Zakɔbɩ joori o vu Betɛlɩ
35
Wɛ dɛɛn laan ma ta Zakɔbɩ DƖ wɩ: «Zaŋɩ n vu Betɛlɩ n ta n zʋʋrɩ da.a Nmʋ na yi da, sɩ n kikili kandwa n lɔ bimbim, sɩ n zuli amʋ, Baŋa-Wɛ, bɛŋwaanɩ, amʋ mʋ tuǝ nmʋ te maŋa kalʋ n dɛɛn na duri sɩ n lu n zɩmbaarʋ Esayu jɩŋa nɩ tɩn.» 2 Zakɔbɩ ma sɛ yɩ o ta dɩ o digə tiinə, dɩ balʋ maama na wʋ o tee nɩ tɩn o wɩ: «Dʋlɩ-na dwi-gɛ tiinə jwǝnǝ yalʋ na wʋ abam tee nɩ tɩn á yagɩ. Taá kwɛ-na á tɩtɩ, sɩ á daarɩ á lǝni-na á gwaarʋ tɩm. 3 Pa-na dɩ́ zaŋɩ dɩ́ vu Betɛlɩ. Dáanɩ mʋ amʋ lagɩ a lɔ bimbim a ma a zuli Wɛ, dɩlʋ dɩm na zəni-nɩ maŋa kam a dɛɛn na wʋ yaara wʋnɩ tɩn, yɩ DƖ da amʋ yigə a vəŋə maama nɩ tɩn.» 4 Ba ma sɩɩnɩ ba kwe ba jwǝnǝ yam maama ba pa Zakɔbɩ. Ba ta ma wǝli dɩ zwa-kwana yalʋ na wʋ ba zwa nɩ tɩn. Zakɔbɩ ma kwe ya maama o kʋ goŋo Sishɛm tiu kʋm kuri nɩ o suli-ya.5 Ba laan ma kwe cwǝŋǝ ba maa kɛa. Wɛ ma pa fʋʋnɩ tiini dɩ ja tɩʋ kʋm kʋntʋ dɩ kʋ nawuurə yam nɔɔna maama. Kʋntʋ ma pa nɔɔn-nɔɔnʋ daa warɩ sɩ o zəli o da Zakɔbɩ dɩ o nɔɔna bam kwaga. 6 Zakɔbɩ dɩdaanɩ nɔɔna balʋ maama na wʋ o tee nɩ tɩn ma vu ba yi Luuzi. Kʋ dɛɛn yɩ Kaanan tɩʋ kʋdoŋ mʋ, yɩ Zakɔbɩ pa kʋ yɩrɩ wɩ: ‹Betɛlɩ›. 7 O na yi da tɩn mʋ o lɔgɩ kaanɩm bimbim sɩ o ma o zuli Wɛ. O ma bəŋi je sɩm yɩrɩ nɩ ‹El-bɛtɛlɩ›, bɛŋwaanɩ kʋ yɩ dáanɩ mʋ Wɛ brɩ DƖ tɩtɩ dɩd-o maŋa kalʋ o dɛɛn na maa durǝ sɩ o lu o zɩmbaarʋ Esayu jɩŋa nɩ tɩn. 8 Kaanɩ wʋlʋ dɛɛn ya na nii Rebeka baŋa nɩ tɩn ma ba o tɩ je sɩm kʋntʋ nɩ. O yɩrɩ mʋ Debora. Ba ma ja‑o ba kɩ tiu kʋm kuri nɩ, kʋ na wʋ Betɛlɩ kuri seeni tɩn. Ba ma bəŋi je sɩm kʋntʋ yɩrɩ wɩ: ‹Wʋ-cɔkʋ kərə tiu›.
9 Kʋ dɛ cwǝŋǝ kam kʋntʋ mʋ yɩ Zakɔbɩ dɛɛn zɩgɩ Mezopotami nɩ o joori o ba Betɛlɩ. O na wʋra tɩn mʋ Wɛ daa vɩɩrɩ DƖ tɩtɩ dɩd-o yɩ DƖ daarɩ DƖ kɩ o yu-yoŋo. 10 Wɛ ma ta dɩd-o DƖ wɩ: «Ba nan daa bá taa bǝi nmʋ nɩ Zakɔbɩ. Nmʋ yɩrɩ laan mʋ yɩ Yisɩrayɛlɩ.»b Wɛ ma sɩɩnɩ DƖ ləni o yɩrɩ dɩm sɩ dɩ taa yɩ ‹Yisɩrayɛlɩ›.
11 Wɛ laan ma ta-o DƖ wɩ: «Amʋ mʋ yɩ Dam-fɔrɔ Tu Wɛ dɩm. Aá pa n dwi puli zanzan. Tɩɩnɩ zanzan wʋ́ nuŋi nmʋ yɩra nɩ, yɩ pwa dɩ wʋ́ taa wʋra n dwi dɩm wʋnɩ. 12 A pɛ‑m tɩga kalʋ a dɛɛn na kwe a pa Abraham dɩ Yizakɩ tɩn mʋ sɩ n ta n te-ka. Amʋ nan ta wʋ́ pa nmʋ dwi dɩm na wʋ́ saŋɩ nmʋ kwaga tɩn.» 13 Wɛ na ŋɔɔnɩ DƖ ti tɩn, DƖ laan ma titwəni DƖ dɛɛn na zɩgɩ je sɩlʋ nɩ tɩn DƖ kɛ, yɩ DƖ daarɩ Zakɔbɩ. 14 Jǝgǝ kalʋ Wɛ na zɩgɩ DƖ ŋɔɔnɩ dɩd-o tɩn mʋ Zakɔbɩ dɛɛn kwe kandwɛ o cwi da. O ta ma kwe wo-nyɔɔrʋ pɛɛrɩ dɩ nugə o lo dɩ baŋa nɩ o pa Wɛ. 15 Zakɔbɩ dɛɛn bəŋi mɛ Wɛ na zɩgɩ DƖ ŋɔɔnɩ dɩd-o tɩn o wɩ: ‹Betɛlɩ›.
Rasɛɛlɩ tʋʋnɩ
16 Ba dɛɛn ma zaŋɩ Betɛlɩ nɩ ba kwe cwǝŋǝ ba maa kɛa. Ba na gɛ fɩɩn sɩ ba yi Efrata tɩn mʋ Rasɛɛlɩ vri pugə sɩ o lʋ, yɩ kʋ cɛ o yɩra nɩ. 17 Lʋra kam na tiini kʋ camma ka pa‑o kʋntʋ tɩn, mʋ ka-pu-lwəru wʋlʋ na jaan‑o sɩ o lʋ tɩn tagɩ dɩd-o o wɩ: «Yɩ ta n liǝ, sɩ n daa n nɛ bəkərə wʋdoŋ mʋ.» 18 Rasɛɛlɩ dɛɛn maa wʋra o tʋa. O siun kʋm na lagɩ kʋ kwǝri tɩn, mʋ o pɛ o bəkərə kam yɩrɩ o wɩ: ‹Bɛn-Oni›.c Bu wʋm ko dɩ dɛɛn ma pa o yɩrɩ o wɩ: ‹Bɛnzamɛn›.d 19 Rasɛɛlɩ ma tɩ yɩ ba kɩ-o Efrata cwǝŋǝ kam yuu nɩ (Betelɩhɛm mʋ kʋntʋ). 20 Zakɔbɩ ma kwe kandwɛ o cwi Rasɛɛlɩ yibeeli dɩm baŋa nɩ. Dɩ zɩm maama, kandwɛ dɩm kʋntʋ mʋ brɩ mɛ yibeeli dɩm na zɩgɩ tɩn.
21 Zakɔbɩ daa ma kwe cwǝŋǝ o kɛ, yɩ o vu o cwi o vwe Migdal-Edɛrɩ kwaga nɩ. 22 Zakɔbɩ ta na zʋʋrɩ laŋa kam kʋntʋ nɩ tɩn mʋ Ruban zʋa o pəni dɩ o ko ka-biə dɩdʋa, o yɩrɩ na yɩ Bila tɩn. Zakɔbɩ ma ni kʋ ŋwa.
Zakɔbɩ dɛɛn jɩgɩ bu-baara fugǝ-bale mʋ.
23 Lea na lʋgɩ bu-baara balʋ tɩn mʋ tɩntʋ: Ruban dɛɛn mʋ yɩ Zakɔbɩ bu-kwɩan, kʋ wǝli dɩ Simeyon, dɩ Levi, dɩ Zuda, dɩ Yisakaarɩ, dɩdaanɩ Zabulɔn.
24 Rasɛɛlɩ bu-baara bam mʋ tɩntʋ: Zʋzɛfʋ dɩdaanɩ Bɛnzamɛn.
25 Rasɛɛlɩ tɩntʋŋ-kana Bila bu-baara bam mʋ tɩntʋ: Dan dɩdaanɩ Nɛfitali.
26 Lea tɩntʋŋ-kana Zilpa dɩ bu-baara bam mʋ tɩntʋ: Gadɩ dɩdaanɩ Asɛɛrɩ.
Mʋ Zakɔbɩ bu-baara bam mʋ kʋntʋ, o kaana bam na lʋgɩ ba pa‑o yɩ o dɛɛn ta wʋ Mezopotami nɩ tɩn.
Yizakɩ tʋʋnɩ
27 Zakɔbɩ ma zaŋɩ o joori o vu o ko Yizakɩ te, Mamre nɩ. Je sɩm kʋntʋ dɛɛn bwələ dɩdaanɩ Kiriyat-Arba mʋ (Ebrɔn mʋ kʋntʋ). Abraham dɩ Yizakɩ dɛɛn nan zʋʋrɩ dáanɩ mʋ. 28 Yizakɩ bɩna dɛɛn yɩ bi dɩdaanɩ funɔnɔ (180) mʋ. 29 O dɛɛn tiini o kwɩn zanzan yɩ o laan ba o tɩ. O bu-baara bam Esayu dɩdaanɩ Zakɔbɩ dɛɛn ma ja‑o ba kɩ.