Abram dɩ Lɔtɩ na pwɛ daanɩ te tɩn
13
Abram dɩ o kaanɩ dɛɛn ma ja ba jɩjɩgɩrʋ tɩm maama ba nuŋi Ezipi tɩʋ nɩ. Ba ma kwe cwǝŋǝ ba vu baŋa seeni ba vu ba yi kagʋa kalʋ yɩrɩ na yɩ Negɛbɩ tɩn. Lɔtɩ dɩ ma tɔgɩ dɩd-o o kɛ. 2 Abram dɛɛn ma tiini o duni dɩ vara dwi dwi, yɩ o ta jɩgɩ səbu dɩdaanɩ səbu-sɩŋa wǝǝnu zanzan.3 O na zɩgɩ kagʋa kam seeni tɩn, Abram dɛɛn yǝni o kaagɩ o ve mʋ, o zɩgɩ jǝgǝ dɩdʋa o vu jǝgǝ wʋdoŋ nɩ. O kɩ kʋntʋ mʋ taan o vu o yi Betɛlɩ dɩ Ayi tɩtarɩ laŋa nɩ. Dáanɩ mʋ o ya na maŋɩ o pu o vwe da 4 yɩ o ya lɔgɩ kaanɩm bimbim da tɩn.a Abram ma bəŋi Baŋa-Wɛ yɩrɩ o zuli‑DƖ dáanɩ.
5 Lɔtɩ dɩ dɛɛn na tɔgɩ dɩ Abram tɩn, dɩ ya jɩgɩ peeni, dɩ bʋnɩ, dɩ naanɩ, kʋ wǝli dɩ tɩntʋŋna dɩ ba vwə. 6 Ba na zʋʋrɩ daanɩ kʋntʋ tɩn, tɩga kam ya daa ba daga ka pa-ba, ba vara bam na tiini ba gaalɩ tɩn ŋwaanɩ. Ba daa warɩ sɩ ba taa zʋʋrɩ daanɩ jǝgǝ dɩdʋa. 7 Abram nayɩra bam dɩ Lɔtɩ nayɩra bam dɛɛn ma magɩ ni-kantɔgɔ daanɩ. Maŋa kam kʋntʋ nɩ mʋ Kanaan tiinə bam dɩ Perezi tiinə bam ya daa ta zʋʋrɩ je sɩm kʋntʋ nɩ.
8 Abram laan ma ta dɩ Lɔtɩ o wɩ: «Dɩbam yɩ cʋrrʋ mʋ. Kʋ wʋ maŋɩ sɩ najara wʋ dɩbam laŋa nɩ, kʋ wʋ maŋɩ sɩ ya wʋ amʋ nayɩra bam dɩ nmʋ nayɩra bam laŋa nɩ. 9 Tɩga kam na tigi nmʋ yigə nɩ daga zanzan. Kʋ daɩ cɩga na? Nan pa dɩ́ pwɛ cwe. Nmʋ na ve jagwiə seeni, amʋ wʋ́ vu jazɩm seeni. Kʋ daarɩ, nmʋ nan na ve jazɩm, amʋ wʋ́ vu jagwiə seeni.»
10 Lɔtɩ dɛɛn ma kwǝni o yuu o nii o na Zʋrdɛn bolo kʋm sɩ kʋ taa ve Soarɩ seeni tɩn. O ma maanɩ wɩ tɩga kam tiini ka jɩgɩ na nɩnɛɛnɩ Baŋa-Wɛ tɩtɩ tweeru kara kam mʋ. Ka ta maa yɩ tɩ-ywəŋə nɩnɛɛnɩ Ezipi tɩga kam na yɩ te tɩn. Maŋa kam kʋntʋ nɩ Baŋa-Wɛ dɛɛn ta wʋ cɔgɩ Sodɔm dɩ Gomɔrɩ tɩɩnɩ dɩm.b 11 Lɔtɩ ma nii o kuri Zʋrdɛn bolo kʋm kʋntʋ maama o pa o tɩtɩ. O ma zaŋɩ o kwe cwǝŋǝ o ma yɔɔrɩ wa-puli je sɩm nɩ. Mʋ ba na pwɛ daaanɩ tɩte. 12 Abram dɛɛn maŋɩ Kanaan tɩʋ kʋm nɩ, kʋ daarɩ Lɔtɩ vu o zʋʋrɩ tɩɩnɩ dɩlʋ na wʋ bolo kʋm nɩ tɩn tɩtarɩ nɩ. O ma vu o twɛ Sodɔm o ja o vwe dɩm o vu o pu je sɩm kʋntʋ nɩ. 13 Sodɔm tiinə bam dɛɛn maa tiini ba jɩgɩ pu-sɩŋa yɩ ba tʋŋɩ lwarɩm Baŋa-Wɛ yigə nɩ pa kʋ gaalɩ.
Baŋa-Wɛ na goni ni DƖ pa Abram te tɩn
14 Lɔtɩ na kɛ o daarɩ tɩn, mʋ Baŋa-Wɛ dɛɛn ma ta dɩ Abram DƖ wɩ: «Zɩgɩ n na wʋ mɛ tɩn sɩ n kwǝni n yuu n nii je sɩm maama, n yigə nɩ, dɩ n kwaga nɩ, kʋ wǝli dɩ n jazɩm dɩ n jagwiə. 15 A lagɩ a pa nmʋ dɩ n dwi dɩm tɩga kam kʋntʋ maama mʋ, sɩ á taá te maŋa maama. 16 Amʋ wʋ́ pa n dwi dɩm taa daga zanzan nɩnɛɛnɩ lʋgʋ baŋa kasʋlʋ kʋm na daga te tɩn. Nɔɔn-nɔɔnʋ bá wanɩ nmʋ dwi dɩm o ga o ti. 17 Nan zaŋɩ n ta n ve n kaarɩ tɩga kam maama n nii ka na dwara te tɩn dɩdaanɩ ka na yalma te maama tɩn, bɛŋwaanɩ, a lagɩ a kwe ka maama mʋ a pa‑m sɩ n ta n te.»
18 Abram ma zaŋɩ dáanɩ dɩ o nɔɔna bam maama yɩ o laan vu Ebrɔn seeni o zʋʋrɩ Mamre tu-kamunnu tɩm na wʋ mɛ tɩn. O ma lɔ kaanɩm bimbim dáanɩ sɩ o ma zuli Baŋa-Wɛ.