Sishɛm zi Dina o cɔgɩ
34
Dina dɛɛn yɩ bukɔ wʋlʋ Lea na lʋgɩ o pa Zakɔbɩ tɩn mʋ. Dɛ dɩdwɩ mʋ o zaŋɩ o vu sɩ o jeeri Kaanan tɩʋ kʋm bukwa bam. 2 Hamɔɔrɩ dɛɛn yɩ Hevi tu mʋ na yɩ pɛ je sɩm kʋntʋ nɩ. O maa jɩgɩ bu-baarʋ, o yɩrɩ na yɩ Sishɛm. Sishɛm na nɛ Dina tɩn, o ma ja-o dam o vu o pəni dɩdaan-o, o pa o cɔgɩ. 3 O wʋbʋŋa dɛɛn ma tiini ya zʋ Dina wʋnɩ. O na soe‑o tɩn ŋwaanɩ, o ma ŋɔɔnɩ o koor‑o, o paɩ o sɛ sɩ o zʋ-o. 4 Sishɛm ma ta dɩ o ko Hamɔɔrɩ o wɩ: «Tɔgɩ bukɔ wʋntʋ nɛ n pa-nɩ sɩ a ma a kɩ a kaanɩ.»5 Zakɔbɩ dɛɛn ma ni Sishɛm na cɔgɩ o bukɔ Dina te tɩn, yɩ o ta maanɩ nɩ o bu-baara bam ta wʋ gaa nɩ mʋ ba nii o vara bam. O maa wʋ tagɩ kʋlʋkʋlʋ, yɩ o cəgi-ba sɩ ba joori sɔŋɔ.
6 Sishɛm ko Hamɔɔrɩ dɛɛn ma vu Zakɔbɩ te sɩ o ŋɔɔnɩ dɩd-o. 7 Zakɔbɩ biə bam ma nuŋi gaa wʋ ba joori sɔŋɔ yɩ ba ni kʋlʋ na kɩ Dina tɩn. Ba wʋ ma tiini kʋ cɔgɩ yɩ ba bam dɩ zaŋɩ kʋ ja gaalɩ. Bɛŋwaanɩ, Sishɛm na zi Zakɔbɩ bukɔ wʋm tɩn, o yáalɩ Yisɩrayɛlɩ dwi dɩm mʋ. Kǝm dɩm kʋntʋ nan ya wʋ maŋɩ sɩ nɔɔnʋ tʋŋɩ maŋa dɩ maŋa.
8 Hamɔɔrɩ ma ta dɩ ba o wɩ: «Amʋ bu Sishɛm bɩcarɩ maama wʋ abam bukɔ wʋm wʋnɩ mʋ. A loori-m, sɛ-na sɩ o di‑o o ma kɩ kaanɩ. 9 Pa-na sɩ dɩ́ biə taa di daanɩ. Ye-na á bukwa á pa dɩbam, sɩ á dɩ soe dɩbam dɩ bukwa. 10 Abam wʋ́ wanɩ á taá zʋʋrɩ dɩdaanɩ dɩbam. Nii-na tɩga kam maama mʋ tɩntʋ abam yigə nɩ. Taá zʋʋrɩ-na ka wʋnɩ, sɩ á taá beeri á pipiə yɩ á daarɩ á yəgi tɩga á taá te.»
11 Sishɛm laan ma ta dɩ Dina ko wʋm dɩ o nabwa bam o wɩ: «Sɛ-na á kɩ woŋo kʋntʋ á pa-nɩ, sɩ amʋ dɩ wʋ́ pa abam kʋlʋ maama á na lagɩ tɩn. 12 Abam na tagɩ kadri wǝǝnu tɩm dɩ pɛɛra yalʋ amʋ na maŋɩ sɩ a pa tɩn, tɩ na yɩ tɩte maama, amʋ wʋ́ ŋwɩ. Za‑á pa-na sɩ a di bukɔ wʋm sɩ a ma a kɩ a kaanɩ.»
13 Taanɩ dɩm Sishɛm dɩ o ko Hamɔɔrɩ dɛɛn na jɩgɩ ba ŋɔɔnɩ tɩn, Zakɔbɩ biə bam səgi ba wʋ mʋ ba lǝri-ba. Ba kɩ kʋntʋ bɛŋwaanɩ Sishɛm maŋɩ o cɔgɩ ba nakɔ Dina. 14 Ba ma ta dɩ ba ba wɩ: «Dɩbam bá wanɩ dɩ kɩ kʋntʋ. Dɩbam bá kwe dɩ́ nakɔ dɩ́ ye dɩ́ pa baarʋ wʋlʋ na wʋ goni o pəni tɩn. Kʋntʋ yɩ cavɩɩra mʋ dɩbam tee nɩ. 15 Kʋ nan maŋɩ sɩ abam mʋ sɛ sɩ á kɩ woŋo dɩdʋ á pa dɩbam. Abam dɩdaanɩ dɩbam maŋɩ sɩ dɩ́ taa yɩ bɩdwɩ mʋ pənə gonim baŋa nɩ. Abam maŋɩ sɩ á goni á baara bam maama pənə mʋ. 16 Kʋntʋ laan wʋ́ pa pwələ taa wʋra sɩ dɩ́ kwe dɩ́ bukwa dɩ́ pa abam, sɩ dɩbam dɩ taa di abam bukwa dɩ́ ma kɩ dɩ́ kaana. Dɩ́ maa wʋ́ taa zʋʋrɩ abam tee nɩ sɩ dɩ́ maama taa yɩ dwi dɩdʋa. 17 Abam nan na wʋ sɛ sɩ á goni á baara pənə, dɩbam wʋ́ ja dɩ́ nakɔ mʋ dɩ́ viiri abam tɩʋ kʋm nɩ.»
18 Ba taanɩ dɩm maa lamma dɩ paɩ Hamɔɔrɩ dɩ o bu Sishɛm. 19 Nɔn-dʋŋʋ kʋm daa wʋ jaanɩ taanɩ dɩm o jǝni. O bɩcarɩ maama nan na wʋ Zakɔbɩ bukɔ wʋm wʋnɩ tɩn, kʋ pɛ o kɩ kʋlʋ maama ba na brɩ-o sɩ o kɩ tɩn. O ko sɔŋɔ kʋm nɔɔna maama dɛɛn maa nɩg-o zanzan.
20 Hamɔɔrɩ dɩ o bu Sishɛm laan ma nuŋi ba vu tɩʋ kʋm manco-pɩɩna ni nɩ, sɩ ba ŋɔɔnɩ dɩ ba tɩʋ kʋm baara bam. 21 Ba ma ta dɩ ba ba wɩ: «Nɔɔna bantʋ yǝni ba kɩ dɩbam lanyɩranɩ. Nan sɛ-na sɩ dɩ́ pa-ba pwələ sɩ ba taa zʋʋrɩ dɩbam tɩʋ kʋm nɩ. Ba ta wʋ́ wanɩ ba taa beerǝ ba kɩ pipiu yo seeni. Dɩbam tɩga kam daga sɩ ka yi bantʋ dɩ jǝŋǝ. Dɩ́ maa wʋ́ wanɩ dɩ́ di ba bukwa yɩ dɩ́ kwe dɩbam dɩ bukwa dɩ́ ye-ba. 22 Woŋo dɩdʋa mʋ daarɩ sɩ dɩ́ kɩ dɩ́ pa nɔɔna bam, sɩ ba laan sɛ ba taa zʋʋrɩ dɩdaanɩ dɩbam sɩ dɩ́ taa yɩ dwi dɩdʋa. Ba lagɩ sɩ dɩbam baara maama dɩ goni dɩ́ pənə nɩnɛɛnɩ bantʋ tɩtɩ na kɩ te tɩn. 23 Kʋ nan na kɩ kʋntʋ, ba naanɩ, dɩ ba jɩjɩgɩrʋ, dɩdaanɩ ba vara maama laan bá taa yɩ dɩbam nyɩm mʋ na? Kʋntʋ, pa-na sɩ dɩ́ sɛ ba bʋbʋŋɩ dɩm, sɩ ba taa zʋʋrɩ dɩdaanɩ dɩbam.»
24 Baara balʋ maama na nuŋi tɩʋ kʋm manco-pɩɩna yam ni tɩn ma sɛ Hamɔɔrɩ dɩ o bu Sishɛm taanɩ dɩm. Tɩʋ kʋm baara bam maama ma goni ba pənə. 25 Ba na goni ba pənə yam yɩ da yatɔ yi tɩn, mʋ Zakɔbɩ bu-baara bale, Simeyon dɩdaanɩ Levi, zaŋɩ ba nuŋi ba vu Sishɛm tɩʋ kʋm. Tɩʋ kʋm baara bam ta wʋ ba pənə gonim zʋnnɩ dɩm wʋnɩ mʋ. Kantʋ maŋa nɩ tɩm nɔɔn-nɔɔnʋ ba tigə o liə kʋnkʋlʋ. Dina nabwa bale bam ma kwe ba sʋ-lwaanʋ ba zaŋɩ tɩʋ kʋm baara bam baŋa nɩ ba gʋ ba maama. 26 Ba dɛɛn mɛ ba sʋ-lwaanʋ ba zɔ Hamɔɔrɩ dɩ o bu Sishɛm ba gʋ, yɩ ba daarɩ ba ja Dina Sishɛm sɔŋɔ kʋm nɩ ba ja nuŋi ba viiri. 27 Zakɔbɩ bu-baara badaara dɩ ma zʋ tɩʋ kʋm wʋ ba tɔgɩ twa bam baŋa nɩ ba ŋɔ tɩʋ kʋm zɩla yam maama, sɩ ba ma ŋwɩ ba nakɔ wʋm cavɩɩra yam jɩnɩ. 28 Ba ma ja tɩʋ kʋm peeni, dɩ bʋnɩ, dɩ ba naanɩ, dɩdaanɩ ba bɩnɛ maama mʋ ba ja viiri. Ba ta ma vrɩ wǝǝnu tɩlʋ maama na wʋ tɩʋ kʋm wʋnɩ tɩn dɩdaanɩ kʋlʋ maama na wʋ pooni yigə nɩ tɩn. 29 Ba ma pɛ tɩʋ kʋm jɩjɩgɩrʋ tɩm maama, kʋ wǝli dɩ ba kaana dɩ ba biə bam maama ba ja viiri. Ba dɛɛn ta na nɛ kʋlʋ maama sam dɩm nɩ tɩn, mʋ ba lugi ba ja viiri.
30 Zakɔbɩ dɛɛn ma da kʋ ŋwaanɩ o ta taanɩ dɩntʋ o brɩ Simeyon dɩdaanɩ Levi o wɩ: «Abam jaanɩ lɛɛrʋ á ba amʋ yuu nɩ! Á pɛ amʋ kǝm maama laan lwe mʋ Kaanan tiinə bam, dɩ Perezi tiinə bam, dɩdaanɩ nɔɔna balʋ maama na zʋʋrɩ lʋgʋ kʋntʋ nɩ tɩn mʋmwa nɩ. Abam ye nɩ dɩbam kɔgɔ kʋm ba daga. Lʋgʋ kʋm tiinə na kɩ ni daanɩ, ba laan wʋ́ zaŋɩ amʋ dɩdaanɩ a sɔŋɔ kʋm maama baŋa nɩ ba cɔgɩ dɩbam maama.»
31 Ba dɩ ma ləri ba wɩ: «Kʋ nan ya maŋɩ sɩ nɔɔnʋ wʋntʋ ma dɩbam nakɔ wʋm o ma o ji ka-boro sɩ o kɩ kʋlʋ o na kɩ-o tɩn na?»