Ba na cɔgɩ Sodɔm dɩ Gomɔrɩ te tɩn
19
Malɛsɩ sɩle sɩlʋ na jeeri Abraham tɩn dɛɛn ma ba ba yi Sodɔm dɩdaan-ni nɩ, yɩ Lɔtɩ dɛɛn je tɩʋ kʋm manco-pɩɩna ni nɩ. O na nɛ-ba tɩn, o ma zaŋɩ wɛɛnɩ o vu sɩ o jeeri-ba yɩ o cɔɔlɩ o yibiyə tɩga nɩ o warɩ-ba. 2 O maa wɩ: «A loori abam! Amʋ tiinə bam, pa-na sɩ a ja abam a yi sɔŋɔ, sɩ á kɩ á yɩra á daarɩ á pəni sɩ tɩga pʋʋrɩ sɩ á laan goni tɩga á vu á na maa ve mɛ tɩn.» Ba ma ləri ba wɩ: «Awo, dɩbam lagɩ dɩ́ pəni tɩʋ kʋm pwələ kantʋ nɩ mʋ.»3 O dɛɛn na tiini o fɩn-ba tɩn ŋwaanɩ, ba ma tɔgɩ dɩd-o ba zʋ o sɔŋɔ kʋm wʋ. O ma kɩ wʋdiu dɩ dɩpɛ dɩlʋ na ba jɩgɩ dabɩlɩ dɩ wʋnɩ tɩn o pa-ba yɩ ba di. 4 Ba na wʋra ba ti ba yigə sɩ ba pəni tɩn, mʋ Sodɔm tɩʋ kʋm baara bam maama nuŋi tɩʋ kʋm je maama ba ba ba gilimi sɔŋɔ kʋm, nankwɩn dɩdaanɩ nɔɔn-dʋnnʋ maama. 5 Ba ma bəŋi Lɔtɩ yɩ ba wɩ: «Nɔɔna balʋ na tu ba zʋ nmʋ sɔŋɔ nɩ tɩtɩɩ dɩntʋ tɩn bɛ? Ja-ba n ja n nuŋi yo n pa dɩbam sɩ dɩ́ lagɩ-ba mʋ.»
6 Lɔtɩ ma nuŋi pooni sɩ o jeeri tɩʋ kʋm nɔɔna bam yɩ o daarɩ o pɩ boro kʋm. 7 O maa wɩ: «Amʋ donnǝ bam, a loori abam sɩ á yɩ kɩ tɩtʋŋ-lɔŋɔ kʋntʋ doŋ. 8 Cəgi-na yo, amʋ jɩgɩ bukwa bale balʋ ta na yǝri baara tɩn. Yagɩ-na sɩ a ja-ba a ba a pa abam, sɩ á kɩ á na lagɩ te tɩn dɩ ba. Kʋ na yɩ nɔɔna bantʋ, yɩ kɩ-na-ba kʋnkʋlʋ, bɛŋwaanɩ ba tu ba zʋ amʋ woro kuri nɩ mʋ.»
9 Ba ma bagɩ Lɔtɩ ba wɩ: «Kɩ dáa nɩ!» Ba daa ta ma ta daanɩ ba wɩ: «Nɔɔnʋ wʋntʋ yɩ vəru mʋ dɩ́ tɩʋ kʋm nɩ. Bɛɛ mʋ yɩ o lagɩ sɩ o brɩ dɩbam dɩ́ na wʋ́ kɩ kʋlʋ tɩn?» Ba laan ma ta dɩ Lɔtɩ ba wɩ: «Dɩ́ nan wʋ́ kɩ nmʋ dɩ́ dwǝni dɩ́ na wʋ́ kɩ bantʋ te tɩn.» Ba ma tiini ba pɩɩnɩ Lɔtɩ yɩ ba laan fʋfɔ ba twɛ o sɔŋɔ ni dɩm sɩ ba bwəri boro kʋm ba zʋ digə kam wʋnɩ.
10 Nɔɔna bale bam ma zɩgɩ digə kam wʋnɩ ba pʋrɩ boro kʋm yɩ ba laan vaŋɩ Lɔtɩ ba zʋ digə kam nɩ. Ba ma daarɩ ba pɩ boro kʋm. 11 Ba laan ma pa nɔɔna balʋ maama ya na zɩgɩ mancoŋo kʋm ni nɩ tɩn yiə dwe, bu yoo, nankwɩan yoo, ba maama. Ba maa taanɩ taanɩ ba yaarɩ taan ba ga mancoŋo kʋm ni jəgə sɩ ba pʋrɩ. 12 Nɔɔna bale bam ma ta dɩ Lɔtɩ ba wɩ: «Nmʋ ta jɩgɩ nɔɔna tɩʋ kʋntʋ wʋnɩ na? Nɩnɛɛnɩ n tɩmbaara, dɩ n bu-baara, dɩ n bukwa, dɩ wʋlʋ maama na yɩ nmʋ cʋrʋ tɩn sɩ n ja-ba sɩ á nuŋi jəgə kantʋ nɩ! 13 Bɛŋwaanɩ dɩ́ lagɩ dɩ́ cɔgɩ tɩʋ kʋm mʋ. Nɔɔna tiini ba keeri Baŋa-Wɛ yigə nɩ sɩ kʋ gaalɩ, tɩʋ kʋm nɔɔn-biə bam kənə ŋwaanɩ. DƖ ma tʋŋɩ dɩbam sɩ dɩ́ ba dɩ́ cɔgɩ-kʋ.»
14 Lɔtɩ maa nuŋi sɩ o ŋɔɔnɩ dɩ o bukwa banna na di o bukwa tɩm. O maa ta-ba o wɩ: «Kɩ-na lɩla á nuŋi dáa je sɩntʋ nɩ, bɛŋwaanɩ Baŋa-Wɛ lagɩ DƖ cɔgɩ tɩʋ kʋntʋ mʋ!» O tɩmbaara bam nan bʋŋɩ sɩ o ŋɔɔnɩ o kwɛɛrɩ mʋ.
15 Tɩ-pʋra ni nɩ, malɛsɩ sɩm ma ta dɩ Lɔtɩ ba wɩ: «Kɩ lɩla! Ja n kaanɩ wʋm dɩ n bukwa bale sɩ á nuŋi da yo seeni! Kʋ na daɩ kʋntʋ, Baŋa-Wɛ na yaarɩ tɩʋ kʋm, abam dɩ wʋ́ da á na cɔgɩm.» 16 Ba na tagɩ kʋntʋ yɩ Lɔtɩ ta zɩgɩ o daana tɩn, mʋ ba caalɩ o jɩŋa, dɩ o kaanɩ wʋm dɩdaanɩ o bukwa bale bam jɩa ba ja ba nuŋi tɩʋ kʋm daa nɩ sɩ ba wanɩ ba lu, Baŋa-Wɛ dɛɛn na duri ba ŋwaŋa tɩn ŋwaanɩ. 17 Malɛsɩ sɩm na jaanɩ-ba sɩ nuŋi sɩ ti tɩn mʋ sɩ dɩdʋa tagɩ dɩ wɩ: «Duri-na sɩ á lu cɔgɩm! Yɩ nii-na á kwaga nɩ, á nan yɩ zɩgɩ-na je je nɩ bolo kʋm wʋnɩ! Duri-na á yi pweeru tɩm je sɩm sɩ abam yɩ da á na cɔgɩm!»
18 Lɔtɩ ma ta o wɩ: «Awo! Amʋ Yuutu, a bá wanɩ! 19 Nmʋ maŋɩ n kɩ amʋ lanyɩranɩ yɩ n duri a ŋwaŋa pa a joŋi a ŋwɩa. A bá wanɩ a duri a yi pweeru tɩm je sɩm. Amʋ ta na wʋ cwǝŋǝ nɩ, cɔgɩm dɩntʋ wʋ́ yi amʋ, sɩ a tɩ. 20 Nan nii tɩʋ kʋdoŋ mʋ tɩntʋ bwələ bwələ a na wʋ́ wanɩ a duri a yi da. Kʋ maa yɩ tʋ-balaŋa mʋ. Pa-nɩ pwələ sɩ a duri a vu dáanɩ tʋ-balaŋa kʋntʋ, sɩ kʋntʋ mʋ a wʋ́ lu.»
21 O ma ta dɩd-o o wɩ: «Amʋ sɛ sɩ a kɩ kʋntʋ dɩ a pa‑m. A bá cɔgɩ tɩʋ kʋm kʋntʋ. 22 Nan kɩ lɩla n duri n vu n yi da, bɛŋwaanɩ amʋ bá wanɩ a kɩ kʋlʋkʋlʋ yɩ nmʋ wʋ yi da.» Kʋntʋ ŋwaanɩ mʋ ba pɛ tɩʋ kʋm kʋntʋ yɩrɩ ba bəi Soarɩ. a
23 Lɔtɩ dɛɛn ma vu o yi Soarɩ dɩdaanɩ wɛ maŋɩ dɩ puli mʋ. 24 Baŋa-Wɛ laan ma pa ciribi na jigɩ mim tɩn nuŋi wɛyuu nɩ kʋ tʋ Sodɔm dɩ Gomɔrɩ tɩɩnɩ dɩm baŋa nɩ nɩnɛɛnɩ dʋa na nɩ te tɩn. 25 Wɛ dɛɛn tɔgɩ kʋntʋ mʋ DƖ ma cɔgɩ tɩɩnɩ dɩm kʋntʋ dɩdaanɩ je sɩm maama, kʋ wǝli dɩ balʋ maama na zʋʋrɩ tɩɩnɩ dɩm kʋntʋ nɩ tɩn dɩdaanɩ tɩga kam wǝǝnu tɩlʋ maama na nuŋi ka baŋa nɩ tɩn. 26 Lɔtɩ kaanɩ dɛɛn ma pipiri o nii o kwaga nɩ. O ma ji yɛ-kandwɛ-dɩdɔrɔ o zɩgɩ da.
27 Tɩga na pʋʋrɩ tɩn, Abraham ma goni tɩga o joori o vu o ya na zɩgɩ mɛ Baŋa-Wɛ yigə nɩ tɩn. 28 O ma guni o nii Sodɔm dɩ Gomɔrɩ tɩɩnɩ dɩm seeni. O ta ma nii bolo kʋm laŋa kam maama, yɩ o na nyʋ-zwənə mʋ na zɩgɩ je sɩm kʋntʋ nɩ ka zaŋɩ ka maa diini wɛyuu nɩ, ka nyɩ dɩdaanɩ nyʋa kalʋ na nuŋi min-lɔŋɔ wʋnɩ tɩn mʋ.
29 Wɛ na cɔgɩ tɩɩnɩ dɩm dɩ bolo kʋm maama tɩn, DƖ dɛɛn guli Abraham gulə yɩ DƖ vrɩ Lɔtɩ DƖ ja nuŋi cam dɩlʋ na cɔgɩ je sɩm kʋntʋ maama tɩn.
Lɔtɩ dɩ o bukwa bam taanɩ
30 Lɔtɩ dɩ o bukwa bale bam laan ma nuŋi Soarɩ tɩʋ kʋm nɩ ba vu ba jǝni pweeru tɩm wʋnɩ, bɛŋwaanɩ o dɛɛn kwarɩ sɩ o zʋ Soarɩ nɩ. Ba maa zʋʋrɩ piu bɔɔnɩ wʋnɩ. 31 Dɛ dɩdwɩ mʋ bukɔ-nakwɩn kam tagɩ dɩ balaŋa kam o wɩ: «Dɩbam ko wʋm kwɩn mʋ, yɩ baarʋ nan tǝrǝ yo sɩ o pəni dɩ dɩbam nɩnɛɛnɩ lʋgʋ baŋa nabiinǝ maama na yǝni ba kɩ te tɩn. 32 Kʋntʋ ŋwaanɩ, yagɩ sɩ dɩ́ pa dɩ́ ko wʋm nyɔ sana o bugi sɩ dɩ́ laan pəni dɩd-o, sɩ dɩ́ ko wʋm oó na dwi n saŋɩ o kwaga nɩ.»
33 Ba maa sɩɩnɩ ba pa ba ko wʋm nyɔ sana dɩntʋ tɩtɩɩ dɩm nɩ o su. Bukɔ-nakwɩn kam ma zʋ o pəni dɩd-o. O ko wʋm maa wʋ maanɩ o na zʋ o pəni dɩd-o naa o na zaŋɩ o nuŋi maŋa kalʋ tɩn.
34 Tɩga na pʋʋrɩ tɩn, bukɔ-nakwɩn kam ma ta dɩ balaŋa kam ka wɩ: «Amʋ diin pəni dɩdaanɩ dɩ́ ko mʋ. Yagɩ sɩ zɩm tɩtɩɩ dɩntʋ dɩ́ daa pa o nyɔ sana o bugi, sɩ nmʋ dɩ vu n pəni dɩd-o sɩ sɩ kʋ pa dɩ́ ko wʋm na bu o ma o tiŋi o dwi.» 35 Ba ma sɩɩnɩ ba pa ba ko wʋm nyɔ sana o su dɩntʋ tɩtɩɩ dɩm nɩ. Bukɔ-balaŋa kam dɩ ma vu o pəni dɩd-o, yɩ o ko wʋm ta wʋ maanɩ o na zʋ o pəni dɩd-o naa o na zaŋɩ o nuŋi maŋa kalʋ tɩn.