38
Kantʋ maŋa kam nɩ, mʋ Zuda dɛɛn zaŋɩ o cʋrrʋ tɩm tee nɩ yɩ o vu o zʋʋrɩ dɩ Adulamɩ tu wʋdoŋ, o yɩrɩ na yɩ Hira tɩn tee nɩ. 2 Dáanɩ mʋ o nɛ Kaanan tiinə bukɔ dɩdʋa, o ko yɩrɩ na yɩ Sua tɩn. O ma di‑o o ma kɩ o kaanɩ. 3 Kaanɩ wʋm ma ja pugə yɩ o lʋ bəkərə. Ba dɛɛn ma bəŋi bu wʋm yɩrɩ ba wɩ: ‹Ɛrɩ›. 4 O dɛɛn daa ma ja pugə o lʋ bəkərə yɩ o bəŋi o yɩrɩ o wɩ: ‹Onanɩ›. 5 O daa ta ma lʋ bəkərə wʋdoŋ yɩ ba bəŋi wʋntʋ ba wɩ: ‹Swela›. Kezibi tɩʋ nɩ mʋ ba lʋg-o.6 Ɛrɩ dɛɛn na kɩ nɔɔnʋ tɩn, Zuda dɛɛn di kaanɩ o pa‑o, o na yɩ o bu-kwɩan kam tɩn ŋwaanɩ. Kaanɩ wʋm yɩrɩ mʋ Tamaarɩ. 7 Ɛrɩ dɛɛn ma tiini o kɩ pu-sɩŋa tɩtʋŋɩ Baŋa-Wɛ yigə nɩ. O kənə yam tiini ya cɔgɩ Baŋa-Wɛ wʋ yɩ DƖ pa o tɩ.
8 Zuda laan ma ta dɩ Onanɩ o wɩ: «Ve n kwe n zɩmbaarʋ kaanɩ wʋm, sɩ n kɩ kʋlʋ na maŋɩ sɩ nyaanɩ tʋŋɩ dɩ o zɩmbaarʋ kadəm tɩn. Kʋntʋ wʋ́ pa á na dwi á pa n zɩmbaarʋ wʋm.» 9 Onanɩ ma maanɩ sɩ dwi dɩlʋ ba na wʋ́ lʋ tɩn bá taa yɩ wʋntʋ nyɩm. O dɛɛn na zʋ o tigi dɩ o zɩmbaarʋ kaanɩ wʋm, o ma yǝni o lo o nywannʋ tɩm o yagɩ tɩga nɩ. Bɛŋwaanɩ, o dɛɛn ba lagɩ sɩ o na biə o pa o zɩmbaarʋ wʋm. 10 O kɩ pu-sɩŋa tɩtʋŋɩ Baŋa-Wɛ yigə nɩ. Wɛ ma gʋ wʋntʋ dɩ.
11 Zuda dɛɛn ma ta dɩ o bu Ɛrɩ kaanɩ Tamaarɩ o wɩ: «Joori n vu n ko sɔŋɔ n ta n je da kadən. Amʋ bu-baarʋ Swela na kɩ nɔɔnʋ o ti, sɩ n laan ba.» O dɛɛn tagɩ kʋntʋ bɛŋwaanɩ o dɛɛn bʋŋɩ mʋ o wɩ: «Kʋ na daɩ kʋntʋ, Swela dɩ wʋ́ zɩgɩ o tɩ nɩnɛɛnɩ o cʋrrʋ tɩm na tɩgɩ te tɩn.» Tamaarɩ ma sɩɩnɩ o vu o zʋʋrɩ o ko sɔŋɔ nɩ.
12 Kʋ maa wʋra kʋ wʋra, Zuda kaanɩ wʋlʋ na yɩ Sua bukɔ tɩn dɛɛn ma ba o tɩ. Zuda na keeri o kaanɩ wʋm yɩ luə kam ni kɛ tɩn mʋ o zaŋɩ o vu Timna, o dɩ o ciloŋ Hira, Adulamɩ tu wʋm. O tɩntʋŋna dɛɛn maa wʋra ba fanɩ o peeni sɩm kʋrʋ. 13 Tamaarɩ dɛɛn ma lwarɩ nɩ: o barʋ ko wʋm wʋ cwǝŋǝ nɩ o maa ve Timna sɩ o fanɩ o peeni kʋrʋ. 14 O ma lɩ o kadən gwaarʋ tɩm, yɩ o daarɩ o vɔ gɔrɔ kʋdoŋ sɩ o ma kwǝli o yibiyə pa ba war‑o ba lwarɩ. O dɛɛn ta ma daarɩ o vu Enayimi tɩʋ kʋm o je manco-pɩɩna ni nɩ, bɛŋwaanɩ o maanɩ nɩ Swela dɛɛn bɩgɩ baarʋ yɩ ba ta wʋ sɛ sɩ wʋm ji o kaanɩ. Enayimi dɛɛn wʋ Timna cwǝŋǝ kam ni nɩ mʋ.
15 Zuda dɛɛn na maa kɛa yɩ o na‑o tɩn, o pɛ o yɩ ka-boro mʋ, kaanɩ wʋm na kwǝli o yibiyə tɩn ŋwaanɩ. 16 O ma ywəri o vu o yi o te cwǝŋǝ kam ni nɩ yɩ o wɩ: «A loori-m, sɛ sɩ n pa dɩ́ pəni daanɩ.» O dɛɛn tagɩ kʋntʋ yɩ o wʋ lwarɩ nɩ kʋ yɩ o tɩtɩ bu-kaanɩ wʋm mʋ. Kaanɩ wʋm ma bwe‑o o wɩ: «Bɛɛ mʋ nmʋ wʋ́ pa-nɩ sɩ a laan pəni dɩ nmʋ?» 17 Zuda ma ləri o wɩ: «A wʋ́ lɩ a vara bam wʋnɩ bʋ-bala a tʋŋɩ a pa‑m.» O daa ma bwe‑o o wɩ: «Nmʋ nan wʋ́ pa amʋ woŋo mʋ sɩ a tiŋi sɩ kʋ taa nii maŋa kalʋ n na wʋ́ tʋŋɩ varɩm wʋm tɩn na?» 18 O maa wɩ: «Nmʋ ya lagɩ sɩ a pa‑m bɛɛ mʋ a tiŋi daarɩ?» O maa wɩ: «Pa-nɩ n jafʋlɩ dɩm dɩ ŋʋna kalʋ na lǝgi da tɩn, n ta wǝli n jɩŋa nacəgə kam.» O ma sɛ o kwe-tɩ o pa‑o yɩ ba daarɩ ba pəni daanɩ. Kʋntʋ tɩn, Tamaarɩ dɛɛn jaanɩ pugə dɩ o barʋ ko wʋm. 19 Tamaarɩ ma zaŋɩ o joori sɔŋɔ o vu o lɩ gɔrɔ kʋlʋ o na mɛ o kwǝli o yibiyə tɩn, yɩ o daarɩ o joori o kwe o kadən gwaarʋ tɩm o zʋ.
20 Zuda dɛɛn ma tʋŋɩ o ciloŋ Adulamɩ tu wʋm dɩdaanɩ bʋ-bala kam sɩ o ja o vu o pa kaanɩ wʋm, sɩ o daarɩ o joŋi wǝǝnu tɩlʋ o na mɛ o tiŋi daarɩ tɩn. Hira ma beeri beeri kaanɩ wʋm o ga. 21 O ma bwe Enayimi nɔɔna badonnǝ o wɩ: «Ka-boro kʋlʋ dɛɛn na je á tɩʋ kʋm cwǝŋǝ ni nɩ tɩn ve yən mʋ?» Ba ma ləri ba wɩ: «Ka-boro kʋntʋ doŋ maŋɩ kʋ təri yo jəgə kam kʋntʋ nɩ.»
22 O ma joori o vu Zuda te o ta o wɩ: «Amʋ beeri wuu, yɩ a ga o ŋwa! Tɩʋ kʋm nɔɔna ma ta ba wɩ: ka-boro maŋɩ kʋ wʋ garɩ yo.» 23 Zuda ma ta o wɩ: «Pa dɩ́ yagɩ wǝǝnu tɩm dɩ́ na mɛ dɩ́ tiŋi daarɩ o tee nɩ tɩn. Kʋ na daɩ kʋntʋ, nɔɔna laan wʋ́ taa jɩgɩ dɩbam ba mwana. A loori a tʋŋɩ bʋ-bala kam sɩ a ya pa‑o, nmʋ nan wʋ nɛ‑o mʋ.»
24 Canɩ sɩtɔ na kɛ tɩn mʋ ba tagɩ dɩ Zuda ba wɩ: «N bu-kaanɩ Tamaarɩ kɩ ka-boro tɩtʋŋɩ mʋ, kʋ ŋwaanɩ o laan jɩgɩ pugə mʋ.» Zuda ma ta o wɩ: «Ja-o-na á nuŋi dáa á zwɛ á gʋ-na.» 25 Ba dɛɛn na jɩg-o ba maa nuŋi tɩn mʋ o tʋŋɩ kwǝrǝ o pa o barʋ ko wʋm o wɩ: «Amʋ jaanɩ pugə kam dɩ baarʋ wʋlʋ na te wǝǝnu tɩntʋ tɩn mʋ. Fɔgɩ n nii lanyɩranɩ sɩ n nii nń wanɩ n lwarɩ kʋ na yɩ wʋlʋ jafʋlɩ dɩ dɩ ŋʋna, dɩ kʋ na yɩ wʋlʋ nacəgə tɩn na?» 26 Zuda ma nii wǝǝnu tɩm, yɩ o wɩ: «Tɩ yɩ amʋ mʋ nyɩm! Kaanɩ wʋntʋ jɩgɩ cɩga o dwe amʋ. Bɛŋwaanɩ, a wʋ sɛ sɩ a ja‑o a pa a bu Swela.» O nan daa wʋ joori o pəni dɩd-o.
27 Maŋa kam na yi sɩ Tamaarɩ lʋ tɩn, mʋ ba maanɩ nɩ yiywa dɛɛn wʋ o pugə kam nɩ. 28 O na wʋra o lʋrɩ tɩn mʋ bəkəri sɩm dɩdʋa twɩ o jɩŋa pa ka nuŋi pooni. Ka-lwəru wʋm ma ja jɩŋa kam o vɔ gar-ŋʋn-sɩŋa o kɩ da, yɩ o wɩ: «Wʋntʋ mʋ dɛ yigə o nuŋi pooni.» 29 Dɩ kʋ dɩ, bu wʋm daa ma joori o kɔɔrɩ o jɩŋa kam o daarɩ yɩ o cʋrʋ kʋm kɛ o nuŋi pooni. Ka-lwəru wʋm maa wɩ: «Nii nmʋ na pi n nuŋi pooni te!» Kʋntʋ ŋwaanɩ ba ma bəŋi o yɩrɩ wɩ: ‹Perɛtsɩ›.a 30 Bəkərə wʋdoŋ kam laan ma nuŋi pooni dɩ o gar-ŋʋn-sɩŋa kam o jɩŋa nɩ. Ba ma pa wʋntʋ yɩrɩ ba wɩ: Zera.