Səbu-poŋo na-zʋŋa taanɩ
44
Zʋzɛfʋ dɛɛn ma pa o sɔŋɔ tɩntʋŋna yigə tu wʋm ni yɩ o wɩ: «Kɩ wʋdiu n su nɔɔna bam ywəllu tɩm sɩ kʋ maŋɩ dɩ ba dɩdʋa dɩdʋa na wʋ́ wanɩ te ba zɩŋɩ tɩn. Laan kwe nɔɔnʋ maama səbu n joori n kɩ o yolo ni nɩ. 2 Ta daarɩ n kwe amʋ səbu-poŋo na-zʋŋa kam n kɩ ba nyaan-balaŋa kam yolo kʋm ni nɩ n wǝli dɩ o dɩ səbu kʋm.» Tɩntʋŋnʋ wʋm ma kɩ kʋlʋ maama Zʋzɛfʋ na brɩ-o tɩn.3 Tɩga na jɩgɩ ka pʋʋrɩ tɩn, ba ma pa nɔɔna bam cwǝŋǝ sɩ ba viiri dɩ ba bɩnɛ sɩm maama. 4 Ba na nuŋi tɩʋ kʋm wʋnɩ yɩ ba maŋɩ ba wʋ yi yigə tɩn, dɩdaanɩ Zʋzɛfʋ na tagɩ o sɔŋɔ tɩntʋŋnʋ wʋm o wɩ: «Kɩ lɩla n zəli nɔɔna bam n ja-ba. N na yi-ba sɩ n ta dɩ ba nɩ ‹Bɛŋwaanɩ mʋ abam mɛ lwarɩm á ma á ŋwɩ lanyɩranɩ dɩlʋ a tu wʋm na kɩ o pa abam tɩn? 5 Bɛɛ mʋ yɩ á ŋɔ amʋ tu na-zʋŋa kam? Mʋ kalʋ amʋ tu wʋm na ma o nyɔ na, yɩ o ta maɩ-ka o beeri o nii o yigə. Abam tiini á tʋŋɩ pu-sɩŋa á pa‑o.› »
6 Zʋzɛfʋ tɩntʋŋnʋ wʋm ma sɩɩnɩ o parɩ-ba o ja, yɩ o lwǝni taanɩ dɩm o brɩ-ba. 7 Ba ma ləri ba wɩ: «Bɛɛ mʋ yɩ dɩ́ tu wʋm laan ta kʋntʋ? Dɩbam warɩ dɩ́ tʋŋɩ kʋntʋ doŋ dɩ́ pa‑o kɔtaa! 8 Dɩ́ daama na maanɩ nɩ səbu kʋlʋ dɩ́ mɛ dɩ́ yəgi wʋdiu kʋm tɔgɩ dɩbam kʋ vu Kaanan tɩʋ kʋm tɩn, dɩ́ joori dɩ́ ja-kʋ dɩ́ ba dɩ́ pa abam. Kʋ daɩ cɩga na? Bɛɛ mʋ laan nan wʋ́ pa dɩ́ ŋɔ səbu-sɩŋa naa səbu-poŋo nmʋ tu wʋm sɔŋɔ nɩ? 9 Nmʋ na nɛ na-zʋŋa kam n tɩntʋŋna bam wʋlʋ tee nɩ, kʋntʋ tu wʋ́ tɩ mʋ. Dɩbam maama balʋ na daarɩ tɩn maa wʋ́ ji dɩ́ tu wʋm gambɛ.» 10 Zʋzɛfʋ tɩntʋŋnʋ wʋm ma ləri o wɩ: «Tɔ. A sɛ sɩ kʋ taa yɩ nɩ abam na tagɩ te tɩn mʋ. Amʋ na nɛ na-zʋŋa kam nɔɔnʋ wʋlʋ tee nɩ, kʋntʋ tu mʋ wʋ́ ji amʋ gambaa. Kʋ daarɩ sɩ abam maama viiri á taá te á tɩtɩ.»
11 Ba maama ma kɩ lɩla ba zʋʋrɩ ba ywəllu tɩm ba tiŋi tɩga nɩ yɩ ba bwǝli-tɩ. 12 Zʋzɛfʋ tɩntʋŋnʋ wʋm ma puli o bərə kam. O dɛɛn zɩgɩ nakwɩ wʋm baŋa nɩ mʋ o vu o yi nyaan-balaŋa kam baŋa. O laan ma vu o na na-zʋŋa kam Bɛnzamɛn yolo kʋm nɩ. 13 Cʋrrʋ tɩm maama na nɛ kʋntʋ tɩn, ba ma kaarɩ ba tɩtɩ gwaarʋ dɩ wʋ-cɔgɔ. Ba dɛɛn ma joori ba kwe ba zɩla yam ba daŋɩ ba bɩnɛ sɩm baŋa nɩ, yɩ ba joori tɩʋ kʋm wʋ.
14 Zʋzɛfʋ dɛɛn ya ta wʋ sɔŋɔ nɩ yɩ Zuda dɩ o cʋrrʋ tɩm joori ba ba ba zʋ. Ba ma vwi ba yibiyə tɩga nɩ sɩ ba ja o naga. 15 Zʋzɛfʋ dɛɛn ma ta dɩ ba o wɩ: «Bɛɛ mʋ kʋntʋ abam kɩa? Abam ya yǝri wɩ: amʋ na yɩ dɩdɛɛrʋ tɩn, a waɩ a beeri a nii a naɩ wǝǝnu jaja na?» 16 Zuda dɛɛn ma ləri o wɩ: «Dɩbam tu, dɩbam ba jɩgɩ kʋlʋkʋlʋ sɩ dɩ́ ta. Dɩbam ni laan mɔɔrɩ mʋ. Dɩ́ bá wanɩ dɩ́ ta kʋlʋ dɩ́ na wʋ́ ma dɩ́ joŋi dɩ́ tɩtɩ tɩn. Wɛ mʋ pɩɩrɩ dɩbam zɩm dɩ́ cavɩɩra wʋnɩ. Kʋntʋ tɩn, dɩbam maama mʋ laan yɩ nmʋ gambɛ, dɩ́ maama, kʋ wǝli dɩ wʋlʋ ba na nɛ na-zʋŋa kam o zɩla wʋnɩ tɩn.» 17 Zʋzɛfʋ ma ləri o wɩ: «Amʋ bá wanɩ a pa kʋ kɩ kʋntʋ doŋ! Ba na nɛ na-zʋŋa kam wʋlʋ zɩla nɩ tɩn yɩranɩ mʋ wʋ́ ji amʋ gambaa. Abam maama wʋ́ wanɩ á joori á ko wʋm tee nɩ dɩ yazurə.»
18 Zuda dɛɛn ma titwəni o yi Zʋzɛfʋ te o ta o wɩ:
«A loori-m, amʋ tu, pa-nɩ cwǝŋǝ sɩ dɩ́ ŋɔɔnɩ daanɩ jaja. Nan yɩ pa n bam zaŋɩ amʋ baŋa nɩ, sɩ nmʋ dɩ Pa-farʋ wʋm tɩtɩ maɩ daanɩ mʋ. 19 Amʋ tu, nmʋ daama bwe dɩbam nɩ: dɩ́ ta jɩgɩ ko dɩ cʋrʋ kʋdoŋ na? 20 Dɩ́ ma ləri dɩ́ wɩ: dɩ́ jɩgɩ nankwɩan sɔŋɔ nɩ. Dɩ́ nyaan-balaŋa dɩdʋa dɩ ta wʋra, dɩ́ ko na lʋg-o o kʋkwɩɩrʋ maŋa nɩ mʋ. Dɩ́ ta pɛ n lwarɩ wɩ dɩ́ nyaanɩ wʋm kʋntʋ zɩmbaarʋ maŋɩ o tɩ. Wʋntʋ yɩranɩ laan mʋ daarɩ o nu-pugə biə wʋnɩ. O ko wʋm ma tiini o soe‑o zanzan.
21 Nmʋ daa ta ma n ta n wɩ: dɩ́ ja-o dɩ́ ba yo sɩ nmʋ dɩ wanɩ n na‑o. 22 Dɩbam dɩ ma ta dɩ nmʋ wɩ: bu wʋm bá wanɩ o nuŋi sɔŋɔ o daarɩ o ko wʋm, bɛŋwaanɩ, o na tǝri o ko wʋm tee nɩ, nankwɩan kam wʋ́ tɩ mʋ. 23 Dɩ́ tu, dɩ́ na tagɩ kʋntʋ tɩn, nmʋ ta ma n ləri n wɩ: dɩ́ na wʋ jaanɩ dɩ́ nyaanɩ wʋm dɩ́ ba, n daa n bá pa dɩbam cwǝŋǝ sɩ dɩ́ zʋ n te. 24 Dɩ́ na joori sɔŋɔ tɩn, dɩ́ ma ta dɩ́ brɩ dɩbam ko kʋlʋ maama nmʋ na tagɩ tɩn.
25 Kʋ na kɩ fɩɩn tɩn, dɩ́ ko wʋm maa wɩ: ‹Joori-na á vu á yəgi wʋdiu fɩɩn á ja á ba.› 26 Dɩ́ ma ta dɩ́ wɩ: ‹Dɩ́ bá wanɩ dɩ́ vu, kʋ na daɩ sɩ dɩ́ nyaanɩ wʋm na dɛ dɩbam kwaga sɩ dɩ́ vu. Dɩ́ nyaanɩ wʋm na tǝri dɩ́ tee nɩ, dɩ́ bá na cwǝŋǝ sɩ dɩ́ daa zʋ dɩdɛɛrʋ wʋm te.›
27 Dɩbam ko wʋm ma ta o wɩ: ‹Abam ye wɩ a kaanɩ Rasɛɛlɩ lʋgɩ bəkəri sɩle yɩranɩ mʋ o pa-nɩ. 28 Dɩdʋa maŋɩ o je o daarɩ-nɩ. Amʋ na bʋŋɩ te tɩn, ga-varɩm mʋ jaan‑o dɩ tʋrɩ tʋrɩ. Dɩdaanɩ zɩm maama a daa wʋ nɛ‑o. 29 Abam nan na jaanɩ wʋntʋ dɩ á viiri yɩ cam na yi‑o, abam wʋ́ pa a tɩ wʋ-cɔgɔ ŋwaanɩ, yɩ a ja a yu-pwe sɩntʋ a vu curu.›
30 Amʋ tu, jeeli sɩ n lwarɩ wɩ nankwɩan kam ŋwɩa dɩ bu wʋm ŋwɩa mɩ daanɩ mʋ. Dɩ́ nan na yi sɔŋɔ yɩ bu wʋm tǝri dɩ́ tee nɩ, amʋ ko wʋ́ tɩ mʋ. 31 O na nɛ nɩ bu wʋm tɔgɩ o tǝrǝ, kʋʋ́ pa o tɩ wʋ-cɔgɔ ŋwaanɩ, yɩ o ja o yu-pwe sɩm o vu curu. 32 Kʋ wǝli da, a kwe a tɩtɩ a zɩgɩ daarɩ bu wʋm ŋwaanɩ yɩ a ta dɩ a ko a wɩ: a na wʋ joori a ja-o a kɩ o jɩŋa nɩ, sɩ o kwe kʋ maama o zɩŋɩ amʋ yuu nɩ maŋa maama.