Pulim 43

Zʋzɛfʋ zɩmbaara joori Ezipi

Kana kam dɛɛn tiini ka cɛ Kaanan tɩʋ maama nɩ mʋ. 2 Zakɔbɩ sɔŋɔ tiinə bam ma di mɩna yalʋ maama ba na nɛ Ezipi nɩ ba ja ba tɩn ba ti. Zakɔbɩ laan ma ta dɩ ba o wɩ: «Joori-na á vu á yəgi wʋdiu fɩɩn á ja á ba yo seeni.»

3 Zuda dɛɛn ma ta dɩ ba ko wʋm o wɩ: «Dɩdɛɛrʋ wʋm sɩɩnɩ yiǝ mʋ o kaanɩ dɩbam o wɩ: dɩ́ na wʋ jaanɩ dɩ́ nyaanɩ wʋm dɩ́ ba, o daa bá pa dɩbam cwǝŋǝ sɩ dɩ́ zʋ o te. 4 Nmʋ na sɛ sɩ dɩ́ nyaanɩ Bɛnzamɛn tɔgɩ dɩdaanɩ dɩbam o vu mʋ, dɩ́ laan wʋ́ wanɩ dɩ́ vu dɩ́ yəgi wʋdiu dɩ́ ja ba dɩ́ pa‑m. 5 Sɩ n nan na wʋ sɛ sɩ o tɔgɩ o vu, dɩ́ bá wanɩ dɩ́ vu, dɩdɛɛrʋ wʋm na tagɩ kʋlʋ tɩn ŋwaanɩ, dɩ o na wɩ: dɩ́ na wʋ jaanɩ dɩ́ nyaanɩ wʋm dɩ́ ba, o daa bá pa dɩbam cwǝŋǝ sɩ dɩ́ zʋ o te.»

6 Zakɔbɩ ma bwe-ba o wɩ: «Bɛŋwaanɩ mʋ á tagɩ dɩ nɔɔnʋ wʋm nɩ á ta jɩgɩ nyaanɩ wʋdoŋ sɔŋɔ nɩ, yɩ á kɩ-nɩ cam wʋnɩ tɩntʋ?» 7 Ba ma ləri ba wɩ: «Nɔɔnʋ wʋm tiini o bwe dɩbam mʋ o bwe bwiə dɩdaanɩ dɩ́ dwi maama. O brɩ o bwe o wɩ: ‹Abam ko ta ŋwɩ na? Á daa ta jɩgɩ cʋrʋ kʋdoŋ na?› Dɩbam dɩ ma ləri o bwiə yam maama. Dɩ́ ya bá wanɩ dɩ́ lwarɩ nɩ oó ta nɩnɛɛnɩ, dɩ́ ve dɩ́ ja dɩ́ nyaanɩ wʋm dɩ́ ja ba o te.»

8 Zuda laan ma ta dɩ o ko wʋm o wɩ: «Kwe bu wʋm n kɩ amʋ jɩŋa nɩ sɩ dɩ́ kɩ lɩla dɩ́ kɛ da. Kʋ na daɩ kʋntʋ, dɩbam dɩ dɩ́ biə bam maama wʋ́ pu mʋ dɩ kana. 9 Amʋ wʋ́ kwe a tɩtɩ a zɩgɩ daarɩ bu wʋm ŋwaanɩ. A na wʋ joori a ja-o a ba yo a kɩ n jɩŋa nɩ, sɩ n bwe amʋ o bwiə. Amʋ sɛ sɩ, woŋo na kɩ-o, sɩ n kwe kʋ maama n zɩŋɩ amʋ yuu nɩ maŋa maama. 10 Cɩga tɩn, kʋ na daɩ dɩ́ na zɩgɩ dɩ́ daanɩ, tɩntʋ wɛɛnɩ dɩ́ yaá ve yɩ dɩ́ daa joori sɩ kʋ yi kuni bɩle.»

11 Ba ko Zakɔbɩ ma ləri o wɩ: «Kʋ nan na sɩɩnɩ kʋ yɩ kʋntʋ, kɩ-na tɩntʋ doŋ: twəri-na dɩ́ tɩga kam wo-laarʋ dwi dwi á kɩ á ywəllu tɩm nɩ sɩ á ja á vu á ma kɩ pɛɛrɩ á pa dɩdɛɛrʋ wʋm. Kʋ maa wʋ́ taa yɩ tralɩ nugə fɩnfɩɩn, dɩ tʋʋrʋ fɩɩn, dɩ taloŋ-ywəŋə dwi dwi, dɩdaanɩ tweeru biə dwi dwi. 12 Nan ta taá jɩgɩ-na mɩna yam səbu kuni bɩle á wǝli da. Bɛŋwaanɩ, á maŋɩ sɩ á joori á ja kʋlʋ ba ya na kɩ á ywəllu tɩm nɩ tɩn mʋ á vu á pa-ba. Dɛdoŋ ba tusi mʋ ba kɩ kʋntʋ. 13 Ja-na á nyaanɩ wʋm á wǝli da sɩ á joori á vu dɩdɛɛrʋ wʋm te lele kʋntʋ. 14 Dam-fɔrɔ Tu Wɛ dɩm wʋ́ pa nɔɔnʋ wʋm duri á yibwənə yɩ DƖ pa cwǝŋǝ sɩ á ja á cʋrrʋ tɩm, Simeyon dɩdaanɩ Bɛnzamɛn, á joori á ba yo. Kʋ na tu sɩ a ga a biə bam tɩntʋ, a nan wʋ́ ga-ba mʋ.»

15 Ba dɛɛn ma ti ba pɛɛra yam yigə, yɩ ba jɩgɩ ba səbu kuni bɩle. Bɛnzamɛn dɛɛn ma da o vu. Ba ma kɩ lɩla ba vu Ezipi. Ba na yi da tɩn, ba ma zʋ Zʋzɛfʋ te. 16 Zʋzɛfʋ na nɛ wɩ Bɛnzamɛn tɔgɩ o wʋ ba wʋnɩ tɩn, o ma ta o sɔŋɔ tɩntʋŋna yigə tu wʋm o wɩ: «Ja nɔɔna bantʋ n vu sɔŋɔ. N na yiǝ, sɩ n gʋ varɩm n ma n kɩ wʋdiu, sɩ bantʋ wʋ́ di wʋdiu dɩ amʋ mʋ wɩa nɩ.» 17 Tɩntʋŋna yigə tu wʋm ma kɩ o na brɩ-o sɩ o kɩ te tɩn, yɩ o jɩgɩ nɔɔna bam o maa ve o tu wʋm sɔŋɔ.

18 Fʋʋnɩ dɛɛn maa jɩgɩ cʋrrʋ tɩm dɩdaanɩ ba na jegɩ-ba ba maa ve Zʋzɛfʋ sɔŋɔ kʋm tɩn. Ba wʋbʋŋa yam dɛɛn yɩ nɩ: «Kʋ yɩ səbu kʋm ba ya na joori ba kɩ dɩ́ ywəllu tɩm wʋnɩ tɩn ŋwaanɩ mʋ ba jɩgɩ dɩbam ba ve dáanɩ. Dɩdɛɛrʋ wʋm lagɩ o pa ba da ba zi dɩbam mʋ ba ja ba ma kɩ wʋntʋ gambɛ, yɩ ba vrɩ dɩbam bɩnɛ sɩm dɩ ba wǝli da.» 19 Ba na ve ba yi sɔŋɔ kʋm manchoŋo ni tɩn, mʋ ba ŋɔɔnɩ dɩ Zʋzɛfʋ tɩntʋŋna yigə tu wʋm, 20 yɩ ba wɩ: «A loori-m, dɩbam daama maŋɩ dɩ́ ba yo dɩ́ yəgi wʋdiu. 21 Dɩ laan na viiri yɩ dɩ́ yi jǝgǝ kalʋ sɩ dɩ́ pəni dɩ́ sin tɩtɩ nɩ tɩn, dɩ́ ma puri dɩ́ ywəllu tɩm niə yɩ dɩbam dɩdʋa dɩdʋa na nɩ dɩ́ mɩna yam sǝbiǝ bam maama joori ba wʋra, kʋ maa yɩ səbu kʋm ni nɩ mʋ cɩga cɩga. Dɩ laan nan joori dɩ́ ja-kʋ dɩ́ ba. 22 Dɩ́ nan ta jaanɩ səbu dɩ́ wǝli da dɩ́ ba sɩ dɩ́ daa ma yəgi wʋdiu. Dɩbam wʋ lwarɩ wʋlʋ daama na kwe dɩ́ səbu kʋm o joori o kɩ dɩ́ ywəllu tɩm wʋnɩ tɩn.» 23 Tɩntʋŋnʋ wʋm ma ta o wɩ: «Kʋ wʋ cɔgɩ, yɩ taá fʋna. Abam Wɛ dɩm, dɩlʋ dɩm á ko na tɔgɩ tɩn mʋ kwe pɛɛra DƖ kɩ á ywəllu tɩm nɩ. Amʋ daama joŋi abam səbu kʋm.» O na tagɩ kʋntʋ tɩn, o laan ma pʋrɩ Simeyon o ja ba ba te.

24 Tɩntʋŋnʋ wʋm dɛɛn ma pa cʋrrʋ tɩm zʋ Zʋzɛfʋ sɔŋɔ kʋm. O ta ma mɔ na o pa-ba sɩ ba ma zarɩ ba nɛ, yɩ o daarɩ o ja wʋdiiru o ba o pa ba bɩnɛ sɩm. 25 Ba ma ni nɩ baá di wʋdiu dɩdaanɩ Zʋzɛfʋ mʋ o sɔŋɔ nɩ. Ba ma lɩ ba pɛɛra yam ba tiŋi yɩ ba cəgi Zʋzɛfʋ sɩ o ba wɩa nɩ.

26 Zʋzɛfʋ na tu sɔŋɔ tɩn, ba ma kwe pɛɛra yalʋ ba na jaanɩ ba jeeri o sɔŋɔ kʋm nɩ tɩn ba ja zʋ digə ba pa‑o. Ba ma cɔɔlɩ ba yibiyə tɩga nɩ ba jɔɔn‑o. 27 O ma bwe ba kwaga yɩ o daarɩ o wɩ: «Á nankwɩan kam á ya na tagɩ ka taanɩ á brɩ-nɩ tɩn jɩgɩ yazurə na? O daa ta ŋwɩ na?» 28 Ba ma ləri ba wɩ: «Dɩbam ko yɩ nmʋ tɩntʋŋnʋ mʋ, o nan ta ŋwɩ. O jɩgɩ yazurə dɩ ya-dɛɛra.» Ba ma kuni doonə tɩga nɩ ba zul‑o.

29 Zʋzɛfʋ ma dʋlɩ o yi o na o nyaanɩ Bɛnzamɛn na yɩ o nu-pugə bu tɩn. O ma bwe-ba o wɩ: «Abam nyaanɩ wʋm á na tagɩ o taanɩ á brɩ-nɩ tɩn mʋ tɩntʋ na?» O ma daarɩ o ta dɩ Bɛnzamɛn o wɩ: «Amʋ bu tɩtɩ, Wɛ yu-yoŋo wʋ́ taa wʋ nmʋ yuu nɩ.» 30 Zʋzɛfʋ na sɩɩnɩ o na o nyaanɩ wʋm tɩn, kʋ dɛɛn ma tiini kʋ vaŋ-o zanzan. O ma kɩ lɩla o nuŋi o beeri je sɩ o kan yi-na. O ma zʋ o tɩtɩ digə o keeri, o na jɩgɩ o nyaanɩ wʋm sono tɩn ŋwaanɩ.

31 Zʋzɛfʋ laan ma su o yiǝ, yɩ o joori o nuŋi ba te. O ma fɔgɩ o ja o tɩtɩ yɩ o wɩ: «Ja-na wodiu á ja á ba sɩ dɩ́ di.» 32 Ba dɛɛn kɩ wʋntʋ wʋdiu kʋ yɩra mʋ, cʋrrʋ tɩm dɩ nyɩm kʋ yɩra. Ba ma daarɩ ba kɩ Ezipi tiinə balʋ na wʋra tɩn dɩ nyɩm kʋ yɩra, bɛŋwaanɩ, kʋ culǝ kʋ paɩ Ezipi tiinə pa ba warɩ ba di dɩdaanɩ Ebru tiinə. 33 Zʋzɛfʋ dɛɛn pɛ o cʋrrʋ tɩm jǝni o yigə nɩ sɩ kʋ maŋɩ dɩ ba bɩna yam na yɩ te tɩn mʋ, kʋ zɩgɩ bu-kwɩan kam nɩ sɩ kʋ yi nyaan-balaŋa kam baŋa. Ba na nɛ kʋntʋ tɩn mʋ ba nii daanɩ yɩ kʋ kɩ-ba yǝǝu. 34 Zʋzɛfʋ ma pa ba pɔɔrɩ pɔɔrɩ o wʋdiu kʋm wʋnɩ ba pa o cʋrrʋ tɩm. Bɛnzamɛn na joŋi wʋdiu kʋlʋ tɩn daga kʋ dwe o zɩmbaara bam nyɩm kuni bɩnu. Ba maama maa je Zʋzɛfʋ tee nɩ ba di yɩ ba nyɔ ba su yɩ liǝ tǝrǝ.