Wɛ na goni ni dɩ Abram te tɩn
15
Kʋntʋ maama na kɩ kʋ kɛ tɩn, Baŋa-Wɛ ma vɩɩrɩ DƖ tɩtɩ DƖ pa Abram DƖ wɩ: «Abram, yɩ ta n kwarɩ fʋʋnɩ. Amʋ mʋ yɩ wʋlʋ na wʋ́ cɩ-m sɩ n yɩ na cɔgɩm, sɩ a daarɩ a pa nmʋ joŋi nyɔɔrɩ zanzan amʋ tee nɩ.»2 Abram ma ləri o wɩ: «Yuutu Baŋa-Wɛ, bɛ nyɔɔrɩ l lagɩ n pa amʋ? Nii, a ba jɩgɩ bu. Amʋ na tǝrǝ a daarɩ, Damasɩ tu Eliezɛrɩ mʋ wʋ́ joŋi a wǝǝnu tɩm maama o taa te. 3 Nmʋ na wʋ pɛ amʋ bu tɩn, amʋ sɔŋɔ gambaa mʋ laan wʋ́ joŋi-kʋ o taa te.»
4 Baŋa-Wɛ daa ma ta dɩd-o DƖ wɩ: «Eliezɛrɩ nan bá joŋi n sɔŋɔ kʋm, sɩ kʋ yɩ n bu-baarʋ wʋlʋ n na wʋ́ lʋ tɩn mʋ wʋ́ ba o joŋi-kʋ o taa te.» 5 Wɛ laan ma ja-o DƖ nuŋi pooni yɩ DƖ wɩ: «Kwǝni n yuu n nii wɛyuu nɩ sɩ n daarɩ n kwaanɩ n ga calɩcwɩ sɩm. Nń wanɩ n ga-sɩ n ti na?»a DƖ laan ma ta dɩd-o DƖ wɩ: «Nmʋ dwi dɩm na wʋ́ taa daga te tɩn mʋ kʋntʋ.»
6 Abram na nɛ kʋntʋ tɩn, o ma kɩ o wʋ-dɩdʋa dɩ Baŋa-Wɛ. Kʋntʋ ŋwaanɩ mʋ Wɛ pɛ o na cɩga DƖ tee nɩ.b
7 Wɛ ta ma ta dɩd-o DƖ wɩ: «Amʋ mʋ yɩ Baŋa-Wɛ, kʋ yɩ amʋ mʋ jaanɩ nmʋ a nuŋi Babilɔnɩc tiinə tɩʋ Uri nɩ a pa n ba yo seeni sɩ a pa‑m tɩga kantʋ sɩ n ta n te.»d 8 Abram ma bwe‑DƖ o wɩ: «Yuutu Baŋa-Wɛ, bɛ mʋ lagɩ kʋ brɩ amʋ nɩ amʋ wʋ́ sɩɩnɩ a ba a taa a te tɩga kam?»
9 Baŋa-Wɛ laan ma ta dɩd-o DƖ wɩ: «Nan ja nacwɛ, dɩ bʋcwɛ, dɩ pi-bɩa, tɩ maama na yɩ bɩna yatɔ yatɔ tɩn, sɩ n ta n ja kunkwǝŋ-pulə dɩ kunkwəŋ-poŋo n wǝli da n ja n ba.» 10 Abram ma ja vara bam kʋntʋ maama o ba Wɛ yigə nɩ, yɩ o cɛ tɩ maama yale yale, sɩ kʋ na yɩ zunə bam, o dɛɛn wʋ cɛ tɩntʋ. O laan ma tiŋi-tɩ pa cicoro maama pipiri kʋ jeeri kʋdoŋ kʋm. 11 Duurə ma ba sɩ ba di nwana yam kʋntʋ. Abram ma zəli-ba o yagɩ.
12 Kʋ na tu kʋ yi wa-zʋʋrɩ maŋa nɩ tɩn, mʋ dɔɔnɩ jaanɩ Abram. O dɔɔnɩ dɩm maŋa nɩ mʋ fʋʋnɩ kamunu jaan-o kʋ pa o bɩcarɩ baanɩ. 13 Baŋa-Wɛ ma ta dɩd-o DƖ wɩ: «Nan ta n ye lanyɩranɩ nɩ n dwi dɩm lagɩ ba ji vərə mʋ tɩʋ kʋdoŋ nɩ, yɩ kʋ daɩ ba tɩtɩ tɩʋ. Baá ji gambɛ mʋ yɩ nɔɔna bɛɛsɩ-ba bɩna biə-yana.e 14 Kʋ nan na yɩ tɩʋ kʋlʋ nɔɔna na bɛɛsɩ-ba tɩn, amʋ wʋ́ vaŋɩ ba zwa lanyɩranɩ. Kʋ kwaga nɩ mʋ a wʋ́ pa n biə bam ja jɩjɩgɩrʋ zanzan ba nuŋi tɩʋ kʋm kʋntʋ nɩ ba ja viiri.f 15 Sɩ kʋ na yɩ nmʋ tɩtɩ, amʋ wʋ́ pa n ta n ŋwɩ ŋwɩa dɩ yazurə mʋ sɩ n laan tɩ n kʋkwɩɩrʋ maŋa nɩ. 16 Zamaanɩ kuni bɩna laŋa nɩ mʋ, nmʋ dwi dɩm laan wʋ́ joori ba ba ba taa zʋʋrɩ yo. Kantʋ maŋa kam mʋ wʋ́ taa yɩ maŋa kalʋ Amɔɔrɩ tiinə bam kǝm-balwaarʋ na daga yɩ tɩ yi sɩ a vaŋɩ ba zwa tɩn. Maŋa kam ta wʋ yi sɩ a kɩ kʋntʋ.»
17 Wɛ na tu dɩ ba dɩ tʋ tɩn, jəgə kam ma tiini ka ji lim. Mim-farɩ na nyɩ nɩ yɔrɔ mim te tɩn dɩ dɩ nyʋa dɩ dɩ min-vʋgʋ da dɩ ba vara bam o na goni goni o tiŋi tɩn tɩtarɩ dɩ kɛ. 18 Dɩntʋ dɛ dɩm nɩ Baŋa-Wɛ ma goni ni dɩdaanɩ Abram yɩ DƖ wɩ: «Kʋ yɩ nmʋ dwi dɩm mʋ a na lagɩ a pa-ba tɩga kantʋ, ka na zɩgɩ Ezipi bugə kam laŋa nɩ, sɩ ka taa ve Efratɩ bu-fara kam seeni tɩn. 19 Kʋ yɩ Kɛnɩ tiinə tɩga kam, dɩ Kenizi tiinə bam, dɩ Kadɩmɔ tiinə bam, 20 dɩ Hɛtɩ tiinə bam, dɩ Perezi tiinə bam, dɩ Refayim tiinə bam, 21 dɩ Amɔɔrɩ tiinə bam, dɩ Kanan tiinə bam, dɩ Girgasɩ tiinə bam, dɩdaanɩ Yebusi tiinə bam maama tɩga kam mʋ kʋntʋ.»g