Vərə batɔ na tu Abraham tee nɩ te tɩn
18
Maŋa kalʋ Abraham dɛɛn na zʋʋrɩ Mamre tu-kamunnu tɩm təŋə nɩ tɩn, dɛ dɩdwɩ o maa je o vwe dɩm ni nɩ. Mʋ Baŋa-Wɛ tu DƖ vɩɩrɩ DƖ tɩtɩ dɩd-o. Maŋa kalʋ wɩa na bɩgɩ tɩn mʋ kʋntʋ. 2 Abraham ma kwǝni o yuu wɛɛnɩ yɩ o na nɔɔna batɔ na zɩgɩ ba twɛ dɩd-o. O na nɛ-ba tɩn, mʋ o kɩ lɩla o zaŋɩ o vwe dɩm ni nɩ o jeeri-ba yɩ o tiini o cɔɔlɩ o yibiyə tɩga nɩ o jɔɔnɩ-ba.a3 O maa wɩ: «Amʋ Yuutu, n yi na su amʋ, sɩ n yɩ kɛ n daarɩ-nɩ. 4 Sɛ sɩ a ja na fɩnfɩɩn a ba sɩ á ma á zarɩ á nɛ, sɩ á daarɩ á jǝni tiu kʋntʋ kuri nɩ á sin. 5 Yagɩ-na sɩ a lagɩ wʋdiu a pa abam sɩ á di sɩ á yɩra joori sɩ á laan taá kɛa. Kʋ za yɩ kʋntʋ ŋwaanɩ mʋ yɩ á da yo seeni.» Ba ma ləri ba wɩ: «Tɔ, kɩ nɩnɛɛnɩ nmʋ na tagɩ te tɩn.»
6 Abraham ma kɩ lɩla o yi Sara te vwe dɩm nɩ yɩ o wɩ: «Kɩ lɩla n kwe mun-bwe bwɛn sɩtɔ n viiri n ma n kɩ wʋdiu.» 7 O daa ta ma kɩ lɩla o zʋ o naanɩ dɩm wʋ o kuri na-pwala kalʋ na lamma tɩn, o ja o pa o tɩntʋŋna sɩ ba ma kɩ wʋdiu lɩla. 8 O ta ma kwe nayɩl-dɔa, dɩdaanɩ nayɩlɩ-kapwəŋə, dɩ wʋdiu kʋm o zɩgɩ ba yigə nɩ o pa-ba. Nɔɔna bam dɛɛn ma je ba di yɩ o zɩgɩ ba tee nɩ tiu kʋm kuri nɩ.
9 Ba ma bwe‑o ba wɩ: «N kaanɩ Sara wʋ yən mʋ?» O ma ləri o wɩ: «O wʋ vwe dɩm wʋnɩ.» 10 Ba dɩdʋa ma ta o wɩ: «Amʋ wʋ́ joori a ba nmʋ te bɩnɩ nɩ maŋa kantʋ wʋnɩ. Ka maŋa nɩ dɩ nmʋ kaanɩ Sara wʋ́ taa jɩgɩ o tɩtɩ bəkərə o jɩŋa nɩ.» Sara dɛɛn ya dalɩ vwe dɩm ni nɩ mʋ ba kwaga nɩ yɩ o cəgi ba taanɩ dɩm.
11 Abraham dɩ Sara dɛɛn ya maŋɩ ba kwɩn, ba bɩna yam gaalɩ. Sara dɛɛn kɛ bu-lʋrɩ. 12 Sara ma mwanɩ o tɩtɩ nɩ o wɩ: «Amʋ laan na kwɩn tɩntʋ yɩ amʋ digə tu wʋm dɩ tiini o kwɩn tɩn mʋ amʋ laan lagɩ a ni ywǝǝni dɩntʋ na?»
13 Baŋa-Wɛ ma bwe Abraham DƖ wɩ: «Bɛŋwaanɩ mʋ Sara mwanɩ yɩ o daarɩ o ta o wɩ: ‹A laan na kwɩn tɩntʋ tɩn, aá wanɩ a lʋ bu na?› 14 Woŋo wʋra kʋ na tiini kʋ camma sɩ amʋ Baŋa-Wɛ tʋŋɩ na?b Ka maŋa kam bɩnɩ na yiǝ, amʋ wʋ́ joori a ba nmʋ te, dɩdaanɩ Sara laan jɩgɩ o bəkərə o jɩŋa nɩ.»
15 Fʋʋnɩ ma ja Sara yɩ o fʋ o ni o wɩ: «Amʋ wʋ mwanɩ.» O dɩ maa wɩ: «Cɩga tɩn, n mwanɩ.»
Abraham na loori Wɛ Sodɔm ŋwaanɩ te tɩn
16 Nɔɔna bam ma zaŋɩ sɩ ba kɛ, yɩ ba laan kwəni ba yigə ba ba nii Sodɔm seeni. Abraham dɩ ma vu sɩ o yagɩ-ba cwǝŋǝ nɩ sɩ ba laan taa kɛa.
17 Baŋa-Wɛ ma ta DƖ wɩ: «A ba lagɩ a səgi a na bʋŋɩ sɩ a kɩ te tɩn yɩ Abraham yǝri kʋ ni nɩ. 18 Abraham dwi dɩm wʋ́ ji dwi kamunu kʋlʋ na dana tɩn mʋ. Amʋ wʋ́ da wʋntʋ baŋa nɩ mʋ a kɩ lʋgʋ kʋm baŋa tɩɩnɩ dɩm maama yu-yoŋo.c 19 Bɛŋwaanɩ, amʋ mʋ kur‑o, sɩ o brɩ o biə dɩ o sɔŋɔ kʋm maama na wʋ́ saŋɩ o kwaga nɩ tɩn, sɩ ba taa tɔgɩ Baŋa-Wɛ cwǝŋǝ kam ba daarɩ ba taa tʋŋɩ kʋlʋ na maŋɩ dɩ kʋlʋ na yɩ cɩga tɩn. Kʋntʋ mʋ wʋ́ pa amʋ Baŋa-Wɛ na goni ni sɩ a kɩ tɩte maama a pa‑o tɩn wanɩ kʋ tʋŋɩ cɩga cɩga.»
20 Baŋa-Wɛ laan ma ta DƖ wɩ: «Nɔɔna tiini ba keeri Sodɔm dɩ Gomɔrɩ ŋwaanɩ sɩ kʋ gaalɩ. Ba wo-lwaanʋ tɩtʋŋa dɩ ta maa tiini tɩ daga. 21 Kʋntʋ ŋwaanɩ mʋ amʋ lagɩ a vu sɩ a nii, ba tɩtʋŋa yam sɩɩnɩ ya yɩ balɔrɔ nɩnɛɛnɩ nɔɔna kərə kam na brɩ te tɩn na. Kʋ na daɩ kʋntʋ, amʋ wʋ́ lwarɩ kʋ ni nɩ.»
22 Nɔɔna bale bam ma pipiri ba kwe Sodɔm cwǝŋǝ kam ba maa kɛa. Abraham dɩ dɛɛn ma maŋɩ dáanɩ o zɩgɩ Baŋa-Wɛ yigə nɩ. 23 Abraham ma vaŋɩ o tɩtɩ o twɛ Baŋa-Wɛ yɩ o wɩ: «Kʋntʋ, nń cɔgɩ nɔn-ŋʋna tɩm maama mʋ n wǝli dɩ nɔn-balwaarʋ bam na? 24 Sɩ nɔn-ŋʋna na yi fiinnu yɩ ba wʋ tɩʋ kʋm nɩ, nń cɔgɩ kʋ maama n yagɩ mʋ na? N bá n yagɩ n ma n cɛ-ba nɔn-ŋʋna fiinnu balʋ na zʋʋrɩ kʋ wʋnɩ tɩn ŋwaanɩ na? 25 A ye sɩ nmʋ bá gʋ nɔn-ŋʋna dɩ nɔn-balwaarʋ n gwaanɩ daanɩ, yɩ kʋʋ́ taa nyɩ dɩ n pɛ nɔn-ŋʋna dɩ nɔn-balwaarʋ bam taa yɩ bɩdwɩ mʋ. Amʋ ye sɩ kʋ bá kɩ kʋntʋ! Nmʋ na yɩ wʋlʋ wʋm na di lʋgʋ baŋa maama sarɩya tɩn, nmʋ wʋ́ kɩ kʋlʋ na tɔgɩ cɩga cwǝŋǝ tɩn mʋ.»
26 Baŋa-Wɛ ma ta DƖ wɩ: «A na nɛ nɔn-ŋʋna Sodɔm tɩʋ kʋm nɩ sɩ ba yi nɔɔna fiinnu, amʋ wʋ́ da bantʋ ŋwaanɩ sɩ a yagɩ sɩ tɩʋ kʋm daa yɩ na cɔgɩm.»
27 Abraham daa ma ŋɔɔnɩ o wɩ: «Amʋ Yuutu, amʋ daɩ kʋlʋkʋlʋ nmʋ yigə nɩ. A nyɩ dɩ tɩɩrʋ dɩdaanɩ tɩntwarɩm mʋ. A laan nan nɛ baarɩ sɩ a ŋɔɔnɩ dɩ nmʋ. 28 Sɩ nɔn-ŋʋna bam na muri fiinnu kʋm dɩ nɔɔna banu, nń ta wɩ, nɔɔna banu bam na muri tɩn ŋwaanɩ sɩ n cɔgɩ tɩʋ kʋm maama na?» DƖ maa wɩ: «Amʋ za na nɛ nɔn-ŋʋna fiinna-banu da, a bá cɔgɩ-kʋ.»
29 Abraham daa ma ŋɔɔnɩ o wɩ: «Sɩ nɔɔna fiinna yɩranɩ mʋ na wʋra?» DƖ ma ləri DƖ wɩ: «Nɔɔna fiinna bam ŋwaanɩ amʋ bá cɔgɩ-kʋ.»
30 Abraham laan maa wɩ: «A loori-m, amʋ Yuutu, yɩ pa n bam zaŋɩ. Nan sɛ sɩ a ŋɔɔnɩ dɩ nmʋ. Sɩ nɔɔna fiintɔ yɩranɩ mʋ na wʋra?» DƖ ma ləri DƖ wɩ: «A na nɛ nɔn-ŋʋna fiintɔ je sɩm nɩ, a bá kɩ kʋlʋkʋlʋ.»
31 Abraham maa wɩ: «Nmʋ maŋɩ n pa a na baarɩ sɩ a ŋɔɔnɩ dɩ nmʋ. Yagɩ sɩ a bwe a nii, sɩ n na nɛ nɔɔna fiinle mʋ da?» DƖ ma ta DƖ wɩ: «Fiinle kʋm ŋwaanɩ, a bá cɔgɩ-kʋ.»
32 Abraham laan ma ta o wɩ: «A loori-m, amʋ Yuutu, yɩ pa n bam zaŋɩ, sɩ a lagɩ a ta ŋɔɔnɩ bɩdwɩ dɩntʋ yɩranɩ mʋ. Kʋ waɩ sɩ nɔɔna fugə mʋ wʋra?» Baŋa-Wɛ ma ləri DƖ wɩ: «Nɔɔna fugə kam kʋntʋ ŋwaanɩ, amʋ bá cɔgɩ-kʋ.»
33 Baŋa-Wɛ na ŋɔɔnɩ dɩdaanɩ Abraham DƖ ti kʋntʋ tɩn, DƖ ma viiri. Abraham dɩ ma joori sɔŋɔ.