Zakɔbɩ ti o yigə sɩ o jeeri Esayu
32
Tɩga na pʋʋrɩ zɩzɩŋa nɩ tɩn, Laban ma kukwəri o bukwa bam dɩ ba biə bam yɩ o kwe Wɛ zaanɩ o ma kɩ ba yu-yoŋo. O laan ma kɛ o joori sɔŋɔ. 2 Zakɔbɩ dɩ ma kwe o cwǝŋǝ o maa kɛa. Wɛ malɛsɩ ma ba sɩ jeer-o. 3 O dɩ na nɛ-sɩ tɩn, o maa wɩ: «Wɛ na te DƖ vwə dɩ DƖ kwaga tɔgɩna bam mɛ tɩn mʋ tɩntʋ!» O dɛɛn bəŋi jəgə kam yɩrɩ o wɩ: ‹Mahanayimi›.4 Zakɔbɩ ma pa nɔɔna ni sɩ ba da yigə ba vu o zɩmbaarʋ Esayu te Seyiri nɩ. Edɔm tɩʋ kʋm mʋ kʋntʋ. 5 O na lagɩ o toŋɩ-ba tɩn, o ma brɩ-ba o wɩ: «Á na wʋ́ ta kʋlʋ dɩdaanɩ amʋ tu Esayu tɩn mʋ tɩntʋ:
‹Nmʋ tɩntʋŋnʋ Zakɔbɩ wɩ: A dɛɛn zʋʋrɩ Laban tee nɩ mʋ kʋ dáanɩ sɩ kʋ ba kʋ yi zɩm. 6 A jɩgɩ naanɩ dɩ bɩnɛ dɩ peeni dɩ bʋnɩ, dɩdaanɩ gambɛ, baara dɩ kaana maama mʋ. Kʋntʋ ŋwaanɩ mʋ a tʋŋɩ kwǝrǝ kantʋ a pa‑m sɩ kʋ pa amʋ tɩtʋŋa yam su nmʋ yi.› »
7 Nɔɔna bam na veǝ yɩ ba joori Zakɔbɩ tee nɩ tɩn, ba ma ta ba wɩ: «Dɩ́ ve dɩ́ yi nmʋ zɩmbaarʋ Esayu te. O dɩ nan maa bɩɩnɩ nmʋ te mʋ sɩ o jeeri‑m, yɩ baara biə-yana wʋ o tee nɩ.» 8 Zakɔbɩ na ni kʋntʋ tɩn, fʋʋnɩ ma tiini dɩ ja-o yɩ o wʋ cɔgɩ. Kʋ ma pa o pɔɔrɩ nɔɔna balʋ na wʋ o tee nɩ tɩn kuni bɩle, kʋ wǝli dɩ o naanɩ dɩm, dɩ o peeni sɩm, dɩ o bʋnɩ dɩm, dɩdaanɩ o yogondə yam maama. 9 Bɛŋwaanɩ, o bʋŋɩ mʋ o wɩ: «Esayu na tu o yi kɔgɔ pɔɔrɩm dɩdʋa o wanɩ-ba, pɔɔrɩm wʋdoŋ kam wʋ́ duri ka lu.»
10 O laan ma loori Wɛ yɩ o wɩ: «Amʋ Tu Baŋa-Wɛ, dɩm na yɩ a kwə Abraham dɩ Yizakɩ Wɛ tɩn, nmʋ ya tagɩ dɩ amʋ n wɩ: ‹Joori n tɩʋ dɩ n cʋrrʋ tɩm tee nɩ, sɩ amʋ wʋ́ kɩ-m lanyɩranɩ.› 11 Tɔ. Amʋ yɩ nmʋ tɩntʋŋnʋ mʋ. A brɩ a wʋ maŋɩ sɩ nmʋ ya duri amʋ yibwənə yɩ n fɔgɩ n nii a baŋa nɩ lanyɩranɩ dɩ cɩga. Amʋ dɛɛn na bɛ Zʋrdɛn bugə kam a viiri tɩn, a ze a nacəgə yɩranɩ mʋ. A laan nan joori yɩ kɔgɔ pɔɔrɩm bɩle mʋ wʋ a tee nɩ, nɔɔna dɩ vara maama. 12 Joŋi-nɩ n yagɩ amʋ zɩmbaarʋ Esayu jɩŋa nɩ, sɩ amʋ kwarɩ fʋʋnɩ sɩ oó ba o ciŋi amʋ, dɩ kaana bam dɩdaanɩ biə bam maama. 13 Nmʋ nan maŋɩ n ta n wɩ: ‹A wʋ́ sɩɩnɩ a kɩ-m lanyɩranɩ. A ta wʋ́ pa n dwi dɩm taa puli zanzan nɩnɛɛnɩ nɩnɩʋ ni kasʋlʋ na daga te tɩn mʋ. Nɔɔn-nɔɔnʋ nan bá wanɩ o nii o ga o ti.› »a
14 Tɩtɩɩ dɩm kʋntʋ nɩ Zakɔbɩ ma maŋɩ da o pəni. Tɩga na pʋʋrɩ tɩn, o ma twǝri pɛɛra o jɩjɩgɩrʋ tɩm wʋnɩ, sɩ o pa o zɩmbaarʋ Esayu. 15 Pɛɛra yam mʋ tɩntʋ: Bʋ-niinə biə-yale dɩ bʋ-balɩ fiinle, dɩdaanɩ pi-niinə biə-yale dɩ pi-bɛ fiinle, 16 kʋ wǝli dɩ yogondə-niinə fiintɔ dɩ ya biə, dɩ na-niinə fiinna, dɩ nabɛ fugə, dɩdaanɩ bɩna-niinə fiinle, dɩ bɩna-bɛ fugə. 17 O ma pɔɔrɩ pɛɛra yam kʋntʋ maama kɔgɔ dɩ kɔgɔ o kɩ o tɩntʋŋna jɩŋa nɩ. O laan ma ta dɩ ba o wɩ: «Da-na yigə á taá veǝ sɩ a bɩɩnɩ. Za á pa-na sɩ pwələ taa wʋra vara bam kɔgɔ dɩdʋa dɩdʋa tɩtarɩ laŋa nɩ yɩ á yɩ taá twɛ daanɩ.» 18 O ma daarɩ o ta o brɩ wʋlʋ wʋm na tɔgɩ ba maama yigə tɩn o wɩ: «Amʋ zɩmbaarʋ Esayu na jeeri‑m yɩ o bwe o wɩ: ‹Nmʋ yɩ wɔɔ nɔɔnʋ mʋ? N nan maa n ve yən mʋ, yɩ wɔɔ mʋ te vara bantʋ maama nmʋ na jegɩ-ba n kalɩ tɩn?›, 19 sɩ nmʋ ta dɩd-o n wɩ: ‹Ba yɩ nmʋ nyaanɩ Zakɔbɩ nyɩm mʋ. Kʋ nan za yɩ pɛɛrɩ mʋ o na pɛ o tu Esayu. O tɩtɩ nan wʋ kwaga nɩ o bɩɩna.› »
20 Zakɔbɩ ta ma ta kʋntʋ doŋ o brɩ bale tu wʋm dɩ batɔ tu wʋm dɩdaanɩ balʋ daa ta na daarɩ yɩ ba tɔgɩ vara bam kwaga tɩn, yɩ o wɩ: «Abam dɩ na jeeri Esayu, á maŋɩ sɩ á ta kʋntʋ mʋ dɩdaan‑o. 21 Taá ye-na sɩ á za ta wɩ: ‹N nyaanɩ Zakɔbɩ wʋ kwaga nɩ o bɩɩna.› » Bɛŋwaanɩ, o dɛɛn bʋŋɩ o yuu nɩ mʋ o wɩ: «Esayu na nɛ pɛɛra yam a na pɛ ya tɔgɩ a yigə ya kɛ tɩn, kʋʋ́ wanɩ kʋ pa o bɩcarɩ zuri, sɩ amʋ laan na yi o te, dɛ dɩlʋ oó jeeri-nɩ lanyɩranɩ.» 22 Kʋntʋ tɩn, Zakɔbɩ pɛɛra yam ma loori yigə ya kɛ, yɩ o tɩtɩ maŋɩ jəgə kam nɩ o pəni sɩ tɩga ba ka pʋʋrɩ.
Zakɔbɩ jaŋɩ dɩdaanɩ Baŋa-Wɛ
23 Dɩntʋ tɩtɩɩ dɩm nɩ Zakɔbɩ laan ma zaŋɩ o ja o kaana bale bam, o wǝli dɩ o tɩntʋŋ-kaana bale bam dɩdaanɩ o biə fugə-dɩdʋa bam, yɩ ba tʋ Yabɔkɩ nɩnɩʋ kʋm ba bɛ. 24 O dɛɛn na jaanɩ-ba o pa ba bɛ kʋntʋ tɩn, o ma daarɩ o pa o jɩjɩgɩrʋ tɩm maama dɩ tɔgɩ tɩ bɛ. 25 Zakɔbɩ tɩtɩ ma maŋɩ dáanɩ o yɩranɩ. Nɔɔnʋ wʋdoŋ ma ba o zʋ jaŋa dɩd-o taan, sɩ tɩga laan ba ka pʋʋrɩ. 26 Nɔɔnʋ wʋm na tu o maanɩ nɩ o war‑o sɩ o ja o dɩ tɩga nɩ tɩn, o ma dwe Zakɔbɩ tikəri kwi sɩm na jeeri daanɩ mɛ tɩn. Kʋ na kɩ kʋntʋ tɩn, kʋ dɛɛn pɛ o tikəri mʋ ywəri, o dɩ nɔɔnʋ wʋm jaŋa kam ŋwaanɩ.
27 Nɔɔnʋ wʋm laan ma ta o wɩ: «Yagɩ-nɩ sɩ a viiri, sɩ tɩga lagɩ ka pʋʋrɩ mʋ.» Zakɔbɩ dɩ ma ləri o wɩ: «Nmʋ na wʋ sɔɔlɩ Wɛ yu-yoŋo n yagɩ amʋ yuu nɩ, amʋ bá sɛ a yagɩ‑m sɩ n viiri!» 28 Nɔɔnʋ wʋm ma bwe‑o o wɩ: «Nmʋ yɩrɩ mʋ bɛ?» O ma ləri o wɩ: «A yɩrɩ mʋ Zakɔbɩ.» 29 Nɔɔnʋ wʋm laan maa wɩ: «Nmʋ yɩrɩ daa bá taa yɩ Zakɔbɩ, n yɩrɩ laan wʋ́ taa yɩ Yisɩrayɛlɩ mʋ, bɛŋwaanɩ nmʋ jaŋɩ jaŋa dɩ Wɛ, yɩ n ta jaŋɩ dɩdaanɩ nabiinǝ.b Nmʋ nan wanɩ.»
30 Zakɔbɩ laan ma ta o wɩ: «A loori-m, ta nmʋ yɩrɩ n brɩ-nɩ.» O ma ləri o wɩ: «Bɛŋwaanɩ mʋ yɩ n bwe amʋ yɩrɩ bwiə?»c O laan ma zɩgɩ da o kwe Wɛ zaanɩ o ma kɩ Zakɔbɩ yu-yoŋo. 31 Zakɔbɩ ma bəŋi je sɩm kʋntʋ yɩrɩ o wɩ: ‹Peniɛlɩ›, yɩ o wɩ: «Amʋ nɛ Wɛ yibiyə dɩdaanɩ dɩa yi yɩ DƖ duri amʋ yibwənə pa a wʋ tɩgɩ.»d
32 Wɛ puli mʋ dɩ maa diini wɛyuu yɩ Zakɔbɩ zɩgɩ Peniɛlɩ nɩ o maa kɛa. O ma veǝ yɩ o duǝ, o tikəri dɩm na ywəri tɩn ŋwaanɩ.
33 Dɩ zɩm maama, Yisɩrayɛlɩ tiinə bam ba sɛ ba di ŋɔŋɔ kʋlʋ na toŋi tikəri kwi sɩm tɩn. Kʋ maa yɩ nɔɔnʋ wʋm dɛɛn na dwei Zakɔbɩ tikəri dɩm kantʋ jəgə kam seeni tɩn ŋwaanɩ mʋ.