50
Zʋzɛfʋ dɛɛn na maanɩ nɩ o ko tɩgɩ tɩn, o ma parɩ o tʋ o baŋa nɩ, o maa jɩg-o o kukwərə yɩ o keeri lanyɩranɩ. 2 Zʋzɛfʋ dɛɛn ta pɛ ni mʋ sɩ o tɩntʋŋna kwe tralɩ nugə ba ma turi o ko yɩra yam ba kwɛ ba tiŋi sɩ ba laan di o luə. Ba ma sɩɩnɩ ba kwɛ‑o ba tiŋi. 3 Ba dɛɛn mɛ da fiinna mʋ ba kwɛ‑o, nɩ kʋ na yǝni kʋ kɩ te tɩn. Ezipi tiinə bam dɛɛn ma keeri‑o da fusɩrpɛ.4 Ba kərə maŋa kam na ti tɩn, mʋ Zʋzɛfʋ dɛɛn tagɩ Pa-farʋ wʋm nakwa bam o wɩ: «Nɩnɛɛnɩ abam yi na su dɩ amʋ, sɩ á kwe-na kwǝrǝ kantʋ á vu á ta dɩ Pa-farʋ wʋm nɩ: 5 ‹A ko na lagɩ o tɩ tɩn, o pɛ a du durə a pa‑o nɩ: a maŋɩ sɩ a kɩ-o yibeeli dɩlʋ o na kwɛ o tiŋi o tɩtɩ ŋwaanɩ Kaanan tɩʋ kʋm nɩ tɩn mʋ. Kʋntʋ tɩn, pa-nɩ pwələ sɩ a vu dáanɩ a kɩ a ko wʋm sɩ a laan joori.› » 6 Pa-farʋ wʋm na ni tɩn, o maa wɩ: «Ve n kɩ n ko wʋm, sɩ kʋ tɔgɩ o na pɛ n du wɩ nń kɩ te tɩn.»
7 Zʋzɛfʋ dɛɛn ma ja o ko wʋm o vu sɩ o kɩ. Pa-farʋ wʋm sarɩya-dirə nakwa bam maama dɛɛn tɔg-o mʋ ba vu. Dɩdɛɛra balʋ maama na wʋ Pɛ sɔŋɔ nɩ tɩn dɩdaanɩ Ezipi tɩʋ kʋm dɩdɛɛra bam maama dɩ dɛɛn wʋra. 8 Zʋzɛfʋ digə tiinə dɩ o cʋrrʋ tɩm dɩdaanɩ o ko sɔŋɔ tiinə maama dɛɛn dɛ‑o mʋ ba vu sɩ ba kɩ o ko wʋm. Balʋ yɩranɩ na daarɩ Gozɛnɩ nɩ tɩn maa yɩ bu-balwa sɩm, dɩdaanɩ peeni, dɩ bʋnɩ, kʋ wǝli dɩ naanɩ mʋ. 9 Jar-kərə dɩ ma tɔgɩ ba vu, ba badonnǝ je sise-tərikooru wʋnɩ yɩ badonnǝ dɩ dɔgɩ sise baŋa nɩ ba maa veǝ. Kʋ dɛɛn tiini kʋ yɩ kɔ-fɔrɔ mʋ.
10 Ba ma vu ba bɛ Zʋrdɛn bugə kam yɩ ba daarɩ ba yi jǝgǝ kalʋ Atadɩ na ferɩ o mɩna da tɩn. Ba ma zɩgɩ da ba mɔ nagʋrʋ wɛɛnɩ. Zʋzɛfʋ ma maŋɩ da da yarpɛ o keeri o ko wʋm yɩ o di luə kam. 11 Kaanan tiinə balʋ na zʋʋrɩ je sɩm kʋntʋ nɩ tɩn na nɛ ba kərə kam Atadɩ jǝgǝ kam nɩ tɩn, ba maa wɩ: «Ezipi tiinə bantʋ na jeeri yo tɩn wʋ mʋ tiini kʋ cɔgɩ yɩ ba keeri zanzan.» Ba dɛɛn maa jɩgɩ jǝgǝ kam ba bǝi nɩ ‹Abel-mizarim›.a Jǝgǝ kam kʋntʋ maa yɩ Zʋrdɛn bugə kam bubɛ dɩdɩm dɩm seeni.
12 Zakɔbɩ biə bam dɛɛn ma kɩ ba ko na pɛ-ba ni sɩ ba kɩ te tɩn.b 13 Ba dɛɛn zɩŋɩ o yɩra mʋ ba vu ba kɩ Kaanan nɩ. Kʋ nan yɩ gugoro dɩm na wʋ Makpela pwələ kam nɩ tɩn mʋ ba dɛɛn kɩ-o. Dɩ bwələ dɩ Mamre mʋ, yɩ Abraham yəgi-dɩ Hɛtɩ tu Efrɔn tee nɩ sɩ o taa kɩ o nɔɔna dɩ wʋnɩ. 14 Ba dɛɛn na kɩ o ko wʋm ba ti tɩn, Zʋzɛfʋ laan ma joori Ezipi, wʋntʋ dɩ o cʋrrʋ tɩm, kʋ wǝli dɩ balʋ maama na dɛ ba vu Zakɔbɩ luə kam tɩn.
Zʋzɛfʋ joori o pa o cʋrrʋ tɩm na baarɩ
15 Zʋzɛfʋ cʋrrʋ tɩm na maanɩ nɩ ba ko daa tǝrǝ tɩn, ba ma kɩ ni daanɩ ba wɩ: «Dɩ́ dɛɛn na tiini dɩ́ kɩ lwarɩm dɩ́ pa Zʋzɛfʋ tɩn, dɛ dɩlʋ o bam ta wʋ dɩbam baŋa nɩ, yɩ o bʋŋɩ sɩ o joori o ŋwɩ jɩnɩ dɩ́ yɩra nɩ.»c 16 Ba dɛɛn ma tʋŋɩ kwǝrǝ ba pa Zʋzɛfʋ ba wɩ: «Nmʋ ko daama yagɩ ni dɩntʋ mʋ yɩ o laan daarɩ o tɩ, 17 yɩ o wɩ dɩ́ ta taanɩ dɩntʋ dɩ nmʋ nɩ ‹A loori‑m sɩ n kwe n cʋrrʋ tɩm lwarɩm dɩ ba na kɩ wo-lɔŋɔ kʋlʋ ba pa kʋ yi‑m tɩn n yagɩ n ma n cɛ-ba.› Dɩbam yɩ n ko wʋm Wɛ tɩntʋŋna mʋ. Dɩ́ loori‑m sɩ n kwe lwarɩm dɩlʋ dɩ́ na kɩ-m tɩn n yagɩ n ma n cɛ dɩbam.» Ba kwǝrǝ kam na tʋ Zʋzɛfʋ zwɛ nɩ tɩn, o ma kan yi-na.
18 O cʋrrʋ tɩm dɩ laan ma vu o te. Ba ma tiiri tɩga nɩ o yigə nɩ yɩ ba wɩ: «Dɩbam laan yɩ nmʋ gambɛ mʋ.»d 19 Zʋzɛfʋ dɛɛn ma ta dɩ ba o wɩ: «Yɩ taá kwarɩ-na fʋʋnɩ. Amʋ bá wanɩ a ləri Wɛ yuu nɩ. 20 Abam dɛɛn ya bʋŋɩ sɩ á kɩ amʋ mʋ lwarɩm. Wɛ ma pipiri á bʋbʋŋɩ dɩm pa dɩ kɩ lam. Kʋlʋ na sɩɩnɩ kʋ kɩ tɩn ya na wʋ kɩ, nɔɔna zanzan ŋwɩa zɩm yaá je mʋ. 21 Kʋntʋ ŋwaanɩ, yɩ taá kwarɩ-na fʋʋnɩ. Amʋ wʋ́ taa nii abam dɩ á biə baŋa nɩ sɩ á na wʋdiu á di.» O dɛɛn ta ŋɔɔnɩ wo-laarʋ dɩ o cʋrrʋ tɩm mʋ pa ba joori ba na baarɩ.
Zʋzɛfʋ tʋʋnɩ
22 Zʋzɛfʋ dɩ o ko sɔŋɔ tiinə bam ma lɛɛrɩ ba maŋɩ Ezipi nɩ. O bɩna maama dɛɛn maa yɩ bɩna bi dɩ fugə (110). 23 O dɛɛn nɛ Efrayim biə sɩ kʋ yi dwiə yatɔ laŋa nɩ. Manasɩ bu Makira dɩ biə dɛɛn ta jǝni Zʋzɛfʋ nɛ baŋa nɩ ba lʋra maŋa nɩ.
24 Zʋzɛfʋ dɛɛn ma ta dɩ o cʋrrʋ tɩm o wɩ: «Kʋ laan yi amʋ tʋʋnɩ. Wɛ nan mʋ wʋ́ zǝni abam. DƖ wʋ́ ja abam DƖ ja nuŋi lʋgʋ kʋntʋ nɩ, yɩ DƖ daarɩ DƖ ja abam DƖ joori á nabaara tɩga kam sɩ á taá je da. Tɩga kam kʋntʋ DƖ ya sɩɩnɩ DƖ yiǝ DƖ du durə mʋ sɩ DƖ kwe-ka DƖ pa Abraham, dɩ Yizakɩ, dɩ Zakɔbɩ.» 25 Zʋzɛfʋ dɛɛn ma pa Zakɔbɩ biə bam du durə ba pa‑o yɩ o wɩ: «Wɛ wʋ́ sɩɩnɩ DƖ ba DƖ wǝli abam sɩ á yagɩ yo. Abam nan na maa viirǝ, sɩ á kwe amʋ kwi sɩm á wǝli da á ja kɛ.»e
26 Zʋzɛfʋ dɛɛn jɩgɩ bɩna bi dɩ fugə (110) mʋ yɩ o tɩ. Ba ma kwe tralɩ nugə ba ma turi o yɩra yam ba kwɛ ba tiŋi. Ba na kɩ kʋntʋ ba ti tɩn, ba dɛɛn ja‑o ba kɩ daka nɩ mʋ ba zɩgɩ Ezipi tɩʋ kʋm nɩ.