʋzɛfʋ na tagɩ kʋntʋ tɩn, o laan ma kukwəri o nyaanɩ Bɛnzamɛn yɩ o kan yi-na. Bɛnzamɛn dɩ ma kukwǝr-o yɩ o dɩ kan yi-na. 15 Kʋ kwaga nɩ Zʋzɛfʋ laan ma kukwəri o zɩmbaara bam dɩdʋa dɩdʋa yɩ o ka kan yi-na ba maama baŋa nɩ. O cʋrrʋ tɩm laan ma na pwələ ba ŋɔɔnɩ dɩd-o.
16 Pa-farʋ wʋm dɩ o sɔŋɔ tiinə ma ni nɩ Zʋzɛfʋ cʋrrʋ mʋ tu o te. O dɩ o nakwa bam maama wʋ ma pwǝli kʋ ŋwaanɩ. 17 Pɛ wʋm ma ta dɩ Zʋzɛfʋ o wɩ: «Ta dɩ n cʋrrʋ tɩm sɩ ba vɔ ba bɩnɛ sɩm ba joori Kaanan tɩʋ kʋm. 18 Ba maŋɩ sɩ ba ja á ko wʋm dɩdaanɩ o sɔŋɔ tiinə maama mʋ sɩ ba joori ba ba a te yo. Amʋ wʋ́ pa-ba Ezipi tɩga kam mɛ na tiini ka lamma tɩn sɩ ba jǝni da. Kʋntʋ wʋ́ pa ba ni lʋgʋ kʋm ywǝǝni lanyɩranɩ. 19 Ta ta dɩ ba sɩ ba lagɩ sise-tərikooru Ezipi yo ba ja ba vu Kaanan ba kɩ ba kaana dɩ ba biə tɩ wʋnɩ ba ja ba ba. Ba na bɩɩnɩ, sɩ ba ja á ko ba wǝli da ba ba yo seeni. 20 Yɩ pa-na sɩ kʋ daanɩ abam á zɩla yam ŋwaanɩ, sɩ Ezipi lʋgʋ kʋm wo-laarʋ maama mʋ wʋ́ taa yɩ abam nyɩm.»
21 Zakɔbɩ bu-baara bam ma kɩ kʋlʋ maama ba dɛɛn na brɩ-ba sɩ ba kɩ tɩn. Zʋzɛfʋ dɛɛn pɛ-ba sise-tərikooru mʋ, nɩnɛɛnɩ Pɛ wʋm na pɛ ni te tɩn. O dɛɛn ta ma pa-ba wʋdiu sɩ kʋ wǝli-ba cwǝŋǝ nɩ. 22 O ma daarɩ o pa ba maama gwarɩ-dʋnnʋ sɩ ba zʋ. Sɩ kʋ na yɩ Bɛnzamɛn, o dɛɛn pɛ wʋntʋ səbu səbu-dala biə-yatɔ mʋ o wǝli dɩ gwarɩ-dʋnnʋ kuni bɩnu. 23 Wǝǝnu tɩlʋ Zʋzɛfʋ na tʋŋɩ sɩ ba pa o ko mʋ tɩntʋ: wo-laarʋ dwi dwi mʋ na nuŋi Ezipi nɩ tɩn, bɩnɛ fugə dɛɛn mʋ maa zɩŋɩ-tɩ. O daa ta ma pa bɩna-niinə fugə zɩŋɩ mɩna dɩ wʋdiu zanzan dɩdaanɩ wo-laarʋ tɩlʋ na wʋ́ wǝli o ko cwǝŋǝ nɩ tɩn. 24 Zʋzɛfʋ dɛɛn ma banɩ o cʋrrʋ tɩm o yagɩ cwǝŋǝ nɩ. Ba na maa kɛ tɩn, o ma ta dɩ ba o wɩ: «Yɩ kɩ-na najara cwǝŋǝ nɩ!»
25 Ba ma nuŋi Ezipi nɩ yɩ ba vu ba yi ba ko Zakɔbɩ te Kaanan tɩʋ kʋm nɩ. 26 Ba ma ta dɩd-o ba wɩ: «Zʋzɛfʋ daa ta ŋwɩ! Wʋntʋ mʋ laan te Ezipi tɩʋ kʋm maama o nii kʋ baŋa nɩ.» Zakɔbɩ ma kʋ o zɩga, yɩ o wʋ sɛ ba taanɩ dɩm. 27 Ba dɛɛn ma lwǝni woŋo kʋlʋ maama Zʋzɛfʋ na tagɩ dɩ ba tɩn. Zakɔbɩ ta ma na sise-tərikooru tɩm Zʋzɛfʋ na tʋŋɩ sɩ ba ma ja-o ba ba Ezipi tɩn. Kʋ laan ma pa ba ko Zakɔbɩ ma joori o tɩtɩ nɩ. 28 Zakɔbɩ ma ta o wɩ: «Amʋ laan sɛ! Amʋ bu Zʋzɛfʋ sɩɩnɩ o ta ŋwɩ mʋ! Amʋ wʋ́ vu a na‑o mʋ sɩ a laan daarɩ a tɩ.»