Zakɔbɩ dɩ o zɩmbaarʋ Esayu jeeri-da yɩ ba fɔgɩ daanɩ
33
Zakɔbɩ ma kwǝni o yuu o na Esayu na maa bɩɩnɩ sɩ o jeer-o, o dɩ o baara biə-yana bam (400). Zakɔbɩ ma pɔɔrɩ pɔɔrɩ o biə bam o pa Lea, dɩ Rasɛɛlɩ dɩdaanɩ o tɩntʋŋ-kaana bale bam. 2 O pɛ o tɩntʋŋ-kaana bale bam dɩ ba biə mʋ wʋ yigə nɩ. Lea dɩdaanɩ o dɩ biə bam ma saŋɩ, yɩ Rasɛɛlɩ dɩdaanɩ o bu Zʋzɛfʋ maŋɩ kwaga nɩ. 3 Zakɔbɩ tɩtɩ ma da yigə sɩ o vu o zɩmbaarʋ wʋm te. O na maa ve tɩn, o ma cɔɔlɩ o yuu tɩga nɩ kuni bɩrpɛ o jɔɔn‑o. 4 Esayu tɩtɩ nan duri lɩla mʋ o vu o yi Zakɔbɩ yɩra yɩ o daŋɩ o jɩa o ban nɩ o kukwǝr-o. Ba ma warɩ daanɩ dɩ sono yɩ ba tʋ kərə nɩ. 5 Esayu laan ma kwǝni o yuu wɛɛnɩ o na kaana bam dɩ biə bam maama. O ma bwe‑o o wɩ: «Sɩ bantʋ yɩ bra mʋ ba wʋ nmʋ tee nɩ tɩn?» Zakɔbɩ ma ləri o wɩ: «Amʋ tu, mʋ biə balʋ Wɛ na dɛ DƖ yu-yoŋo baŋa nɩ DƖ pa amʋ tɩn.» 6 Tɩntʋŋ-kaana bam laan ma titwəni ba yi, ba dɩ ba biə, ba kuni doonə tɩga nɩ. 7 Lea dɩ o biə bam dɩ daa ma ba, ba kuni doonə o yigə nɩ. Zʋzɛfʋ dɩ Rasɛɛlɩ dɩ laan ma ba ba kweeli, yɩ ba dɩ kuni doonə o yigə nɩ.8 Esayu ma bwe o wɩ: «Sɩ vara balʋ maama amʋ na jeeri cwǝŋǝ nɩ tɩn brɩ bɛɛ mʋ?» O ma ləri o wɩ: «Amʋ tu, kʋ maama maŋɩ sɩ kʋ pa a tɩtʋŋa yam su nmʋ yi mʋ.» 9 Esayu ma ta o wɩ: «A nyaanɩ, amʋ maŋɩ a jɩgɩ zanzan mʋ. Nmʋ dɩ ta n jɩgɩ n wǝǝnu.» 10 Zakɔbɩ maa wɩ: «A loori-m, nmʋ yi na su amʋ, sɩ n sɛ n joŋi pɛɛrɩ dɩntʋ amʋ tee nɩ. A na nɛ nmʋ yibiyə tɩn, kʋ nyɩ dɩ a nɛ Wɛ yibiyə mʋ, kʋ fɔgɩ kʋ wǝli dɩ nmʋ na jeeri amʋ dɩ wʋpolo te tɩn. 11 Nan kwaanɩ sɩ n joŋi pɛɛra yalʋ ba na jaanɩ ba ba pa‑m tɩn, bɛŋwaanɩ Wɛ tiini DƖ kɩ yu-yoŋo a baŋa nɩ yɩ a jɩgɩ kʋlʋ maama a na lagɩ tɩn.» Zakɔbɩ na tiini o fɩn tɩn, Esayu ma sɛ o joŋi pɛɛra yam.
12 Esayu laan ma ta o wɩ: «Nan ve sɩ dɩ́ kɛ. Amʋ wʋ́ kogili‑m cwǝŋǝ kam yuu nɩ.» 13 Zakɔbɩ ma ta dɩd-o o wɩ: «Amʋ tu, nmʋ ye nɩ biə bam ba jɩgɩ dam, yɩ a ta maŋɩ sɩ a taa nii peeni sɩm dɩ naanɩ dɩm baŋa nɩ mʋ, ba na jɩgɩ biə ba ta ŋɔŋɩ tɩn ŋwaanɩ. A na lagɩ sɩ a tiini a kalɩ vara bam kʋntʋ dɛ dɩdwɩ wʋnɩ, ba maama wʋ́ tɩ mʋ. 14 Kʋntʋ tɩn, amʋ tu, nmʋ da yigə n ta n veǝ, sɩ amʋ wʋ́ kalɩ vara bam a kɩ yigə nɩ a taa ve mɛ mɛ, yɩ biə bam dɩ tɔga. Amʋ laan wʋ́ ba a jeeri‑m Seyiri tɩʋ nɩ.»
15 Esayu ma ləri o wɩ: «Kʋ nan na yɩ kʋntʋ, yagɩ sɩ a pa a baara bam badonnǝ maŋɩ nmʋ tee nɩ ba taa tɔgɩ ba veǝ.» Zakɔbɩ ma ləri o wɩ: «Amʋ tu, bɛɛ mʋ yɩ n jɩgɩ n tɩtɩ n yaara? Nmʋ yi na su amʋ tɩtʋŋa yam tɩn, kʋ maŋɩ.»
16 Dɩntʋ dɛ dɩm nɩ mʋ Esayu joori o pipiri o maa ve Seyiri nɩ. 17 Zakɔbɩ dɩ dɛɛn ma vu Sukɔtɩ nɩ. O dɛɛn ma lɔ sɔŋɔ da, yɩ o daarɩ o te pwe sɩ o vara bam taa tigi da. Kʋntʋ ŋwaanɩ pa je sɩm kʋntʋ yɩrɩ yɩ Sukɔtɩ.a
18 Zakɔbɩ dɛɛn ya zɩgɩ Mezopotami nɩ yɩ o laan vu o yi Sishɛm. Tɩʋ kʋm kʋntʋ dɛɛn wʋ Kaanan nɩ mʋ.b O ma yi da dɩ yazurə yɩ o jǝni tɩʋ kʋm pooni yigə nɩ.c 19 O dɛɛn na cwi o vwə yam mɛ tɩn, o ma yəgi tɩga kam Hamɔɔrɩ biə bam tee nɩ. Sishɛm ko mʋ kʋntʋ. Tɩga kam jɩnɩ dɛɛn yɩ səbu-dala bi mʋ. 20 O dɛɛn ta ma lɔ bimbim je sɩm kʋntʋ nɩ sɩ o ma zuli Wɛ, yɩ o bəŋi dɩ yɩrɩ o wɩ: ‹Yisɩrayɛlɩ tiinə Wɛ dɩm mʋ yɩ Wɛ cɩga cɩga dɩm›.