Babɛlɩ di-dɩdɔrɔ kʋm
11
Pulim nɩ tɩn, nabiinǝ bam maama dɛɛn jɩgɩ taanɩ dɩdwɩ mʋ ba ŋɔɔna. Ba bɩtarbiǝ dɛɛn daɩ yɩra yɩra. 2 Kʋ na kɩ fɩɩn tɩn mʋ nɔɔna badonnǝ nuŋi wa-puli je sɩm nɩ ba beeria ba vu ba yi Sinearɩb laŋa kam. Ba ma jǝni ba lɔ sam kʋ tɩ-kamparɩ je nɩ. 3 Nɔɔna bam ma ta daanɩ ba wɩ: «Pa-na dɩ́ magɩ-na wara dɩ́ fuli-ya sɩ ya taa dana.» Ba ma sɩɩnɩ ba kɩ kʋntʋ. Ba dɛɛn mɛ wara yam ba ji kandwa ba ma lɔ ba sam yɩ ba ma kʋtaalɩ sɩ kʋ taa yɩ tɩ-lɛɛrʋ kʋ pa-ba. 4 Ba ma daarɩ ba wɩ: «Pa-na dɩ́ kɩ ni daanɩ sɩ dɩ́ lɔ tɩʋ kamunu yɩ dɩ́ lɔ di-dɩdɔrɔ kʋlʋ yuu na wʋ́ di wɛ-wɛ kʋ twɛ wɛyuu tɩn. Kʋ na kɩ kʋntʋ, dɩ́ wʋ́ na yɩrɩ dɩ́ pa dɩ́ tɩtɩ, yɩ dɩ́ bá jagɩ tɩga baŋa je maama nɩ.»5 Baŋa-Wɛ ma tu DƖ ba sɩ DƖ nii tɩʋ kʋlʋ nabiinǝ bam na lɔgɩ tɩn dɩ kʋ di-dɩdɔrɔ kʋm. 6 DƖ ma ta DƖ tɩtɩ nɩ DƖ wɩ: «Nii nɔɔna bantʋ na garɩ ba puli sɩ ba taa tʋŋɩ te! Ba nan na yɩ dwi dɩdʋa yɩ ba ta ŋɔɔnɩ taanɩ dɩdwɩ tɩn mʋ pa kʋ yɩ kʋntʋ. Kʋ na lagɩ kʋ taa yɩ tɩntʋ, kʋ bá dáanɩ yɩ ba wanɩ ba tʋŋɩ kʋlʋ maama ba na lagɩ tɩn. 7 Pa-na sɩ dɩ́ vu dɩ́ yi ba te dɩ́ vugimi ba taanɩ dɩm sɩ ba daa yɩ taa ni da-taanɩ kuri.»
8 Baŋa-Wɛ dɛɛn ma sɩɩnɩ DƖ pa ba jagɩ tɩga baŋa je maama nɩ. Ba ma kwe ba tɩʋ kʋm lɔɔm dɩm ba yagɩ. 9 Kʋ laan ma pa ba bəŋi tɩʋ kʋm kʋntʋ yɩrɩ ba wɩ Babɛlɩ, bɛŋwaanɩ, dáanɩ mʋ Wɛ dɛɛn vugimi nabiinǝ taanɩ dɩm yɩ DƖ daarɩ DƖ pa ba zɩgɩ dáanɩ ba jagɩ ba vu tɩga kam baŋa je maama nɩ.c
Sem dwi dɩm taanɩd
10 Sem dwi dɩm taanɩ mʋ tɩntʋ: Sem dɛɛn na yi bɩna bi tɩn mʋ o lʋgɩ Arapazadɩ. Na-fara kam na kɛ kʋ jɩgɩ bɩna yale kʋ kɩ kʋntʋ. 11 Arapazadɩ lʋra kam kwaga nɩ, Sem daa ta ma na bɩna biə-yanu, yɩ o lʋ biə badonnǝ o wǝli da, bəkəri dɩdaanɩ bɩsankam.
12 Arapazadɩ dɛɛn na yi bɩna fiintɔ-yanu tɩn mʋ o lʋgɩ Swela. 13 Swela lʋra kam kwaga nɩ, Arapazadɩ daa ta ma na bɩna biə-yana dɩ yatɔ (403), yɩ o lʋ biə badonnǝ o wǝli da, bəkəri dɩdaanɩ bɩsankam.
14 Swela dɛɛn na yi bɩna fiintɔ tɩn mʋ o lʋgɩ Hebɛrɩ. 15 Hebɛrɩ lʋra kam kwaga nɩ, Swela daa ta ma na bɩna biə-yana dɩ yatɔ, yɩ o lʋ biə badonnǝ o wǝli da, bəkəri dɩdaanɩ bɩsankam.
16 Hebɛrɩ dɛɛn na yi bɩna fiintɔ-yana tɩn mʋ o lʋgɩ Pelɛgɩ. 17 Pelɛgɩ lʋra kam kwaga nɩ, Hebɛrɩ daa ta ma na bɩna biə-yana dɩ fiintɔ, yɩ o lʋ biə badonnǝ o wǝli da, bəkəri dɩdaanɩ bɩsankam.
18 Pelɛgɩ dɛɛn na yi bɩna fiintɔ tɩn mʋ o lʋgɩ Rehu. 19 Rehu lʋra kam kwaga nɩ, Pelɛgɩ daa ta ma na bɩna biə-yale dɩ nʋgʋ, yɩ o lʋ biə badonnǝ o wǝli da, bəkəri dɩdaanɩ bɩsankam.
20 Rehu dɛɛn na yi bɩna fiintɔ-yale tɩn mʋ o lʋgɩ Serugi. 21 Serugi lʋra kam kwaga nɩ, Rehu daa ta ma na bɩna biə-yale dɩ yarpɛ, yɩ o lʋ biə badonnǝ o wǝli da, bəkəri dɩdaanɩ bɩsankam.
22 Serugi dɛɛn na yi bɩna fiintɔ tɩn mʋ o lʋgɩ Nahɔrɩ. 23 Nahɔrɩ lʋra kam kwaga nɩ, Serugi daa ta ma na bɩna biə-yale, yɩ o lʋ biə badonnǝ o wǝli da, bəkəri dɩdaanɩ bɩsankam.
24 Nahɔrɩ dɛɛn na yi bɩna fiinle-nʋgʋ tɩn mʋ o lʋgɩ Tera. 25 Tera lʋra kam kwaga nɩ, Nahɔrɩ daa ta ma na bɩna bi dɩ fugə-nʋgʋ, yɩ o lʋ biə badonnǝ o wǝli da, bəkəri dɩdaanɩ bɩsankam.
26 Tera dɛɛn na yi bɩna fusɩrpɛ tɩn mʋ o lʋgɩ Abram, yɩ o daarɩ o lʋ Nahɔrɩ dɩ Haran.
Tera dwi dɩm taanɩ
27 Tera dwi dɩm taanɩ mʋ tɩntʋ: Tera dɛɛn ma lʋ Abram, dɩ Nahɔrɩ, dɩdaanɩ Haran. Haran ma lʋ Lɔtɩ. 28 Tera dɛɛn lʋgɩ o biə bam Babilɔnɩ tiinə tɩʋ kʋlʋ yɩrɩ na yɩ Uri tɩn nɩ mʋ. Haran dɛɛn ma loori yigə o tɩ dáanɩ, yɩ o ko Tera ta ŋwɩ. 29 Abram dɩ Nahɔrɩ dɛɛn maa di ba kaana. Abram kaanɩ wʋm yɩrɩ dɛɛn mʋ yɩ Sarayi. Nahɔrɩ kaanɩ wʋm yɩrɩ dɛɛn maa yɩ Milka. Milka dɛɛn yɩ Haran bukɔ mʋ yɩ o daarɩ o yɩ Yiska nakɔ. 30 Sarayi dɛɛn yɩ ka-dʋgʋ mʋ. O ya wʋ wanɩ biə o lʋ.
31 Tera dɛɛn ma zaŋɩ Babilɔnɩ tiinə tɩʋ Uri nɩ sɩ o vu Kanan tɩʋ kʋm. O ma ja o bu Abram, dɩ o naa Lɔtɩ wʋlʋ na yɩ Haran bu tɩn, kʋ wǝli dɩ Abram kaanɩ Sarayi, yɩ o zaŋɩ o maa kɛa. Ba maama ma vu ba yi Haran tɩʋ ba zʋʋrɩ da (yɩ ba ta wʋ yi Kanaan).
32 Tera dɛɛn ŋwɩ mʋ taan o yi bɩna biə-yale dɩ yanu (205), yɩ o laan tɩ Haran tɩʋ kʋm nɩ.