Abram na joŋi Lɔtɩ o yagɩ te tɩn
14
Kantʋ maŋa kam nɩ, pwa badonnǝ dɛɛn mʋ wʋra. Sinearɩa tɩʋ pɛ yɩrɩ mʋ Amrafɛlɩ. Elasarɩ tɩʋ pɛ yɩrɩ maa yɩ Aryɔkɩ. Elam tɩʋ pɛ yɩrɩ maa yɩ Kedɔrlaʋmɛrɩ. Kʋ daarɩ Goyimi tɩʋ pɛ yɩrɩ mʋ Tidealɩ. 2 Pwa bantʋ dɛɛn kɩ ni daanɩ mʋ sɩ ba vu ba zaŋɩ najara dɩ ba dʋna pwa dɩdaanɩ ba nɔɔna. Bantʋ maa yɩ Sodɔm tɩʋ pɛ Bera, dɩ Gomɔrɩ tɩʋ pɛ Birisa, dɩ Adema tɩʋ pɛ Sineabɩ, dɩdaanɩ Seboyim tɩʋ pɛ Semeyebɛrɩ, sɩ kʋ wǝli dɩ Bela tɩʋ pɛ wʋm, kʋ lagɩ kʋ ta nɩ Soarɩ tɩʋ kʋm pɛ. 3 Pwa bantʋ dɛɛn kɩ ni daanɩ mʋ ba jeeri Sidimi bolo kʋm nɩ. Zɩm je sɩntʋ mʋ yɩ Yɛ nɩnɩʋ kʋmb. 4 Bɩna fugə-yale wʋnɩ mʋ pɛ Kedɔrlaʋmɛrɩ te pwa bantʋ. Kʋ daarɩ, bɩna fugə-yatɔ bɩnɩ dɩm nɩ ba ma lɔ o kwaga nɩ.5 Bɩna fugə-yana bɩnɩ dɩm nɩ Kedɔrlaʋmɛrɩ dɩ pwa balʋ na wʋ o kwaga nɩ tɩn laan ma vu Asterɔtɩ-Karnayimi ba kɩ najara ba wanɩ Refayim tiinə bam. Ba dɛɛn ta ma vu Hamɩ ba wanɩ Zuzimi tiinə bam ba di-ba, yɩ ba daarɩ ba wanɩ Emimi tiinə bam na wʋ Save-Kiryatayim nɩ tɩn. 6 Ba ma daarɩ ba wanɩ Hori tiinə bam na wʋ Seyiric nɩ pweeru laŋa kam nɩ tɩn. Ba ma zəli-ba taan ba vu ba yi El-paran na bwələ dɩ kagʋa kam je sɩm tɩn. 7 Ba ma pipiri ba joori ba vu ba yi Eyin-Mispata, kʋ yɩ Kadɛsɩ tɩʋ kʋm mʋ kʋntʋ. Ba ma ja najara ba wanɩ Amalɛkɩ tiinə bam dɩ ba tɩɩnɩ dɩm maama, kʋ wǝli dɩ Amɔɔrɩ tiinə bam ba na zʋʋrɩ Hasason-Tamarɩ nɩ tɩn.
8 Kantʋ maŋa kam nɩ mʋ Sodɔm pɛ, dɩ Gomɔrɩ pɛ, dɩ Adma pɛ, dɩ Tisoboyimi pɛ, dɩ Bela pɛ, kʋ lagɩ kʋ ta nɩ Soarɩ tɩʋ kʋm pɛ, nuŋi ba kɩ daanɩ sɩ ba zaŋɩ najara dɩ pwa badonnǝ bam Sidimi bolo kʋm nɩ. 9 Pwa banu bantʋ dɛɛn mʋ zaŋɩ najara dɩ pwa bana. Kʋ maa yɩ Elam pɛ Kedɔrlaʋmɛrɩ, dɩ Goyimi pɛ Tidealɩ, dɩ Sinearɩ pɛ Amrafɛlɩ, dɩdaanɩ Elasarɩ pɛ Aryɔkɩ mʋ nuŋi sɩ ba ja dɩdaanɩ-ba.
10 Gwǝǝnu zanzan dɛɛn maa wʋ je sɩm kʋntʋ nɩ yɩ kʋtaalɩ wʋ tɩ wʋnɩ. Kʋ ma pa Sodɔm dɩ Gomɔrɩ pwa bam dɩ ba najar-kərə bam na duri sɩ ba lu najara yam nɩ tɩn, ba badaara ma vu ba tʋ gwəənu tɩm wʋnɩ. Ba badonnǝ ma duri ba vu ba yi pweeru laŋa sɩ ba lu. 11 Pwa bana bam laan ma vrɩ Sodɔm dɩ Gomɔrɩ tiinə jɩjaanʋ tɩm maama dɩ ba wʋdiiru maama ba ja ba viiri. 12 Abram cʋrʋ bu Lɔtɩ dɛɛn na zʋʋrɩ Sodɔm nɩ tɩn, ba ma ja-o ba wǝli da ba viiri, dɩ o jɩjɩgɩrʋ tɩm maama.
13 Nɔɔnʋ wʋdoŋ dɛɛn ma wanɩ o lu najara yam nɩ. O ma vu Ebru tu Abram te o ta o brɩ-o kʋlʋ maama na kɩ tɩn. Ka maŋa kam nɩ o dɛɛn zʋʋrɩ o twɛ dɩ tu-kamunnu tɩm na yɩ Amɔɔrɩ tu Mamre nyɩm tɩn mʋ. Mamre wʋm cʋrrʋ dɛɛn mʋ yɩ Ɛskɔlɩ dɩ Anɛrɩ, yɩ ba dɛɛn sɔɔlɩ mʋ ba di ciloŋo dɩ Abram. 14 Abram na lwarɩ nɩ pwa bana bam jaanɩ o cʋrʋ Lɔtɩ ba wǝli da tɩn, o ma bəŋi najar-kərə biə-yatɔ dɩ fugə-nana (318) ba na lʋgɩ-ba o sɔŋɔ nɩ tɩn. Ba ma zəli pwa bam ba vu ba yi Dan nɩ. 15 Tɩtɩɩ nɩ Abram ma pɔɔrɩ o nɔɔna bam kɔgɔ kɔgɔ sɩ ba ja dɩdaanɩ o dʋna bam yɩ o wanɩ-ba. O ma zəli-ba o vu o yi Hoba na wʋ Damasɩ baŋa nɩ tɩn. 16 O ma joori o joŋi jɩjaanʋ tɩm maama yɩ o daarɩ o vrɩ o cʋrʋ bu Lɔtɩ dɩ o jɩjɩgɩrʋ tɩm maama ba jɩŋa nɩ o ja o joori, kʋ wǝli dɩ kaana bam dɩdaanɩ nɔɔna bam maama.
Mɛlɩkisedɛkɩ na warɩ Wɛ sɩ DƖ kɩ Abram yu-yoŋo te tɩn
17 Abram na wanɩ Kedɔrlaʋmɛrɩ dɩ o pwa badonnǝ bam yɩ o joori tɩn mʋ Sodɔm Pɛ nuŋi o jeer-o Save bolo kʋm nɩ. Ba ta bə-kʋ sɩ ‹Pɛ bolo kʋm›.
18 Mɛlɩkisedɛkɩ dɛɛn maa yɩ Salɛmd tiinə Pɛ. O ta maa kwǝri o yɩ Yuutu Baŋa-Wɛ dɩm kaanɩm tu mʋ. O ma ja dɩpɛ dɩ dɩvɛn o ba o pa Abram. 19 O dɛɛn ta ma warɩ Wɛ o pa Abram o wɩ:
«Yuutu Baŋa-Wɛ dɩm na kɩ wɛyuu dɩ tɩga baŋa tɩn
wʋ́ kɩ nmʋ yu-yoŋo.
20 Yuutu Baŋa-Wɛdɩm yɔɔrɩ DƖ maŋɩ dɩ tiə,
DƖ na wanɩ nmʋ dʋna bam
DƖ kɩ-ba nmʋ jɩŋa nɩ tɩn ŋwaanɩ.»e
Abram laan ma pɔɔrɩ jɩjɩgɩrʋ tɩm o na jaanɩ o joori jara yam je nɩ tɩn maama kuni fugə, yɩ o pa Mɛlɩkisedɛkɩ pɔɔrɩm dɩdʋa.f
21 Sodɔm Pɛ dɛɛn ma ta dɩ Abram o wɩ: «Pa-nɩ a nɔɔn-biə bam maama sɩ n daarɩ jɩjɩgɩrʋ tɩm n ta n jɩga.» 22 Abram ma ləri Sodɔm Pɛ wʋm o wɩ: «Amʋ du durə dɩ Yuutu Baŋa-Wɛ dɩm, DƖ na kɩ wɛyuu dɩ tɩga baŋa tɩn nɩ, 23 amʋ sɩɩnɩ a bá joŋi kʋlʋkʋlʋ na yɩ nmʋ nyɩm tɩn. A bá sɛ a joŋi nmʋ woŋo fɩnfɩɩn dɩ, kʋ na maŋɩ kʋ yɩ n gar-ŋʋna, naa n natrɩ-ŋʋna dɩ, bɛŋwaanɩ, a ba lagɩ sɩ maŋa wʋdoŋ nɩ sɩ nmʋ brɩ n tɩtɩ n ta n wɩ, nmʋ mʋ pɛ amʋ ji nadum. 24 Amʋ bá sɛ a joŋi kʋlʋkʋlʋ n tee nɩ kʋ na daɩ wʋdiiru tɩlʋ yɩranɩ a nɔɔna bam na di tɩn. Kʋ daarɩ, Anɛrɩ dɩ Ɛskɔlɩ dɩdaanɩ Mamre maŋɩ sɩ ba joŋi ba tɩtɩ pɔɔrɩm mʋ, bantʋ dɩ na tɔgɩ ba wǝli amʋ yɩ dɩ́ kɩ najara yam tɩn ŋwaanɩ.»