Agaarɩ dɩdaanɩ Ismayɛlɩ taanɩ
16
Abram kaanɩ Sarayi dɛɛn nan ya wʋ lʋgɩ bu o pa‑o. O dɛɛn nan ya jɩgɩ tɩntʋŋ-kana mʋ, o na yɩ Ezipi tiinə bukɔ. Tɩntʋŋ-kana wʋm yɩrɩ dɛɛn mʋ yɩ Agaarɩ. 2 O na wʋ lʋgɩ tɩn ŋwaanɩ o ma ta dɩ o barʋ Abram o wɩ: «Baŋa-Wɛ cɩgɩ amʋ dɩ bu-lʋrɩ. Nan ve n pəni dɩ a tɩntʋŋ-kana wʋm, sɩ dɛdoŋ nɩ wʋm wʋ́ na bu yɩ kʋ ta yɩ an bu.» Abram ma sɛ Sarayi na tagɩ te tɩn.3 Ka maŋa kam nɩ, Abram dɛɛn zʋ Kanaan tɩʋ kʋm nɩ bɩna fugə mʋ. Sarayi ma kwe o tɩntʋŋ-kana Agaarɩ o pa‑o sɩ o ma o ji o kaanɩ. 4 O ma pəni dɩ Agaarɩ, yɩ o ja pugə. Agaarɩ ma na nɛ nɩ o jɩgɩ pugə tɩn, o daa maa ba nɩgɩ Sarayi. 5 Kʋ ma pa Sarayi ta dɩ Abram o wɩ: «A kwe a tɩntʋŋ-kana a kɩ n jɩŋa nɩ. O laan na nɛ nɩ o jɩgɩ pugə tɩn, o daa ba nɩgɩ amʋ. Amʋ yaara yantʋ maŋɩ sɩ ya ji nmʋ yaara. Baŋa-Wɛ mʋ wʋ́ di dɩbam bale taanɩ dɩntʋ.» 6 Abram ma lǝr-o o wɩ: «Wʋntʋ ta yɩ nmʋ tɩntʋŋ-kana mʋ, nmʋ mʋ te o jɩa dɩ o nɛ maama, sɩ n kɩ-o n wʋbʋŋa na lagɩ te tɩn.» O na tagɩ kʋntʋ tɩn, Sarayi ma puli sɩ o taa jɩgɩ Agaarɩ o yaara. Kʋ laan ma pa Agaarɩ duri o tee nɩ o daarɩ‑o.
7 Agaarɩ ma vu o zʋ kagʋa kam wʋnɩ o vu o yi buli-yi. Kʋ dɛɛn bwələ dɩ Suuri cwǝŋǝ kam mʋ. Baŋa-Wɛ malɛka kam laan ma ba o te, 8 yɩ ka wɩ: «Sarayi tɩntʋŋ-kana Agaarɩ, nmʋ nuŋi yən mʋ tɩntʋ, yɩ n nan ma n ve yən mʋ?» O ma ləri o wɩ: «A maa durǝ sɩ a lu a tu Sarayi jɩŋa nɩ mʋ.»
9 Malɛka kam laan ma ta dɩd-o ka wɩ: «Joori n vu n tu wʋm te n tu n tɩtɩ n sɛ-o. 10 Amʋ wʋ́ pa n dwi puli lanyɩranɩ sɩ nɔɔn-nɔɔnʋ bá wanɩ-ba o ga o ti.» 11 Malɛka kam ma ta dɩd-o ka wǝli da ka wɩ:
«Nmʋ laan zɩgɩ dɩ pugə mʋ tɩntʋ
sɩ n lʋ bəkərə.
Nmʋ nan wʋ́ pa o yɩrɩ nɩ ‹Ismayɛlɩ›, a
bɛŋwaanɩ, Baŋa-Wɛ ni n wʋ-cɔgɔ kʋm.
12 Oó taa yɩ nɩnɛɛnɩ bɩnaga kalʋ
ba na bá wanɩ ba ja-ka tɩn mʋ.
O bá taa lagɩ nɔn-dwi maama taanɩ,
yɩ nɔɔna maama dɩ bá taa lagɩ o taanɩ.
Wʋntʋ dɩ o cʋrrʋ wʋ́ taa culi daanɩ mʋ.»
13 Agaarɩ na ni malɛka kam kʋntʋ tɩn, o ma bʋŋɩ o tɩtɩ nɩ o wɩ: «Amʋ yiǝ sɩɩnɩ ya na Baŋa-Wɛ dɩlʋ na naɩ amʋ tɩn.» O ma kwe yɩrɩ dɩntʋ o pa Baŋa-Wɛ o wɩ: ‹Wɛ dɩlʋ na naɩ amʋ tɩn.» 14 Kʋntʋ ŋwaanɩ mʋ ba dɛɛn pɛ vʋlɩ dɩm kʋntʋ yɩrɩ ba wɩ: ‹Layi-Royi›.b Vʋlɩ dɩm zɩgɩ Kadɛsɩ dɩ Beredɩ tɩtarɩ laŋa nɩ mʋ.