Baŋa-Wɛ pɛ Abram ni-gonim maana
17
Abram dɛɛn na yi bɩna funʋgʋ-nʋgʋ tɩn mʋ Baŋa-Wɛ tu DƖ vɩɩrɩ DƖ tɩtɩ dɩd-o. DƖ maa wɩ: «Amʋ mʋ yɩ Dam-fɔrɔ Tu Wɛ dɩm.a Ta n sɛ a ni kʋntʋ, sɩ n yɩ ta n jɩgɩ kəm-balwaarʋ. 2 Amʋ maa wʋ́ pa ni-gonim dɩlʋ a dɩdaanɩ nmʋ na kɩ daanɩ tɩn zɩgɩ cɩga cɩga, yɩ a pa nmʋ dwi puli dɩ gaalɩ.»3 Abram ma vin o yibiyə tɩga nɩ o zuli Wɛ, yɩ Wɛ ta dɩd-o DƖ wɩ, 4 «Amʋ ni-gonim dɩm a na kɩ dɩ nmʋ tɩn mʋ tɩntʋ:
Nmʋ lagɩ n ji twi tiinə zanzan nabaarʋ mʋ. 5 Ba daa bá taa bǝi nmʋ nɩ Abram,b nmʋ yɩrɩ laan wʋ́ taa yɩ Abraham mʋ,c Bɛŋwaanɩ, a pɛ nmʋ ji dwi tiinə zanzan nabaarʋ mʋ. 6 Amʋ wʋ́ pa lʋra sɛ-m kʋ ja gaalɩ, a pa n lʋ dwi zanzan, n lʋ pwa zanzan. 7 A wʋ́ pa ni-gonim a na kɩ dɩ nmʋ tɩn zɩgɩ cɩga cɩga. Kʋ na yɩ nmʋ dwi dɩlʋ na wʋ́ saŋɩ n kwaga nɩ tɩn, ni-gonim dɩm kʋntʋ ta wʋ́ zɩgɩ kʋ pa-ba sɩ kʋ taa ve maŋa kalʋ na ba ti tɩn mʋ. Amʋ wʋ́ taa yɩ nmʋ Wɛ, dɩ n dwi dɩm dɩ Wɛ. 8 Kaanan tiinə tɩga kantʋ mɛ nmʋ ta na yɩ vəru tɩntʋ tɩn, mʋ amʋ lagɩ a kwe a pa nmʋ dɩ n dwi dɩm sɩ á taá te sɩ kʋ taa ve maŋa kalʋ na ba ti tɩn. Amʋ wʋ́ taa yɩ bantʋ dɩ Wɛ.»
9 Wɛ laan ma ta dɩ Abraham DƖ wɩ: «Kʋ na yɩ nmʋ, n maŋɩ sɩ n ta n jɩgɩ a ni dɩm mʋ, sɩ nmʋ dɩ n kwaga kam taá sɛ-dɩ maŋa maama. 10 A ni dɩm mʋ tɩntʋ a na goni dɩ nmʋ dɩ n kwaga kam maama tɩn. Ni-gonim dɩm kʋntʋ mʋ á nan maŋɩ sɩ á taá zɩgɩ dɩ wʋnɩ tɩn:
Abam wʋnɩ baarʋ maama, ba maŋɩ sɩ ba goni o pəni mʋ. 11 Abam maŋɩ sɩ á taá kɩ gonim mʋ á yɩra yam nɩ. Kʋntʋ mʋ wʋ́ taa yɩ maana yalʋ na brɩ nɩ dɩ́ kɩ ni-gonim daanɩ. 12 Nmʋ dwi nɩ sɩ kʋ taa ve maŋa maama, bəkərə wʋlʋ maama na wʋ á wʋnɩ yɩ o yi da nana, á maŋɩ sɩ á goni kʋ tu mʋ. Kʋ na yɩ gambɛ sɩlʋ ba na lʋgɩ á sam dɩm nɩ tɩn, dɩdaanɩ balʋ á na maŋɩ á yəgi dɩ səbu yɩ ba yɩ vərə tɩn, á maŋɩ sɩ á goni bəkəri maama mʋ. 13 Ba na lʋgɩ-ba á sam dɩm nɩ, naa á yəgi-ba dɩ səbu mʋ, kʋ maŋɩ sɩ á goni-ba mʋ. Tɩntʋ mʋ amʋ ni-gonim dɩm wʋ́ taa wʋ abam yɩra yam nɩ sɩ kʋ brɩ nɩ ni-gonim dɩm bá taa jɩgɩ kweelim. 14 Ba na wʋ goni baarʋ wʋlʋ maama, kʋ tu daa bá tɔgɩ o wǝli Yisɩrayɛlɩ dwi dɩm wʋnɩ, o na cɔgɩ amʋ ni-gonim dɩm tɩn ŋwaanɩ.»
15 Baŋa-Wɛ daa ma ta dɩ Abraham DƖ wɩ: «Kʋ daarɩ nmʋ kaanɩ Sarayi, daa n yɩ ta n bǝ-o nɩ Sarayi, o yɩrɩ laan yɩ Sara mʋ. 16 A lagɩ a kɩ o yu-yoŋo mʋ. A nan lagɩ a tɔgɩ wʋntʋ baŋa nɩ mʋ a pa nmʋ bəkərə. Amʋ wʋ́ kɩ o yu-yoŋo sɩ o taa yɩ dwi tiinə zanzan nu. Tɩɩnɩ zanzan pwa mʋ lagɩ ba nuŋi wʋntʋ wʋnɩ.»
17 Abraham daa ma vin o yibiyə tɩga nɩ. O ma mwanɩ yɩ o ta o wʋnɩ o wɩ: «Nɔɔnʋ na yi bɩna bi, o ta wʋ́ wanɩ o lʋ bu na? Kʋ wǝli da, Sara na yi bɩna funʋgʋ tɩn, o ta wʋ́ wanɩ o lʋ na?» 18 O laan ma ta o brɩ Wɛ o wɩ: «Nmʋ na maŋɩ n pa Ismayɛlɩ jɩgɩ yazurə yɩ nmʋ na kɩ zaanɩ n kɩ wʋntʋ yuu nɩ, kʋʋ́ taa daga kʋ paɩ amʋ.»
19 Baŋa-Wɛ ma ta dɩd-o DƖ wɩ: «Kʋ na wʋ́ taa yɩ te tɩn, n kaanɩ Sara mʋ wʋ́ lʋ bu o pa‑m, yɩ nń pa o yɩrɩ sɩ ‹Yizakɩ›. Amʋ wʋ́ pa ni-gonim dɩlʋ a na wʋ́ kɩ dɩd-o tɩn zɩgɩ cɩga cɩga mʋ sɩ kʋ taa ve maŋa kalʋ na ba ti tɩn. Dɩ nan ta wʋ́ taa wʋra dɩ paɩ o dwi dɩlʋ na wʋ́ saŋɩ o kwaga tɩn dɩ mʋ. 20 Kʋ nan na yɩ Ismayɛlɩ taanɩ dɩm, a ni n na tagɩ te tɩn. Amʋ wʋ́ kɩ wʋntʋ dɩ yu-yoŋo. Amʋ wʋ́ pa o dwi puli o na kɔgɔ zanzan.d Pwa fugǝ-bale mʋ wʋ́ taa wʋ ba wʋnɩ, yɩ ba ji dwi kamunu. 21 A ni-gonim dɩm mʋ a laan za wʋ́ pa dɩ zɩgɩ dɩdaanɩ Yizakɩ, wʋlʋ wʋm Sara na wʋ́ lʋ o pa‑m bɩnɩ nɩ maŋa kantʋ nɩ tɩn.» 22 Wɛ ma na ŋɔɔnɩ dɩdaanɩ Abraham DƖ ti tɩn, DƖ ma kɛ dáa o tee nɩ.
23 Dɩntʋ dɛ dɩm nɩ mʋ Abraham jaanɩ o bu Ismayɛlɩ kʋ wǝli dɩ gambɛ sɩlʋ ba na lʋgɩ o sɔŋɔ kʋm nɩ tɩn dɩ sɩlʋ o na yəgi dɩ o səbu tɩn maama, baara balʋ maama na zʋʋrɩ o sɔŋɔ kʋm nɩ tɩn o ja o nuŋi. O ma goni-ba, nɩnɛɛnɩ Wɛ na tagɩ te tɩn. 24 Abraham dɛɛn yɩ bɩna funʋgʋ-nʋgʋ mʋ o gwəŋə kam maŋa nɩ. 25 O bu Ismayɛlɩ dɩ maa jɩgɩ bɩna fugə-yatɔ mʋ. 26 Abraham dɩ o bu-baarʋ Ismayɛlɩ gwəŋə kam dɛɛn ya yɩ dɛ dɩdwɩ mʋ. 27 Abraham sɔŋɔ kʋm baara maama, kʋ na yɩ balʋ ba na lʋgɩ-ba dáanɩ, naa balʋ ba na yəgi vərə tee nɩ tɩn, ba dɩ goni-ba maama dɛ dɩntʋ dɛ dɩm nɩ mʋ.