Zʋzɛfʋ cʋrrʋ ve Ezipi ba na wʋdiu
42
Zakɔbɩ dɛɛn ma lwarɩ nɩ wʋdiu wʋ Ezipi nɩ. O ma ta o bu-baara bam o wɩ: «Wʋdiu tǝrǝ yɩ á je sɔŋɔ nɩ sɩ bɛɛ? 2 Amʋ ni nɩ wʋdiu wʋ Ezipi nɩ. Nan ve-na dáanɩ á yəgi mɩna á ja á ba, sɩ dɩ́ yɩ pu dɩ kana.»3 Zʋzɛfʋ zɩmbaara bam fugə ma zaŋɩ ba vu Ezipi sɩ ba yəgi mɩna. 4 Zakɔbɩ dɛɛn nan ya cɩgɩ Zʋzɛfʋ nyaanɩ Bɛnzamɛn mʋ sɩ o yɩ tɔgɩ o cʋrrʋ tɩdonnǝ tɩm o vu. Bɛŋwaanɩ, o kwarɩ nɩ cam mʋ wʋ́ zɩgɩ dɩ yi‑o cwǝŋǝ nɩ. 5 Zakɔbɩ bu-baara bam dɛɛn tʋ nɔn-kɔgɔ wʋnɩ mʋ ba tɔgɩ ba vu Ezipi sɩ ba yəgi wʋdiu. Bɛŋwaanɩ, kana kam dɛɛn cɛ Kaanan lʋgʋ kʋm maama dɩ mʋ.
6 Zʋzɛfʋ dɛɛn nan mʋ yɩ dɩdɛɛrʋ Ezipi nɩ yɩ o jɩgɩ mɩna o yəgi o paɩ kʋ nɔɔn-biə maama. Zʋzɛfʋ zɩmbaara bam ma vu ba yi o te, yɩ ba cɔɔlɩ ba yibiyə tɩga nɩ ba jɔɔn‑o.a 7 Zʋzɛfʋ na nɛ o zɩmbaara bam tɩn mʋ o lwarɩ-ba. O dɛɛn ma səgi o tɩtɩ dɩ ba, yɩ o daarɩ o zagɩ-ba ni-chɛɛrɩ. O ma bwe-ba o wɩ: «Abam nuŋi yən mʋ?» Ba dɩ ma ləri ba wɩ: «Dɩbam nuŋi Kaanan mʋ. Dɩ́ tu sɩ dɩ́ yəgi wʋdiu mʋ.»
8 Zʋzɛfʋ dɛɛn na lwarɩ o zɩmbaara bam tɩn, bantʋ ya wʋ lwar-o. 9 O ma guli o na dwɛ o zɩmbaara bam dɩndwɩa yam tɩn, yɩ o ta dɩ ba o wɩ: «Abam tu sɩ á ŋɔ á yɩrɩ dɩbam tɩʋ kʋm wǝǝnu mʋ, sɩ á nii tɩʋ kʋm mɛ na wʋ cɩgɩ tɩn.» 10 Ba ma lǝr-o wɩ: «Dɩbam tu, kʋ nan daɩ kʋntʋ! Dɩbam yɩ nmʋ gambɛ. Dɩ́ tu yo seeni sɩ dɩ́ yəgi wʋdiu mʋ. 11 Dɩbam maama yɩ baarʋ dɩdʋa biə mʋ. Dɩbam ve dɩ cɩga mʋ, sɩ dɩ́ wʋ tu sɩ dɩ́ ŋɔ dɩ́ yɩrɩ á tɩʋ kʋm.»
12 O daa ta ma ta dɩ ba o wɩ: «Vwan! Abam tu yo sɩ á nii dɩbam tɩʋ kʋm je sɩlʋ na wʋ cɩgɩ tɩn mʋ.» 13 Ba ma lǝr-o ba wɩ: «Dɩbam tu, dɩ́ dɛɛn yɩ fugǝ-bale mʋ dɩ ko dɩdʋa yɩ dɩ́ zʋʋrɩ Kaanan nɩ. Dɩ́ nyaanɩ wʋm ta wʋ dɩbam ko tee nɩ tɩntʋ. Kʋ daarɩ, dɩdʋa kam daa tǝrǝ.»
14 Zʋzɛfʋ ma ta dɩ ba wɩ: «Amʋ maŋɩ a wʋ tagɩ cɩga na? Abam ŋɔnɩ mʋ á nii tɩʋ kʋm! 15 A lagɩ a faŋɩ abam mʋ a nii: A dugi Pa-farʋ wʋm yɩrɩ ŋwaanɩ, abam nyaanɩ wʋm na wʋ tu sɩ a na‑o, a bá sɛ a yagɩ abam sɩ á viiri. 16 Tʋŋɩ-na á wʋnɩ dɩdʋa sɩ kʋ tu vu o ja á nyaanɩ wʋm o ba. Abam balʋ na daarɩ tɩn, a lagɩ a pɩ á maama mʋ sɩ a lwarɩ á taanɩ dɩm na yɩ cɩga naa vwan. A dugi dɩdaanɩ Pa-farʋ wʋm yɩrɩ, á nyaanɩ wʋm na wʋ tu, kʋʋ́ brɩ nɩ abam sɩɩnɩ á ŋɔnɩ á nii tɩʋ kʋm mʋ!» 17 O ma pa ba ja ba maama ba pɩ da yatɔ.
18 Da yatɔ dɛ dɩm na yi tɩn, Zʋzɛfʋ ma ta dɩ ba wɩ: «Kɩ-na tɩntʋ sɩ a pa á joŋi á ŋwɩa, amʋ na kwarɩ Wɛ tɩn ŋwaanɩ. 19 Abam na sɩɩnɩ á ve dɩ cɩga, sɩ á pa abam dɩdʋa maŋɩ pɩɩna digə kam nɩ yo. Abam balʋ na daarɩ tɩn wʋ́ wanɩ á ja wʋdiiru á vu á pa á sɔŋɔ tiinə bam sɩ ba yɩ pu dɩ kana. 20 Kʋ nan maŋɩ sɩ á ja á nyaanɩ wʋm mʋ á ja á ba sɩ a na‑o. Kʋntʋ wʋ́ brɩ nɩ abam taanɩ dɩm yɩ cɩga pa á daa yɩ ga ŋwɩa.»
Ba ma sɛ, 21 yɩ ba bwɛ daanɩ ba wɩ: «Dɩ́ na nɛ cam dɩntʋ maama tɩn, kʋ yɩ dɩ́ na kɩ dɩ́ nyaanɩ Zʋzɛfʋ te tɩn ŋwaanɩ mʋ. Kʋ dɛɛn na ni‑o, yɩ o loori zǝnǝ dɩbam tee nɩ tɩn, dɩ́ nɛ yɩ dɩ́ vɩn sɩ dɩ́ duri o yibwənə. Kʋntʋ cam laan nan mʋ joori dɩbam baŋa nɩ.» 22 Ruban ma ləri o wɩ: «Amʋ dɛɛn tagɩ dɩ abam nɩ á yɩ kɩ zʋnnɩ á pa bu wʋm. Abam ma vɩn sɩ á cəgi-nɩ! Dɩ́ laan maŋɩ sɩ dɩ́ joŋi o tʋʋnɩ dɩm ŋwɩɩrʋ mʋ.» 23 Ba na ŋɔɔnɩ daanɩ kʋntʋ tɩn, ba dɛɛn yǝri nɩ Zʋzɛfʋ ni ba taanɩ dɩm. Bɛŋwaanɩ, ba ya na yǝni ba ŋɔɔnɩ dɩd-o, nɔɔnʋ mʋ wʋ́ joŋi ba taanɩ dɩm o ləri dɩ Ezipi tiinə taanɩ o pa‑o. 24 Zʋzɛfʋ dɛɛn ma pipiri o vu dáa yɩ o kan yi-na. O yɩra na joori tɩn, o ma joori ba te o ŋɔɔnɩ dɩ ba. O dɛɛn ma lɩ Simeyon ba wʋnɩ yɩ o pa nɔɔna vɔ‑o ba ja viiri ba maama yibiyə nɩ.
25 Zʋzɛfʋ ma pa ni o wɩ: ba kwe mɩna ba su o zɩmbaara bam ywəllu tɩm maama. O dɛɛn ta pɛ ba joori ba kɩ nɔɔnʋ maama səbu mʋ o yolo wʋnɩ, sɩ ba daarɩ ba pa-ba wʋdiu ba na wʋ́ di cwǝŋǝ nɩ tɩn. 26 Ba na kɩ kʋntʋ ba pa-ba tɩn, nɔɔna bam ma vɔ ba ywəllu tɩm ba daŋɩ ba bɩnɛ baŋa nɩ yɩ ba kɛ.
27 Ba dɛɛn ma vu ba yi mɛ ba na wʋ́ pəni ba sin sɩ tɩga pʋʋrɩ tɩn. Ba dɩdʋa ma bwǝli o yolo sɩ o lɩ wʋdiu o pa o bɩnaga. O ma na o səbu kʋm na tigi da o yolo kʋm ni nɩ. 28 O ma ta dɩ o cʋrrʋ tɩm o wɩ: «Amʋ səbu kʋm mʋ ba joori ba pa-nɩ. Nii-kʋ da a yolo kʋm nɩ.» Ba na lwarɩ kʋntʋ tɩn, ba bɩcara ma di. Fʋʋnɩ ma ja-ba yɩ ba ŋɔɔnɩ ba brɩ daanɩ ba wɩ: «Bɛɛ mʋ Wɛ kɩ dɩbam tɩntʋ?»
29 Ba dɛɛn ma vu ba yi ba ko Zakɔbɩ te Kaanan nɩ. Ba ma lwǝni kʋlʋ maama na yi-ba tɩn ba brɩ-o. Ba ma ta ba wɩ: 30 «Dɩdɛɛrʋ wʋlʋ na nii Ezipi lʋgʋ kʋm maama baŋa nɩ tɩn zagɩ dɩbam mʋ dɩ ni-chɛɛrɩ yɩ o pa kʋ zʋ dɩ́ yɩra nɩnɛɛnɩ dɩ́ ga yɩ balʋ na lagɩ dɩ́ ŋɔ ba tɩʋ kʋm mʋ dɩ́ nii tɩn. 31 Dɩbam dɩ ma ta dɩd-o dɩ́ wɩ: ‹Dɩbam yɩ cɩga tiinə mʋ, dɩ́ daɩ balʋ na ŋɔnɩ dɩ́ nii á tɩʋ kʋm tɩn.› 32 Dɩ́ ma pa o maanɩ dɩ́ wɩ: dɩ́ dɛɛn yɩ cʋrrʋ fugǝ-bale mʋ dɩ ko dɩdʋa. Dɩ́ brɩ-o dɩbam dɩdʋa daa na tǝrǝ te, dɩdaanɩ dɩ́ nyaan-balaŋa mʋ laan na wʋ dɩ́ ko wʋm tee nɩ yo seeni te tɩn.
33 Dɩdɛɛrʋ wʋm ma ta dɩdaanɩ dɩbam o wɩ: ‹Kɩ-na tɩntʋ sɩ a lwarɩ nɩ á tagɩ cɩga. Abam cʋrʋ dɩdʋa wʋ́ maŋɩ amʋ tee nɩ yo, sɩ á daarɩ á kwe mɩna á ja á vu á pa á sɔŋɔ tiinə sɩ ba yɩ pu dɩ kana. 34 Kʋ nan maŋɩ sɩ á ja á nyaanɩ wʋm mʋ á ba sɩ a na‑o. Kʋntʋ mʋ wʋ́ pa a lwarɩ nɩ á yɩ cɩga tiinə yɩ á wʋ tu sɩ á ŋɔ á nii dɩ́ tɩʋ kʋm. Amʋ laan maa wʋ́ yagɩ á cʋrʋ kʋm a ya na pɩ tɩn, sɩ á dɩ taá beeri á pipiə dɩbam tɩʋ kʋm nɩ.› »
35 Ba na tagɩ kʋntʋ ba ti tɩn, mʋ ba maama dɛɛn bwǝli ba ywəllu tɩm. Ba dɩdʋa dɩdʋa ma na o səbu-gan-lɔgɩrɩ dɩm na tigi da dɩdaanɩ sǝbiǝ bam maama! Ba maama dɩ ba ko wʋm na nɛ kʋntʋ tɩn, fʋʋnɩ ma ja-ba. 36 Ba ko Zakɔbɩ ma ta dɩ ba o wɩ: «Abam na kɩ te tɩn, á lagɩ á pa amʋ ga a biə bam maama mʋ! A bu Zʋzɛfʋ daa tǝrǝ. Simeyon dɩ daa tǝrǝ. Abam daa ta kwaanɩ sɩ á ja Bɛnzamɛn á ja viiri. Lɛɛrʋ jɩgɩ-nɩ kǝm dɩntʋ maama wʋnɩ!» 37 Ruban ma ta dɩ o ko o wɩ: «Kwe bu wʋm n kɩ amʋ jɩŋa nɩ sɩ dɩ́ kɛ. A na wʋ jaan‑o a joori a kɩ n jɩŋa nɩ, sɩ n gʋ a bu-baara bale bam.» 38 Dɩ kʋntʋ dɩ, Zakɔbɩ tagɩ o wɩ: «Amʋ bá sɛ. Amʋ bu Bɛnzamɛn bá da dɩdaanɩ abam o vu. O zɩmbaarʋ Zʋzɛfʋ maŋɩ o tɩ yɩ wʋntʋ yɩranɩ mʋ daarɩ o nu-biə wʋnɩ. Cam na yi‑o cwǝŋǝ nɩ, abam wʋ́ pa a tɩ wʋ-cɔgɔ ŋwaanɩ, yɩ a ja a yu-pwe sɩntʋ a vu curu.»