Abraham dɩ Abimelɛkɩ taanɩ
20
Abraham ma zaŋɩ o kwe cwǝŋǝ o maa ve Negɛbɩ kagʋa kam seeni. O laan vu o zʋʋrɩ Kadɛsɩ dɩdaanɩ Suuri tɩtarɩ laŋa nɩ. O ma daarɩ o vu o jǝni Gerarɩ nɩ.2 O na wʋra tɩn mʋ Abraham tagɩ o kaanɩ Sara taanɩ o wɩ, o yɩ o nakɔ.a Gerarɩ tɩʋ kʋm pɛ Abimelɛkɩ ma tʋŋɩ Sara kwaga nɩ yɩ o joŋ-o sɩ o ma o kɩ o kaanɩ. 3 Tɩtɩɩ nɩ Baŋa-Wɛ ma ba Abimelɛkɩ te dɩndwɩa wʋnɩ DƖ ta dɩd-o DƖ wɩ: «Nmʋ yɩ tʋ mʋ, kaanɩ wʋm n na kwe tɩn na yɩ nɔɔnʋ kaanɩ tɩn ŋwaanɩ.»
4 Abimelɛkɩ ya daa ta wʋ dwe‑o. Kʋntʋ tɩn, o laan maa wɩ: «Amʋ Yuutu, a wʋ kɩ kʋlʋkʋlʋ a cɔgɩ. Nmʋ wʋ́ sɛ n cɔgɩ nɔɔna balʋ na wʋ kɩ wo-lɔŋɔ tɩn na? 5 Abraham mʋ tagɩ nɩ kaanɩ wʋm yɩ o nakɔ mʋ, yɩ kaanɩ wʋm dɩ ma ta nɩ o yɩ wʋm nabɔ. Amʋ kɩ tɩntʋ dɩ a wʋ-poŋo mʋ, a jɩa ba jɩgɩ digru.»
6 Wɛ daa ta ma ŋɔɔnɩ dɩd-o dɩndwɩa yam wʋnɩ DƖ wɩ: «Kʋ yɩ cɩga. A ye sɩ n na tʋŋɩ te maama tɩn, n kɩ dɩdaanɩ wʋbʋŋ-laarʋ. Kʋntʋ ŋwaanɩ amʋ cɩgɩ-m sɩ nmʋ yɩ kɩ lwarɩm n cɔgɩ amʋ yigə mʋ yɩ a wʋ pɛ‑m cwǝŋǝ sɩ n dwe‑o. 7 Kʋntʋ ŋwaanɩ, joori n pa baarʋ wʋm o kaanɩ wʋm. O yɩ amʋ nijoŋnu mʋ, kʋntʋ oó loori amʋ o pa‑m sɩ n ta n ŋwɩ. Kʋ daarɩ, n na wʋ kɩ kʋntʋ, nmʋ wʋ́ sɩɩnɩ n tɩ, dɩ n nɔɔna maama.»
8 Tɩga na pʋʋrɩ tɩn, Abimelɛkɩ ma goni tɩga o bəŋi o tɩntʋŋna bam maama, yɩ o daarɩ o lwǝni kʋlʋ maama na kɩ tɩn o brɩ-ba. Ba na ni tɩn, fʋʋnɩ ma tiini dɩ ja-ba. 9 Abimelɛkɩ ma bəŋi Abraham o pa o zʋ ba te yɩ o wɩ: «Bɛŋwaanɩ mʋ nmʋ kɩ dɩbam kʋntʋ? Bɛ lwarɩm mʋ a kɩ-m yɩ nmʋ laan ja cɔgɩm n ba amʋ dɩ a tɩʋ kʋm baŋa nɩ? Nmʋ na kɩ amʋ te tɩn yɩ woŋo kʋlʋ na wʋ maŋɩ sɩ ba kɩ tɩn mʋ.» 10 O ta ma bwe Abraham o wɩ: «Bɛɛ mʋ pɛ n kɩ kʋntʋ?»
11 Abraham laan ma ləri o wɩ: «Amʋ ya bʋŋɩ sɩ, nɔɔn-nɔɔnʋ ba kwarɩ Wɛ je sɩntʋ nɩ, yɩ baá wanɩ ba gʋ-nɩ, a kaanɩ wʋm ŋwaanɩ. 12 Kʋlʋ na wəli da tɩn, o sɩɩnɩ o yɩ a nakɔ mʋ. Dɩ́ daɩ nu daanɩ mʋ sɩ o yɩ a ko wʋm bukɔ mʋ, yɩ o laan ji amʋ kaanɩ. 13 Maŋa kalʋ Wɛ na pɛ a nuŋi a ko sɔŋɔ kʋm nɩ yɩ a kaagɩ a beeri tɩn, mʋ a tagɩ dɩd-o a wɩ: ‹Sara, kɩ tɩntʋ sɩ n brɩ nɩ n soe amʋ: Mɛ maama dɩbam na ve dɩ́ yi, sɩ nmʋ ta nɩ, a yɩ n nabɔ mʋ.› »
14 Abimelɛkɩ laan ma ja peeni dɩ naanɩ dɩdaanɩ gambɛ, baara dɩ kaana maama, o ja o nuŋi o pa Abraham. O ta ma kwe Abraham kaanɩ Sara o joori o pa‑o. 15 Abimelɛkɩ maa wɩ: «Amʋ tɩga kam mʋ tɩntʋ, nmʋ yigə nɩ. Tan zʋʋrɩ jəgə kalʋ n na lagɩ tɩn.» 16 O ma daarɩ o ta dɩ Sara o wɩ: «Nii, səbu-dala mʋrʋ mʋ a pɛ n nabɔ wʋm. Kʋʋ́ taa yɩ maana kʋ pa balʋ maama na wʋ n tee nɩ tɩn sɩ kʋ brɩ nɩ n jɩgɩ bʋra. Nmʋ wʋ kɩ kʋlʋkʋlʋ n cɔgɩ.»