Abraham dɩ o kaanɩ Ketura biə
25
Abraham daa ma di kaanɩ wʋdoŋ, o yɩrɩ na yɩ Ketura tɩn.a 2 Wʋntʋ dɩ ma lʋ biə o pa-o: Zimran, dɩ Yoksan, dɩ Medan, dɩ Madɩan, dɩ Yisbakɩ, dɩdaanɩ Suha. 3 Yoksan dɛɛn mʋ yɩ Saba dɩ Dedan ko. Dedan dwi dɩm mʋ yɩ Asuuri tiinə bam, dɩ Letusi tiinə bam, dɩ Leomi tiinə bam. 4 Madɩan dɩ bu-baara bam mʋ tɩntʋ: Efa, dɩ Efɛrɩ, dɩ Henɔkɩ, dɩ Abida, dɩ Ɛldaa. Bantʋ maama dɛɛn yɩ Ketura dwi mʋ.5 Abraham ma kwe o na jɩgɩ woŋo kʋlʋ maama tɩn o tiŋi o pa Yizakɩ. 6 Kʋ daarɩ, o kaana babam biə bam mʋ o lɩ pɛɛra o pa-ba yɩ o daa ta ŋwɩ. O ma daarɩ o pwɛ-ba o pa ba yɔɔrɩ ba vu wa-puli seeni yɩ ba daarɩ o bu Yizakɩ.
Abraham tʋʋnɩ
7 Abraham bɩna yam maama dɛɛn yi bi dɩdaanɩ fusɩrpɛ-yanu (175), 8 yɩ o laan ba o tɩ. O nɛ ywǝǝni dɩ mʋmwɛ-dɛɛrɩ lʋgʋ baŋa nɩ mʋ yɩ o laan ba o tɩ o kʋkwɩɩrʋ maŋa nɩ. 9 O biə Yizakɩ dɩdaanɩ Ismayɛlɩ ma ja‑o ba kɩ Makpela gugoro dɩm nɩ, dɩ na bwələ dɩ Mamre tɩn,b tɩga kalʋ dɛɛn ya yɩ Hɛtɩ tu Tɩsoharɩ bu Efrɔn nyɩm mʋ, 10 yɩ Abraham yəgi-ka Hɛtɩ tiinə bam tee nɩ. Ba dɛɛn kɩ-o mɛ ba na kɩ Sara tɩn mʋ. 11 Abraham tʋʋnɩ dɩm kwaga nɩ, mʋ Wɛ kɩ Yizakɩ yu-yoŋo. Ka maŋa nɩ o dɛɛn zʋʋrɩ Layi-Royi vʋlɩ dɩm je sɩm nɩ mʋ.
Ismayɛlɩ dwi dɩm na toŋi te tɩnc
12 Ismayɛlɩ dɩ o dwi dɩm yɩra taanɩ mʋ tɩntʋ. Sara tɩntʋŋ-kana Agaarɩ na yɩ Ezipi tu tɩn dɩ Abraham mʋ lʋgɩ Ismayɛlɩ. 13 Ismayɛlɩ bu-baara bam yɩra mʋ tɩntʋ, ya pʋpʋnɩ ya maŋɩ dɩ ba lʋra kam na yɩ te tɩn mʋ: Nebayɔtɩ mʋ dɛɛn yɩ o bu-kwɩa, kʋ wǝli dɩ Kedarɩ, dɩ Adɩbeyɛlɩ, dɩ Mibsan, 14 dɩ Misma, dɩ Duma, dɩ Masa, 15 dɩ Adadɩ, dɩ Tema, dɩ Yeturi, dɩ Nafisi dɩdaanɩ Kɛdɩma. 16 Ismayɛlɩ biə fugǝ-bale bam mʋ kʋntʋ. Ba dɩdʋa dɩdʋa dɛɛn ma ji ba dwi tiinə nabaarʋ. Mʋ ba yɩra yam mʋ kʋntʋ, nɔɔnʋ maama, dɩ o nawuuri, dɩ o tɩʋ.
17 Ismayɛlɩ bɩna yam maama yi bi dɩdaanɩ fiintɔ-yarpɛ (137) yɩ o laan ba o tɩ. 18 O dwi dɩm ma vu ba jǝni tɩga kalʋ na zɩgɩ Avila dɩ Suuri tɩtarɩ laŋa nɩ tɩn. Je sɩm kʋntʋ yɔɔrɩ kʋ wʋ Ezipi sisəm ni nɩ sɩ kʋ taa ve Asiiri seeni tɩn mʋ. Maŋa maama ba dɛɛn jɩgɩ nakɔɔrɩ mʋ ba kɩ dɩ ba cʋrrʋ tɩm.
Zakɔbɩ dɩdaanɩ Esayu taanɩ
19 Abraham bu Yizakɩ dɩ o dwi dɩm yɩra taanɩ mʋ tɩntʋ. Abraham dɛɛn mʋ yɩ Yizakɩ ko. 20 Yizakɩ dɛɛn jɩgɩ bɩna fiinna mʋ yɩ o di Betuɛlɩ bukɔ Rebeka o ma kɩ o kaanɩ. Betuɛlɩ maa yɩ Aram tu yɩ o zʋʋrɩ Mezopotami nɩ. Rebeka maa yɩ Laban nakɔ.
21 Rebeka dɛɛn na yɩ ka-dʋgʋ tɩn, Yizakɩ ma loori Baŋa-Wɛ sɩ o kaanɩ wʋm lʋ bu.d Baŋa-Wɛ ma sɛ o wɛ-loro kʋm, yɩ o kaanɩ Rebeka ja pugə.e 22 Biə bam ma yigi daanɩ o pugə kam nɩ. O dɛɛn maa wɩ: «Bɛŋwaanɩ mʋ kʋ yɩ tɩntʋ amʋ yɩra yam nɩ?» Kʋ ma pa o vu Baŋa-Wɛ yigə o bwe‑DƖ sɩ o lwarɩ kʋ kuri. 23 Baŋa-Wɛ maa wɩ:
«Dwiə yale mʋ wʋ nmʋ pugə kam wʋnɩ.
Nmʋ wʋ́ lʋ dwi dwi kuni bɩle,
yɩ ba wʋ́ ba ba pwɛ cwe.
Dwi dɩdʋa wʋ́ taa damma dɩ dwe dɩdoŋ dɩm,
zɩmbaarʋ wʋm mʋ wʋ́ taa tʋŋɩ o pa o nyaanɩ wʋm.»f
24 Maŋa kam ma yi sɩ o lʋ. O dɛɛn ma sɩɩnɩ o lʋ yiywa, bəkəri yɩranɩ. 25 Wʋlʋ na dɛ yigə sɩ o nuŋi pooni tɩn maa yɩ nasʋŋʋ, yɩ o yɩra yam maama yɩ kʋrʋ yɩranɩ. Kʋ ma pa ba bəŋi wʋntʋ yɩrɩ wɩ: ‹Esayu›.g 26 Kʋntʋ kwaga nɩ mʋ o nyaanɩ wʋm dɩ saŋɩ o nuŋi pooni, yɩ o jɩŋa ja Esayu nakilə. Kʋ ma pa ba pa wʋntʋ yɩrɩ ba wɩ: ‹Zakɔbɩ›.h Yizakɩ dɛɛn jɩgɩ bɩna fusɩrdʋ mʋ yɩ Rebeka lʋ-ba.
27 Biə bam dɛɛn ma ba ba kɩ nɔɔna. Esayu ma ji tɔɔrʋ wʋlʋ na tiini o waɩ o tɔɔra. O maa yǝni o soe o wʋ gaa nɩ mʋ maŋa maama. Zakɔbɩ dɛɛn maa yɩ cɩmm. O maa soe sɩ o taa wʋ sɔŋɔ nɩ maŋa maama. 28 Yizakɩ dɛɛn maa soe Esayu, Esayu na jaanɩ ga-vara nwana yam o tui o pa‑o tɩn ŋwaanɩ. Rebeka dɩ dɛɛn maa soe Zakɔbɩ.
29 Dɛ dɩdwɩ mʋ Zakɔbɩ wʋra o saŋɩ wʋdiu. Esayu ma zɩgɩ gaa nɩ o joori sɔŋɔ yɩ kana tiini ka cɛ-o, o kwəri o bwəm. 30 O ma ta dɩ Zakɔbɩ o wɩ: «Nan kɩ n so-sɩna kapwəənu tɩm n pa-nɩ sɩ a di! Bɛŋwaanɩ, a wʋra a tʋa mʋ dɩ kana!» Dwə bam na sɩɩnɩ tɩn ŋwaanɩ mʋ ba dɛɛn bǝ-o nɩ ‹Edɔm›.i
31 Zakɔbɩ ma ləri o wɩ: «Nan sɛ sɩ n da yigə n yəgi n nakwɩɩm dɩm n pa-nɩ, sɩ n laan daarɩ.» 32 Esayu ma ləri o wɩ: «Nii yo, amʋ laan gɛ fɩɩn mʋ sɩ a tɩ! A na yɩ bu-kwɩan tɩn, kʋ laan jɩgɩ bɛ nyɔɔrɩ kʋ pa-nɩ?» 33 Zakɔbɩ ma ləri o wɩ: «Nan da yigə n du durə sɩ n daarɩ.» O dɩ ma du durə o pa‑o, o kwe o nakwɩɩm dɩm o yagɩ o pa Zakɔbɩ.j
34 Zakɔbɩ laan ma kwe dɩpɛ dɩdaanɩ so-sɩna kapwəənu tɩm o pa Esayu. O ma di yɩ o daarɩ o nyɔ. O laan ma zaŋɩ wɛɛnɩ o maa kɛa. Kʋ dɛɛn tɔgɩ cwǝŋǝ kam kʋntʋ mʋ yɩ Esayu nii o nakwɩ nyɔɔrɩ dɩm o gooni-dɩ tɩn.