Zʋzɛfʋ brɩ dɩndwɩa kuri
40
Kʋ maa wʋra kʋ wʋra, Ezipi Pɛ wʋm tɩntʋŋna bale dɛɛn ma kɩ ba cɔgɩ o yigə. Ba dɩdʋa yɩ wʋlʋ na yǝni o kwe na-zʋŋa dɩ ka wʋ sana bam o kɩ Pɛ wʋm jɩŋa nɩ tɩn. Wʋwʋm wʋm maa yɩ wʋlʋ na nii Pɛ wʋm dɩpɛ fɔgɩm baŋa nɩ tɩn. 2 Pa-farʋ wʋm bam ma zaŋɩ dɩ o tɩntʋŋna bale bam kʋntʋ. 3 O dɛɛn ma pa ba pɩ-ba ba yagɩ pɩɩna digə nɩ, Pɛ cɩ-tara yigə tu wʋm tee nɩ. Dáanɩ mʋ ba dɛɛn ya loori yigə ba pɩ Zʋzɛfʋ. 4 Ba na pɩ-ba yɩ ba zʋ je sɩm nɩ tɩn, mʋ pɩɩna digə dɩdɛɛrʋ wʋm ma kwe Zʋzɛfʋ o yagɩ ba tee nɩ yɩ o zǝni-ba dɩ kʋlʋ ba na lagɩ tɩn.Ba maa wʋra kʋntʋ taan. 5 Tɩtɩɩ dɩdʋa nɩ, wʋlʋ wʋm na kɩ sana Pɛ wʋm jɩŋa nɩ tɩn dwɛ dɩndwɩa mʋ, yɩ wʋlʋ wʋm na nii Pɛ wʋm dɩpɛ fɔgɩm baŋa nɩ tɩn dɩ dwɛ o nyɩm, dɩndwɩa maama dɩ dɩ kuri. 6 Tɩga na pʋʋrɩ tɩn, Zʋzɛfʋ ma vu sɩ o daanɩ ba pwəgə. O dɛɛn ma maanɩ nɩ woŋo tiini kʋ yaarɩ-ba zanzan. 7 O dɛɛn ma bwe Pa-farʋ wʋm tɩntʋŋna bale bam o wɩ: «Bɛɛ mʋ kɩa yɩ abam yibiyə zɩm nywanɩ kʋntʋ?» 8 Ba ma lǝr-o ba wɩ: «Dɩbam maama dwɛ dɩ́ dɩndwɩa mʋ, yɩ nɔɔn-nɔɔnʋ laan tǝrǝ sɩ o ta ya kuri o brɩ dɩbam.» Zʋzɛfʋ ma ta dɩ ba o wɩ: «Wɛ mʋ yɩ wʋlʋ na brɩ nɔɔna dɩndwɩa kuri tɩn. Ta-na á dɩndwɩa yam á brɩ-nɩ.»a
9 Wʋlʋ ya na kɩ sana pɛ wʋm jɩŋa nɩ tɩn ma ta o dɩndwɩa dɩm o brɩ Zʋzɛfʋ. O dɛɛn maa wɩ: «Amʋ na dwɛ dɩndwɩa dɩm tɩn mʋ a nɛ nɩ tiu kʋlʋ biə na waɩ ba kɩ sana tɩn mʋ zɩgɩ a yigə nɩ. 10 Kʋ maa jɩgɩ nɛ sɩtɔ. Vɔɔrʋ ma nuŋi nɛ sɩm nɩ yɩ punnu dɩ nuŋi lɩla. Kʋ wʋ dáanɩ dɩ kʋ na lǝgi biə, yɩ ba dɩ yɔɔrɩ ba bɩ lanyɩranɩ. 11 Amʋ ma na nɩ a ze Pa-farʋ wʋm na-zʋŋa kam mʋ. A ma gwəri tiu biə bam yɩ a ŋʋkɩ-ba a kɩ nyʋa na-zʋŋa kam nɩ. A laan ma kwe a pa Pɛ wʋm.»
12 Zʋzɛfʋ dɛɛn ma ta o wɩ: «Dɩndwɩa dɩm kuri mʋ tɩntʋ: Tiu kʋm nɛ sɩtɔ sɩm yɩ da yatɔ mʋ. 13 Da yatɔ wɛɛnɩ Pa-farʋ wʋm wʋ́ lɩ‑m pa n yuu joori kʋ zǝŋi. O maa wʋ́ pa n joori n ta n tʋŋa n faŋa tɩtʋŋa yam mʋ. Nmʋ wʋ́ ta n kɩ Pa-farʋ wʋm sana bam o jɩŋa nɩ, nɩ nmʋ ya na yǝni nɩ kɩ te pulim nɩ tɩn mʋ. 14 Wǝǝnu nan na kwe cwǝŋǝ tɩ pa‑m, sɩ n guli amʋ gulə. Duri amʋ yibwənə sɩ n ta a taanɩ n brɩ Pa-farʋ wʋm. Kʋntʋ wʋ́ pa ba pʋrɩ-nɩ sɩ a nuŋi pɩɩna digə kantʋ nɩ. 15 Bɛŋwaanɩ, ba jaanɩ-nɩ mʋ ba vrɩ Ebru tiinə tɩʋ kʋm nɩ ba ja ba ba yo seeni. Amʋ nan na yi yo seeni tɩn, a wʋ kɩ kʋlʋkʋlʋ a cɔgɩ sɩ ba pɩ amʋ jǝgǝ kantʋ wʋnɩ.»
16 Tɩntʋŋnʋ wʋlʋ na nii Pɛ wʋm dɩpɛ fɔgɩm baŋa nɩ tɩn ma maanɩ wɩ o doŋ wʋm dɩndwɩa dɩm kuri lamma dɩ pa‑o. O dɛɛn ma ta dɩ Zʋzɛfʋ o wɩ: «Amʋ dɩ dwɛ nɩ: A zɩŋɩ dɩpɛ kayɛ sɩtɔ mʋ a yuu nɩ, sɩ nan təni da-baŋa nɩ mʋ. 17 Kayaa kalʋ na wʋ sɩ maama baŋa nɩ tɩn ma su dɩ wo-laarʋ dwi dwi sɩ Pa-farʋ wʋm ya di. Zunə laan maa tui ba di wʋdiiru tɩm, yɩ tɩ ta wʋ amʋ yuu nɩ.»
18 Zʋzɛfʋ maa wɩ: «Nmʋ dɩndwɩa dɩm dɩ kuri mʋ tɩntʋ: Kayɛ sɩtɔ sɩm yɩ da yatɔ mʋ. 19 Da yatɔ wɛɛnɩ Pa-farʋ wʋm wʋ́ lɩ‑m o pa n yuu zǝŋi. Ba ta wʋ́ kuuri n ban ba yagɩ tiu yuu nɩ pa n tɩ mʋ, sɩ zunə laan taa tui ba di n ya-nwana yam.»
20 Da yatɔ yam dɛɛn ma sɩɩnɩ ya yi, yɩ kʋ yɩ Ezipi Pa-farʋ wʋm lʋra dɛ mʋ. O ma kɩ candiə o pa o nakwa maama. O dɛɛn ma pa ba pʋrɩ o tɩntʋŋna bale bam, sɩ ba ba ba jeeri o nakwa bam tee nɩ. 21 Pa-farʋ wʋm dɛɛn ma sɩɩnɩ o pa sana tu wʋm joori o tɩtʋŋa je sɩ o taa kɩ sana Pɛ wʋm jɩŋa nɩ nɩnɛɛnɩ kʋ na yɩ te faŋa tɩn. 22 O dɛɛn ma daarɩ o pa ba kuuri wʋdiu tu wʋm ba le tiu yuu nɩ ba gʋ. Kʋ maama dɛɛn kɩ kʋ maŋɩ dɩ Zʋzɛfʋ na tagɩ ba dɩndwɩa yam kuri te o brɩ-ba tɩn mʋ. 23 Kʋ nan na yɩ Pɛ wʋm sana tu wʋm, o yɔɔrɩ o swe Zʋzɛfʋ swiə mʋ.