Zʋzɛfʋ dɩ Potifarɩ kaanɩ taanɩ
39
Ismayɛlɩ tiinə bam dɛɛn ya jaanɩ Zʋzɛfʋ ba vu ba yi Ezipi. Ba ma yəg‑o ba pa Ezipi tu wʋdoŋ, o yɩrɩ mʋ Potifarɩ. Wʋntʋ maa yɩ ba tɩʋ kʋm Pa-farʋ kwaga dɩdɛɛra bam nɔɔnʋ dɩdʋa yɩ o yɩ pamaŋna bam yuutu.2 Baŋa-Wɛ dɛɛn maa wʋ Zʋzɛfʋ tee nɩ, pa wǝǝnu da cwǝŋǝ lanyɩranɩ tɩ pa‑o. O dɛɛn maa yɔɔrɩ o wʋ o tu Potifarɩ sɔŋɔ kʋm nɩ o tʋŋa. 3 O tu wʋm dɛɛn maanɩ nɩ Baŋa-Wɛ mʋ wʋ Zʋzɛfʋ tee nɩ. O ta ma lwarɩ nɩ kʋ yɩ Baŋa-Wɛ ŋwaanɩ mʋ paɩ Zʋzɛfʋ jɩŋa wǝǝnu maama tɔgɩ cwǝŋǝ. 4 Kʋ ma pa Potifarɩ yi dɛɛn su Zʋzɛfʋ tɩtʋŋa yam. O ma pa‑o cwǝŋǝ sɩ o taa nii wʋm tɩtɩ wǝǝnu baŋa nɩ o pa‑o. O ma yɔɔrɩ o kwe o sɔŋɔ kʋm tɩtʋŋa dɩ o jɩjɩgɩrʋ maama mʋ o kɩ Zʋzɛfʋ jɩŋa nɩ sɩ o taa niə. 5 Kʋ zɩgɩ dɛ dɩm kʋntʋ nɩ kʋ taa veǝ, Baŋa-Wɛ dɛɛn kɩ Potifarɩ dɩ o sɔŋɔ kʋm maama yu-yoŋo mʋ Zʋzɛfʋ ŋwaanɩ. Kʋ na yɩ o karɩ sɩm dɩ o vara bam dɩ o sɔŋɔ wǝǝnu tɩm maama, Baŋa-Wɛ yu-yoŋo dɛɛn wʋ tɩ maama baŋa nɩ mʋ. 6 O dɛɛn yagɩ o jɩŋa woŋo maama o pa Zʋzɛfʋ sɩ o taa nii-tɩ o pa‑o. O yigə dɛɛn daa tǝrǝ kʋlʋkʋlʋ wʋnɩ, kʋ na daɩ o tɩtɩ ni-wʋdiu kʋm yɩranɩ sɩ o ba o di.
Zʋzɛfʋ yɩ-daa kam dɛɛn maŋɩ daanɩ mʋ yɩ o tiini o lamma yi nɩ. 7 Kʋ wʋ dáanɩ dɩdaanɩ o tu wʋm kaanɩ na dʋlɩ o yi o na Zʋzɛfʋ. Kaanɩ wʋm wʋbʋŋa ma zʋ-o yɩ o ta o wɩ: «Ba n pəni dɩ amʋ.» 8 Zʋzɛfʋ ma vɩn yɩ o wɩ: «A bá sɛ! Amʋ tu wʋm kwe o sɔŋɔ wǝǝnu maama mʋ o kɩ amʋ jɩŋa nɩ, yɩ o yigə daa tǝri kʋlʋkʋlʋ wʋnɩ, amʋ na nii tɩ baŋa nɩ tɩn ŋwaanɩ. 9 Nɔɔn-nɔɔnʋ ba dwe amʋ sɔŋɔ kʋntʋ nɩ. Amʋ tu wʋm nan wʋ cəŋi kʋlʋkʋlʋ yo amʋ tee nɩ, kʋ na daɩ nmʋ yɩranɩ, nmʋ na yɩ o kaanɩ tɩn ŋwaanɩ. A nan bá wanɩ a tʋŋɩ wo-balɔrɔ tɩtʋŋɩ dɩntʋ. Kʋʋ́ taa yɩ lwarɩm mʋ Wɛ yigə nɩ.» 10 Dɛ maama mʋ kaanɩ wʋm yɔɔrɩ o daanɩ Zʋzɛfʋ dɩ taanɩ dɩm kʋntʋ doŋ. O dɩ maa ba sɛa, yɩ o jɩg-o o liisə, sɩ ba yɩ twɛ daanɩ.
11 Dɛ dɩdwɩ: Zʋzɛfʋ ma zʋ sɔŋɔ kʋm wʋnɩ sɩ o tʋŋɩ o tɩtʋŋa. O donnǝ tɩntʋŋna bam wʋlʋwʋlʋ dɛɛn maa tǝri kʋ wʋnɩ. 12 Potifarɩ kaanɩ wʋm ma vu o ja-o o gɔrɔ seeni yɩ o wɩ: «Ba sɩ dɩ́ pəni daanɩ!» Zʋzɛfʋ ma vrɩ o tɩtɩ o daarɩ o gɔrɔ kʋm o yagɩ kaanɩ wʋm jɩŋa nɩ, yɩ o duri o nuŋi pooni. 13 Kaanɩ wʋm na nɛ nɩ o yagɩ o gɔrɔ o jɩŋa nɩ yɩ o duri o nuŋi sɔŋɔ kʋm nɩ tɩn, 14 o ma bəŋi sɔŋɔ kʋm wʋ tɩntʋŋna bam o ta dɩ ba o wɩ: «Nii-na a barʋ na jaanɩ Ebru tu wʋntʋ o ba yo sɩ o mwanɩ dɩbam te! O zʋ yo mʋ sɩ o zi-nɩ, yɩ a dɩ tiini a tɔɔlɩ. 15 O nan na ni nɩ a tɔɔlɩ sɩ ba joŋi-nɩ ba yagɩ tɩn, mʋ o yagɩ o gɔrɔ a tee nɩ o daarɩ o duri o nuŋi.»
16 Kaanɩ wʋm dɛɛn ma tiŋi Zʋzɛfʋ gɔrɔ kʋm o tee nɩ, yɩ o cəgi sɩ o barʋ joori sɔŋɔ. 17 O na tu tɩn, kaanɩ wʋm laan ma tʋlɩ taanɩ dɩm o brɩ-o o wɩ: «Ebru gambaa kam nmʋ na yəgi n ja n ba tɩn mʋ zʋ yo sɩ o zi-nɩ. 18 A na tɔɔlɩ sɩ ba joŋi-nɩ ba yagɩ tɩn, mʋ o yagɩ o gɔrɔ a tee nɩ yɩ o daarɩ o duri o nuŋi pooni.»
19 Potifarɩ na ni o kaanɩ wʋm na tagɩ kʋlʋ tɩn, o bam tiini dɩ zaŋɩ dɩ Zʋzɛfʋ mʋ. 20 O dɛɛn ma pa ba ja Zʋzɛfʋ ba pɩ pɩɩna digə nɩ. Dáanɩ mʋ ba dɛɛn yǝni ba pɩ Ezipi Pɛ wʋm pɩɩna.
Zʋzɛfʋ dɛɛn na wʋ pɩɩna digə kam nɩ kʋntʋ tɩn, 21 Baŋa-Wɛ wʋ o tee nɩ mʋ. DƖ ma kɩ Zʋzɛfʋ lanyɩranɩ yɩ DƖ pa pɩɩna digə kam dɩdɛɛrʋ wʋm soe Zʋzɛfʋ. 22 Dɩdɛɛrʋ wʋm dɛɛn ma pa Zʋzɛfʋ cwǝŋǝ sɩ wʋntʋ taa nii pɩɩna badonnǝ bam o pa‑o. O ma kwe kʋlʋ maama na wʋ́ kɩ pɩɩna digə kam nɩ tɩn o kɩ Zʋzɛfʋ jɩŋa nɩ. 23 Pɩɩna digə kam dɩdɛɛrʋ wʋm yigə dɛɛn tǝrǝ dɩ kʋlʋ maama o na kɩ Zʋzɛfʋ jɩŋa nɩ tɩn. Bɛŋwaanɩ, Baŋa-Wɛ dɛɛn wʋ Zʋzɛfʋ tee nɩ mʋ yɩ o kǝm maama tɔgɩ cwǝŋǝ.