Wɛ na bəŋi Abram te tɩn
12
Baŋa-Wɛ ma ta dɩ Abram DƖ wɩ: «Yagɩ n tɩʋ kʋm, dɩ n cʋrrʋ tɩm, dɩ n ko sɔŋɔ tiinə bam maama, sɩ n daarɩ n vu tɩga kalʋ amʋ na wʋ́ brɩ-m tɩn.2 Amʋ wʋ́ kɩ nmʋ yu-yoŋo,
yɩ a pa n dwi tiinə ji dwi kamunu.
Amʋ wʋ́ pa n yɩrɩ dɩm zaŋɩ dɩ taa yɩ yɩrɩ kamunu.
Nń pa nɔɔna na yu-yoŋo amʋ tee nɩ.a
3 Balʋ maama na wʋ́ kɩ nmʋ lanyɩranɩ tɩn,
amʋ dɩ wʋ́ kɩ ba yu-yoŋo.
Wʋlʋ maama nan na wʋ́ sɔɔlɩ lwarɩm o yagɩ nmʋ yɩra nɩ tɩn,
amʋ dɩ wʋ́ sɔɔlɩ lwarɩm a yagɩ kʋ tu dɩ baŋa nɩ.
Amʋ nan wʋ́ da nmʋ baŋa nɩ mʋ
a kɩ lʋgʋ baŋa dwi maama yu-yoŋo.»
4 Abram ma nuŋi Haran tɩʋ kʋm nɩ sɩ o vu jǝgǝ wʋdoŋ, nɩnɛɛnɩ Baŋa-Wɛ na tag-o sɩ o kɩ te tɩn. O dɛɛn jɩgɩ bɩna fusɩrpɛ-yanu mʋ. O cʋrʋ bu Lɔtɩ dɩ ma tɔgɩ o vu. 5 O ma ja o kaanɩ Sarayi o wǝli da, dɩdaanɩ Lɔtɩ. O ta ma kwe jɩjɩgɩrʋ tɩlʋ maama o na nɛa Haran nɩ tɩn, dɩ nɔɔna balʋ maama na tʋŋa ba pa‑o tɩn o ja nuŋi o maa viirǝ. Ba dɛɛn kwe cwǝŋǝ mʋ ba maa ve Kanaan tɩʋ kʋm.
Ba na vu ba yi da tɩn, 6 Abram maa ve lʋgʋ kʋm nɩ taan o vu o yi tu-kamunu kʋdoŋ ba na bəi sɩ More tiu tɩn na wʋ Sishɛm nɩ tɩn. Maŋa kam kʋntʋ nɩ, Kanaan tiinə bam dɛɛn mʋ ta zʋʋrɩ je sɩm kʋntʋ nɩ. 7 Abram na wʋra kʋntʋ tɩn, Baŋa-Wɛ ma ba o te DƖ wɩ: «A lagɩ a kwe tɩga kantʋ mʋ a pa n dwi dɩm sɩ ba taa te.»b O ma lɔgɩ kaanɩm bimbim dáanɩ sɩ o ma zuli Baŋa-Wɛ, o na tu o te tɩn ŋwaanɩ.
8 O ma zɩgɩ dáanɩ o vu pweeru laŋa na wʋ Betɛlɩ wa-puli seeni tɩn. O laan ma pu o vwe da. Ayi dɩ Betɛlɩ tɩtarɩ nɩ mʋ kʋntʋ. Betɛlɩ dɛɛn wʋ wa-zʋʋrɩ je nɩ mʋ, Ayi dɩ maa wʋ wa-puli je nɩ. O ma lɔ kaanɩm bimbim o pa Baŋa-Wɛ yɩ o zuli DƖ yɩrɩ.
9 Abram maa daa zaŋɩ dáanɩ o veə yɩ o zɩga, o veə o maa yɔɔrɩ Negɛbɩ seeni.
Abram na ve Ezipi te tɩn
10 Kana dɛɛn tiini ka tʋ tɩʋ kʋm nɩ. Abram ma zaŋɩ o vu Ezipi sɩ o taa zʋʋrɩ da maŋa fɩnfɩɩn sɩ kana yɩ ja-ba ka gʋ. 11 Ba na twɛ Ezipi sɩ ba zʋ tɩʋ kʋm tɩn, o ma ta dɩ o kaanɩ Sarayi o wɩ: «Nmʋ sɩɩnɩ n yɩ kaanɩ wʋlʋ na tiini o lamma tɩn mʋ. 12 Kʋntʋ tɩn, Ezipi tɩʋ tiinə bam na nɛ‑m, baá ta wɩ: ‹O kaanɩ wʋm mʋ tɩntʋ.› Ba laan maa wʋ́ ja-nɩ ba gʋ ba daarɩ nmʋ sɩ n ta n wʋra. 13 Nan ta n brɩ-ba nɩnɛɛnɩ n yɩ a nakɔ mʋ, sɩ ba tɔgɩ nmʋ ŋwaanɩ ba kɩ-nɩ lanyɩranɩ, ba daarɩ ba yagɩ a ŋwɩa kam ba pa-nɩ.»c
14 Abram na ve o yi Ezipi tɩʋ kʋm tɩn, Ezipi tiinə bam ma na nɩ o kaanɩ wʋm tiini o lamma. 15 Tɩʋ kʋm nakwa na nɛ‑o tɩn, ba ma tiini ba tee‑o ba Pa-farʋ wʋm yigə nɩ. O ma pa ba ja-o ba zʋ pɛ sɔŋɔ kʋm wʋnɩ. 16 O ma da Sarayi ŋwaanɩ o kɩ Abram lanyɩranɩ. O ma pa Abram na peeni dɩ bʋnɩ dɩ naanɩ dɩ bɩnabɛ dɩdaanɩ bɩna-niinə. O ma kwǝri o na tɩntʋŋ-baara dɩ tɩntʋŋ-kana, dɩdaanɩ yogondə.
17 Baŋa-Wɛ nan pɛ yawɩ-cɛɛrʋ zʋ Pa-farʋ wʋm dɩ o sɔŋɔ tiinə yɩra nɩ. Kʋ maa yɩ Pɛ wʋm na jɩgɩ Abram kaanɩ Sarayi ŋwaanɩ tɩn mʋ ba nɛ cam dɩm kʋntʋ. 18 Pɛ wʋm ma bəŋi Abram yɩ o bwe‑o o wɩ: «Bɛɛ mʋ yɩ nmʋ kɩ-nɩ kʋntʋ? Bɛŋwaanɩ mʋ yɩ n wʋ tagɩ n brɩ amʋ nɩ wʋntʋ yɩ nmʋ kaanɩ mʋ? 19 Bɛɛ mʋ yɩ n ta n wɩ, o yɩ n nakɔ, n pa a ja‑o sɩ o taa yɩ a kaanɩ? N kɩ cɩga na? Kʋntʋ, nii n kaanɩ wʋm. Ja-o sɩ á viiri!» 20 Pa-farʋ wʋm ma pa o nɔɔna bam ni sɩ ba zəli Abram, dɩ o kaanɩ wʋm, dɩ kʋlʋ maama o dɛɛn na jɩgɩ tɩn sɩ ba viiri.